| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৬-৮. কপ্পসুত্তাদিৰণ্ণনা
6-8. Kappasuttādivaṇṇanā
১৫৬-১৫৮. ছট্ঠে সংৰট্টনং ৰিনস্সনং সংৰট্টো, সংৰট্টতো উদ্ধং তথা ঠাযী সংৰট্টট্ঠাযী। ৰিৰট্টনং নিব্বত্তনং, ৰড্ঢনং ৰা ৰিৰট্টো। ‘‘তেজোসংৰট্টো, আপোসংৰট্টো, ৰাযোসংৰট্টোতি এৰং সংৰট্টসীমানুক্কমেন সংৰট্টেসু ৰত্তব্বেসু তথা অৰত্ৰা আপোসংৰট্টো, তেজোসংৰট্টো, ৰাযোসংৰট্টোতি ৰচনং সংৰট্টমহাভূতদেসনানুপুব্বিযা’’তি কেচি। ‘‘ভাৰীসংৰট্টানুপুব্বিযা’’তি অপরে। আপেন সংৰট্টো আপোসংৰট্টো। সংৰট্টসীমাতি সংৰট্টনমরিযাদা। সংৰট্টতীতি ৰিনস্সতি। সদাতি সব্বকালং, তীসুপি সংৰট্টকালেসূতি অত্থো। একং বুদ্ধক্খেত্তং ৰিনস্সতীতি এত্থ বুদ্ধক্খেত্তং নাম তিৰিধং হোতি জাতিক্খেত্তং, আণাক্খেত্তং, ৰিসযক্খেত্তঞ্চ।
156-158. Chaṭṭhe saṃvaṭṭanaṃ vinassanaṃ saṃvaṭṭo, saṃvaṭṭato uddhaṃ tathā ṭhāyī saṃvaṭṭaṭṭhāyī. Vivaṭṭanaṃ nibbattanaṃ, vaḍḍhanaṃ vā vivaṭṭo. ‘‘Tejosaṃvaṭṭo, āposaṃvaṭṭo, vāyosaṃvaṭṭoti evaṃ saṃvaṭṭasīmānukkamena saṃvaṭṭesu vattabbesu tathā avatvā āposaṃvaṭṭo, tejosaṃvaṭṭo, vāyosaṃvaṭṭoti vacanaṃ saṃvaṭṭamahābhūtadesanānupubbiyā’’ti keci. ‘‘Bhāvīsaṃvaṭṭānupubbiyā’’ti apare. Āpena saṃvaṭṭo āposaṃvaṭṭo. Saṃvaṭṭasīmāti saṃvaṭṭanamariyādā. Saṃvaṭṭatīti vinassati. Sadāti sabbakālaṃ, tīsupi saṃvaṭṭakālesūti attho. Ekaṃ buddhakkhettaṃ vinassatīti ettha buddhakkhettaṃ nāma tividhaṃ hoti jātikkhettaṃ, āṇākkhettaṃ, visayakkhettañca.
তত্থ জাতিক্খেত্তং দসসহস্সচক্কৰাল়পরিযন্তং হোতি, তথাগতস্স পটিসন্ধিগ্গহণাদীসু কম্পতি। আণাক্খেত্তং কোটিসতসহস্সচক্কৰাল়পরিযন্তং, যত্থ রতনসুত্তং (খু॰ পা॰ ৬.১ আদযো; সু॰ নি॰ ২২৪ আদযো) খন্ধপরিত্তং (অ॰ নি॰ ৪.৬৭; চূল়ৰ॰ ২৫১) ধজগ্গপরিত্তং (সং॰ নি॰ ১.২৪৯) আটানাটিযপরিত্তং (দী॰ নি॰ ৩.২৭৭-২৭৮) মোরপরিত্তন্তি (জা॰ ১.২.১৭-১৮) ইমেসং পরিত্তানং আনুভাৰো ৰত্ততি। ৰিসযক্খেত্তং অনন্তাপরিমাণং, যং ‘‘যাৰতা ৰা পনাকঙ্খেয্যা’’তি (অ॰ নি॰ ৩.৮১) ৰুত্তং। তত্থ যং যং তথাগতো আকঙ্খতি, তং তং জানাতি। এৰমেতেসু তীসু বুদ্ধক্খেত্তেসু একং আণাক্খেত্তং ৰিনস্সতি , তস্মিং পন ৰিনস্সন্তে জাতিক্খেত্তং ৰিনট্ঠমেৰ হোতি, ৰিনস্সন্তঞ্চ একতোৰ ৰিনস্সতি, সণ্ঠহন্তঞ্চ একতোৰ সণ্ঠহতি। সেসমেত্থ ৰিসুদ্ধিমগ্গসংৰণ্ণনাসু (ৰিসুদ্ধি॰ মহাটী॰ ২.৪০৪) ৰুত্তনযেনেৰ গহেতব্বং। সত্তমট্ঠমানি উত্তানত্থানেৰ।
Tattha jātikkhettaṃ dasasahassacakkavāḷapariyantaṃ hoti, tathāgatassa paṭisandhiggahaṇādīsu kampati. Āṇākkhettaṃ koṭisatasahassacakkavāḷapariyantaṃ, yattha ratanasuttaṃ (khu. pā. 6.1 ādayo; su. ni. 224 ādayo) khandhaparittaṃ (a. ni. 4.67; cūḷava. 251) dhajaggaparittaṃ (saṃ. ni. 1.249) āṭānāṭiyaparittaṃ (dī. ni. 3.277-278) moraparittanti (jā. 1.2.17-18) imesaṃ parittānaṃ ānubhāvo vattati. Visayakkhettaṃ anantāparimāṇaṃ, yaṃ ‘‘yāvatā vā panākaṅkheyyā’’ti (a. ni. 3.81) vuttaṃ. Tattha yaṃ yaṃ tathāgato ākaṅkhati, taṃ taṃ jānāti. Evametesu tīsu buddhakkhettesu ekaṃ āṇākkhettaṃ vinassati , tasmiṃ pana vinassante jātikkhettaṃ vinaṭṭhameva hoti, vinassantañca ekatova vinassati, saṇṭhahantañca ekatova saṇṭhahati. Sesamettha visuddhimaggasaṃvaṇṇanāsu (visuddhi. mahāṭī. 2.404) vuttanayeneva gahetabbaṃ. Sattamaṭṭhamāni uttānatthāneva.
কপ্পসুত্তাদিৰণ্ণনা নিট্ঠিতা।
Kappasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৬. কপ্পসুত্তং • 6. Kappasuttaṃ
৭. রোগসুত্তং • 7. Rogasuttaṃ
৮. পরিহানিসুত্তং • 8. Parihānisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৬. কপ্পসুত্তৰণ্ণনা • 6. Kappasuttavaṇṇanā
৭. রোগসুত্তৰণ্ণনা • 7. Rogasuttavaṇṇanā
৮. পরিহানিসুত্তৰণ্ণনা • 8. Parihānisuttavaṇṇanā
