| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. කණ්‌ටකසුත්‌තං
2. Kaṇṭakasuttaṃ
72. එකං සමයං භගවා වෙසාලියං විහරති මහාවනෙ කූටාගාරසාලායං සම්‌බහුලෙහි අභිඤ්‌ඤාතෙහි අභිඤ්‌ඤාතෙහි ථෙරෙහි සාවකෙහි සද්‌ධිං – ආයස්‌මතා ච චාලෙන 1, ආයස්‌මතා ච උපචාලෙන 2, ආයස්‌මතා ච කුක්‌කුටෙන 3, ආයස්‌මතා ච කළිම්‌භෙන 4, ආයස්‌මතා ච නිකටෙන 5, ආයස්‌මතා ච කටිස්‌සහෙන; අඤ්‌ඤෙහි ච අභිඤ්‌ඤාතෙහි අභිඤ්‌ඤාතෙහි ථෙරෙහි සාවකෙහි සද්‌ධිං.
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
තෙන ඛො පන සමයෙන සම්‌බහුලා අභිඤ්‌ඤාතා අභිඤ්‌ඤාතා ලිච්‌ඡවී භද්‍රෙහි භද්‍රෙහි යානෙහි පරපුරාය 11 උච්‌චාසද්‌දා මහාසද්‌දා මහාවනං අජ්‌ඣොගාහන්‌ති භගවන්‌තං දස්‌සනාය. අථ ඛො තෙසං ආයස්‌මන්‌තානං එතදහොසි – ‘‘ඉමෙ ඛො සම්‌බහුලා අභිඤ්‌ඤාතා අභිඤ්‌ඤාතා ලිච්‌ඡවී භද්‍රෙහි භද්‍රෙහි යානෙහි පරපුරාය උච්‌චාසද්‌දා මහාසද්‌දා මහාවනං අජ්‌ඣොගාහන්‌ති භගවන්‌තං දස්‌සනාය. ‘සද්‌දකණ්‌ටකා ඛො පන ඣානා’ වුත්‌තා භගවතා. යංනූන මයං යෙන ගොසිඞ්‌ගසාලවනදායො තෙනුපසඞ්‌කමෙය්‍යාම . තත්‌ථ මයං අප්‌පසද්‌දා අප්‌පාකිණ්‌ණා ඵාසුං 12 විහරෙය්‍යාමා’’ති. අථ ඛො තෙ ආයස්‌මන්‌තො යෙන ගොසිඞ්‌ගසාලවනදායො තෙනුපසඞ්‌කමිංසු; තත්‌ථ තෙ ආයස්‌මන්‌තො අප්‌පසද්‌දා අප්‌පාකිණ්‌ණා ඵාසුං විහරන්‌ති.
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
අථ ඛො භගවා භික්‌ඛූ ආමන්‌තෙසි – ‘‘කහං නු ඛො, භික්‌ඛවෙ, චාලො, කහං උපචාලො, කහං කුක්‌කුටො, කහං කළිම්‌භො, කහං නිකටො, කහං කටිස්‌සහො; කහං නු ඛො තෙ, භික්‌ඛවෙ, ථෙරා සාවකා ගතා’’ති?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘ඉධ, භන්‌තෙ, තෙසං ආයස්‌මන්‌තානං එතදහොසි – ‘ඉමෙ ඛො සම්‌බහුලා අභිඤ්‌ඤාතා අභිඤ්‌ඤාතා ලිච්‌ඡවී භද්‍රෙහි භද්‍රෙහි යානෙහි පරපුරාය උච්‌චාසද්‌දා මහාසද්‌දා මහාවනං අජ්‌ඣොගාහන්‌ති භගවන්‌තං දස්‌සනාය ‘සද්‌දකණ්‌ටකා ඛො පන ඣානාවුත්‌තා භගවතා යංනූන මයං යෙන ගොසිඞ්‌ගසාලවනදායො තෙනුපසඞ්‌කමෙය්‍යාම තත්‌ථ මයං අප්‌පසද්‌දා අප්‌පාකිණ්‌ණා ඵාසුං විහරෙය්‍යාමා’ති. අථ ඛො තෙ, භන්‌තෙ, ආයස්‌මන්‌තො යෙන ගොසිඞ්‌ගසාලවනදායො තෙනුපසඞ්‌කමිංසු. තත්‌ථ තෙ ආයස්‌මන්‌තො අප්‌පසද්‌දා අප්‌පාකිණ්‌ණා ඵාසුං විහරන්‌තී’’ති .
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘සාධු සාධු, භික්‌ඛවෙ, යථා තෙ මහාසාවකා සම්‌මා බ්‍යාකරමානා බ්‍යාකරෙය්‍යුං, ‘සද්‌දකණ්‌ටකා හි, භික්‌ඛවෙ, ඣානා’ වුත්‌තා මයා.
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘දසයිමෙ, භික්‌ඛවෙ, කණ්‌ටකා. කතමෙ දස? පවිවෙකාරාමස්‌ස සඞ්‌ගණිකාරාමතා කණ්‌ටකො, අසුභනිමිත්‌තානුයොගං අනුයුත්‌තස්‌ස සුභනිමිත්‌තානුයොගො කණ්‌ටකො, ඉන්‌ද්‍රියෙසු ගුත්‌තද්‌වාරස්‌ස විසූකදස්‌සනං කණ්‌ටකො, බ්‍රහ්‌මචරියස්‌ස මාතුගාමූපචාරො 15 කණ්‌ටකො, 16 පඨමස්‌ස ඣානස්‌ස සද්‌දො කණ්‌ටකො, දුතියස්‌ස ඣානස්‌ස විතක්‌කවිචාරා කණ්‌ටකා, තතියස්‌ස ඣානස්‌ස පීති කණ්‌ටකො, චතුත්‌ථස්‌ස ඣානස්‌ස අස්‌සාසපස්‌සාසො කණ්‌ටකො, සඤ්‌ඤාවෙදයිතනිරොධසමාපත්‌තියා සඤ්‌ඤා ච වෙදනා ච කණ්‌ටකො රාගො කණ්‌ටකො දොසො කණ්‌ටකො මොහො කණ්‌ටකො.
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘අකණ්‌ටකා , භික්‌ඛවෙ, විහරථ. නික්‌කණ්‌ටකා, භික්‌ඛවෙ, විහරථ. අකණ්‌ටකනික්‌කණ්‌ටකා, භික්‌ඛවෙ, විහරථ. අකණ්‌ටකා, භික්‌ඛවෙ, අරහන්‌තො; නික්‌කණ්‌ටකා, භික්‌ඛවෙ, අරහන්‌තො; අකණ්‌ටකනික්‌කණ්‌ටකා, භික්‌ඛවෙ, අරහන්‌තො’’ති. දුතියං.
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. කණ්‌ටකසුත්‌තවණ්‌ණනා • 2. Kaṇṭakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. ආකඞ්‌ඛසුත්‌තාදිවණ්‌ණනා • 1-4. Ākaṅkhasuttādivaṇṇanā
