| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
6-8. කප්‌පසුත්‌තාදිවණ්‌ණනා
6-8. Kappasuttādivaṇṇanā
156-158. ඡට්‌ඨෙ සංවට්‌ටනං විනස්‌සනං සංවට්‌ටො, සංවට්‌ටතො උද්‌ධං තථා ඨායී සංවට්‌ටට්‌ඨායී. විවට්‌ටනං නිබ්‌බත්‌තනං, වඩ්‌ඪනං වා විවට්‌ටො. ‘‘තෙජොසංවට්‌ටො, ආපොසංවට්‌ටො, වායොසංවට්‌ටොති එවං සංවට්‌ටසීමානුක්‌කමෙන සංවට්‌ටෙසු වත්‌තබ්‌බෙසු තථා අවත්‌වා ආපොසංවට්‌ටො, තෙජොසංවට්‌ටො, වායොසංවට්‌ටොති වචනං සංවට්‌ටමහාභූතදෙසනානුපුබ්‌බියා’’ති කෙචි. ‘‘භාවීසංවට්‌ටානුපුබ්‌බියා’’ති අපරෙ. ආපෙන සංවට්‌ටො ආපොසංවට්‌ටො. සංවට්‌ටසීමාති සංවට්‌ටනමරියාදා. සංවට්‌ටතීති විනස්‌සති. සදාති සබ්‌බකාලං, තීසුපි සංවට්‌ටකාලෙසූති අත්‌ථො. එකං බුද්‌ධක්‌ඛෙත්‌තං විනස්‌සතීති එත්‌ථ බුද්‌ධක්‌ඛෙත්‌තං නාම තිවිධං හොති ජාතික්‌ඛෙත්‌තං, ආණාක්‌ඛෙත්‌තං, විසයක්‌ඛෙත්‌තඤ්‌ච.
156-158. Chaṭṭhe saṃvaṭṭanaṃ vinassanaṃ saṃvaṭṭo, saṃvaṭṭato uddhaṃ tathā ṭhāyī saṃvaṭṭaṭṭhāyī. Vivaṭṭanaṃ nibbattanaṃ, vaḍḍhanaṃ vā vivaṭṭo. ‘‘Tejosaṃvaṭṭo, āposaṃvaṭṭo, vāyosaṃvaṭṭoti evaṃ saṃvaṭṭasīmānukkamena saṃvaṭṭesu vattabbesu tathā avatvā āposaṃvaṭṭo, tejosaṃvaṭṭo, vāyosaṃvaṭṭoti vacanaṃ saṃvaṭṭamahābhūtadesanānupubbiyā’’ti keci. ‘‘Bhāvīsaṃvaṭṭānupubbiyā’’ti apare. Āpena saṃvaṭṭo āposaṃvaṭṭo. Saṃvaṭṭasīmāti saṃvaṭṭanamariyādā. Saṃvaṭṭatīti vinassati. Sadāti sabbakālaṃ, tīsupi saṃvaṭṭakālesūti attho. Ekaṃ buddhakkhettaṃ vinassatīti ettha buddhakkhettaṃ nāma tividhaṃ hoti jātikkhettaṃ, āṇākkhettaṃ, visayakkhettañca.
තත්‌ථ ජාතික්‌ඛෙත්‌තං දසසහස්‌සචක්‌කවාළපරියන්‌තං හොති, තථාගතස්‌ස පටිසන්‌ධිග්‌ගහණාදීසු කම්‌පති. ආණාක්‌ඛෙත්‌තං කොටිසතසහස්‌සචක්‌කවාළපරියන්‌තං, යත්‌ථ රතනසුත්‌තං (ඛු. පා. 6.1 ආදයො; සු. නි. 224 ආදයො) ඛන්‌ධපරිත්‌තං (අ. නි. 4.67; චූළව. 251) ධජග්‌ගපරිත්‌තං (සං. නි. 1.249) ආටානාටියපරිත්‌තං (දී. නි. 3.277-278) මොරපරිත්‌තන්‌ති (ජා. 1.2.17-18) ඉමෙසං පරිත්‌තානං ආනුභාවො වත්‌තති. විසයක්‌ඛෙත්‌තං අනන්‌තාපරිමාණං, යං ‘‘යාවතා වා පනාකඞ්‌ඛෙය්‍යා’’ති (අ. නි. 3.81) වුත්‌තං. තත්‌ථ යං යං තථාගතො ආකඞ්‌ඛති, තං තං ජානාති. එවමෙතෙසු තීසු බුද්‌ධක්‌ඛෙත්‌තෙසු එකං ආණාක්‌ඛෙත්‌තං විනස්‌සති , තස්‌මිං පන විනස්‌සන්‌තෙ ජාතික්‌ඛෙත්‌තං විනට්‌ඨමෙව හොති, විනස්‌සන්‌තඤ්‌ච එකතොව විනස්‌සති, සණ්‌ඨහන්‌තඤ්‌ච එකතොව සණ්‌ඨහති. සෙසමෙත්‌ථ විසුද්‌ධිමග්‌ගසංවණ්‌ණනාසු (විසුද්‌ධි. මහාටී. 2.404) වුත්‌තනයෙනෙව ගහෙතබ්‌බං. සත්‌තමට්‌ඨමානි උත්‌තානත්‌ථානෙව.
Tattha jātikkhettaṃ dasasahassacakkavāḷapariyantaṃ hoti, tathāgatassa paṭisandhiggahaṇādīsu kampati. Āṇākkhettaṃ koṭisatasahassacakkavāḷapariyantaṃ, yattha ratanasuttaṃ (khu. pā. 6.1 ādayo; su. ni. 224 ādayo) khandhaparittaṃ (a. ni. 4.67; cūḷava. 251) dhajaggaparittaṃ (saṃ. ni. 1.249) āṭānāṭiyaparittaṃ (dī. ni. 3.277-278) moraparittanti (jā. 1.2.17-18) imesaṃ parittānaṃ ānubhāvo vattati. Visayakkhettaṃ anantāparimāṇaṃ, yaṃ ‘‘yāvatā vā panākaṅkheyyā’’ti (a. ni. 3.81) vuttaṃ. Tattha yaṃ yaṃ tathāgato ākaṅkhati, taṃ taṃ jānāti. Evametesu tīsu buddhakkhettesu ekaṃ āṇākkhettaṃ vinassati , tasmiṃ pana vinassante jātikkhettaṃ vinaṭṭhameva hoti, vinassantañca ekatova vinassati, saṇṭhahantañca ekatova saṇṭhahati. Sesamettha visuddhimaggasaṃvaṇṇanāsu (visuddhi. mahāṭī. 2.404) vuttanayeneva gahetabbaṃ. Sattamaṭṭhamāni uttānatthāneva.
කප්‌පසුත්‌තාදිවණ්‌ණනා නිට්‌ඨිතා.
Kappasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
6. කප්‌පසුත්‌තං • 6. Kappasuttaṃ
7. රොගසුත්‌තං • 7. Rogasuttaṃ
8. පරිහානිසුත්‌තං • 8. Parihānisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
6. කප්‌පසුත්‌තවණ්‌ණනා • 6. Kappasuttavaṇṇanā
7. රොගසුත්‌තවණ්‌ණනා • 7. Rogasuttavaṇṇanā
8. පරිහානිසුත්‌තවණ්‌ණනා • 8. Parihānisuttavaṇṇanā
