| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൩. തേരസമവഗ്ഗോ
13. Terasamavaggo
(൧൨൬) ൧. കപ്പട്ഠകഥാ
(126) 1. Kappaṭṭhakathā
൬൫൪. കപ്പട്ഠോ കപ്പം തിട്ഠേയ്യാതി? ആമന്താ. കപ്പോ ച സണ്ഠാതി ബുദ്ധോ ച ലോകേ ഉപ്പജ്ജതീതി? ന ഹേവം വത്തബ്ബേ…പേ॰…. കപ്പട്ഠോ കപ്പം തിട്ഠേയ്യാതി? ആമന്താ. കപ്പോ ച സണ്ഠാതി സങ്ഘോ ച ഭിജ്ജതീതി? ന ഹേവം വത്തബ്ബേ…പേ॰… കപ്പട്ഠോ കപ്പം തിട്ഠേയ്യാതി? ആമന്താ. കപ്പോ ച സണ്ഠാതി കപ്പട്ഠോ ച കപ്പട്ഠിയം കമ്മം കരോതീതി? ന ഹേവം വത്തബ്ബേ…പേ॰… കപ്പട്ഠോ കപ്പം തിട്ഠേയ്യാതി? ആമന്താ. കപ്പോ ച സണ്ഠാതി കപ്പട്ഠോ ച പുഗ്ഗലോ കാലം കരോതീതി? ന ഹേവം വത്തബ്ബേ…പേ॰….
654. Kappaṭṭho kappaṃ tiṭṭheyyāti? Āmantā. Kappo ca saṇṭhāti buddho ca loke uppajjatīti? Na hevaṃ vattabbe…pe…. Kappaṭṭho kappaṃ tiṭṭheyyāti? Āmantā. Kappo ca saṇṭhāti saṅgho ca bhijjatīti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Kappo ca saṇṭhāti kappaṭṭho ca kappaṭṭhiyaṃ kammaṃ karotīti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Kappo ca saṇṭhāti kappaṭṭho ca puggalo kālaṃ karotīti? Na hevaṃ vattabbe…pe….
൬൫൫. കപ്പട്ഠോ കപ്പം തിട്ഠേയ്യാതി? ആമന്താ. അതീതം കപ്പം തിട്ഠേയ്യ, അനാഗതം കപ്പം തിട്ഠേയ്യാതി? ന ഹേവം വത്തബ്ബേ…പേ॰… കപ്പട്ഠോ കപ്പം തിട്ഠേയ്യാതി? ആമന്താ. ദ്വേ കപ്പേ തിട്ഠേയ്യ… തയോ കപ്പേ തിട്ഠേയ്യ… ചത്താരോ കപ്പേ തിട്ഠേയ്യാതി? ന ഹേവം വത്തബ്ബേ…പേ॰….
655. Kappaṭṭho kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… kappaṭṭho kappaṃ tiṭṭheyyāti? Āmantā. Dve kappe tiṭṭheyya… tayo kappe tiṭṭheyya… cattāro kappe tiṭṭheyyāti? Na hevaṃ vattabbe…pe….
൬൫൬. കപ്പട്ഠോ കപ്പം തിട്ഠേയ്യാതി? ആമന്താ. കപ്പട്ഠോ കപ്പേ ഡയ്ഹന്തേ കത്ഥ ഗച്ഛതീതി? അഞ്ഞം ലോകധാതും ഗച്ഛതീതി. മതോ ഗച്ഛതി, വേഹാസം ഗച്ഛതീതി? മതോ ഗച്ഛതീതി. കപ്പട്ഠിയം കമ്മം അപരാപരിയവേപക്കന്തി? ന ഹേവം വത്തബ്ബേ…പേ॰… 1 വേഹാസം ഗച്ഛതീതി? ആമന്താ 2. കപ്പട്ഠോ ഇദ്ധിമാതി? ന ഹേവം വത്തബ്ബേ…പേ॰… കപ്പട്ഠോ ഇദ്ധിമാതി? ആമന്താ. കപ്പട്ഠേന ഛന്ദിദ്ധിപാദോ ഭാവിതോ വീരിയിദ്ധിപാദോ ഭാവിതോ ചിത്തിദ്ധിപാദോ ഭാവിതോ വീമംസിദ്ധിപാദോ ഭാവിതോതി? ന ഹേവം വത്തബ്ബേ…പേ॰….
656. Kappaṭṭho kappaṃ tiṭṭheyyāti? Āmantā. Kappaṭṭho kappe ḍayhante kattha gacchatīti? Aññaṃ lokadhātuṃ gacchatīti. Mato gacchati, vehāsaṃ gacchatīti? Mato gacchatīti. Kappaṭṭhiyaṃ kammaṃ aparāpariyavepakkanti? Na hevaṃ vattabbe…pe… 3 vehāsaṃ gacchatīti? Āmantā 4. Kappaṭṭho iddhimāti? Na hevaṃ vattabbe…pe… kappaṭṭho iddhimāti? Āmantā. Kappaṭṭhena chandiddhipādo bhāvito vīriyiddhipādo bhāvito cittiddhipādo bhāvito vīmaṃsiddhipādo bhāvitoti? Na hevaṃ vattabbe…pe….
൬൫൭. ന വത്തബ്ബം – ‘‘കപ്പട്ഠോ കപ്പം തിട്ഠേയ്യാ’’തി? ആമന്താ. നനു വുത്തം ഭഗവതാ –
657. Na vattabbaṃ – ‘‘kappaṭṭho kappaṃ tiṭṭheyyā’’ti? Āmantā. Nanu vuttaṃ bhagavatā –
‘‘ആപായികോ നേരയികോ, കപ്പട്ഠോ സങ്ഘഭേദകോ;
‘‘Āpāyiko nerayiko, kappaṭṭho saṅghabhedako;
വഗ്ഗരതോ അധമ്മട്ഠോ, യോഗക്ഖേമാ പധംസതി;
Vaggarato adhammaṭṭho, yogakkhemā padhaṃsati;
അത്ഥേവ സുത്തന്തോതി? ആമന്താ. തേന ഹി കപ്പട്ഠോ കപ്പം തിട്ഠേയ്യാതി.
Attheva suttantoti? Āmantā. Tena hi kappaṭṭho kappaṃ tiṭṭheyyāti.
കപ്പട്ഠകഥാ നിട്ഠിതാ.
Kappaṭṭhakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧. കപ്പട്ഠകഥാവണ്ണനാ • 1. Kappaṭṭhakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൧. കപ്പട്ഠകഥാവണ്ണനാ • 1. Kappaṭṭhakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൧. കപ്പട്ഠകഥാവണ്ണനാ • 1. Kappaṭṭhakathāvaṇṇanā
