| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
12. கப்பஸுத்தங்
12. Kappasuttaṃ
124. ஸாவத்தி²னிதா³னங் . அத² கோ² ஆயஸ்மா கப்போ யேன ப⁴க³வா தேனுபஸங்கமி…பே॰… ஏகமந்தங் நிஸின்னோ கோ² ஆயஸ்மா கப்போ ப⁴க³வந்தங் ஏதத³வோச – ‘‘கத²ங் நு கோ², ப⁴ந்தே, ஜானதோ கத²ங் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹொந்தீ’’தி?
124. Sāvatthinidānaṃ . Atha kho āyasmā kappo yena bhagavā tenupasaṅkami…pe… ekamantaṃ nisinno kho āyasmā kappo bhagavantaṃ etadavoca – ‘‘kathaṃ nu kho, bhante, jānato kathaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānānusayā na hontī’’ti?
‘‘யங் கிஞ்சி, கப்ப, ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் ரூபங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. யா காசி வேத³னா…பே॰… யா காசி ஸஞ்ஞா… யே கேசி ஸங்கா²ரா… யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் விஞ்ஞாணங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. ஏவங் கோ², கப்ப, ஜானதோ ஏவங் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹொந்தீ’’தி. த்³வாத³ஸமங்.
‘‘Yaṃ kiñci, kappa, rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Evaṃ kho, kappa, jānato evaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānānusayā na hontī’’ti. Dvādasamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 12-13. கப்பஸுத்தாதி³வண்ணனா • 12-13. Kappasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 12-13. கப்பஸுத்தாதி³வண்ணனா • 12-13. Kappasuttādivaṇṇanā
