| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. கப்பருக்கி²யத்தே²ரஅபதா³னவண்ணனா
10. Kapparukkhiyattheraapadānavaṇṇanā
ஸித்³த⁴த்த²ஸ்ஸ ப⁴க³வதோதிஆதி³கங் ஆயஸ்மதோ கப்பருக்கி²யத்தே²ரஸ்ஸ அபதா³னங் (தே²ரகா³॰ அட்ட²॰ 2.576). அயம்பி புரிமபு³த்³தே⁴ஸு கதாதி⁴காரோ தேஸு தேஸு ப⁴வேஸு நிப்³பா³னாதி⁴க³மூபாயபூ⁴தானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே விப⁴வஸம்பன்னே ஏகஸ்மிங் குலே நிப்³ப³த்தோ மஹத்³த⁴னோ மஹாபோ⁴கோ³ ஸத்த²ரி பஸன்னோ ஸத்தஹி ரதனேஹி விசித்தங் ஸுவண்ணமயங் கப்பருக்க²ங் காரெத்வா ஸித்³த⁴த்த²ஸ்ஸ ப⁴க³வதோ சேதியஸ்ஸ ஸம்முகே² ட²பெத்வா பூஜேஸி. ஸோ ஏவரூபங் புஞ்ஞங் கத்வா யாவதாயுகங் ட²த்வா ததோ சுதோ ஸுக³தீஸுயேவ ஸங்ஸரந்தோ கமேன இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா ரதனத்தயே பஸன்னோ த⁴ம்மங் ஸுத்வா படிலத்³த⁴ஸத்³தோ⁴ ஸத்து² ஆராதெ⁴த்வா பப்³ப³ஜிதோ நசிரஸ்ஸேவ அரஹத்தங் பத்வா புப்³பே³ கதகுஸலனாமேன கப்பருக்கி²யத்தே²ரோதி பாகடோ அஹோஸி.
Siddhatthassa bhagavatotiādikaṃ āyasmato kapparukkhiyattherassa apadānaṃ (theragā. aṭṭha. 2.576). Ayampi purimabuddhesu katādhikāro tesu tesu bhavesu nibbānādhigamūpāyabhūtāni puññāni upacinanto siddhatthassa bhagavato kāle vibhavasampanne ekasmiṃ kule nibbatto mahaddhano mahābhogo satthari pasanno sattahi ratanehi vicittaṃ suvaṇṇamayaṃ kapparukkhaṃ kāretvā siddhatthassa bhagavato cetiyassa sammukhe ṭhapetvā pūjesi. So evarūpaṃ puññaṃ katvā yāvatāyukaṃ ṭhatvā tato cuto sugatīsuyeva saṃsaranto kamena imasmiṃ buddhuppāde ekasmiṃ kulagehe nibbatto viññutaṃ patto gharāvāsaṃ saṇṭhapetvā ratanattaye pasanno dhammaṃ sutvā paṭiladdhasaddho satthu ārādhetvā pabbajito nacirasseva arahattaṃ patvā pubbe katakusalanāmena kapparukkhiyattheroti pākaṭo ahosi.
108. ஸோ ஏவங் பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் பகாஸெந்தோ ஸித்³த⁴த்த²ஸ்ஸ ப⁴க³வதோதிஆதி³மாஹ. தூ²பஸெட்ட²ஸ்ஸ ஸம்முகா²தி ஸெட்ட²ஸ்ஸ உத்தமஸ்ஸ தா⁴துனிஹிததூ²பஸ்ஸ சேதியஸ்ஸ ஸம்முக²ட்டா²னே விசித்தது³ஸ்ஸே அனேகவண்ணேஹி விஸமேன விஸதி³ஸேன சித்தேன மனோஹரே சினபட்டஸோமாரபட்டாதி³கே து³ஸ்ஸே . லகெ³த்வா ஓலக்³கெ³த்வா கப்பருக்க²ங் ட²பேஸிங் அஹங் பதிட்ட²பேஸிந்தி அத்தோ². ஸேஸங் உத்தானத்த²மேவாதி.
108. So evaṃ pattaarahattaphalo attano pubbakammaṃ saritvā somanassavasena pubbacaritāpadānaṃ pakāsento siddhatthassa bhagavatotiādimāha. Thūpaseṭṭhassa sammukhāti seṭṭhassa uttamassa dhātunihitathūpassa cetiyassa sammukhaṭṭhāne vicittadusse anekavaṇṇehi visamena visadisena cittena manohare cinapaṭṭasomārapaṭṭādike dusse . Lagetvā olaggetvā kapparukkhaṃ ṭhapesiṃ ahaṃ patiṭṭhapesinti attho. Sesaṃ uttānatthamevāti.
கப்பருக்கி²யத்தே²ரஅபதா³னவண்ணனா ஸமத்தா.
Kapparukkhiyattheraapadānavaṇṇanā samattā.
சதுத்த²வக்³க³வண்ணனா ஸமத்தா.
Catutthavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. கப்பருக்கி²யத்தே²ரஅபதா³னங் • 10. Kapparukkhiyattheraapadānaṃ
