| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
13. තෙරසමවග්‌ගො
13. Terasamavaggo
1. කප්‌පට්‌ඨකථාවණ්‌ණනා
1. Kappaṭṭhakathāvaṇṇanā
654-657. ඉදානි කප්‌පට්‌ඨකථා නාම හොති. තත්‌ථ යෙසං ‘‘සඞ්‌ඝං සමග්‌ගං භෙත්‌වාන, කප්‌පං නිරයම්‌හි පච්‌චතී’’ති ‘‘සකලම්‌පි කප්‌පං සඞ්‌ඝභෙදකො නිරයෙ තිට්‌ඨතී’’ති ලද්‌ධි, සෙය්‍යථාපි රාජගිරිකානං; තෙ සන්‌ධාය කප්‌පට්‌ඨොති පුච්‌ඡා සකවාදිස්‌ස, පටිඤ්‌ඤා ඉතරස්‌ස. බුද්‌ධො ච ලොකෙති ඉදං විනා බුද්‌ධුප්‌පාදෙන සඞ්‌ඝභෙදස්‌ස අභාවදස්‌සනත්‌ථං වුත්‌තං. කප්‌පො ච සණ්‌ඨාති සඞ්‌ඝො ච භිජ්‌ජතීතිආදි ‘‘යදි සො සකලං කප්‌පං තිට්‌ඨති, සණ්‌ඨහනතො පට්‌ඨාය තං කම්‌මං කත්‌වා තත්‌ථ උප්‌පජ්‌ජිත්‌වා තිට්‌ඨෙය්‍යා’’ති දස්‌සෙතුං වුත්‌තං. අතීතන්‌තිආදි හෙට්‌ඨා වුත්‌තාධිප්‌පායමෙව. කප්‌පට්‌ඨො ඉද්‌ධිමාති පඤ්‌හෙ භාවනාමයං සන්‌ධාය පටික්‌ඛිපති, පරසමයෙ පනස්‌ස ජාතිමයං ඉද්‌ධිං ඉච්‌ඡන්‌ති, තං සන්‌ධාය පටිජානාති. ඡන්‌දිද්‌ධිපාදොතිආදි ‘‘ජාතිමයාය ඉද්‌ධියා ඉද්‌ධිමාති ලද්‌ධිමත්‌තමෙතං, කිං තෙන, යදි පනස්‌ස ඉද්‌ධි අත්‌ථි, ඉමිනා නයෙන ඉද්‌ධිපාදා භාවිතා භවෙය්‍යු’’න්‌ති චොදනත්‌ථං වුත්‌තං. ආපායිකො නෙරයිකොති සුත්‌තං යං සො එකං කප්‌පං අසීතිභාගෙ කත්‌වා තතො එකභාගමත්‌තං කාලං තිට්‌ඨෙය්‍ය, තං ආයුකප්‌පං සන්‌ධාය වුත්‌තං, තස්‌මා අසාධකන්‌ති.
654-657. Idāni kappaṭṭhakathā nāma hoti. Tattha yesaṃ ‘‘saṅghaṃ samaggaṃ bhetvāna, kappaṃ nirayamhi paccatī’’ti ‘‘sakalampi kappaṃ saṅghabhedako niraye tiṭṭhatī’’ti laddhi, seyyathāpi rājagirikānaṃ; te sandhāya kappaṭṭhoti pucchā sakavādissa, paṭiññā itarassa. Buddho ca loketi idaṃ vinā buddhuppādena saṅghabhedassa abhāvadassanatthaṃ vuttaṃ. Kappo ca saṇṭhāti saṅgho ca bhijjatītiādi ‘‘yadi so sakalaṃ kappaṃ tiṭṭhati, saṇṭhahanato paṭṭhāya taṃ kammaṃ katvā tattha uppajjitvā tiṭṭheyyā’’ti dassetuṃ vuttaṃ. Atītantiādi heṭṭhā vuttādhippāyameva. Kappaṭṭho iddhimāti pañhe bhāvanāmayaṃ sandhāya paṭikkhipati, parasamaye panassa jātimayaṃ iddhiṃ icchanti, taṃ sandhāya paṭijānāti. Chandiddhipādotiādi ‘‘jātimayāya iddhiyā iddhimāti laddhimattametaṃ, kiṃ tena, yadi panassa iddhi atthi, iminā nayena iddhipādā bhāvitā bhaveyyu’’nti codanatthaṃ vuttaṃ. Āpāyiko nerayikoti suttaṃ yaṃ so ekaṃ kappaṃ asītibhāge katvā tato ekabhāgamattaṃ kālaṃ tiṭṭheyya, taṃ āyukappaṃ sandhāya vuttaṃ, tasmā asādhakanti.
කප්‌පට්‌ඨකථාවණ්‌ණනා.
Kappaṭṭhakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (126) 1. කප්‌පට්‌ඨකථා • (126) 1. Kappaṭṭhakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 1. කප්‌පට්‌ඨකථාවණ්‌ණනා • 1. Kappaṭṭhakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 1. කප්‌පට්‌ඨකථාවණ්‌ණනා • 1. Kappaṭṭhakathāvaṇṇanā
