| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১৭৯. কপ্পিযভূমিঅনুজাননকথা
179. Kappiyabhūmianujānanakathā
২৯৫. বহারামকোট্ঠকেতি এত্থ সমীপত্থে ভুম্মৰচনন্তি আহ ‘‘বহারামকোট্ঠকসমীপেতি আরামকোট্ঠকস্স বহি সমীপেতি অত্থো’’তি। অচ্ছন্তীতি ৰসন্তি। এতন্তি ‘‘পচ্চন্তিম’’ন্তি এতং ৰচনং। ধুরৰিহারোপীতি পধানৰিহারোপি। তত্থ তত্থাতি তস্মিং তস্মিং ঠানে। অনুপগেযেৰাতি পাতোযেৰ। ওরৰসদ্দন্তি উচ্চরৰসঙ্খাতং সদ্দং। কপিলসুত্তপরিযোসানেতি সুত্তনিপাতে (সু॰ নি॰ অট্ঠ॰ ২.কপিলসুত্তৰণ্ণনা) সঙ্গহিতস্স কপিলসুত্তস্স পরিযোসানে। পঞ্চসতানং কেৰট্টপুরিসানন্তি সম্বন্ধো।
295.Bahārāmakoṭṭhaketi ettha samīpatthe bhummavacananti āha ‘‘bahārāmakoṭṭhakasamīpeti ārāmakoṭṭhakassa bahi samīpeti attho’’ti. Acchantīti vasanti. Etanti ‘‘paccantima’’nti etaṃ vacanaṃ. Dhuravihāropīti padhānavihāropi. Tattha tatthāti tasmiṃ tasmiṃ ṭhāne. Anupageyevāti pātoyeva. Oravasaddanti uccaravasaṅkhātaṃ saddaṃ. Kapilasuttapariyosāneti suttanipāte (su. ni. aṭṭha. 2.kapilasuttavaṇṇanā) saṅgahitassa kapilasuttassa pariyosāne. Pañcasatānaṃ kevaṭṭapurisānanti sambandho.
উস্সাৰনন্তিকাদীসু এৰং ৰিনিচ্ছযো ৰেদিতব্বোতি যোজনা। যো ৰিহারো করিযতীতি সম্বন্ধো। ভূমিযা গতি ৰিয গতি এতেসন্তি ভূমিগতিকা। পতিট্ঠাপেন্তেহি বহূহি ভিক্খূহি পতিট্ঠাপেতব্বোতি সম্বন্ধো। নিচ্ছারেন্তেহি ভিক্খূহীতি যোজনা। সযন্তি ভিক্খু। তং পনাতি ‘‘সঙ্ঘস্স কপ্পিযকুটিং অধিট্ঠামী’’তি ৰচনং পন। অৰত্ৰাপীতি পিসদ্দো তথা ‘‘ৰত্ৰাপী’’তি অত্থং সম্পিণ্ডেতি। অট্ঠকথাসূতি মহাঅট্ঠকথাদীসু তীসু অট্ঠকথাসু। এত্থাতি উস্সাৰনন্তিককুটিযং। ‘‘সমকালং ৰট্টতী’’তি ৰচনং দল়্হীকরোন্তো আহ ‘‘সচে হী’’তিআদি। ৰচনেতি ‘‘কপ্পিযকুটিং করোমা’’তি ৰচনে। তস্মিন্তি থম্ভে। তেনেৰাতি অকতভাৰেনেৰ। হীতি সচ্চং। এত্থাতি বহূসু।
Ussāvanantikādīsu evaṃ vinicchayo veditabboti yojanā. Yo vihāro kariyatīti sambandho. Bhūmiyā gati viya gati etesanti bhūmigatikā. Patiṭṭhāpentehi bahūhi bhikkhūhi patiṭṭhāpetabboti sambandho. Nicchārentehi bhikkhūhīti yojanā. Sayanti bhikkhu. Taṃ panāti ‘‘saṅghassa kappiyakuṭiṃ adhiṭṭhāmī’’ti vacanaṃ pana. Avatvāpīti pisaddo tathā ‘‘vatvāpī’’ti atthaṃ sampiṇḍeti. Aṭṭhakathāsūti mahāaṭṭhakathādīsu tīsu aṭṭhakathāsu. Etthāti ussāvanantikakuṭiyaṃ. ‘‘Samakālaṃ vaṭṭatī’’ti vacanaṃ daḷhīkaronto āha ‘‘sace hī’’tiādi. Vacaneti ‘‘kappiyakuṭiṃ karomā’’ti vacane. Tasminti thambhe. Tenevāti akatabhāveneva. Hīti saccaṃ. Etthāti bahūsu.
যতোতি ইট্ঠকসিলামত্তিকাপিণ্ডতো। ৰুত্তনযেনেৰাতি ‘‘বহূহি সম্পরিৰারেত্ৰা কপ্পিযকুটিং করোমা’’তি ৰুত্তনযেনেৰ। ইট্ঠকাদযোতি ‘‘কপ্পিযকুটিং করোমা’’তি অধিট্ঠাতব্বইট্ঠকাদযো। অন্ধকট্ঠকথাযং ৰুত্তন্তি সম্বন্ধো। তথাতি যথা অন্ধকট্ঠকথাযং ৰুত্তং, তথা। থম্ভাদীনি উক্খিপিত্ৰা পতিট্ঠাপনঞ্চ ‘‘কপ্পিযকুটিং করোমা’’তি সাৰনঞ্চ অন্তং পরিযোসানমেতিস্সাতি উস্সাৰনন্তিকা।
Yatoti iṭṭhakasilāmattikāpiṇḍato. Vuttanayenevāti ‘‘bahūhi samparivāretvā kappiyakuṭiṃ karomā’’ti vuttanayeneva. Iṭṭhakādayoti ‘‘kappiyakuṭiṃ karomā’’ti adhiṭṭhātabbaiṭṭhakādayo. Andhakaṭṭhakathāyaṃ vuttanti sambandho. Tathāti yathā andhakaṭṭhakathāyaṃ vuttaṃ, tathā. Thambhādīni ukkhipitvā patiṭṭhāpanañca ‘‘kappiyakuṭiṃ karomā’’ti sāvanañca antaṃ pariyosānametissāti ussāvanantikā.
তাসূতি দ্ৰীসু গোনিসাদিকাসু। যত্থাতি কুটিযং। নেৰ আরামো পরিক্খিত্তো হোতীতি সম্বন্ধো। পুন যত্থাতি কুটিযং। অযন্তি কুটি। উভযত্থাপীতি আরামৰিহারগোনিসাদিকাসু দ্ৰীসুপি। বহুতরং পরিক্খিত্তোপি পরিক্খিত্তোযেৰ নামাতি যোজনা। এত্থাতি উপড্ঢপরিক্খিত্তবহুতরপরিক্খিত্তআরামে। গাৰো পৰিসিত্ৰা যথাসুখং নিসীদন্তি এত্থাতি গোনিসাদা গোসালা। গোনিসাদা ৰিযাতি গোনিসাদিকা কুটি।
Tāsūti dvīsu gonisādikāsu. Yatthāti kuṭiyaṃ. Neva ārāmo parikkhitto hotīti sambandho. Puna yatthāti kuṭiyaṃ. Ayanti kuṭi. Ubhayatthāpīti ārāmavihāragonisādikāsu dvīsupi. Bahutaraṃ parikkhittopi parikkhittoyeva nāmāti yojanā. Etthāti upaḍḍhaparikkhittabahutaraparikkhittaārāme. Gāvo pavisitvā yathāsukhaṃ nisīdanti etthāti gonisādā gosālā. Gonisādā viyāti gonisādikā kuṭi.
মনুস্সা ৰদন্তীতি সম্বন্ধো। এসাতি কুটি। ৰুত্তেপীতি পিসদ্দে, ‘‘কপ্পিযকুটিং দেমা’’তি ৰাক্যং অপেক্খতি। অন্ধকট্ঠকথাযং ৰুত্তন্তি সম্বন্ধো। যস্মা ৰট্টতি, তস্মাতি যোজনা। তেসন্তি সেসসহধম্মিকদেৰমনুস্সানং। তেহীতি সেসসহধম্মিকদেৰমনুস্সেহি। পুনপি ৰুত্তং, কিং ৰুত্তন্তি আহ ‘‘ভিক্খুস্স…পে॰… হোতী’’তি। অপীতি তদঞ্ঞেসং। তন্তি ৰচনং। হীতি সচ্চং, যস্মা ৰা। সঙ্ঘস্স সন্তকমেৰ ৰা ভিক্খুস্স সন্তকমেৰ ৰাতি যোজনা। ইতি তস্মা সুৰুত্তন্তি সম্বন্ধো। গহপতীনং সন্তকং গহপতি কুটি। ‘‘কম্মৰাচং সাৰেত্ৰা’’তি ইদং উপলক্খণমত্তং কম্মৰাচমৰত্ৰা অপলোকনেনপি কপ্পিযত্তা। কম্মৰাচায ৰা অপলোকনেন ৰা সম্মনিতব্বাতি সম্মুতি কুটি। ইতিসদ্দো পরিসমাপনত্থো।
Manussā vadantīti sambandho. Esāti kuṭi. Vuttepīti pisadde, ‘‘kappiyakuṭiṃ demā’’ti vākyaṃ apekkhati. Andhakaṭṭhakathāyaṃ vuttanti sambandho. Yasmā vaṭṭati, tasmāti yojanā. Tesanti sesasahadhammikadevamanussānaṃ. Tehīti sesasahadhammikadevamanussehi. Punapi vuttaṃ, kiṃ vuttanti āha ‘‘bhikkhussa…pe… hotī’’ti. Apīti tadaññesaṃ. Tanti vacanaṃ. Hīti saccaṃ, yasmā vā. Saṅghassa santakameva vā bhikkhussa santakameva vāti yojanā. Iti tasmā suvuttanti sambandho. Gahapatīnaṃ santakaṃ gahapati kuṭi. ‘‘Kammavācaṃ sāvetvā’’ti idaṃ upalakkhaṇamattaṃ kammavācamavatvā apalokanenapi kappiyattā. Kammavācāya vā apalokanena vā sammanitabbāti sammuti kuṭi. Itisaddo parisamāpanattho.
যং আমিসং ৰুত্থং, সব্বং তং আমিসন্তিযোজনা। অকপ্পিযভূমিযং সহসেয্যপহোনকে গেহে ৰুত্থং ঠপিতন্তি সম্বন্ধো। যং পন সঙ্ঘিকং ৰা পুগ্গলিকং ৰা অত্থীতি যোজনা। তেসংযেৰাতি ভিক্খুভিক্খুনীনমেৰ । একরত্তম্পি ঠপিতং যং সন্তকং অত্থীতি যোজনা। তন্তি সঙ্ঘিকাদি। তত্থাতি অকপ্পিযভূমিযং সহসেয্যপহোনকগেহে। এতন্তি অন্তোৰুত্থঅন্তোপক্কসঙ্খাতং যাৰযামকালিকং, ‘‘ন কপ্পতী’’তি ব্যতিরেকস্স অন্ৰযং দস্সেন্তো আহ ‘‘সত্তাহকালিকং পনা’’তিআদি।
Yaṃ āmisaṃ vutthaṃ, sabbaṃ taṃ āmisantiyojanā. Akappiyabhūmiyaṃ sahaseyyapahonake gehe vutthaṃ ṭhapitanti sambandho. Yaṃ pana saṅghikaṃ vā puggalikaṃ vā atthīti yojanā. Tesaṃyevāti bhikkhubhikkhunīnameva . Ekarattampi ṭhapitaṃ yaṃ santakaṃ atthīti yojanā. Tanti saṅghikādi. Tatthāti akappiyabhūmiyaṃ sahaseyyapahonakagehe. Etanti antovutthaantopakkasaṅkhātaṃ yāvayāmakālikaṃ, ‘‘na kappatī’’ti byatirekassa anvayaṃ dassento āha ‘‘sattāhakālikaṃ panā’’tiādi.
তত্রাতি পুরিমৰচনাপেক্খং। তত্র ৰচনেতি হি অত্থো। সামণেরো দেতীতি সম্বন্ধো। যংকিঞ্চি তণ্ডুলাদিকং আমিসন্তি যোজনা। মুখসন্নিধি নামাতি আপত্তিযা মুখো উপাযো সন্নিধি নামাতি অত্থো। তত্থাতি মহাপচ্চরিযং, মুখসন্নিধিঅন্তোৰুত্থেসু ৰা। ভিক্খু পচিত্ৰা পরিভুঞ্জতীতি সম্বন্ধো। আমিসসংসট্ঠন্তি আমিসেন সংসগ্গং।
Tatrāti purimavacanāpekkhaṃ. Tatra vacaneti hi attho. Sāmaṇero detīti sambandho. Yaṃkiñci taṇḍulādikaṃ āmisanti yojanā. Mukhasannidhi nāmāti āpattiyā mukho upāyo sannidhi nāmāti attho. Tatthāti mahāpaccariyaṃ, mukhasannidhiantovutthesu vā. Bhikkhu pacitvā paribhuñjatīti sambandho. Āmisasaṃsaṭṭhanti āmisena saṃsaggaṃ.
জহিতৰত্থুকাতি জহিতং ৰত্থু এতাসন্তি জহিতৰত্থুকা। উস্সাৰনন্তিকা কতাতি সম্বন্ধো। সাতি উস্সাৰনন্তিকা। যো যোতি থম্ভো ৰা ভিত্তিপাদো ৰা। ইট্ঠকাদীহি কতা উস্সাৰনন্তিকাতি যোজনা। চযস্সাতি অধিট্ঠানস্স। যেহি পন ইট্ঠকাদীহীতিআদিসদ্দেন থম্ভসিলামত্তিকাযো সঙ্গণ্হাতি। তদঞ্ঞেসূতি তেহি অধিট্ঠিতইট্ঠকাদীহি অঞ্ঞেসু।
Jahitavatthukāti jahitaṃ vatthu etāsanti jahitavatthukā. Ussāvanantikā katāti sambandho. Sāti ussāvanantikā. Yo yoti thambho vā bhittipādo vā. Iṭṭhakādīhi katā ussāvanantikāti yojanā. Cayassāti adhiṭṭhānassa. Yehi pana iṭṭhakādīhītiādisaddena thambhasilāmattikāyo saṅgaṇhāti. Tadaññesūti tehi adhiṭṭhitaiṭṭhakādīhi aññesu.
পাকারাদিপরিক্খেপেতি উপচারসীমাপরিচ্ছিন্নস্স আরামস্স পাকারাদিনা পরিক্খেপে কতে। পাকারাদীতি আদিসদ্দেন ৰতিং সঙ্গণ্হাতি। কপ্পিযকুটিং লদ্ধুং ৰট্টতীতি গোনিসাদিকায অভাৰেন সেসাসু তীসু কপ্পিযকুটীসু যংকিঞ্চি কপ্পিযকুটিং লদ্ধুং ৰট্টতীতি অত্থো। তত্থ তত্থাতি তস্মিং তস্মিং ঠানে। ইতরা পনাতি উস্সাৰনন্তিকগোনিসাদিকাহি অঞ্ঞা। দ্ৰেতি উভো গহপতিসম্মুতিযো, জহিতৰত্থুকাৰ হোন্তীতি সম্বন্ধো। পক্খপাসকমণ্ডলন্তি দ্ৰে পক্খে অপতনত্থায পসতি বন্ধতীতি পক্খপাসকো, মণ্ডলন্তি ছদনকোটিগোপানসীনং উপরি ঠপিতকট্ঠৰিসেসো, পক্খপাসকো চ মণ্ডলঞ্চ পক্খপাসকমণ্ডলং।
Pākārādiparikkhepeti upacārasīmāparicchinnassa ārāmassa pākārādinā parikkhepe kate. Pākārādīti ādisaddena vatiṃ saṅgaṇhāti. Kappiyakuṭiṃ laddhuṃ vaṭṭatīti gonisādikāya abhāvena sesāsu tīsu kappiyakuṭīsu yaṃkiñci kappiyakuṭiṃ laddhuṃ vaṭṭatīti attho. Tattha tatthāti tasmiṃ tasmiṃ ṭhāne. Itarā panāti ussāvanantikagonisādikāhi aññā. Dveti ubho gahapatisammutiyo, jahitavatthukāva hontīti sambandho. Pakkhapāsakamaṇḍalanti dve pakkhe apatanatthāya pasati bandhatīti pakkhapāsako, maṇḍalanti chadanakoṭigopānasīnaṃ upari ṭhapitakaṭṭhaviseso, pakkhapāsako ca maṇḍalañca pakkhapāsakamaṇḍalaṃ.
যত্রাতি যস্মিং ঠানে। অনুপসম্পন্নস্স দত্ৰাতি অনপেক্খৰিস্সজ্জনেন অনুপসম্পন্নস্স দত্ৰা। চীৰরৰিকপ্পনং ৰিয সাপেক্খৰিস্সজ্জনম্পি ৰট্টতীতি ৰদন্তি। তত্রাতি পুরিমৰচনাপেক্খং। সোতি করৰীকতিস্সত্থেরো, পস্সিত্ৰা পুচ্ছীতি সম্বন্ধো। থেরোতি মহাসিৰত্থেরো। লূখদিৰসেতি অসিনিদ্ধদিৰসে। ততোতি ব্রৰনতো, পরন্তি সম্বন্ধো। নন্তি মহাসিৰত্থেরং। পমুখেতি গব্ভস্স পমুখে। তন্তি সব্বিকুম্ভিং। বহীতি ৰিহারস্স বহি। সোতি মহাসিৰত্থেরো।
Yatrāti yasmiṃ ṭhāne. Anupasampannassa datvāti anapekkhavissajjanena anupasampannassa datvā. Cīvaravikappanaṃ viya sāpekkhavissajjanampi vaṭṭatīti vadanti. Tatrāti purimavacanāpekkhaṃ. Soti karavīkatissatthero, passitvā pucchīti sambandho. Theroti mahāsivatthero. Lūkhadivaseti asiniddhadivase. Tatoti bravanato, paranti sambandho. Nanti mahāsivattheraṃ. Pamukheti gabbhassa pamukhe. Tanti sabbikumbhiṃ. Bahīti vihārassa bahi. Soti mahāsivatthero.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৭৯. কপ্পিযভূমিঅনুজাননা • 179. Kappiyabhūmianujānanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / কপ্পিযভূমিঅনুজাননকথা • Kappiyabhūmianujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কপ্পিযভূমিঅনুজাননকথাৰণ্ণনা • Kappiyabhūmianujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কপ্পিযভূমিঅনুজাননকথাৰণ্ণনা • Kappiyabhūmianujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কপ্পিযভূমিঅনুজাননকথাৰণ্ণনা • Kappiyabhūmianujānanakathāvaṇṇanā
