| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
179. கப்பியபூ⁴மிஅனுஜானநகதா²
179. Kappiyabhūmianujānanakathā
295. ப³ஹாராமகொட்ட²கேதி எத்த² ஸமீபத்தே² பு⁴ம்மவசனந்தி ஆஹ ‘‘ப³ஹாராமகொட்ட²கஸமீபேதி ஆராமகொட்ட²கஸ்ஸ ப³ஹி ஸமீபேதி அத்தோ²’’தி. அச்ச²ந்தீதி வஸந்தி. ஏதந்தி ‘‘பச்சந்திம’’ந்தி ஏதங் வசனங். து⁴ரவிஹாரோபீதி பதா⁴னவிஹாரோபி. தத்த² தத்தா²தி தஸ்மிங் தஸ்மிங் டா²னே. அனுபகே³யேவாதி பாதோயேவ. ஓரவஸத்³த³ந்தி உச்சரவஸங்கா²தங் ஸத்³த³ங். கபிலஸுத்தபரியோஸானேதி ஸுத்தனிபாதே (ஸு॰ நி॰ அட்ட²॰ 2.கபிலஸுத்தவண்ணனா) ஸங்க³ஹிதஸ்ஸ கபிலஸுத்தஸ்ஸ பரியோஸானே. பஞ்சஸதானங் கேவட்டபுரிஸானந்தி ஸம்ப³ந்தோ⁴.
295.Bahārāmakoṭṭhaketi ettha samīpatthe bhummavacananti āha ‘‘bahārāmakoṭṭhakasamīpeti ārāmakoṭṭhakassa bahi samīpeti attho’’ti. Acchantīti vasanti. Etanti ‘‘paccantima’’nti etaṃ vacanaṃ. Dhuravihāropīti padhānavihāropi. Tattha tatthāti tasmiṃ tasmiṃ ṭhāne. Anupageyevāti pātoyeva. Oravasaddanti uccaravasaṅkhātaṃ saddaṃ. Kapilasuttapariyosāneti suttanipāte (su. ni. aṭṭha. 2.kapilasuttavaṇṇanā) saṅgahitassa kapilasuttassa pariyosāne. Pañcasatānaṃ kevaṭṭapurisānanti sambandho.
உஸ்ஸாவனந்திகாதீ³ஸு ஏவங் வினிச்ச²யோ வேதி³தப்³போ³தி யோஜனா. யோ விஹாரோ கரியதீதி ஸம்ப³ந்தோ⁴. பூ⁴மியா க³தி விய க³தி ஏதேஸந்தி பூ⁴மிக³திகா. பதிட்டா²பெந்தேஹி ப³ஹூஹி பி⁴க்கூ²ஹி பதிட்டா²பேதப்³போ³தி ஸம்ப³ந்தோ⁴. நிச்சா²ரெந்தேஹி பி⁴க்கூ²ஹீதி யோஜனா. ஸயந்தி பி⁴க்கு². தங் பனாதி ‘‘ஸங்க⁴ஸ்ஸ கப்பியகுடிங் அதி⁴ட்டா²மீ’’தி வசனங் பன. அவத்வாபீதி பிஸத்³தோ³ ததா² ‘‘வத்வாபீ’’தி அத்த²ங் ஸம்பிண்டே³தி. அட்ட²கதா²ஸூதி மஹாஅட்ட²கதா²தீ³ஸு தீஸு அட்ட²கதா²ஸு. எத்தா²தி உஸ்ஸாவனந்திககுடியங். ‘‘ஸமகாலங் வட்டதீ’’தி வசனங் த³ள்ஹீகரொந்தோ ஆஹ ‘‘ஸசே ஹீ’’திஆதி³. வசனேதி ‘‘கப்பியகுடிங் கரோமா’’தி வசனே. தஸ்மிந்தி த²ம்பே⁴. தேனேவாதி அகதபா⁴வேனேவ. ஹீதி ஸச்சங். எத்தா²தி ப³ஹூஸு.
Ussāvanantikādīsu evaṃ vinicchayo veditabboti yojanā. Yo vihāro kariyatīti sambandho. Bhūmiyā gati viya gati etesanti bhūmigatikā. Patiṭṭhāpentehi bahūhi bhikkhūhi patiṭṭhāpetabboti sambandho. Nicchārentehi bhikkhūhīti yojanā. Sayanti bhikkhu. Taṃ panāti ‘‘saṅghassa kappiyakuṭiṃ adhiṭṭhāmī’’ti vacanaṃ pana. Avatvāpīti pisaddo tathā ‘‘vatvāpī’’ti atthaṃ sampiṇḍeti. Aṭṭhakathāsūti mahāaṭṭhakathādīsu tīsu aṭṭhakathāsu. Etthāti ussāvanantikakuṭiyaṃ. ‘‘Samakālaṃ vaṭṭatī’’ti vacanaṃ daḷhīkaronto āha ‘‘sace hī’’tiādi. Vacaneti ‘‘kappiyakuṭiṃ karomā’’ti vacane. Tasminti thambhe. Tenevāti akatabhāveneva. Hīti saccaṃ. Etthāti bahūsu.
யதோதி இட்ட²கஸிலாமத்திகாபிண்ட³தோ. வுத்தனயேனேவாதி ‘‘ப³ஹூஹி ஸம்பரிவாரெத்வா கப்பியகுடிங் கரோமா’’தி வுத்தனயேனேவ. இட்ட²காத³யோதி ‘‘கப்பியகுடிங் கரோமா’’தி அதி⁴ட்டா²தப்³ப³இட்ட²காத³யோ. அந்த⁴கட்ட²கதா²யங் வுத்தந்தி ஸம்ப³ந்தோ⁴. ததா²தி யதா² அந்த⁴கட்ட²கதா²யங் வுத்தங், ததா². த²ம்பா⁴தீ³னி உக்கி²பித்வா பதிட்டா²பனஞ்ச ‘‘கப்பியகுடிங் கரோமா’’தி ஸாவனஞ்ச அந்தங் பரியோஸானமேதிஸ்ஸாதி உஸ்ஸாவனந்திகா.
Yatoti iṭṭhakasilāmattikāpiṇḍato. Vuttanayenevāti ‘‘bahūhi samparivāretvā kappiyakuṭiṃ karomā’’ti vuttanayeneva. Iṭṭhakādayoti ‘‘kappiyakuṭiṃ karomā’’ti adhiṭṭhātabbaiṭṭhakādayo. Andhakaṭṭhakathāyaṃ vuttanti sambandho. Tathāti yathā andhakaṭṭhakathāyaṃ vuttaṃ, tathā. Thambhādīni ukkhipitvā patiṭṭhāpanañca ‘‘kappiyakuṭiṃ karomā’’ti sāvanañca antaṃ pariyosānametissāti ussāvanantikā.
தாஸூதி த்³வீஸு கோ³னிஸாதி³காஸு. யத்தா²தி குடியங். நேவ ஆராமோ பரிக்கி²த்தோ ஹோதீதி ஸம்ப³ந்தோ⁴. புன யத்தா²தி குடியங். அயந்தி குடி. உப⁴யத்தா²பீதி ஆராமவிஹாரகோ³னிஸாதி³காஸு த்³வீஸுபி. ப³ஹுதரங் பரிக்கி²த்தோபி பரிக்கி²த்தோயேவ நாமாதி யோஜனா. எத்தா²தி உபட்³ட⁴பரிக்கி²த்தப³ஹுதரபரிக்கி²த்தஆராமே. கா³வோ பவிஸித்வா யதா²ஸுக²ங் நிஸீத³ந்தி எத்தா²தி கோ³னிஸாதா³ கோ³ஸாலா. கோ³னிஸாதா³ வியாதி கோ³னிஸாதி³கா குடி.
Tāsūti dvīsu gonisādikāsu. Yatthāti kuṭiyaṃ. Neva ārāmo parikkhitto hotīti sambandho. Puna yatthāti kuṭiyaṃ. Ayanti kuṭi. Ubhayatthāpīti ārāmavihāragonisādikāsu dvīsupi. Bahutaraṃ parikkhittopi parikkhittoyeva nāmāti yojanā. Etthāti upaḍḍhaparikkhittabahutaraparikkhittaārāme. Gāvo pavisitvā yathāsukhaṃ nisīdanti etthāti gonisādā gosālā. Gonisādā viyāti gonisādikā kuṭi.
மனுஸ்ஸா வத³ந்தீதி ஸம்ப³ந்தோ⁴. ஏஸாதி குடி. வுத்தேபீதி பிஸத்³தே³, ‘‘கப்பியகுடிங் தே³மா’’தி வாக்யங் அபெக்க²தி. அந்த⁴கட்ட²கதா²யங் வுத்தந்தி ஸம்ப³ந்தோ⁴. யஸ்மா வட்டதி, தஸ்மாதி யோஜனா. தேஸந்தி ஸேஸஸஹத⁴ம்மிகதே³வமனுஸ்ஸானங். தேஹீதி ஸேஸஸஹத⁴ம்மிகதே³வமனுஸ்ஸேஹி. புனபி வுத்தங், கிங் வுத்தந்தி ஆஹ ‘‘பி⁴க்கு²ஸ்ஸ…பே॰… ஹோதீ’’தி. அபீதி தத³ஞ்ஞேஸங். தந்தி வசனங். ஹீதி ஸச்சங், யஸ்மா வா. ஸங்க⁴ஸ்ஸ ஸந்தகமேவ வா பி⁴க்கு²ஸ்ஸ ஸந்தகமேவ வாதி யோஜனா. இதி தஸ்மா ஸுவுத்தந்தி ஸம்ப³ந்தோ⁴. க³ஹபதீனங் ஸந்தகங் க³ஹபதி குடி. ‘‘கம்மவாசங் ஸாவெத்வா’’தி இத³ங் உபலக்க²ணமத்தங் கம்மவாசமவத்வா அபலோகனேனபி கப்பியத்தா. கம்மவாசாய வா அபலோகனேன வா ஸம்மனிதப்³பா³தி ஸம்முதி குடி. இதிஸத்³தோ³ பரிஸமாபனத்தோ².
Manussā vadantīti sambandho. Esāti kuṭi. Vuttepīti pisadde, ‘‘kappiyakuṭiṃ demā’’ti vākyaṃ apekkhati. Andhakaṭṭhakathāyaṃ vuttanti sambandho. Yasmā vaṭṭati, tasmāti yojanā. Tesanti sesasahadhammikadevamanussānaṃ. Tehīti sesasahadhammikadevamanussehi. Punapi vuttaṃ, kiṃ vuttanti āha ‘‘bhikkhussa…pe… hotī’’ti. Apīti tadaññesaṃ. Tanti vacanaṃ. Hīti saccaṃ, yasmā vā. Saṅghassa santakameva vā bhikkhussa santakameva vāti yojanā. Iti tasmā suvuttanti sambandho. Gahapatīnaṃ santakaṃ gahapati kuṭi. ‘‘Kammavācaṃ sāvetvā’’ti idaṃ upalakkhaṇamattaṃ kammavācamavatvā apalokanenapi kappiyattā. Kammavācāya vā apalokanena vā sammanitabbāti sammuti kuṭi. Itisaddo parisamāpanattho.
யங் ஆமிஸங் வுத்த²ங், ஸப்³ப³ங் தங் ஆமிஸந்தியோஜனா. அகப்பியபூ⁴மியங் ஸஹஸெய்யபஹோனகே கே³ஹே வுத்த²ங் ட²பிதந்தி ஸம்ப³ந்தோ⁴. யங் பன ஸங்கி⁴கங் வா புக்³க³லிகங் வா அத்தீ²தி யோஜனா. தேஸங்யேவாதி பி⁴க்கு²பி⁴க்கு²னீனமேவ . ஏகரத்தம்பி ட²பிதங் யங் ஸந்தகங் அத்தீ²தி யோஜனா. தந்தி ஸங்கி⁴காதி³. தத்தா²தி அகப்பியபூ⁴மியங் ஸஹஸெய்யபஹோனககே³ஹே. ஏதந்தி அந்தோவுத்த²அந்தோபக்கஸங்கா²தங் யாவயாமகாலிகங், ‘‘ந கப்பதீ’’தி ப்³யதிரேகஸ்ஸ அன்வயங் த³ஸ்ஸெந்தோ ஆஹ ‘‘ஸத்தாஹகாலிகங் பனா’’திஆதி³.
Yaṃ āmisaṃ vutthaṃ, sabbaṃ taṃ āmisantiyojanā. Akappiyabhūmiyaṃ sahaseyyapahonake gehe vutthaṃ ṭhapitanti sambandho. Yaṃ pana saṅghikaṃ vā puggalikaṃ vā atthīti yojanā. Tesaṃyevāti bhikkhubhikkhunīnameva . Ekarattampi ṭhapitaṃ yaṃ santakaṃ atthīti yojanā. Tanti saṅghikādi. Tatthāti akappiyabhūmiyaṃ sahaseyyapahonakagehe. Etanti antovutthaantopakkasaṅkhātaṃ yāvayāmakālikaṃ, ‘‘na kappatī’’ti byatirekassa anvayaṃ dassento āha ‘‘sattāhakālikaṃ panā’’tiādi.
தத்ராதி புரிமவசனாபெக்க²ங். தத்ர வசனேதி ஹி அத்தோ². ஸாமணேரோ தே³தீதி ஸம்ப³ந்தோ⁴. யங்கிஞ்சி தண்டு³லாதி³கங் ஆமிஸந்தி யோஜனா. முக²ஸன்னிதி⁴ நாமாதி ஆபத்தியா முகோ² உபாயோ ஸன்னிதி⁴ நாமாதி அத்தோ². தத்தா²தி மஹாபச்சரியங், முக²ஸன்னிதி⁴அந்தோவுத்தே²ஸு வா. பி⁴க்கு² பசித்வா பரிபு⁴ஞ்ஜதீதி ஸம்ப³ந்தோ⁴. ஆமிஸஸங்ஸட்ட²ந்தி ஆமிஸேன ஸங்ஸக்³க³ங்.
Tatrāti purimavacanāpekkhaṃ. Tatra vacaneti hi attho. Sāmaṇero detīti sambandho. Yaṃkiñci taṇḍulādikaṃ āmisanti yojanā. Mukhasannidhi nāmāti āpattiyā mukho upāyo sannidhi nāmāti attho. Tatthāti mahāpaccariyaṃ, mukhasannidhiantovutthesu vā. Bhikkhu pacitvā paribhuñjatīti sambandho. Āmisasaṃsaṭṭhanti āmisena saṃsaggaṃ.
ஜஹிதவத்து²காதி ஜஹிதங் வத்து² ஏதாஸந்தி ஜஹிதவத்து²கா. உஸ்ஸாவனந்திகா கதாதி ஸம்ப³ந்தோ⁴. ஸாதி உஸ்ஸாவனந்திகா. யோ யோதி த²ம்போ⁴ வா பி⁴த்திபாதோ³ வா. இட்ட²காதீ³ஹி கதா உஸ்ஸாவனந்திகாதி யோஜனா. சயஸ்ஸாதி அதி⁴ட்டா²னஸ்ஸ. யேஹி பன இட்ட²காதீ³ஹீதிஆதி³ஸத்³தே³ன த²ம்ப⁴ஸிலாமத்திகாயோ ஸங்க³ண்ஹாதி. தத³ஞ்ஞேஸூதி தேஹி அதி⁴ட்டி²தஇட்ட²காதீ³ஹி அஞ்ஞேஸு.
Jahitavatthukāti jahitaṃ vatthu etāsanti jahitavatthukā. Ussāvanantikā katāti sambandho. Sāti ussāvanantikā. Yo yoti thambho vā bhittipādo vā. Iṭṭhakādīhi katā ussāvanantikāti yojanā. Cayassāti adhiṭṭhānassa. Yehi pana iṭṭhakādīhītiādisaddena thambhasilāmattikāyo saṅgaṇhāti. Tadaññesūti tehi adhiṭṭhitaiṭṭhakādīhi aññesu.
பாகாராதி³பரிக்கே²பேதி உபசாரஸீமாபரிச்சி²ன்னஸ்ஸ ஆராமஸ்ஸ பாகாராதி³னா பரிக்கே²பே கதே. பாகாராதீ³தி ஆதி³ஸத்³தே³ன வதிங் ஸங்க³ண்ஹாதி. கப்பியகுடிங் லத்³து⁴ங் வட்டதீதி கோ³னிஸாதி³காய அபா⁴வேன ஸேஸாஸு தீஸு கப்பியகுடீஸு யங்கிஞ்சி கப்பியகுடிங் லத்³து⁴ங் வட்டதீதி அத்தோ². தத்த² தத்தா²தி தஸ்மிங் தஸ்மிங் டா²னே. இதரா பனாதி உஸ்ஸாவனந்திககோ³னிஸாதி³காஹி அஞ்ஞா. த்³வேதி உபோ⁴ க³ஹபதிஸம்முதியோ, ஜஹிதவத்து²காவ ஹொந்தீதி ஸம்ப³ந்தோ⁴. பக்க²பாஸகமண்ட³லந்தி த்³வே பக்கே² அபதனத்தா²ய பஸதி ப³ந்த⁴தீதி பக்க²பாஸகோ, மண்ட³லந்தி ச²த³னகோடிகோ³பானஸீனங் உபரி ட²பிதகட்ட²விஸேஸோ, பக்க²பாஸகோ ச மண்ட³லஞ்ச பக்க²பாஸகமண்ட³லங்.
Pākārādiparikkhepeti upacārasīmāparicchinnassa ārāmassa pākārādinā parikkhepe kate. Pākārādīti ādisaddena vatiṃ saṅgaṇhāti. Kappiyakuṭiṃ laddhuṃ vaṭṭatīti gonisādikāya abhāvena sesāsu tīsu kappiyakuṭīsu yaṃkiñci kappiyakuṭiṃ laddhuṃ vaṭṭatīti attho. Tattha tatthāti tasmiṃ tasmiṃ ṭhāne. Itarā panāti ussāvanantikagonisādikāhi aññā. Dveti ubho gahapatisammutiyo, jahitavatthukāva hontīti sambandho. Pakkhapāsakamaṇḍalanti dve pakkhe apatanatthāya pasati bandhatīti pakkhapāsako, maṇḍalanti chadanakoṭigopānasīnaṃ upari ṭhapitakaṭṭhaviseso, pakkhapāsako ca maṇḍalañca pakkhapāsakamaṇḍalaṃ.
யத்ராதி யஸ்மிங் டா²னே. அனுபஸம்பன்னஸ்ஸ த³த்வாதி அனபெக்க²விஸ்ஸஜ்ஜனேன அனுபஸம்பன்னஸ்ஸ த³த்வா. சீவரவிகப்பனங் விய ஸாபெக்க²விஸ்ஸஜ்ஜனம்பி வட்டதீதி வத³ந்தி. தத்ராதி புரிமவசனாபெக்க²ங். ஸோதி கரவீகதிஸ்ஸத்தே²ரோ, பஸ்ஸித்வா புச்சீ²தி ஸம்ப³ந்தோ⁴. தே²ரோதி மஹாஸிவத்தே²ரோ. லூக²தி³வஸேதி அஸினித்³த⁴தி³வஸே. ததோதி ப்³ரவனதோ, பரந்தி ஸம்ப³ந்தோ⁴. நந்தி மஹாஸிவத்தே²ரங். பமுகே²தி க³ப்³ப⁴ஸ்ஸ பமுகே². தந்தி ஸப்³பி³கும்பி⁴ங். ப³ஹீதி விஹாரஸ்ஸ ப³ஹி. ஸோதி மஹாஸிவத்தே²ரோ.
Yatrāti yasmiṃ ṭhāne. Anupasampannassa datvāti anapekkhavissajjanena anupasampannassa datvā. Cīvaravikappanaṃ viya sāpekkhavissajjanampi vaṭṭatīti vadanti. Tatrāti purimavacanāpekkhaṃ. Soti karavīkatissatthero, passitvā pucchīti sambandho. Theroti mahāsivatthero. Lūkhadivaseti asiniddhadivase. Tatoti bravanato, paranti sambandho. Nanti mahāsivattheraṃ. Pamukheti gabbhassa pamukhe. Tanti sabbikumbhiṃ. Bahīti vihārassa bahi. Soti mahāsivatthero.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 179. கப்பியபூ⁴மிஅனுஜானநா • 179. Kappiyabhūmianujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கப்பியபூ⁴மிஅனுஜானநகதா² • Kappiyabhūmianujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கப்பியபூ⁴மிஅனுஜானநகதா²வண்ணனா • Kappiyabhūmianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கப்பியபூ⁴மிஅனுஜானநகதா²வண்ணனா • Kappiyabhūmianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கப்பியபூ⁴மிஅனுஜானநகதா²வண்ணனா • Kappiyabhūmianujānanakathāvaṇṇanā
