| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৩. তেরসমৰগ্গো
13. Terasamavaggo
(১২৬) ১. কপ্পট্ঠকথা
(126) 1. Kappaṭṭhakathā
৬৫৪. কপ্পট্ঠো কপ্পং তিট্ঠেয্যাতি? আমন্তা। কপ্পো চ সণ্ঠাতি বুদ্ধো চ লোকে উপ্পজ্জতীতি? ন হেৰং ৰত্তব্বে…পে॰…। কপ্পট্ঠো কপ্পং তিট্ঠেয্যাতি? আমন্তা। কপ্পো চ সণ্ঠাতি সঙ্ঘো চ ভিজ্জতীতি? ন হেৰং ৰত্তব্বে…পে॰… কপ্পট্ঠো কপ্পং তিট্ঠেয্যাতি? আমন্তা। কপ্পো চ সণ্ঠাতি কপ্পট্ঠো চ কপ্পট্ঠিযং কম্মং করোতীতি? ন হেৰং ৰত্তব্বে…পে॰… কপ্পট্ঠো কপ্পং তিট্ঠেয্যাতি? আমন্তা। কপ্পো চ সণ্ঠাতি কপ্পট্ঠো চ পুগ্গলো কালং করোতীতি? ন হেৰং ৰত্তব্বে…পে॰…।
654. Kappaṭṭho kappaṃ tiṭṭheyyāti? Āmantā. Kappo ca saṇṭhāti buddho ca loke uppajjatīti? Na hevaṃ vattabbe…pe…. Kappaṭṭho kappaṃ tiṭṭheyyāti? Āmantā. Kappo ca saṇṭhāti saṅgho ca bhijjatīti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Kappo ca saṇṭhāti kappaṭṭho ca kappaṭṭhiyaṃ kammaṃ karotīti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Kappo ca saṇṭhāti kappaṭṭho ca puggalo kālaṃ karotīti? Na hevaṃ vattabbe…pe….
৬৫৫. কপ্পট্ঠো কপ্পং তিট্ঠেয্যাতি? আমন্তা। অতীতং কপ্পং তিট্ঠেয্য, অনাগতং কপ্পং তিট্ঠেয্যাতি? ন হেৰং ৰত্তব্বে…পে॰… কপ্পট্ঠো কপ্পং তিট্ঠেয্যাতি? আমন্তা। দ্ৰে কপ্পে তিট্ঠেয্য… তযো কপ্পে তিট্ঠেয্য… চত্তারো কপ্পে তিট্ঠেয্যাতি? ন হেৰং ৰত্তব্বে…পে॰…।
655. Kappaṭṭho kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Dve kappe tiṭṭheyya… tayo kappe tiṭṭheyya… cattāro kappe tiṭṭheyyāti? Na hevaṃ vattabbe…pe….
৬৫৬. কপ্পট্ঠো কপ্পং তিট্ঠেয্যাতি? আমন্তা। কপ্পট্ঠো কপ্পে ডয্হন্তে কত্থ গচ্ছতীতি? অঞ্ঞং লোকধাতুং গচ্ছতীতি। মতো গচ্ছতি, ৰেহাসং গচ্ছতীতি? মতো গচ্ছতীতি। কপ্পট্ঠিযং কম্মং অপরাপরিযৰেপক্কন্তি? ন হেৰং ৰত্তব্বে…পে॰… 1 ৰেহাসং গচ্ছতীতি? আমন্তা 2। কপ্পট্ঠো ইদ্ধিমাতি? ন হেৰং ৰত্তব্বে…পে॰… কপ্পট্ঠো ইদ্ধিমাতি? আমন্তা। কপ্পট্ঠেন ছন্দিদ্ধিপাদো ভাৰিতো ৰীরিযিদ্ধিপাদো ভাৰিতো চিত্তিদ্ধিপাদো ভাৰিতো ৰীমংসিদ্ধিপাদো ভাৰিতোতি? ন হেৰং ৰত্তব্বে…পে॰…।
656. Kappaṭṭho kappaṃ tiṭṭheyyāti? Āmantā. Kappaṭṭho kappe ḍayhante kattha gacchatīti? Aññaṃ lokadhātuṃ gacchatīti. Mato gacchati, vehāsaṃ gacchatīti? Mato gacchatīti. Kappaṭṭhiyaṃ kammaṃ aparāpariyavepakkanti? Na hevaṃ vattabbe…pe… 3 vehāsaṃ gacchatīti? Āmantā 4. Kappaṭṭho iddhimāti? Na hevaṃ vattabbe…pe… kappaṭṭho iddhimāti? Āmantā. Kappaṭṭhena chandiddhipādo bhāvito vīriyiddhipādo bhāvito cittiddhipādo bhāvito vīmaṃsiddhipādo bhāvitoti? Na hevaṃ vattabbe…pe….
৬৫৭. ন ৰত্তব্বং – ‘‘কপ্পট্ঠো কপ্পং তিট্ঠেয্যা’’তি? আমন্তা। ননু ৰুত্তং ভগৰতা –
657. Na vattabbaṃ – ‘‘kappaṭṭho kappaṃ tiṭṭheyyā’’ti? Āmantā. Nanu vuttaṃ bhagavatā –
‘‘আপাযিকো নেরযিকো, কপ্পট্ঠো সঙ্ঘভেদকো।
‘‘Āpāyiko nerayiko, kappaṭṭho saṅghabhedako;
ৰগ্গরতো অধম্মট্ঠো, যোগক্খেমা পধংসতি।
Vaggarato adhammaṭṭho, yogakkhemā padhaṃsati;
অত্থেৰ সুত্তন্তোতি? আমন্তা। তেন হি কপ্পট্ঠো কপ্পং তিট্ঠেয্যাতি।
Attheva suttantoti? Āmantā. Tena hi kappaṭṭho kappaṃ tiṭṭheyyāti.
কপ্পট্ঠকথা নিট্ঠিতা।
Kappaṭṭhakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. কপ্পট্ঠকথাৰণ্ণনা • 1. Kappaṭṭhakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. কপ্পট্ঠকথাৰণ্ণনা • 1. Kappaṭṭhakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. কপ্পট্ঠকথাৰণ্ণনা • 1. Kappaṭṭhakathāvaṇṇanā
