| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. ཀཎྚཀསུཏྟཾ
2. Kaṇṭakasuttaṃ
༧༢. ཨེཀཾ སམཡཾ བྷགཝཱ ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡཾ སམྦཧུལེཧི ཨབྷིཉྙཱཏེཧི ཨབྷིཉྙཱཏེཧི ཐེརེཧི སཱཝཀེཧི སདྡྷིཾ – ཨཱཡསྨཏཱ ཙ ཙཱལེན 1, ཨཱཡསྨཏཱ ཙ ཨུཔཙཱལེན 2, ཨཱཡསྨཏཱ ཙ ཀུཀྐུཊེན 3, ཨཱཡསྨཏཱ ཙ ཀལི༹མྦྷེན 4, ཨཱཡསྨཏཱ ཙ ནིཀཊེན 5, ཨཱཡསྨཏཱ ཙ ཀཊིསྶཧེན; ཨཉྙེཧི ཙ ཨབྷིཉྙཱཏེཧི ཨབྷིཉྙཱཏེཧི ཐེརེཧི སཱཝཀེཧི སདྡྷིཾ།
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
ཏེན ཁོ པན སམཡེན སམྦཧུལཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི བྷདྲེཧི བྷདྲེཧི ཡཱནེཧི པརཔུརཱཡ 11 ཨུཙྩཱསདྡཱ མཧཱསདྡཱ མཧཱཝནཾ ཨཛ྄ཛྷོགཱཧནྟི བྷགཝནྟཾ དསྶནཱཡ། ཨཐ ཁོ ཏེསཾ ཨཱཡསྨནྟཱནཾ ཨེཏདཧོསི – ‘‘ཨིམེ ཁོ སམྦཧུལཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི བྷདྲེཧི བྷདྲེཧི ཡཱནེཧི པརཔུརཱཡ ཨུཙྩཱསདྡཱ མཧཱསདྡཱ མཧཱཝནཾ ཨཛ྄ཛྷོགཱཧནྟི བྷགཝནྟཾ དསྶནཱཡ། ‘སདྡཀཎྚཀཱ ཁོ པན ཛྷཱནཱ’ ཝུཏྟཱ བྷགཝཏཱ། ཡཾནཱུན མཡཾ ཡེན གོསིངྒསཱལཝནདཱཡོ ཏེནུཔསངྐམེཡྻཱམ ། ཏཏྠ མཡཾ ཨཔྤསདྡཱ ཨཔྤཱཀིཎྞཱ ཕཱསུཾ 12 ཝིཧརེཡྻཱམཱ’’ཏི། ཨཐ ཁོ ཏེ ཨཱཡསྨནྟོ ཡེན གོསིངྒསཱལཝནདཱཡོ ཏེནུཔསངྐམིཾསུ; ཏཏྠ ཏེ ཨཱཡསྨནྟོ ཨཔྤསདྡཱ ཨཔྤཱཀིཎྞཱ ཕཱསུཾ ཝིཧརནྟི།
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘ཀཧཾ ནུ ཁོ, བྷིཀྑཝེ, ཙཱལོ, ཀཧཾ ཨུཔཙཱལོ, ཀཧཾ ཀུཀྐུཊོ, ཀཧཾ ཀལི༹མྦྷོ, ཀཧཾ ནིཀཊོ, ཀཧཾ ཀཊིསྶཧོ; ཀཧཾ ནུ ཁོ ཏེ, བྷིཀྑཝེ, ཐེརཱ སཱཝཀཱ གཏཱ’’ཏི?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘ཨིདྷ, བྷནྟེ, ཏེསཾ ཨཱཡསྨནྟཱནཾ ཨེཏདཧོསི – ‘ཨིམེ ཁོ སམྦཧུལཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི བྷདྲེཧི བྷདྲེཧི ཡཱནེཧི པརཔུརཱཡ ཨུཙྩཱསདྡཱ མཧཱསདྡཱ མཧཱཝནཾ ཨཛ྄ཛྷོགཱཧནྟི བྷགཝནྟཾ དསྶནཱཡ ‘སདྡཀཎྚཀཱ ཁོ པན ཛྷཱནཱཝུཏྟཱ བྷགཝཏཱ ཡཾནཱུན མཡཾ ཡེན གོསིངྒསཱལཝནདཱཡོ ཏེནུཔསངྐམེཡྻཱམ ཏཏྠ མཡཾ ཨཔྤསདྡཱ ཨཔྤཱཀིཎྞཱ ཕཱསུཾ ཝིཧརེཡྻཱམཱ’ཏི། ཨཐ ཁོ ཏེ, བྷནྟེ, ཨཱཡསྨནྟོ ཡེན གོསིངྒསཱལཝནདཱཡོ ཏེནུཔསངྐམིཾསུ། ཏཏྠ ཏེ ཨཱཡསྨནྟོ ཨཔྤསདྡཱ ཨཔྤཱཀིཎྞཱ ཕཱསུཾ ཝིཧརནྟཱི’’ཏི །
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘སཱདྷུ སཱདྷུ, བྷིཀྑཝེ, ཡཐཱ ཏེ མཧཱསཱཝཀཱ སམྨཱ བྱཱཀརམཱནཱ བྱཱཀརེཡྻུཾ, ‘སདྡཀཎྚཀཱ ཧི, བྷིཀྑཝེ, ཛྷཱནཱ’ ཝུཏྟཱ མཡཱ།
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘དསཡིམེ, བྷིཀྑཝེ, ཀཎྚཀཱ། ཀཏམེ དས? པཝིཝེཀཱརཱམསྶ སངྒཎིཀཱརཱམཏཱ ཀཎྚཀོ, ཨསུབྷནིམིཏྟཱནུཡོགཾ ཨནུཡུཏྟསྶ སུབྷནིམིཏྟཱནུཡོགོ ཀཎྚཀོ, ཨིནྡྲིཡེསུ གུཏྟདྭཱརསྶ ཝིསཱུཀདསྶནཾ ཀཎྚཀོ, བྲཧྨཙརིཡསྶ མཱཏུགཱམཱུཔཙཱརོ 15 ཀཎྚཀོ, 16 པཋམསྶ ཛྷཱནསྶ སདྡོ ཀཎྚཀོ, དུཏིཡསྶ ཛྷཱནསྶ ཝིཏཀྐཝིཙཱརཱ ཀཎྚཀཱ, ཏཏིཡསྶ ཛྷཱནསྶ པཱིཏི ཀཎྚཀོ, ཙཏུཏྠསྶ ཛྷཱནསྶ ཨསྶཱསཔསྶཱསོ ཀཎྚཀོ, སཉྙཱཝེདཡིཏནིརོདྷསམཱཔཏྟིཡཱ སཉྙཱ ཙ ཝེདནཱ ཙ ཀཎྚཀོ རཱགོ ཀཎྚཀོ དོསོ ཀཎྚཀོ མོཧོ ཀཎྚཀོ།
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘ཨཀཎྚཀཱ , བྷིཀྑཝེ, ཝིཧརཐ། ནིཀྐཎྚཀཱ, བྷིཀྑཝེ, ཝིཧརཐ། ཨཀཎྚཀནིཀྐཎྚཀཱ, བྷིཀྑཝེ, ཝིཧརཐ། ཨཀཎྚཀཱ, བྷིཀྑཝེ, ཨརཧནྟོ; ནིཀྐཎྚཀཱ, བྷིཀྑཝེ, ཨརཧནྟོ; ཨཀཎྚཀནིཀྐཎྚཀཱ, བྷིཀྑཝེ, ཨརཧནྟོ’’ཏི། དུཏིཡཾ།
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. ཀཎྚཀསུཏྟཝཎྞནཱ • 2. Kaṇṭakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༤. ཨཱཀངྑསུཏྟཱདིཝཎྞནཱ • 1-4. Ākaṅkhasuttādivaṇṇanā
