| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৫. কপ্পত্থেরগাথাৰণ্ণনা
5. Kappattheragāthāvaṇṇanā
নানাকুলমলসম্পুণ্ণোতিআদিকা আযস্মতো কপ্পত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিদ্ধত্থস্স ভগৰতো কালে ৰিভৰসম্পন্নে কুলে নিব্বত্তিত্ৰা পিতু অচ্চযেন ৰিঞ্ঞুতং পত্তো নানাৰিরাগৰণ্ণৰিচিত্তেহি ৰত্থেহি অনেকৰিধেহি আভরণেহি নানাৰিধেহি মণিরতনেহি বহুৰিধেহি পুপ্ফদামমালাদীহি চ কপ্পরুক্খং নাম অলঙ্করিত্ৰা তেন সত্থু থূপং পূজেসি। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে মণ্ডলিকরাজকুলে নিব্বত্তিত্ৰা পিতু অচ্চযেন রজ্জে পতিট্ঠিতো কামেসু অতিৰিয রত্তো গিদ্ধো হুত্ৰা ৰিহরতি। তং সত্থা মহাকরুণাসমাপত্তিতো ৰুট্ঠায লোকং ৰোলোকেন্তো ঞাণজালে পঞ্ঞাযমানং দিস্ৰা, ‘‘কিং নু খো ভৰিস্সতী’’তি আৰজ্জেন্তো, ‘‘এস মম সন্তিকে অসুভকথং সুত্ৰা কামেসু ৰিরত্তচিত্তো হুত্ৰা পব্বজিত্ৰা অরহত্তং পাপুণিস্সতী’’তি ঞত্ৰা আকাসেন তত্থ গন্ত্ৰা –
Nānākulamalasampuṇṇotiādikā āyasmato kappattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto siddhatthassa bhagavato kāle vibhavasampanne kule nibbattitvā pitu accayena viññutaṃ patto nānāvirāgavaṇṇavicittehi vatthehi anekavidhehi ābharaṇehi nānāvidhehi maṇiratanehi bahuvidhehi pupphadāmamālādīhi ca kapparukkhaṃ nāma alaṅkaritvā tena satthu thūpaṃ pūjesi. So tena puññakammena devamanussesu saṃsaranto imasmiṃ buddhuppāde magadharaṭṭhe maṇḍalikarājakule nibbattitvā pitu accayena rajje patiṭṭhito kāmesu ativiya ratto giddho hutvā viharati. Taṃ satthā mahākaruṇāsamāpattito vuṭṭhāya lokaṃ volokento ñāṇajāle paññāyamānaṃ disvā, ‘‘kiṃ nu kho bhavissatī’’ti āvajjento, ‘‘esa mama santike asubhakathaṃ sutvā kāmesu virattacitto hutvā pabbajitvā arahattaṃ pāpuṇissatī’’ti ñatvā ākāsena tattha gantvā –
৫৬৭.
567.
‘‘নানাকুলমলসম্পুণ্ণো , মহাউক্কারসম্ভৰো।
‘‘Nānākulamalasampuṇṇo , mahāukkārasambhavo;
চন্দনিকংৰ পরিপক্কং, মহাগণ্ডো মহাৰণো॥
Candanikaṃva paripakkaṃ, mahāgaṇḍo mahāvaṇo.
৫৬৮.
568.
‘‘পুব্বরুহিরসম্পুণ্ণো, গূথকূপেন গাল়্হিতো।
‘‘Pubbaruhirasampuṇṇo, gūthakūpena gāḷhito;
আপোপগ্ঘরণো কাযো, সদা সন্দতি পূতিকং॥
Āpopaggharaṇo kāyo, sadā sandati pūtikaṃ.
৫৬৯.
569.
‘‘সট্ঠিকণ্ডরসম্বন্ধো, মংসলেপনলেপিতো।
‘‘Saṭṭhikaṇḍarasambandho, maṃsalepanalepito;
চম্মকঞ্চুকসন্নদ্ধো, পূতিকাযো নিরত্থকো॥
Cammakañcukasannaddho, pūtikāyo niratthako.
৫৭০.
570.
‘‘অট্ঠিসঙ্ঘাতঘটিতো, ন্হারুসুত্তনিবন্ধনো।
‘‘Aṭṭhisaṅghātaghaṭito, nhārusuttanibandhano;
নেকেসং সংগতীভাৰা, কপ্পেতি ইরিযাপথং॥
Nekesaṃ saṃgatībhāvā, kappeti iriyāpathaṃ.
৫৭১.
571.
‘‘ধুৰপ্পযাতো মরণায, মচ্চুরাজস্স সন্তিকে।
‘‘Dhuvappayāto maraṇāya, maccurājassa santike;
ইধেৰ ছড্ডযিত্ৰান, যেনকামঙ্গমো নরো॥
Idheva chaḍḍayitvāna, yenakāmaṅgamo naro.
৫৭২.
572.
‘‘অৰিজ্জায নিৰুতো কাযো, চতুগন্থেন গন্থিতো।
‘‘Avijjāya nivuto kāyo, catuganthena ganthito;
ওঘসংসীদনো কাযো, অনুসযাজালমোত্থতো॥
Oghasaṃsīdano kāyo, anusayājālamotthato.
৫৭৩.
573.
‘‘পঞ্চনীৰরণে যুত্তো, ৰিতক্কেন সমপ্পিতো।
‘‘Pañcanīvaraṇe yutto, vitakkena samappito;
তণ্হামূলেনানুগতো, মোহচ্ছাদনছাদিতো॥
Taṇhāmūlenānugato, mohacchādanachādito.
৫৭৪.
574.
‘‘এৰাযং ৰত্ততে কাযো, কম্মযন্তেন যন্তিতো।
‘‘Evāyaṃ vattate kāyo, kammayantena yantito;
সম্পত্তি চ ৰিপত্যন্তা, নানাভাৰো ৰিপজ্জতি॥
Sampatti ca vipatyantā, nānābhāvo vipajjati.
৫৭৫.
575.
‘‘যেমং কাযং মমাযন্তি, অন্ধবালা পুথুজ্জনা।
‘‘Yemaṃ kāyaṃ mamāyanti, andhabālā puthujjanā;
ৰড্ঢেন্তি কটসিং ঘোরং, আদিযন্তি পুনব্ভৰং॥
Vaḍḍhenti kaṭasiṃ ghoraṃ, ādiyanti punabbhavaṃ.
৫৭৬.
576.
‘‘যেমং কাযং ৰিৰজ্জেন্তি, গূথলিত্তংৰ পন্নগং।
‘‘Yemaṃ kāyaṃ vivajjenti, gūthalittaṃva pannagaṃ;
ভৰমূলং ৰমিত্ৰান, পরিনিব্বিস্সন্তিনাসৰা’’তি॥ –
Bhavamūlaṃ vamitvāna, parinibbissantināsavā’’ti. –
ইমাহি গাথাহি তস্স অসুভকথং কথেসি। সো সত্থু সম্মুখা অনেকাকারৰোকারং যাথাৰতো সরীরসভাৰৰিভাৰনং অসুভকথং সুত্ৰা সকেন কাযেন অট্টীযমানো হরাযমানো জিগুচ্ছমানো সংৰিগ্গহদযো সত্থারং ৰন্দিত্ৰা, ‘‘লভেয্যাহং, ভন্তে, ভগৰতো সন্তিকে পব্বজ্জ’’ন্তি পব্বজ্জং যাচি। সত্থা সমীপে ঠিতমঞ্ঞতরং ভিক্খুং আণাপেসি – ‘‘গচ্ছ, ভিক্খু, ইমং পব্বাজেত্ৰা উপসম্পাদেত্ৰা আনেহী’’তি। সো তং তচপঞ্চককম্মট্ঠানং দত্ৰা পব্বাজেসি। সো খুরগ্গেযেৰ সহ পটিসম্ভিদাহি অরহত্তং পাপুণি। তেন ৰুত্তং অপদানে (অপ॰ তের ১.৪.১০২-১০৭) –
Imāhi gāthāhi tassa asubhakathaṃ kathesi. So satthu sammukhā anekākāravokāraṃ yāthāvato sarīrasabhāvavibhāvanaṃ asubhakathaṃ sutvā sakena kāyena aṭṭīyamāno harāyamāno jigucchamāno saṃviggahadayo satthāraṃ vanditvā, ‘‘labheyyāhaṃ, bhante, bhagavato santike pabbajja’’nti pabbajjaṃ yāci. Satthā samīpe ṭhitamaññataraṃ bhikkhuṃ āṇāpesi – ‘‘gaccha, bhikkhu, imaṃ pabbājetvā upasampādetvā ānehī’’ti. So taṃ tacapañcakakammaṭṭhānaṃ datvā pabbājesi. So khuraggeyeva saha paṭisambhidāhi arahattaṃ pāpuṇi. Tena vuttaṃ apadāne (apa. tera 1.4.102-107) –
‘‘সিদ্ধত্থস্স ভগৰতো, থূপসেট্ঠস্স সম্মুখা।
‘‘Siddhatthassa bhagavato, thūpaseṭṭhassa sammukhā;
ৰিচিত্তদুস্সে লগেত্ৰা, কপ্পরুক্খং ঠপেসহং॥
Vicittadusse lagetvā, kapparukkhaṃ ṭhapesahaṃ.
‘‘যং যং যোনুপপজ্জামি, দেৰত্তং অথ মানুসং।
‘‘Yaṃ yaṃ yonupapajjāmi, devattaṃ atha mānusaṃ;
সোভযন্তো মম দ্ৰারং, কপ্পরুক্খো পতিট্ঠতি॥
Sobhayanto mama dvāraṃ, kapparukkho patiṭṭhati.
‘‘অহঞ্চ পরিসা চেৰ, যে কেচি মমৰস্সিতা।
‘‘Ahañca parisā ceva, ye keci mamavassitā;
তম্হা দুস্সং গহেত্ৰান, নিৰাসেম মযং সদা॥
Tamhā dussaṃ gahetvāna, nivāsema mayaṃ sadā.
‘‘চতুন্নৰুতিতো কপ্পে, যং রুক্খং ঠপযিং অহং।
‘‘Catunnavutito kappe, yaṃ rukkhaṃ ṭhapayiṃ ahaṃ;
দুগ্গতিং নাভিজানামি, কপ্পরুক্খস্সিদং ফলং॥
Duggatiṃ nābhijānāmi, kapparukkhassidaṃ phalaṃ.
‘‘ইতো চ সত্তমে কপ্পে, সুচেল়া অট্ঠ খত্তিযা।
‘‘Ito ca sattame kappe, suceḷā aṭṭha khattiyā;
সত্তরতনসম্পন্না, চক্কৰত্তী মহব্বলা॥
Sattaratanasampannā, cakkavattī mahabbalā.
‘‘পটিসম্ভিদা চতস্সো…পে॰… কতং বুদ্ধস্স সাসন’’ন্তি॥
‘‘Paṭisambhidā catasso…pe… kataṃ buddhassa sāsana’’nti.
অরহত্তং পন পত্ৰা লদ্ধূপসম্পদো সত্থারং উপসঙ্কমিত্ৰা ৰন্দিত্ৰা একমন্তং নিসিন্নো অঞ্ঞং ব্যাকরোন্তো তা এৰ গাথা অভাসি। তেনেৰ তা থেরগাথা নাম জাতা।
Arahattaṃ pana patvā laddhūpasampado satthāraṃ upasaṅkamitvā vanditvā ekamantaṃ nisinno aññaṃ byākaronto tā eva gāthā abhāsi. Teneva tā theragāthā nāma jātā.
তত্থ নানাকুলমলসম্পুণ্ণোতি, নানাকুলেহি নানাভাগেহি মলেহি সম্পুণ্ণো, কেসলোমাদিনানাৰিধঅসুচিকোট্ঠাসভরিতোতি অত্থো। মহাউক্কারসম্ভৰোতি, উক্কারো ৰুচ্চতি ৰচ্চকূপং। যত্তকৰযা মাতা, তত্তকং কালং কারপরিসেদিতৰচ্চকূপসদিসতায মাতু কুচ্ছি ইধ ‘‘মহাউক্কারো’’তি অধিপ্পেতো। সো কুচ্ছি সম্ভৰো উপ্পত্তিট্ঠানং এতস্সাতি মহাউক্কারসম্ভৰো। চন্দনিকংৰাতি চন্দনিকং নাম উচ্ছিট্ঠোদকগব্ভমলাদীনং ছড্ডনট্ঠানং, যং জণ্ণুমত্তং অসুচিভরিতম্পি হোতি, তাদিসন্তি অত্থো। পরিপক্কন্তি, পরিণতং পুরাণং। তেন যথা চণ্ডালগামদ্ৰারে নিদাঘসমযে থুল্লফুসিতকে দেৰে ৰস্সন্তে উদকেন সমুপব্যূল়্হমুত্তকরীসঅট্ঠিচম্মন্হারুখণ্ডখেল়সিঙ্ঘাণিকাদিনানাকুণপভরিতং কদ্দমোদকালুল়িতং কতিপযদিৰসাতিক্কমেন সংজাত কিমিকুলাকুলং সূরিযাতপসন্তাপকুথিতং উপরি ফেণপুব্বুল়কানি মুঞ্চন্তং অভিনীলৰণ্ণং পরমদুগ্গন্ধং জেগুচ্ছং চন্দনিকাৰাটং নেৰ উপগন্তুং, ন দট্ঠুং অরহরূপং হুত্ৰা তিট্ঠতি, তথারূপোযং কাযোতি দস্সেতি। সদা দুক্খতামূলযোগতো অসুচিপগ্ঘরণতো উপ্পাদজরামরণেহি উদ্ধুমাযনপরিপচ্চনভিজ্জনসভাৰত্তা চ মহন্তো গণ্ডো ৰিযাতি মহাগণ্ডো। সব্বত্থকমেৰ দুক্খৰেদনানুবদ্ধত্তা গণ্ডানং সহনতো অসুচিৰিস্সন্দনতো চ মহন্তো ৰণো ৰিযাতি মহাৰণো গূথকূপেন গাল়িতোতি, ৰচ্চকূপেন ৰচ্চেনেৰ ৰা ভরিতো। ‘‘গূথকূপনিগাল়্হিতো’’তিপি পাল়ি, ৰচ্চকূপতো নিক্খন্তোতি অত্থো। আপোপগ্ঘরণো কাযো, সদা সন্দতি পূতিকন্তি, অযং কাযো আপোধাতুযা সদা পগ্ঘরণসীলো, তঞ্চ খো পিত্তসেম্হসেদমুত্তাদিকং পূতিকং অসুচিংযেৰ সন্দতি, ন কদাচি সুচিন্তি অত্থো।
Tattha nānākulamalasampuṇṇoti, nānākulehi nānābhāgehi malehi sampuṇṇo, kesalomādinānāvidhaasucikoṭṭhāsabharitoti attho. Mahāukkārasambhavoti, ukkāro vuccati vaccakūpaṃ. Yattakavayā mātā, tattakaṃ kālaṃ kārapariseditavaccakūpasadisatāya mātu kucchi idha ‘‘mahāukkāro’’ti adhippeto. So kucchi sambhavo uppattiṭṭhānaṃ etassāti mahāukkārasambhavo. Candanikaṃvāti candanikaṃ nāma ucchiṭṭhodakagabbhamalādīnaṃ chaḍḍanaṭṭhānaṃ, yaṃ jaṇṇumattaṃ asucibharitampi hoti, tādisanti attho. Paripakkanti, pariṇataṃ purāṇaṃ. Tena yathā caṇḍālagāmadvāre nidāghasamaye thullaphusitake deve vassante udakena samupabyūḷhamuttakarīsaaṭṭhicammanhārukhaṇḍakheḷasiṅghāṇikādinānākuṇapabharitaṃ kaddamodakāluḷitaṃ katipayadivasātikkamena saṃjāta kimikulākulaṃ sūriyātapasantāpakuthitaṃ upari pheṇapubbuḷakāni muñcantaṃ abhinīlavaṇṇaṃ paramaduggandhaṃ jegucchaṃ candanikāvāṭaṃ neva upagantuṃ, na daṭṭhuṃ araharūpaṃ hutvā tiṭṭhati, tathārūpoyaṃ kāyoti dasseti. Sadā dukkhatāmūlayogato asucipaggharaṇato uppādajarāmaraṇehi uddhumāyanaparipaccanabhijjanasabhāvattā ca mahanto gaṇḍo viyāti mahāgaṇḍo. Sabbatthakameva dukkhavedanānubaddhattā gaṇḍānaṃ sahanato asucivissandanato ca mahanto vaṇo viyāti mahāvaṇo gūthakūpena gāḷitoti, vaccakūpena vacceneva vā bharito. ‘‘Gūthakūpanigāḷhito’’tipi pāḷi, vaccakūpato nikkhantoti attho. Āpopaggharaṇo kāyo, sadā sandati pūtikanti, ayaṃ kāyo āpodhātuyā sadā paggharaṇasīlo, tañca kho pittasemhasedamuttādikaṃ pūtikaṃ asuciṃyeva sandati, na kadāci sucinti attho.
সট্ঠিকণ্ডরসম্বন্ধোতি , গীৰায উপরিমভাগতো পট্ঠায সরীরং ৰিনদ্ধমানা সরীরস্স পুরিমপচ্ছিমদক্খিণৰামপস্সেসু পচ্চেকং পঞ্চ পঞ্চ কত্ৰা ৰীসতি, হত্থপাদে ৰিনদ্ধমানা তেসং পুরিমপচ্ছিমপস্সেসু পঞ্চ পঞ্চ কত্ৰা চত্তালীসাতি সট্ঠিযা কণ্ডরেহি মহান্হারূহি সব্বসো বদ্ধো ৰিনদ্ধোতি সট্ঠিকণ্ডরসম্বন্ধো। মংসলেপনলেপিতোতি, মংসসঙ্খাতেন লেপনেন লিত্তো, নৰমংসপেসিসতানুলিত্তোতি অত্থো। চম্মকঞ্চুকসন্নদ্ধোতি, চম্মসঙ্খাতেন কঞ্চুকেন সব্বসো ওনদ্ধো পরিযোনদ্ধো পরিচ্ছিন্নো। পূতিকাযোতি, সব্বসো পূতিগন্ধিকো কাযো। নিরত্থকোতি, নিপ্পযোজনো। অঞ্ঞেসঞ্হি পাণীনং কাযো চম্মাদিৰিনিযোগেন সিযা সপ্পযোজনো, ন তথা মনুস্সকাযোতি। অট্ঠিসঙ্ঘাতঘটিতোতি, অতিরেকতিসতানং অট্ঠীনং সঙ্ঘাতেন ঘটিতো সম্বন্ধো। ন্হারুসুত্তনিবন্ধনোতি, সুত্তসদিসেহি নৰহি ন্হারুসতেহি নিবন্ধিতো। নেকেসং সংগতীভাৰাতি, চতুমহাভূতজীৰিতিন্দ্রিযঅস্সাসপস্সাসৰিঞ্ঞাণাদীনং সমৰাযসম্বন্ধেন সুত্তমেরকসমৰাযেন যন্তং ৰিয ঠানাদিইরিযাপথং কপ্পেতি।
Saṭṭhikaṇḍarasambandhoti , gīvāya uparimabhāgato paṭṭhāya sarīraṃ vinaddhamānā sarīrassa purimapacchimadakkhiṇavāmapassesu paccekaṃ pañca pañca katvā vīsati, hatthapāde vinaddhamānā tesaṃ purimapacchimapassesu pañca pañca katvā cattālīsāti saṭṭhiyā kaṇḍarehi mahānhārūhi sabbaso baddho vinaddhoti saṭṭhikaṇḍarasambandho. Maṃsalepanalepitoti, maṃsasaṅkhātena lepanena litto, navamaṃsapesisatānulittoti attho. Cammakañcukasannaddhoti, cammasaṅkhātena kañcukena sabbaso onaddho pariyonaddho paricchinno. Pūtikāyoti, sabbaso pūtigandhiko kāyo. Niratthakoti, nippayojano. Aññesañhi pāṇīnaṃ kāyo cammādiviniyogena siyā sappayojano, na tathā manussakāyoti. Aṭṭhisaṅghātaghaṭitoti, atirekatisatānaṃ aṭṭhīnaṃ saṅghātena ghaṭito sambandho. Nhārusuttanibandhanoti, suttasadisehi navahi nhārusatehi nibandhito. Nekesaṃ saṃgatībhāvāti, catumahābhūtajīvitindriyaassāsapassāsaviññāṇādīnaṃ samavāyasambandhena suttamerakasamavāyena yantaṃ viya ṭhānādiiriyāpathaṃ kappeti.
ধুৰপ্পযাতো মরণাযাতি, মরণস্স অত্থায একন্তগমনো, নিব্বত্তিতো পট্ঠায মরণং পতি পৰত্তো। ততো এৰ মচ্চুরাজস্স মরণস্স সন্তিকে ঠিতো। ইধেৰ ছড্ডযিত্ৰানাতি, ইমস্মিংযেৰ লোকে কাযং ছড্ডেত্ৰা, যথারুচিতট্ঠানগামী অযং সত্তো, তস্মা ‘‘পহায গমনীযো অযং কাযো’’তি এৰম্পি সঙ্গো ন কাতব্বোতি দস্সেতি।
Dhuvappayāto maraṇāyāti, maraṇassa atthāya ekantagamano, nibbattito paṭṭhāya maraṇaṃ pati pavatto. Tato eva maccurājassa maraṇassa santike ṭhito. Idheva chaḍḍayitvānāti, imasmiṃyeva loke kāyaṃ chaḍḍetvā, yathārucitaṭṭhānagāmī ayaṃ satto, tasmā ‘‘pahāya gamanīyo ayaṃ kāyo’’ti evampi saṅgo na kātabboti dasseti.
অৰিজ্জায নিৰুতোতি, অৰিজ্জানীৰরণেন নিৰুতো পটিচ্ছাদিতাদীনৰো, অঞ্ঞথা কো এত্থ সঙ্গং জনেয্যাতি অধিপ্পাযো। চতুগন্থেনাতি, অভিজ্ঝাকাযগন্থাদিনা চতুব্বিধেন গন্থেন গন্থিতো, গন্থনিযভাৰেন ৰিনদ্ধিতো। ওঘসংসীদনোতি, ওঘনিযভাৰেন কামোঘাদীসু চতূসু ওঘেসু সংসীদনকো। অপ্পহীনভাৰেন সন্তানে অনু অনু সেন্তীতি অনুসযা, কামরাগাদযো অনুসযা। তেসং জালেন ওত্থতো অভিভূতোতি অনুসযাজালমোত্থতো। মকারো পদসন্ধিকরো, গাথাসুখত্থং দীঘং কত্ৰা ৰুত্তং। কামচ্ছন্দাদিনা পঞ্চৰিধেন নীৰরণেন যুত্তো অধিমুত্তোতি পঞ্চনীৰরণে যুত্তো, করণত্থে ভুম্মৰচনং।
Avijjāya nivutoti, avijjānīvaraṇena nivuto paṭicchāditādīnavo, aññathā ko ettha saṅgaṃ janeyyāti adhippāyo. Catuganthenāti, abhijjhākāyaganthādinā catubbidhena ganthena ganthito, ganthaniyabhāvena vinaddhito. Oghasaṃsīdanoti, oghaniyabhāvena kāmoghādīsu catūsu oghesu saṃsīdanako. Appahīnabhāvena santāne anu anu sentīti anusayā, kāmarāgādayo anusayā. Tesaṃ jālena otthato abhibhūtoti anusayājālamotthato. Makāro padasandhikaro, gāthāsukhatthaṃ dīghaṃ katvā vuttaṃ. Kāmacchandādinā pañcavidhena nīvaraṇena yutto adhimuttoti pañcanīvaraṇe yutto, karaṇatthe bhummavacanaṃ.
কামৰিতক্কাদিনা মিচ্ছাৰিতক্কেন সমপ্পিতো সমস্সিতোতি ৰিতক্কেন সমপ্পিতো। তণ্হামূলেনানুগতোতি, তণ্হাসঙ্খাতেন ভৰমূলেন অনুবদ্ধো। মোহচ্ছাদনছাদিতোতি, সম্মোহসঙ্খাতেন আৰরণেন পলিগুণ্ঠিতো। সব্বমেতং সৰিঞ্ঞাণকং করজকাযং সন্ধায ৰদতি। সৰিঞ্ঞাণকো হি অত্তভাৰো ‘‘উচ্ছিন্নভৰনেত্তিকো, ভিক্খৰে, তথাগতস্স কাযো তিট্ঠতি, অযঞ্চেৰ কাযো বহিদ্ধা চ নামরূপ’’ন্তিআদীসু (দী॰ নি॰ ১.১.১৪৭) কাযোতি ৰুচ্চতি, এৰাযং ৰত্ততে কাযোতি এৰং ‘‘নানাকুলমলসম্পুণ্ণো’’তিআদিনা ‘‘অৰিজ্জায নিৰুতো’’তিআদিনা চ ৰুত্তপ্পকারেন অযং কাযো ৰত্ততি, ৰত্তন্তো চ কম্মযন্তেন সুকতদুক্কটেন কম্মসঙ্খাতেন যন্তেন যন্তিতো সঙ্ঘটিতো। যথা ৰা খেমন্তং গন্তুং ন সক্কোতি, তথা সঙ্খোভিতো সুগতিদুগ্গতীসু ৰত্ততি পরিব্ভমতি। সম্পত্তি চ ৰিপত্যন্তাতি যা এত্থ সম্পত্তি, সা ৰিপত্তিপরিযোসানা। সব্বঞ্হি যোব্বনং জরাপরিযোসানং, সব্বং আরোগ্যং ব্যাধিপরিযোসানং, সব্বং জীৰিতং মরণপরিযোসানং, সব্বো সমাগমো ৰিযোগপরিযোসানো। তেনাহ ‘‘নানাভাৰো ৰিপজ্জতী’’তি। নানাভাৰোতি, ৰিনাভাৰো ৰিপ্পযোগো, সো কদাচি ৰিপ্পযুঞ্জকস্স ৰসেন, কদাচি ৰিপ্পযুঞ্জিতব্বস্স ৰসেনাতি ৰিৰিধং পজ্জতি পাপুণীযতি।
Kāmavitakkādinā micchāvitakkena samappito samassitoti vitakkena samappito. Taṇhāmūlenānugatoti, taṇhāsaṅkhātena bhavamūlena anubaddho. Mohacchādanachāditoti, sammohasaṅkhātena āvaraṇena paliguṇṭhito. Sabbametaṃ saviññāṇakaṃ karajakāyaṃ sandhāya vadati. Saviññāṇako hi attabhāvo ‘‘ucchinnabhavanettiko, bhikkhave, tathāgatassa kāyo tiṭṭhati, ayañceva kāyo bahiddhā ca nāmarūpa’’ntiādīsu (dī. ni. 1.1.147) kāyoti vuccati, evāyaṃ vattate kāyoti evaṃ ‘‘nānākulamalasampuṇṇo’’tiādinā ‘‘avijjāya nivuto’’tiādinā ca vuttappakārena ayaṃ kāyo vattati, vattanto ca kammayantena sukatadukkaṭena kammasaṅkhātena yantena yantito saṅghaṭito. Yathā vā khemantaṃ gantuṃ na sakkoti, tathā saṅkhobhito sugatiduggatīsu vattati paribbhamati. Sampatti ca vipatyantāti yā ettha sampatti, sā vipattipariyosānā. Sabbañhi yobbanaṃ jarāpariyosānaṃ, sabbaṃ ārogyaṃ byādhipariyosānaṃ, sabbaṃ jīvitaṃ maraṇapariyosānaṃ, sabbo samāgamo viyogapariyosāno. Tenāha ‘‘nānābhāvo vipajjatī’’ti. Nānābhāvoti, vinābhāvo vippayogo, so kadāci vippayuñjakassa vasena, kadāci vippayuñjitabbassa vasenāti vividhaṃ pajjati pāpuṇīyati.
যেমং কাযং মমাযন্তীতি যে অন্ধবালা পুথুজ্জনা এৰং অসুভং অনিচ্চং অধুৰং দুক্খং অসারং ইমং কাযং ‘‘মম ইদ’’ন্তি গণ্হন্তা মমাযন্তি ছন্দরাগং উপ্পাদেন্তি, তে জাতিআদীহি নিরযাদীহি চ ঘোরং ভযানকং অপণ্ডিতেহি অভিরমিতব্বতো কটসিসঙ্খাতং সংসারং পুনপ্পুনং জননমরণাদীহি ৰড্ঢেন্তি, তেনাহ ‘‘আদিযন্তি পুনব্ভৰ’’ন্তি।
Yemaṃ kāyaṃ mamāyantīti ye andhabālā puthujjanā evaṃ asubhaṃ aniccaṃ adhuvaṃ dukkhaṃ asāraṃ imaṃ kāyaṃ ‘‘mama ida’’nti gaṇhantā mamāyanti chandarāgaṃ uppādenti, te jātiādīhi nirayādīhi ca ghoraṃ bhayānakaṃ apaṇḍitehi abhiramitabbato kaṭasisaṅkhātaṃ saṃsāraṃ punappunaṃ jananamaraṇādīhi vaḍḍhenti, tenāha ‘‘ādiyanti punabbhava’’nti.
যেমং কাযং ৰিৰজ্জেন্তি, গূথলিত্তংৰ পন্নগন্তি যথা নাম পুরিসো সুখকামো জীৰিতুকামো গূথগতং আসীৰিসং দিস্ৰা জিগুচ্ছনিযতায ৰা সপ্পটিভযতায ৰা ৰিৰজ্জেতি ন অল্লীযতি, এৰমেৰং যে পণ্ডিতা কুলপুত্তা অসুচিভাৰেন জেগুচ্ছং অনিচ্চাদিভাৰেন সপ্পটিভযং ইমং কাযং ৰিৰজ্জেন্তি ছন্দরাগপ্পহানেন পজহন্তি। তে ভৰমূলং অৰিজ্জং ভৰতণ্হঞ্চ ৰমিত্ৰা ছড্ডেত্ৰা অচ্চন্তমেৰ পহায ততো এৰ সব্বসো অনাসৰা সউপাদিসেসায অনুপাদিসেসায চ নিব্বানধাতুযা পরিনিব্বাযিস্সন্তীতি।
Yemaṃ kāyaṃ vivajjenti, gūthalittaṃva pannaganti yathā nāma puriso sukhakāmo jīvitukāmo gūthagataṃ āsīvisaṃ disvā jigucchaniyatāya vā sappaṭibhayatāya vā vivajjeti na allīyati, evamevaṃ ye paṇḍitā kulaputtā asucibhāvena jegucchaṃ aniccādibhāvena sappaṭibhayaṃ imaṃ kāyaṃ vivajjenti chandarāgappahānena pajahanti. Te bhavamūlaṃ avijjaṃ bhavataṇhañca vamitvā chaḍḍetvā accantameva pahāya tato eva sabbaso anāsavā saupādisesāya anupādisesāya ca nibbānadhātuyā parinibbāyissantīti.
কপ্পত্থেরগাথাৰণ্ণনা নিট্ঠিতা।
Kappattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৫. কপ্পত্থেরগাথা • 5. Kappattheragāthā
