| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. কণ্টকসুত্তং
2. Kaṇṭakasuttaṃ
৭২. একং সমযং ভগৰা ৰেসালিযং ৰিহরতি মহাৰনে কূটাগারসালাযং সম্বহুলেহি অভিঞ্ঞাতেহি অভিঞ্ঞাতেহি থেরেহি সাৰকেহি সদ্ধিং – আযস্মতা চ চালেন 1, আযস্মতা চ উপচালেন 2, আযস্মতা চ কুক্কুটেন 3, আযস্মতা চ কল়িম্ভেন 4, আযস্মতা চ নিকটেন 5, আযস্মতা চ কটিস্সহেন; অঞ্ঞেহি চ অভিঞ্ঞাতেহি অভিঞ্ঞাতেহি থেরেহি সাৰকেহি সদ্ধিং।
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
তেন খো পন সমযেন সম্বহুলা অভিঞ্ঞাতা অভিঞ্ঞাতা লিচ্ছৰী ভদ্রেহি ভদ্রেহি যানেহি পরপুরায 11 উচ্চাসদ্দা মহাসদ্দা মহাৰনং অজ্ঝোগাহন্তি ভগৰন্তং দস্সনায। অথ খো তেসং আযস্মন্তানং এতদহোসি – ‘‘ইমে খো সম্বহুলা অভিঞ্ঞাতা অভিঞ্ঞাতা লিচ্ছৰী ভদ্রেহি ভদ্রেহি যানেহি পরপুরায উচ্চাসদ্দা মহাসদ্দা মহাৰনং অজ্ঝোগাহন্তি ভগৰন্তং দস্সনায। ‘সদ্দকণ্টকা খো পন ঝানা’ ৰুত্তা ভগৰতা। যংনূন মযং যেন গোসিঙ্গসালৰনদাযো তেনুপসঙ্কমেয্যাম । তত্থ মযং অপ্পসদ্দা অপ্পাকিণ্ণা ফাসুং 12 ৰিহরেয্যামা’’তি। অথ খো তে আযস্মন্তো যেন গোসিঙ্গসালৰনদাযো তেনুপসঙ্কমিংসু; তত্থ তে আযস্মন্তো অপ্পসদ্দা অপ্পাকিণ্ণা ফাসুং ৰিহরন্তি।
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
অথ খো ভগৰা ভিক্খূ আমন্তেসি – ‘‘কহং নু খো, ভিক্খৰে, চালো, কহং উপচালো, কহং কুক্কুটো, কহং কল়িম্ভো, কহং নিকটো, কহং কটিস্সহো; কহং নু খো তে, ভিক্খৰে, থেরা সাৰকা গতা’’তি?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘ইধ, ভন্তে, তেসং আযস্মন্তানং এতদহোসি – ‘ইমে খো সম্বহুলা অভিঞ্ঞাতা অভিঞ্ঞাতা লিচ্ছৰী ভদ্রেহি ভদ্রেহি যানেহি পরপুরায উচ্চাসদ্দা মহাসদ্দা মহাৰনং অজ্ঝোগাহন্তি ভগৰন্তং দস্সনায ‘সদ্দকণ্টকা খো পন ঝানাৰুত্তা ভগৰতা যংনূন মযং যেন গোসিঙ্গসালৰনদাযো তেনুপসঙ্কমেয্যাম তত্থ মযং অপ্পসদ্দা অপ্পাকিণ্ণা ফাসুং ৰিহরেয্যামা’তি। অথ খো তে, ভন্তে, আযস্মন্তো যেন গোসিঙ্গসালৰনদাযো তেনুপসঙ্কমিংসু। তত্থ তে আযস্মন্তো অপ্পসদ্দা অপ্পাকিণ্ণা ফাসুং ৰিহরন্তী’’তি ।
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘সাধু সাধু, ভিক্খৰে, যথা তে মহাসাৰকা সম্মা ব্যাকরমানা ব্যাকরেয্যুং, ‘সদ্দকণ্টকা হি, ভিক্খৰে, ঝানা’ ৰুত্তা মযা।
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘দসযিমে, ভিক্খৰে, কণ্টকা। কতমে দস? পৰিৰেকারামস্স সঙ্গণিকারামতা কণ্টকো, অসুভনিমিত্তানুযোগং অনুযুত্তস্স সুভনিমিত্তানুযোগো কণ্টকো, ইন্দ্রিযেসু গুত্তদ্ৰারস্স ৰিসূকদস্সনং কণ্টকো, ব্রহ্মচরিযস্স মাতুগামূপচারো 15 কণ্টকো, 16 পঠমস্স ঝানস্স সদ্দো কণ্টকো, দুতিযস্স ঝানস্স ৰিতক্কৰিচারা কণ্টকা, ততিযস্স ঝানস্স পীতি কণ্টকো, চতুত্থস্স ঝানস্স অস্সাসপস্সাসো কণ্টকো, সঞ্ঞাৰেদযিতনিরোধসমাপত্তিযা সঞ্ঞা চ ৰেদনা চ কণ্টকো রাগো কণ্টকো দোসো কণ্টকো মোহো কণ্টকো।
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘অকণ্টকা , ভিক্খৰে, ৰিহরথ। নিক্কণ্টকা, ভিক্খৰে, ৰিহরথ। অকণ্টকনিক্কণ্টকা, ভিক্খৰে, ৰিহরথ। অকণ্টকা, ভিক্খৰে, অরহন্তো; নিক্কণ্টকা, ভিক্খৰে, অরহন্তো; অকণ্টকনিক্কণ্টকা, ভিক্খৰে, অরহন্তো’’তি। দুতিযং।
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. কণ্টকসুত্তৰণ্ণনা • 2. Kaṇṭakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. আকঙ্খসুত্তাদিৰণ্ণনা • 1-4. Ākaṅkhasuttādivaṇṇanā
