| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೧೩. ತೇರಸಮವಗ್ಗೋ
13. Terasamavaggo
(೧೨೬) ೧. ಕಪ್ಪಟ್ಠಕಥಾ
(126) 1. Kappaṭṭhakathā
೬೫೪. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ಕಪ್ಪೋ ಚ ಸಣ್ಠಾತಿ ಬುದ್ಧೋ ಚ ಲೋಕೇ ಉಪ್ಪಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ॰…। ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ಕಪ್ಪೋ ಚ ಸಣ್ಠಾತಿ ಸಙ್ಘೋ ಚ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ॰… ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ಕಪ್ಪೋ ಚ ಸಣ್ಠಾತಿ ಕಪ್ಪಟ್ಠೋ ಚ ಕಪ್ಪಟ್ಠಿಯಂ ಕಮ್ಮಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ಕಪ್ಪೋ ಚ ಸಣ್ಠಾತಿ ಕಪ್ಪಟ್ಠೋ ಚ ಪುಗ್ಗಲೋ ಕಾಲಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
654. Kappaṭṭho kappaṃ tiṭṭheyyāti? Āmantā. Kappo ca saṇṭhāti buddho ca loke uppajjatīti? Na hevaṃ vattabbe…pe…. Kappaṭṭho kappaṃ tiṭṭheyyāti? Āmantā. Kappo ca saṇṭhāti saṅgho ca bhijjatīti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Kappo ca saṇṭhāti kappaṭṭho ca kappaṭṭhiyaṃ kammaṃ karotīti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Kappo ca saṇṭhāti kappaṭṭho ca puggalo kālaṃ karotīti? Na hevaṃ vattabbe…pe….
೬೫೫. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ಅತೀತಂ ಕಪ್ಪಂ ತಿಟ್ಠೇಯ್ಯ, ಅನಾಗತಂ ಕಪ್ಪಂ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ॰… ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ದ್ವೇ ಕಪ್ಪೇ ತಿಟ್ಠೇಯ್ಯ… ತಯೋ ಕಪ್ಪೇ ತಿಟ್ಠೇಯ್ಯ… ಚತ್ತಾರೋ ಕಪ್ಪೇ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ॰…।
655. Kappaṭṭho kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Dve kappe tiṭṭheyya… tayo kappe tiṭṭheyya… cattāro kappe tiṭṭheyyāti? Na hevaṃ vattabbe…pe….
೬೫೬. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ। ಕಪ್ಪಟ್ಠೋ ಕಪ್ಪೇ ಡಯ್ಹನ್ತೇ ಕತ್ಥ ಗಚ್ಛತೀತಿ? ಅಞ್ಞಂ ಲೋಕಧಾತುಂ ಗಚ್ಛತೀತಿ। ಮತೋ ಗಚ್ಛತಿ, ವೇಹಾಸಂ ಗಚ್ಛತೀತಿ? ಮತೋ ಗಚ್ಛತೀತಿ। ಕಪ್ಪಟ್ಠಿಯಂ ಕಮ್ಮಂ ಅಪರಾಪರಿಯವೇಪಕ್ಕನ್ತಿ? ನ ಹೇವಂ ವತ್ತಬ್ಬೇ…ಪೇ॰… 1 ವೇಹಾಸಂ ಗಚ್ಛತೀತಿ? ಆಮನ್ತಾ 2। ಕಪ್ಪಟ್ಠೋ ಇದ್ಧಿಮಾತಿ? ನ ಹೇವಂ ವತ್ತಬ್ಬೇ…ಪೇ॰… ಕಪ್ಪಟ್ಠೋ ಇದ್ಧಿಮಾತಿ? ಆಮನ್ತಾ। ಕಪ್ಪಟ್ಠೇನ ಛನ್ದಿದ್ಧಿಪಾದೋ ಭಾವಿತೋ ವೀರಿಯಿದ್ಧಿಪಾದೋ ಭಾವಿತೋ ಚಿತ್ತಿದ್ಧಿಪಾದೋ ಭಾವಿತೋ ವೀಮಂಸಿದ್ಧಿಪಾದೋ ಭಾವಿತೋತಿ? ನ ಹೇವಂ ವತ್ತಬ್ಬೇ…ಪೇ॰…।
656. Kappaṭṭho kappaṃ tiṭṭheyyāti? Āmantā. Kappaṭṭho kappe ḍayhante kattha gacchatīti? Aññaṃ lokadhātuṃ gacchatīti. Mato gacchati, vehāsaṃ gacchatīti? Mato gacchatīti. Kappaṭṭhiyaṃ kammaṃ aparāpariyavepakkanti? Na hevaṃ vattabbe…pe… 3 vehāsaṃ gacchatīti? Āmantā 4. Kappaṭṭho iddhimāti? Na hevaṃ vattabbe…pe… kappaṭṭho iddhimāti? Āmantā. Kappaṭṭhena chandiddhipādo bhāvito vīriyiddhipādo bhāvito cittiddhipādo bhāvito vīmaṃsiddhipādo bhāvitoti? Na hevaṃ vattabbe…pe….
೬೫೭. ನ ವತ್ತಬ್ಬಂ – ‘‘ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾ’’ತಿ? ಆಮನ್ತಾ। ನನು ವುತ್ತಂ ಭಗವತಾ –
657. Na vattabbaṃ – ‘‘kappaṭṭho kappaṃ tiṭṭheyyā’’ti? Āmantā. Nanu vuttaṃ bhagavatā –
‘‘ಆಪಾಯಿಕೋ ನೇರಯಿಕೋ, ಕಪ್ಪಟ್ಠೋ ಸಙ್ಘಭೇದಕೋ।
‘‘Āpāyiko nerayiko, kappaṭṭho saṅghabhedako;
ವಗ್ಗರತೋ ಅಧಮ್ಮಟ್ಠೋ, ಯೋಗಕ್ಖೇಮಾ ಪಧಂಸತಿ।
Vaggarato adhammaṭṭho, yogakkhemā padhaṃsati;
ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ।
Attheva suttantoti? Āmantā. Tena hi kappaṭṭho kappaṃ tiṭṭheyyāti.
ಕಪ್ಪಟ್ಠಕಥಾ ನಿಟ್ಠಿತಾ।
Kappaṭṭhakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೧. ಕಪ್ಪಟ್ಠಕಥಾವಣ್ಣನಾ • 1. Kappaṭṭhakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧. ಕಪ್ಪಟ್ಠಕಥಾವಣ್ಣನಾ • 1. Kappaṭṭhakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧. ಕಪ್ಪಟ್ಠಕಥಾವಣ್ಣನಾ • 1. Kappaṭṭhakathāvaṇṇanā
