| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
179. габбияабхуумиануж̇аананаа
179. Kappiyabhūmianujānanā
295. д̇зна ко бана самаязна взсаалий субхигкаа ход̇и сусассаа сулабхабин̣д̣аа, сугараа ун̃чзна баг̇г̇ахзна яаабзд̇ум̣. ат̇а ко бхаг̇авад̇о рахог̇ад̇асса бадисаллийнасса звам̣ жзд̇асо баривид̇агго уд̣̇абаад̣̇и – ‘‘яаани д̇аани маяаа бхигкуунам̣ анун̃н̃аад̇аани д̣̇уб̣бхигкз д̣̇уссассз д̣̇уллабхабин̣д̣з анд̇о вудтам̣ анд̇о баггам̣ саамам̣ баггам̣ уг̇г̇ахид̇абадиг̇г̇ахид̇агам̣ д̇ад̇о нийхадам̣ бурзбхад̇д̇ам̣ бадиг̇г̇ахид̇ам̣ ванадтам̣ богкарадтам̣, аж̇ж̇ааби ну ко д̇аани бхигкуу барибхун̃ж̇анд̇ий’’д̇и. ат̇а ко бхаг̇аваа сааяанхасамаяам̣ бадисаллаанаа вудтид̇о ааяасманд̇ам̣ аананд̣̇ам̣ ааманд̇зси – ‘‘яаани д̇аани, аананд̣̇а, маяаа бхигкуунам̣ анун̃н̃аад̇аани д̣̇уб̣бхигкз д̣̇уссассз д̣̇уллабхабин̣д̣з анд̇о вудтам̣ анд̇о баггам̣ саамам̣ баггам̣ уг̇г̇ахид̇абадиг̇г̇ахид̇агам̣ д̇ад̇о нийхадам̣ бурзбхад̇д̇ам̣ бадиг̇г̇ахид̇ам̣ ванадтам̣ богкарадтам̣, аж̇ж̇ааби ну ко д̇аани бхигкуу барибхун̃ж̇анд̇ий’’д̇и? ‘‘барибхун̃ж̇анд̇и бхаг̇аваа’’д̇и. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘яаани д̇аани, бхигкавз, маяаа бхигкуунам̣ анун̃н̃аад̇аани д̣̇уб̣бхигкз д̣̇уссассз д̣̇уллабхабин̣д̣з анд̇о вудтам̣ анд̇о баггам̣ саамам̣ баггам̣ уг̇г̇ахид̇абадиг̇г̇ахид̇агам̣ д̇ад̇о нийхадам̣ бурзбхад̇д̇ам̣ бадиг̇г̇ахид̇ам̣ ванадтам̣ богкарадтам̣, д̇аанаахам̣ аж̇ж̇ад̇аг̇г̇з бадигкибаами. на, бхигкавз, анд̇о вудтам̣ анд̇о баггам̣ саамам̣ баггам̣ уг̇г̇ахид̇абадиг̇г̇ахид̇агам̣ барибхун̃ж̇ид̇аб̣б̣ам̣. яо барибхун̃ж̇зяяа, аабад̇д̇и д̣̇уггадасса. на жа, бхигкавз, д̇ад̇о нийхадам̣ бурзбхад̇д̇ам̣ бадиг̇г̇ахид̇ам̣ ванадтам̣ богкарадтам̣ бхуд̇д̇аавинаа баваарид̇зна анад̇ирид̇д̇ам̣ барибхун̃ж̇ид̇аб̣б̣ам̣. яо барибхун̃ж̇зяяа, яат̇аад̇хаммо гаарзд̇аб̣б̣о’’д̇и.
295. Tena kho pana samayena vesālī subhikkhā hoti susassā sulabhapiṇḍā, sukarā uñchena paggahena yāpetuṃ. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘yāni tāni mayā bhikkhūnaṃ anuññātāni dubbhikkhe dussasse dullabhapiṇḍe anto vuṭṭhaṃ anto pakkaṃ sāmaṃ pakkaṃ uggahitapaṭiggahitakaṃ tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ, ajjāpi nu kho tāni bhikkhū paribhuñjantī’’ti. Atha kho bhagavā sāyanhasamayaṃ paṭisallānā vuṭṭhito āyasmantaṃ ānandaṃ āmantesi – ‘‘yāni tāni, ānanda, mayā bhikkhūnaṃ anuññātāni dubbhikkhe dussasse dullabhapiṇḍe anto vuṭṭhaṃ anto pakkaṃ sāmaṃ pakkaṃ uggahitapaṭiggahitakaṃ tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ, ajjāpi nu kho tāni bhikkhū paribhuñjantī’’ti? ‘‘Paribhuñjanti bhagavā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘yāni tāni, bhikkhave, mayā bhikkhūnaṃ anuññātāni dubbhikkhe dussasse dullabhapiṇḍe anto vuṭṭhaṃ anto pakkaṃ sāmaṃ pakkaṃ uggahitapaṭiggahitakaṃ tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ, tānāhaṃ ajjatagge paṭikkhipāmi. Na, bhikkhave, anto vuṭṭhaṃ anto pakkaṃ sāmaṃ pakkaṃ uggahitapaṭiggahitakaṃ paribhuñjitabbaṃ. Yo paribhuñjeyya, āpatti dukkaṭassa. Na ca, bhikkhave, tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ bhuttāvinā pavāritena anatirittaṃ paribhuñjitabbaṃ. Yo paribhuñjeyya, yathādhammo kāretabbo’’ti.
д̇зна ко бана самаязна ж̇аанабад̣̇аа мануссаа б̣ахум̣ лон̣амби, д̇зламби, д̇ан̣д̣уламби, каад̣̇анийяамби сагадзсу ааробзд̇ваа б̣ахаараамагодтагз сагадабариваддам̣ гарид̇ваа ажчанд̇и – яад̣̇аа бадибаадим̣ лабхиссаама, д̇ад̣̇аа бхад̇д̇ам̣ гариссаамаад̇и. махаа жа мзгхо уг̇г̇ад̇о ход̇и. ат̇а ко д̇з мануссаа язнааяасмаа аананд̣̇о д̇знубасан̇гамим̣су, убасан̇гамид̇ваа ааяасманд̇ам̣ аананд̣̇ам̣ зд̇ад̣̇авожум̣ – ‘‘ид̇ха, бханд̇з аананд̣̇а, б̣ахум̣ лон̣амби, д̇зламби, д̇ан̣д̣уламби, каад̣̇анийяамби сагадзсу ааробид̇аа д̇идтанд̇и, махаа жа мзгхо уг̇г̇ад̇о ; гат̇ам̣ ну ко, бханд̇з аананд̣̇а, бадибаж̇ж̇ид̇аб̣б̣а’’нд̇и? ат̇а ко ааяасмаа аананд̣̇о бхаг̇авад̇о зд̇амад̇т̇ам̣ аарожзси. ‘‘д̇зна хаананд̣̇а, сан̇гхо бажжанд̇имам̣ вихаарам̣ габбияабхуумим̣ самманнид̇ваа д̇ад̇т̇а ваасзд̇у, яам̣ сан̇гхо ааган̇кад̇и вихаарам̣ ваа ад̣дхаяог̇ам̣ ваа баасаад̣̇ам̣ ваа хаммияам̣ ваа г̇ухам̣ ваа. зван̃жа бана, бхигкавз, самманнид̇аб̣б̣аа. б̣яад̇д̇зна бхигкунаа бадиб̣алзна сан̇гхо н̃аабзд̇аб̣б̣о –
Tena kho pana samayena jānapadā manussā bahuṃ loṇampi, telampi, taṇḍulampi, khādanīyampi sakaṭesu āropetvā bahārāmakoṭṭhake sakaṭaparivaṭṭaṃ karitvā acchanti – yadā paṭipāṭiṃ labhissāma, tadā bhattaṃ karissāmāti. Mahā ca megho uggato hoti. Atha kho te manussā yenāyasmā ānando tenupasaṅkamiṃsu, upasaṅkamitvā āyasmantaṃ ānandaṃ etadavocuṃ – ‘‘idha, bhante ānanda, bahuṃ loṇampi, telampi, taṇḍulampi, khādanīyampi sakaṭesu āropitā tiṭṭhanti, mahā ca megho uggato ; kathaṃ nu kho, bhante ānanda, paṭipajjitabba’’nti? Atha kho āyasmā ānando bhagavato etamatthaṃ ārocesi. ‘‘Tena hānanda, saṅgho paccantimaṃ vihāraṃ kappiyabhūmiṃ sammannitvā tattha vāsetu, yaṃ saṅgho ākaṅkhati vihāraṃ vā aḍḍhayogaṃ vā pāsādaṃ vā hammiyaṃ vā guhaṃ vā. Evañca pana, bhikkhave, sammannitabbā. Byattena bhikkhunā paṭibalena saṅgho ñāpetabbo –
‘‘сун̣аад̇у мз, бханд̇з, сан̇гхо. яад̣̇и сан̇гхасса бад̇д̇агаллам̣, сан̇гхо ид̇т̇аннаамам̣ вихаарам̣ габбияабхуумим̣ самманнзяяа, зсаа н̃ад̇д̇и.
‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ vihāraṃ kappiyabhūmiṃ sammanneyya, esā ñatti.
‘‘сун̣аад̇у мз, бханд̇з, сан̇гхо. сан̇гхо ид̇т̇аннаамам̣ вихаарам̣ габбияабхуумим̣ самманнад̇и . яассааяасмад̇о камад̇и ид̇т̇аннаамасса вихаарасса габбияабхуумияаа саммуд̇и, со д̇ун̣хасса; яасса нагкамад̇и, со бхаасзяяа.
‘‘Suṇātu me, bhante, saṅgho. Saṅgho itthannāmaṃ vihāraṃ kappiyabhūmiṃ sammannati . Yassāyasmato khamati itthannāmassa vihārassa kappiyabhūmiyā sammuti, so tuṇhassa; yassa nakkhamati, so bhāseyya.
‘‘саммад̇о сан̇гхзна ид̇т̇аннаамо вихааро габбияабхууми. камад̇и сан̇гхасса, д̇асмаа д̇ун̣хий, звамзд̇ам̣ д̇хаараяаамий’’д̇и.
‘‘Sammato saṅghena itthannāmo vihāro kappiyabhūmi. Khamati saṅghassa, tasmā tuṇhī, evametaṃ dhārayāmī’’ti.
д̇зна ко бана самаязна мануссаа д̇ад̇т̇зва саммуд̇ияаа 1 габбияабхуумияаа яааг̇уяо бажанд̇и, бхад̇д̇аани бажанд̇и, суубаани самбаад̣̇знд̇и, мам̣саани годдзнд̇и, гадтаани паалзнд̇и. ассоси ко бхаг̇аваа рад̇д̇ияаа бажжуусасамаяам̣ бажжудтааяа ужжаасад̣̇д̣̇ам̣ махаасад̣̇д̣̇ам̣ гаагоравасад̣̇д̣̇ам̣, суд̇ваана ааяасманд̇ам̣ аананд̣̇ам̣ ааманд̇зси – ‘‘гим̣ ну ко со, аананд̣̇а, ужжаасад̣̇д̣̇о махаасад̣̇д̣̇о гаагоравасад̣̇д̣̇о’’д̇и? ‘‘зд̇арахи, бханд̇з, мануссаа д̇ад̇т̇зва саммуд̇ияаа габбияабхуумияаа яааг̇уяо бажанд̇и, бхад̇д̇аани бажанд̇и, суубаани самбаад̣̇знд̇и, мам̣саани годдзнд̇и, гадтаани паалзнд̇и. со зсо, бхаг̇аваа, ужжаасад̣̇д̣̇о махаасад̣̇д̣̇о гаагоравасад̣̇д̣̇о’’д̇и. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘на, бхигкавз, саммуд̇и 2 габбияабхууми барибхун̃ж̇ид̇аб̣б̣аа. яо барибхун̃ж̇зяяа, аабад̇д̇и д̣̇уггадасса. ануж̇аанаами, бхигкавз, д̇иссо габбияабхуумияо – уссаавананд̇игам̣ г̇онисаад̣̇игам̣ г̇ахабад̇и’’нд̇и.
Tena kho pana samayena manussā tattheva sammutiyā 3 kappiyabhūmiyā yāguyo pacanti, bhattāni pacanti, sūpāni sampādenti, maṃsāni koṭṭenti, kaṭṭhāni phālenti. Assosi kho bhagavā rattiyā paccūsasamayaṃ paccuṭṭhāya uccāsaddaṃ mahāsaddaṃ kākoravasaddaṃ, sutvāna āyasmantaṃ ānandaṃ āmantesi – ‘‘kiṃ nu kho so, ānanda, uccāsaddo mahāsaddo kākoravasaddo’’ti? ‘‘Etarahi, bhante, manussā tattheva sammutiyā kappiyabhūmiyā yāguyo pacanti, bhattāni pacanti, sūpāni sampādenti, maṃsāni koṭṭenti, kaṭṭhāni phālenti. So eso, bhagavā, uccāsaddo mahāsaddo kākoravasaddo’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘na, bhikkhave, sammuti 4 kappiyabhūmi paribhuñjitabbā. Yo paribhuñjeyya, āpatti dukkaṭassa. Anujānāmi, bhikkhave, tisso kappiyabhūmiyo – ussāvanantikaṃ gonisādikaṃ gahapati’’nti.
д̇зна ко бана самаязна ааяасмаа яасож̇о г̇илаано ход̇и. д̇ассад̇т̇ааяа бхзсаж̇ж̇аани аахарияанд̇и. д̇аани бхигкуу б̣ахи ваасзнд̇и. уггабин̣д̣игааби каад̣̇анд̇и, жорааби харанд̇и. бхаг̇авад̇о зд̇амад̇т̇ам̣ аарожзсум̣. ануж̇аанаами , бхигкавз, саммуд̇им̣ габбияабхуумим̣ барибхун̃ж̇ид̇ум̣ . ануж̇аанаами, бхигкавз, жад̇ассо габбияабхуумияо – уссаавананд̇игам̣ г̇онисаад̣̇игам̣ г̇ахабад̇им̣ саммуд̇инд̇и.
Tena kho pana samayena āyasmā yasojo gilāno hoti. Tassatthāya bhesajjāni āhariyanti. Tāni bhikkhū bahi vāsenti. Ukkapiṇḍikāpi khādanti, corāpi haranti. Bhagavato etamatthaṃ ārocesuṃ. Anujānāmi , bhikkhave, sammutiṃ kappiyabhūmiṃ paribhuñjituṃ . Anujānāmi, bhikkhave, catasso kappiyabhūmiyo – ussāvanantikaṃ gonisādikaṃ gahapatiṃ sammutinti.
габбияабхуумиануж̇аананаа нидтид̇аа.
Kappiyabhūmianujānanā niṭṭhitā.
сийхабхаан̣авааро нидтид̇о жад̇уд̇т̇о.
Sīhabhāṇavāro niṭṭhito catuttho.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / габбияабхуумиануж̇аананагат̇аа • Kappiyabhūmianujānanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / габбияабхуумиануж̇аананагат̇ааван̣н̣анаа • Kappiyabhūmianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / габбияабхуумиануж̇аананагат̇ааван̣н̣анаа • Kappiyabhūmianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / габбияабхуумиануж̇аананагат̇ааван̣н̣анаа • Kappiyabhūmianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 179. габбияабхуумиануж̇аананагат̇аа • 179. Kappiyabhūmianujānanakathā
