| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6-8. கப்பஸுத்தாதி³வண்ணனா
6-8. Kappasuttādivaṇṇanā
156-158. ச²ட்டே² ஸங்வட்டனங் வினஸ்ஸனங் ஸங்வட்டோ, ஸங்வட்டதோ உத்³த⁴ங் ததா² டா²யீ ஸங்வட்டட்டா²யீ. விவட்டனங் நிப்³ப³த்தனங், வட்³ட⁴னங் வா விவட்டோ. ‘‘தேஜோஸங்வட்டோ, ஆபோஸங்வட்டோ, வாயோஸங்வட்டோதி ஏவங் ஸங்வட்டஸீமானுக்கமேன ஸங்வட்டேஸு வத்தப்³பே³ஸு ததா² அவத்வா ஆபோஸங்வட்டோ, தேஜோஸங்வட்டோ, வாயோஸங்வட்டோதி வசனங் ஸங்வட்டமஹாபூ⁴ததே³ஸனானுபுப்³பி³யா’’தி கேசி. ‘‘பா⁴வீஸங்வட்டானுபுப்³பி³யா’’தி அபரே. ஆபேன ஸங்வட்டோ ஆபோஸங்வட்டோ. ஸங்வட்டஸீமாதி ஸங்வட்டனமரியாதா³. ஸங்வட்டதீதி வினஸ்ஸதி. ஸதா³தி ஸப்³ப³காலங், தீஸுபி ஸங்வட்டகாலேஸூதி அத்தோ². ஏகங் பு³த்³த⁴க்கெ²த்தங் வினஸ்ஸதீதி எத்த² பு³த்³த⁴க்கெ²த்தங் நாம திவித⁴ங் ஹோதி ஜாதிக்கெ²த்தங், ஆணாக்கெ²த்தங், விஸயக்கெ²த்தஞ்ச.
156-158. Chaṭṭhe saṃvaṭṭanaṃ vinassanaṃ saṃvaṭṭo, saṃvaṭṭato uddhaṃ tathā ṭhāyī saṃvaṭṭaṭṭhāyī. Vivaṭṭanaṃ nibbattanaṃ, vaḍḍhanaṃ vā vivaṭṭo. ‘‘Tejosaṃvaṭṭo, āposaṃvaṭṭo, vāyosaṃvaṭṭoti evaṃ saṃvaṭṭasīmānukkamena saṃvaṭṭesu vattabbesu tathā avatvā āposaṃvaṭṭo, tejosaṃvaṭṭo, vāyosaṃvaṭṭoti vacanaṃ saṃvaṭṭamahābhūtadesanānupubbiyā’’ti keci. ‘‘Bhāvīsaṃvaṭṭānupubbiyā’’ti apare. Āpena saṃvaṭṭo āposaṃvaṭṭo. Saṃvaṭṭasīmāti saṃvaṭṭanamariyādā. Saṃvaṭṭatīti vinassati. Sadāti sabbakālaṃ, tīsupi saṃvaṭṭakālesūti attho. Ekaṃ buddhakkhettaṃ vinassatīti ettha buddhakkhettaṃ nāma tividhaṃ hoti jātikkhettaṃ, āṇākkhettaṃ, visayakkhettañca.
தத்த² ஜாதிக்கெ²த்தங் த³ஸஸஹஸ்ஸசக்கவாளபரியந்தங் ஹோதி, ததா²க³தஸ்ஸ படிஸந்தி⁴க்³க³ஹணாதீ³ஸு கம்பதி. ஆணாக்கெ²த்தங் கோடிஸதஸஹஸ்ஸசக்கவாளபரியந்தங், யத்த² ரதனஸுத்தங் (கு²॰ பா॰ 6.1 ஆத³யோ; ஸு॰ நி॰ 224 ஆத³யோ) க²ந்த⁴பரித்தங் (அ॰ நி॰ 4.67; சூளவ॰ 251) த⁴ஜக்³க³பரித்தங் (ஸங்॰ நி॰ 1.249) ஆடானாடியபரித்தங் (தீ³॰ நி॰ 3.277-278) மோரபரித்தந்தி (ஜா॰ 1.2.17-18) இமேஸங் பரித்தானங் ஆனுபா⁴வோ வத்ததி. விஸயக்கெ²த்தங் அனந்தாபரிமாணங், யங் ‘‘யாவதா வா பனாகங்கெ²ய்யா’’தி (அ॰ நி॰ 3.81) வுத்தங். தத்த² யங் யங் ததா²க³தோ ஆகங்க²தி, தங் தங் ஜானாதி. ஏவமேதேஸு தீஸு பு³த்³த⁴க்கெ²த்தேஸு ஏகங் ஆணாக்கெ²த்தங் வினஸ்ஸதி , தஸ்மிங் பன வினஸ்ஸந்தே ஜாதிக்கெ²த்தங் வினட்ட²மேவ ஹோதி, வினஸ்ஸந்தஞ்ச ஏகதோவ வினஸ்ஸதி, ஸண்ட²ஹந்தஞ்ச ஏகதோவ ஸண்ட²ஹதி. ஸேஸமெத்த² விஸுத்³தி⁴மக்³க³ஸங்வண்ணனாஸு (விஸுத்³தி⁴॰ மஹாடீ॰ 2.404) வுத்தனயேனேவ க³ஹேதப்³ப³ங். ஸத்தமட்ட²மானி உத்தானத்தா²னேவ.
Tattha jātikkhettaṃ dasasahassacakkavāḷapariyantaṃ hoti, tathāgatassa paṭisandhiggahaṇādīsu kampati. Āṇākkhettaṃ koṭisatasahassacakkavāḷapariyantaṃ, yattha ratanasuttaṃ (khu. pā. 6.1 ādayo; su. ni. 224 ādayo) khandhaparittaṃ (a. ni. 4.67; cūḷava. 251) dhajaggaparittaṃ (saṃ. ni. 1.249) āṭānāṭiyaparittaṃ (dī. ni. 3.277-278) moraparittanti (jā. 1.2.17-18) imesaṃ parittānaṃ ānubhāvo vattati. Visayakkhettaṃ anantāparimāṇaṃ, yaṃ ‘‘yāvatā vā panākaṅkheyyā’’ti (a. ni. 3.81) vuttaṃ. Tattha yaṃ yaṃ tathāgato ākaṅkhati, taṃ taṃ jānāti. Evametesu tīsu buddhakkhettesu ekaṃ āṇākkhettaṃ vinassati , tasmiṃ pana vinassante jātikkhettaṃ vinaṭṭhameva hoti, vinassantañca ekatova vinassati, saṇṭhahantañca ekatova saṇṭhahati. Sesamettha visuddhimaggasaṃvaṇṇanāsu (visuddhi. mahāṭī. 2.404) vuttanayeneva gahetabbaṃ. Sattamaṭṭhamāni uttānatthāneva.
கப்பஸுத்தாதி³வண்ணனா நிட்டி²தா.
Kappasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
6. கப்பஸுத்தங் • 6. Kappasuttaṃ
7. ரோக³ஸுத்தங் • 7. Rogasuttaṃ
8. பரிஹானிஸுத்தங் • 8. Parihānisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
6. கப்பஸுத்தவண்ணனா • 6. Kappasuttavaṇṇanā
7. ரோக³ஸுத்தவண்ணனா • 7. Rogasuttavaṇṇanā
8. பரிஹானிஸுத்தவண்ணனா • 8. Parihānisuttavaṇṇanā
