| Library / Tipiṭaka / තිපිටක • Tipiṭaka / සුත්‌තනිපාත-අට්‌ඨකථා • Suttanipāta-aṭṭhakathā |
10. කප්‌පසුත්‌තවණ්‌ණනා
10. Kappasuttavaṇṇanā
1099. මජ්‌ඣෙ සරස්‌මින්‌ති කප්‌පසුත්‌තං. තත්‌ථ මජ්‌ඣෙ සරස්‌මින්‌ති පුරිමපච්‌ඡිමකොටිපඤ්‌ඤාණාභාවතො මජ්‌ඣභූතෙ සංසාරෙති වුත්‌තං හොති. තිට්‌ඨතන්‌ති තිට්‌ඨමානානං. යථායිදං නාපරං සියාති යථා ඉදං දුක්‌ඛං පුන න භවෙය්‍ය.
1099.Majjhesarasminti kappasuttaṃ. Tattha majjhe sarasminti purimapacchimakoṭipaññāṇābhāvato majjhabhūte saṃsāreti vuttaṃ hoti. Tiṭṭhatanti tiṭṭhamānānaṃ. Yathāyidaṃ nāparaṃ siyāti yathā idaṃ dukkhaṃ puna na bhaveyya.
1101-2. අථස්‌ස භගවා තමත්‌ථං බ්‍යාකරොන්‌තො තිස්‌සො ගාථායො අභාසි. තත්‌ථ අකිඤ්‌චනන්‌ති කිඤ්‌චනපටිපක්‌ඛං. අනාදානන්‌ති ආදානපටිපක්‌ඛං, කිඤ්‌චනාදානවූපසමන්‌ති වුත්‌තං හොති. අනාපරන්‌ති අපරපටිභාගදීපවිරහිතං, සෙට්‌ඨන්‌ති වුත්‌තං හොති. න තෙ මාරස්‌ස පද්‌ධගූති තෙ මාරස්‌ස පද්‌ධචරා පරිචාරකා සිස්‌සා න හොන්‌ති. සෙසං සබ්‌බත්‌ථ පාකටමෙව.
1101-2. Athassa bhagavā tamatthaṃ byākaronto tisso gāthāyo abhāsi. Tattha akiñcananti kiñcanapaṭipakkhaṃ. Anādānanti ādānapaṭipakkhaṃ, kiñcanādānavūpasamanti vuttaṃ hoti. Anāparanti aparapaṭibhāgadīpavirahitaṃ, seṭṭhanti vuttaṃ hoti. Na te mārassa paddhagūti te mārassa paddhacarā paricārakā sissā na honti. Sesaṃ sabbattha pākaṭameva.
එවං භගවා ඉමම්‌පි සුත්‌තං අරහත්‌තනිකූටෙනෙව දෙසෙසි දෙසනාපරියොසානෙ ච පුබ්‌බසදිසො එව ධම්‌මාභිසමයො අහොසීති.
Evaṃ bhagavā imampi suttaṃ arahattanikūṭeneva desesi desanāpariyosāne ca pubbasadiso eva dhammābhisamayo ahosīti.
පරමත්‌ථජොතිකාය ඛුද්‌දක-අට්‌ඨකථාය
Paramatthajotikāya khuddaka-aṭṭhakathāya
සුත්‌තනිපාත-අට්‌ඨකථාය කප්‌පසුත්‌තවණ්‌ණනා නිට්‌ඨිතා.
Suttanipāta-aṭṭhakathāya kappasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / සුත්‌තනිපාතපාළි • Suttanipātapāḷi / 10. කප්‌පමාණවපුච්‌ඡා • 10. Kappamāṇavapucchā
