| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൧൦. കപ്പരുക്ഖിയത്ഥേരഅപദാനവണ്ണനാ
10. Kapparukkhiyattheraapadānavaṇṇanā
സിദ്ധത്ഥസ്സ ഭഗവതോതിആദികം ആയസ്മതോ കപ്പരുക്ഖിയത്ഥേരസ്സ അപദാനം (ഥേരഗാ॰ അട്ഠ॰ ൨.൫൭൬). അയമ്പി പുരിമബുദ്ധേസു കതാധികാരോ തേസു തേസു ഭവേസു നിബ്ബാനാധിഗമൂപായഭൂതാനി പുഞ്ഞാനി ഉപചിനന്തോ സിദ്ധത്ഥസ്സ ഭഗവതോ കാലേ വിഭവസമ്പന്നേ ഏകസ്മിം കുലേ നിബ്ബത്തോ മഹദ്ധനോ മഹാഭോഗോ സത്ഥരി പസന്നോ സത്തഹി രതനേഹി വിചിത്തം സുവണ്ണമയം കപ്പരുക്ഖം കാരേത്വാ സിദ്ധത്ഥസ്സ ഭഗവതോ ചേതിയസ്സ സമ്മുഖേ ഠപേത്വാ പൂജേസി. സോ ഏവരൂപം പുഞ്ഞം കത്വാ യാവതായുകം ഠത്വാ തതോ ചുതോ സുഗതീസുയേവ സംസരന്തോ കമേന ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വിഞ്ഞുതം പത്തോ ഘരാവാസം സണ്ഠപേത്വാ രതനത്തയേ പസന്നോ ധമ്മം സുത്വാ പടിലദ്ധസദ്ധോ സത്ഥു ആരാധേത്വാ പബ്ബജിതോ നചിരസ്സേവ അരഹത്തം പത്വാ പുബ്ബേ കതകുസലനാമേന കപ്പരുക്ഖിയത്ഥേരോതി പാകടോ അഹോസി.
Siddhatthassa bhagavatotiādikaṃ āyasmato kapparukkhiyattherassa apadānaṃ (theragā. aṭṭha. 2.576). Ayampi purimabuddhesu katādhikāro tesu tesu bhavesu nibbānādhigamūpāyabhūtāni puññāni upacinanto siddhatthassa bhagavato kāle vibhavasampanne ekasmiṃ kule nibbatto mahaddhano mahābhogo satthari pasanno sattahi ratanehi vicittaṃ suvaṇṇamayaṃ kapparukkhaṃ kāretvā siddhatthassa bhagavato cetiyassa sammukhe ṭhapetvā pūjesi. So evarūpaṃ puññaṃ katvā yāvatāyukaṃ ṭhatvā tato cuto sugatīsuyeva saṃsaranto kamena imasmiṃ buddhuppāde ekasmiṃ kulagehe nibbatto viññutaṃ patto gharāvāsaṃ saṇṭhapetvā ratanattaye pasanno dhammaṃ sutvā paṭiladdhasaddho satthu ārādhetvā pabbajito nacirasseva arahattaṃ patvā pubbe katakusalanāmena kapparukkhiyattheroti pākaṭo ahosi.
൧൦൮. സോ ഏവം പത്തഅരഹത്തഫലോ അത്തനോ പുബ്ബകമ്മം സരിത്വാ സോമനസ്സവസേന പുബ്ബചരിതാപദാനം പകാസേന്തോ സിദ്ധത്ഥസ്സ ഭഗവതോതിആദിമാഹ. ഥൂപസേട്ഠസ്സ സമ്മുഖാതി സേട്ഠസ്സ ഉത്തമസ്സ ധാതുനിഹിതഥൂപസ്സ ചേതിയസ്സ സമ്മുഖട്ഠാനേ വിചിത്തദുസ്സേ അനേകവണ്ണേഹി വിസമേന വിസദിസേന ചിത്തേന മനോഹരേ ചിനപട്ടസോമാരപട്ടാദികേ ദുസ്സേ . ലഗേത്വാ ഓലഗ്ഗേത്വാ കപ്പരുക്ഖം ഠപേസിം അഹം പതിട്ഠപേസിന്തി അത്ഥോ. സേസം ഉത്താനത്ഥമേവാതി.
108. So evaṃ pattaarahattaphalo attano pubbakammaṃ saritvā somanassavasena pubbacaritāpadānaṃ pakāsento siddhatthassa bhagavatotiādimāha. Thūpaseṭṭhassa sammukhāti seṭṭhassa uttamassa dhātunihitathūpassa cetiyassa sammukhaṭṭhāne vicittadusse anekavaṇṇehi visamena visadisena cittena manohare cinapaṭṭasomārapaṭṭādike dusse . Lagetvā olaggetvā kapparukkhaṃ ṭhapesiṃ ahaṃ patiṭṭhapesinti attho. Sesaṃ uttānatthamevāti.
കപ്പരുക്ഖിയത്ഥേരഅപദാനവണ്ണനാ സമത്താ.
Kapparukkhiyattheraapadānavaṇṇanā samattā.
ചതുത്ഥവഗ്ഗവണ്ണനാ സമത്താ.
Catutthavaggavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൧൦. കപ്പരുക്ഖിയത്ഥേരഅപദാനം • 10. Kapparukkhiyattheraapadānaṃ
