| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
கப்பியபூ⁴மிஅனுஜானநகதா²வண்ணனா
Kappiyabhūmianujānanakathāvaṇṇanā
295. அனுப்பகே³ ஏவாதி பாதோவ. ஓரவஸத்³த³ந்தி மஹாஸத்³த³ங். தங் பன அவத்வாபீதி பி-ஸத்³தே³ன ததா²வசனம்பி அனுஜானாதி. அட்ட²கதா²ஸூதி அந்த⁴கட்ட²கதா²விரஹிதாஸு ஸேஸட்ட²கதா²ஸு. ஸாதா⁴ரணலக்க²ணந்தி அந்த⁴கட்ட²கதா²ய ஸஹ ஸப்³ப³ட்ட²கதா²னங் ஸமானங்.
295.Anuppage evāti pātova. Oravasaddanti mahāsaddaṃ. Taṃ pana avatvāpīti pi-saddena tathāvacanampi anujānāti. Aṭṭhakathāsūti andhakaṭṭhakathāvirahitāsu sesaṭṭhakathāsu. Sādhāraṇalakkhaṇanti andhakaṭṭhakathāya saha sabbaṭṭhakathānaṃ samānaṃ.
சயந்தி அதி⁴ட்டா²னஉச்சவத்து²ங். யதோ பட்டா²யாதி யதோ இட்ட²காதி³தோ பட்டா²ய, யங் ஆதி³ங் கத்வா பி⁴த்திங் உட்டா²பேதுகாமாதி அத்தோ². ‘‘த²ம்பா⁴ பன உபரி உக்³க³ச்ச²ந்தி, தஸ்மா வட்டந்தீ’’தி ஏதேன இட்ட²கபாஸாணா ஹெட்டா² பதிட்டா²பிதாபி யதி³ சயதோ, பூ⁴மிதோ வா ஏகங்கு³லமத்தம்பி உக்³க³தா திட்ட²ந்தி, வட்டந்தீதி ஸித்³த⁴ங் ஹோதி.
Cayanti adhiṭṭhānauccavatthuṃ. Yato paṭṭhāyāti yato iṭṭhakādito paṭṭhāya, yaṃ ādiṃ katvā bhittiṃ uṭṭhāpetukāmāti attho. ‘‘Thambhā pana upari uggacchanti, tasmā vaṭṭantī’’ti etena iṭṭhakapāsāṇā heṭṭhā patiṭṭhāpitāpi yadi cayato, bhūmito vā ekaṅgulamattampi uggatā tiṭṭhanti, vaṭṭantīti siddhaṃ hoti.
ஆராமோதி உபசாரஸீமாபரிச்சி²ன்னோ ஸகலோ விஹாரோ. ஸேனாஸனானீதி விஹாரஸ்ஸ அந்தோ திணகுடிஆதி³கானி ஸங்க⁴ஸ்ஸ நிவாஸகே³ஹானி. விஹாரகோ³னிஸாதி³கா நாமாதி ஸேனாஸனகோ³னிஸாதி³கா. ஸேனாஸனானி ஹி ஸயங் பரிக்கி²த்தானிபி ஆராமபரிக்கே²பாபா⁴வேன ‘‘கோ³னிஸாதி³கானீ’’தி வுத்தானி. ‘‘உபட்³ட⁴பரிக்கி²த்தோபீ’’தி இமினா ததோ ஊனபரிக்கி²த்தோ யேபு⁴ய்யேன அபரிக்கி²த்தோ நாம, தஸ்மா அபரிக்கி²த்தஸங்க்²யமேவ க³ச்ச²தீதி த³ஸ்ஸேதி. எத்தா²தி உபட்³டா⁴தி³பரிக்கி²த்தே. கப்பியகுடிங் லத்³து⁴ங் வட்டதீதி கோ³னிஸாதி³யா அபா⁴வேன ஸேஸகப்பியகுடீஸு தீஸு யா காசி கப்பியகுடி காதப்³பா³தி அத்தோ².
Ārāmoti upacārasīmāparicchinno sakalo vihāro. Senāsanānīti vihārassa anto tiṇakuṭiādikāni saṅghassa nivāsagehāni. Vihāragonisādikā nāmāti senāsanagonisādikā. Senāsanāni hi sayaṃ parikkhittānipi ārāmaparikkhepābhāvena ‘‘gonisādikānī’’ti vuttāni. ‘‘Upaḍḍhaparikkhittopī’’ti iminā tato ūnaparikkhitto yebhuyyena aparikkhitto nāma, tasmā aparikkhittasaṅkhyameva gacchatīti dasseti. Etthāti upaḍḍhādiparikkhitte. Kappiyakuṭiṃ laddhuṃ vaṭṭatīti gonisādiyā abhāvena sesakappiyakuṭīsu tīsu yā kāci kappiyakuṭi kātabbāti attho.
தேஸங் கே³ஹானீதி எத்த² பி⁴க்கூ²னங் வாஸத்தா²ய கதம்பி யாவ ந தெ³ந்தி, தாவ தேஸங் ஸந்தகங்யேவ ப⁴விஸ்ஸதீதி த³ட்ட²ப்³ப³ங். விஹாரங் ட²பெத்வாதி உபஸம்பன்னானங் வாஸத்தா²ய கதகே³ஹங் ட²பெத்வாதி அத்தோ². கே³ஹந்தி நிவாஸகே³ஹங், தத³ஞ்ஞங் பன உபோஸதா²கா³ராதி³ ஸப்³ப³ங் அனிவாஸகே³ஹங் சதுகப்பியபூ⁴மிவிமுத்தா பஞ்சமீ கப்பியபூ⁴மி. ஸங்க⁴ஸந்தகேபி ஹி ஏதாதி³ஸே கே³ஹே ஸுட்டு² பரிக்கி²த்தாராமத்தேபி அப்³போ⁴காஸே விய அந்தோவுத்தா²தி³தோ³ஸோ நத்தி². யேன கேனசி ச²ன்னே, பரிச்ச²ன்னே ச ஸஹஸெய்யப்பஹோனகே பி⁴க்கு²ஸங்க⁴ஸ்ஸ நிவாஸகே³ஹே அந்தோவுத்தா²தி³தோ³ஸோ, ந அஞ்ஞத்த². தேனாஹ ‘‘யங் பனா’’திஆதி³. தத்த² ‘‘ஸங்கி⁴கங் வா புக்³க³லிகங் வா’’தி இத³ங் கிஞ்சாபி பி⁴க்கு²னீனங் ஸாமஞ்ஞதோ வுத்தங், பி⁴க்கூ²னங் பன ஸங்கி⁴கங் புக்³க³லிகஞ்ச பி⁴க்கு²னீனங், தாஸங் ஸங்கி⁴கங் புக்³க³லிகஞ்ச பி⁴க்கூ²னங் கி³ஹிஸந்தகட்டா²னே திட்ட²தீதி வேதி³தப்³ப³ங்.
Tesaṃ gehānīti ettha bhikkhūnaṃ vāsatthāya katampi yāva na denti, tāva tesaṃ santakaṃyeva bhavissatīti daṭṭhabbaṃ. Vihāraṃ ṭhapetvāti upasampannānaṃ vāsatthāya katagehaṃ ṭhapetvāti attho. Gehanti nivāsagehaṃ, tadaññaṃ pana uposathāgārādi sabbaṃ anivāsagehaṃ catukappiyabhūmivimuttā pañcamī kappiyabhūmi. Saṅghasantakepi hi etādise gehe suṭṭhu parikkhittārāmattepi abbhokāse viya antovutthādidoso natthi. Yena kenaci channe, paricchanne ca sahaseyyappahonake bhikkhusaṅghassa nivāsagehe antovutthādidoso, na aññattha. Tenāha ‘‘yaṃ panā’’tiādi. Tattha ‘‘saṅghikaṃ vā puggalikaṃ vā’’ti idaṃ kiñcāpi bhikkhunīnaṃ sāmaññato vuttaṃ, bhikkhūnaṃ pana saṅghikaṃ puggalikañca bhikkhunīnaṃ, tāsaṃ saṅghikaṃ puggalikañca bhikkhūnaṃ gihisantakaṭṭhāne tiṭṭhatīti veditabbaṃ.
முக²ஸன்னிதீ⁴தி அந்தோஸன்னிஹிததோ³ஸோ ஹி முக²ப்பவேஸனநிமித்தங் ஆபத்திங் கரோதி, நாஞ்ஞதா². தஸ்மா ‘‘முக²ஸன்னிதீ⁴’’தி வுத்தோ.
Mukhasannidhīti antosannihitadoso hi mukhappavesananimittaṃ āpattiṃ karoti, nāññathā. Tasmā ‘‘mukhasannidhī’’ti vutto.
தத்த² தத்த² க²ண்டா³ ஹொந்தீதி உபட்³ட⁴தோ அதி⁴கங் க²ண்டா³ ஹொந்தி. ஸப்³ப³ஸ்மிங் ச²த³னே வினட்டே²தி திணபண்ணாதி³வஸ்ஸபரித்தாயகே ச²த³னே வினட்டே². கோ³பானஸீனங் பன உபரி வல்லீஹி ப³த்³த⁴த³ண்டே³ஸு டி²தேஸுபி ஜஹிதவத்து²கா ஹொந்தி ஏவ. பக்க²பாஸகமண்ட³லந்தி ஏகஸ்மிங் பஸ்ஸே திண்ணங் கோ³பானஸீனங் உபரி டி²ததிணபண்ணாதி³ச்ச²த³னங் வுச்சதி.
Tattha tattha khaṇḍā hontīti upaḍḍhato adhikaṃ khaṇḍā honti. Sabbasmiṃ chadane vinaṭṭheti tiṇapaṇṇādivassaparittāyake chadane vinaṭṭhe. Gopānasīnaṃ pana upari vallīhi baddhadaṇḍesu ṭhitesupi jahitavatthukā honti eva. Pakkhapāsakamaṇḍalanti ekasmiṃ passe tiṇṇaṃ gopānasīnaṃ upari ṭhitatiṇapaṇṇādicchadanaṃ vuccati.
அனுபஸம்பன்னஸ்ஸ தா³தப்³போ³ அஸ்ஸாதிஆதி³னா அகப்பியகுடியங் வுத்த²ம்பி அனுபஸம்பன்னஸ்ஸ தி³ன்னே கப்பியங் ஹோதி, ஸாபெக்க²தா³னஞ்செத்த² வட்டதி, படிக்³க³ஹணங் விய ந ஹோதீதி த³ஸ்ஸேதி.
Anupasampannassa dātabbo assātiādinā akappiyakuṭiyaṃ vutthampi anupasampannassa dinne kappiyaṃ hoti, sāpekkhadānañcettha vaṭṭati, paṭiggahaṇaṃ viya na hotīti dasseti.
299. பாளியங் கந்தாரே ஸம்பா⁴வேஸீதி அப்பப⁴க்க²கந்தாரே ஸம்பாபுணி.
299. Pāḷiyaṃ kantāre sambhāvesīti appabhakkhakantāre sampāpuṇi.
கப்பியபூ⁴மிஅனுஜானநகதா²வண்ணனா நிட்டி²தா.
Kappiyabhūmianujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
179. கப்பியபூ⁴மிஅனுஜானநா • 179. Kappiyabhūmianujānanā
181. பஞ்சகோ³ரஸாதி³அனுஜானநா • 181. Pañcagorasādianujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கப்பியபூ⁴மிஅனுஜானநகதா² • Kappiyabhūmianujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கப்பியபூ⁴மிஅனுஜானநகதா²வண்ணனா • Kappiyabhūmianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கப்பியபூ⁴மிஅனுஜானநகதா²வண்ணனா • Kappiyabhūmianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 179. கப்பியபூ⁴மிஅனுஜானநகதா² • 179. Kappiyabhūmianujānanakathā
