| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
19. கப்பியபூ⁴மிவினிச்ச²யகதா²
19. Kappiyabhūmivinicchayakathā
101. ஏவங் சதுகாலிகவினிச்ச²யங் கதெ²த்வா இதா³னி கப்பியகுடிவினிச்ச²யங் கதே²துங் ‘‘கப்பியா சதுபூ⁴மியோ’’திஆதி³மாஹ. தத்த² கப்பந்தீதி கப்பியா, கப்ப ஸாமத்தி²யேதி தா⁴து. ப⁴வந்தி ஏதாஸு அந்தோவுத்த²அந்தோபக்கானீதி பூ⁴மியோ, சதஸ்ஸோ பூ⁴மியோ சதுபூ⁴மியோ, சதஸ்ஸோ கப்பியகுடியோதி அத்தோ². கதமா தாதி ஆஹ ‘‘உஸ்ஸாவனந்திகா…பே॰… வேதி³தப்³பா³’’தி. கத²ங் விஞ்ஞாயதிச்சாஹ ‘‘அனுஜானாமி…பே॰… வசனதோ’’தி. இத³ங் பே⁴ஸஜ்ஜக்க²ந்த⁴கபாளிங் (மஹாவ॰ 295) ஸந்தா⁴யாஹ. தத்த² உத்³த⁴ங் ஸாவனா உஸ்ஸாவனா, உஸ்ஸாவனா அந்தோ யஸ்ஸா கப்பியபூ⁴மியாதி உஸ்ஸாவனந்திகா. கா³வோ நிஸீத³ந்தி எத்தா²தி கோ³னிஸாதி³கா, கோ³-ஸத்³தூ³பபத³ நி-புப்³ப³ஸத³ விஸரணக³த்யாவஸானேஸூதி தா⁴து. க³ஹபதீஹி தி³ன்னாதி க³ஹபதி, உத்தரபத³லோபததியாதப்புரிஸோயங். கம்மவாசாய ஸம்மன்னிதப்³பா³தி ஸம்முதீதி ஏவமிமாஸங் விக்³க³ஹோ காதப்³போ³. தத்தா²தி கப்பியகுடிவினிச்ச²யே. தங் பன அவத்வாபீதி அந்த⁴கட்ட²கதா²யங் வுத்தனயங் அவத்வாபி. பி-ஸத்³தே³ன ததா²வசனம்பி அனுஜானாதி. அட்ட²கதா²ஸு வுத்தனயேன வுத்தேதி ஸேஸஅட்ட²கதா²ஸு வுத்தனயேன ‘‘கப்பியகுடிங் கரோமா’’தி வா ‘‘கப்பியகுடீ’’தி வா வுத்தே. ஸாதா⁴ரணலக்க²ணந்தி ஸப்³ப³அட்ட²கதா²னங் ஸாதா⁴ரணங் உஸ்ஸாவனந்திககுடிகரணலக்க²ணங். சயந்தி அதி⁴ட்டா²னங் உச்சவத்து²ங். யதோ பட்டா²யாதி யதோ இட்ட²கதோ ஸிலதோ மத்திகாபிண்ட³தோ வா பட்டா²ய. பட²மிட்ட²காதீ³னங் ஹெட்டா² ந வட்டந்தீதி பட²மிட்ட²காதீ³னங் ஹெட்டா²பூ⁴மியங் பதிட்டா²பியமானா இட்ட²காத³யோ பூ⁴மிக³திகத்தா ‘‘கப்பியகுடிங் கரோமா’’தி வத்வா பதிட்டா²பேதுங் ந வட்டந்தி. யதி³ ஏவங் பூ⁴மியங் நிக²ணித்வா ட²பியமானா த²ம்பா⁴ கஸ்மா ததா² வத்வா பதிட்டா²பேதுங் வட்டந்தீதி ஆஹ ‘‘த²ம்பா⁴ பன…பே॰… வட்டந்தீ’’தி.
101. Evaṃ catukālikavinicchayaṃ kathetvā idāni kappiyakuṭivinicchayaṃ kathetuṃ ‘‘kappiyā catubhūmiyo’’tiādimāha. Tattha kappantīti kappiyā, kappa sāmatthiyeti dhātu. Bhavanti etāsu antovutthaantopakkānīti bhūmiyo, catasso bhūmiyo catubhūmiyo, catasso kappiyakuṭiyoti attho. Katamā tāti āha ‘‘ussāvanantikā…pe… veditabbā’’ti. Kathaṃ viññāyaticcāha ‘‘anujānāmi…pe… vacanato’’ti. Idaṃ bhesajjakkhandhakapāḷiṃ (mahāva. 295) sandhāyāha. Tattha uddhaṃ sāvanā ussāvanā, ussāvanā anto yassā kappiyabhūmiyāti ussāvanantikā. Gāvo nisīdanti etthāti gonisādikā, go-saddūpapada ni-pubbasada visaraṇagatyāvasānesūti dhātu. Gahapatīhi dinnāti gahapati, uttarapadalopatatiyātappurisoyaṃ. Kammavācāya sammannitabbāti sammutīti evamimāsaṃ viggaho kātabbo. Tatthāti kappiyakuṭivinicchaye. Taṃ pana avatvāpīti andhakaṭṭhakathāyaṃ vuttanayaṃ avatvāpi. Pi-saddena tathāvacanampi anujānāti. Aṭṭhakathāsu vuttanayena vutteti sesaaṭṭhakathāsu vuttanayena ‘‘kappiyakuṭiṃ karomā’’ti vā ‘‘kappiyakuṭī’’ti vā vutte. Sādhāraṇalakkhaṇanti sabbaaṭṭhakathānaṃ sādhāraṇaṃ ussāvanantikakuṭikaraṇalakkhaṇaṃ. Cayanti adhiṭṭhānaṃ uccavatthuṃ. Yato paṭṭhāyāti yato iṭṭhakato silato mattikāpiṇḍato vā paṭṭhāya. Paṭhamiṭṭhakādīnaṃ heṭṭhā na vaṭṭantīti paṭhamiṭṭhakādīnaṃ heṭṭhābhūmiyaṃ patiṭṭhāpiyamānā iṭṭhakādayo bhūmigatikattā ‘‘kappiyakuṭiṃ karomā’’ti vatvā patiṭṭhāpetuṃ na vaṭṭanti. Yadi evaṃ bhūmiyaṃ nikhaṇitvā ṭhapiyamānā thambhā kasmā tathā vatvā patiṭṭhāpetuṃ vaṭṭantīti āha ‘‘thambhā pana…pe… vaṭṭantī’’ti.
ஸங்க⁴ஸந்தகமேவாதி வாஸத்தா²ய கதங் ஸங்கி⁴கஸேனாஸனங் ஸந்தா⁴ய வத³தி. பி⁴க்கு²ஸந்தகந்தி வாஸத்தா²ய ஏவ கதங் பி⁴க்கு²ஸ்ஸ புக்³க³லிகஸேனாஸனங்.
Saṅghasantakamevāti vāsatthāya kataṃ saṅghikasenāsanaṃ sandhāya vadati. Bhikkhusantakanti vāsatthāya eva kataṃ bhikkhussa puggalikasenāsanaṃ.
102. முக²ஸன்னிதீ⁴தி இமினா அந்தோவுத்த²து³க்கடமேவ தீ³பேதி.
102.Mukhasannidhīti iminā antovutthadukkaṭameva dīpeti.
விமதிவினோத³னியங் (வி॰ வி॰ டீ॰ மஹாவக்³க³ 2.295) பன ஏவங் வுத்தங் – தங் பன அவத்வாபீதி பி-ஸத்³தே³ன ததா²வசனம்பி அனுஜானாதி. அட்ட²கதா²ஸூதி அந்த⁴கட்ட²கதா²விரஹிதாஸு ஸேஸட்ட²கதா²ஸு. ஸாதா⁴ரணலக்க²ணந்தி அந்த⁴கட்ட²கதா²ய ஸஹ ஸப்³ப³ட்ட²கதா²னங் ஸமானங். சயந்தி அதி⁴ட்டா²னங் உச்சவத்து²ங். யதோ பட்டா²யாதி யதோ இட்ட²காதி³தோ பட்டா²ய சயங் ஆதி³ங் கத்வா பி⁴த்திங் உட்டா²பேதுகாமாதி அத்தோ². ‘‘த²ம்பா⁴ பன உபரி உக்³க³ச்ச²ந்தி, தஸ்மா வட்டந்தீ’’தி ஏதேன இட்ட²கபாஸாணா ஹெட்டா² பதிட்டா²பியமானாபி யதி³ சயதோ, பூ⁴மிதோ வா ஏகங்கு³லமத்தம்பி உக்³க³தா திட்ட²ந்தி, வட்டந்தீதி ஸித்³த⁴ங் ஹோதி.
Vimativinodaniyaṃ (vi. vi. ṭī. mahāvagga 2.295) pana evaṃ vuttaṃ – taṃ pana avatvāpīti pi-saddena tathāvacanampi anujānāti. Aṭṭhakathāsūti andhakaṭṭhakathāvirahitāsu sesaṭṭhakathāsu. Sādhāraṇalakkhaṇanti andhakaṭṭhakathāya saha sabbaṭṭhakathānaṃ samānaṃ. Cayanti adhiṭṭhānaṃ uccavatthuṃ. Yato paṭṭhāyāti yato iṭṭhakādito paṭṭhāya cayaṃ ādiṃ katvā bhittiṃ uṭṭhāpetukāmāti attho. ‘‘Thambhā pana upari uggacchanti, tasmā vaṭṭantī’’ti etena iṭṭhakapāsāṇā heṭṭhā patiṭṭhāpiyamānāpi yadi cayato, bhūmito vā ekaṅgulamattampi uggatā tiṭṭhanti, vaṭṭantīti siddhaṃ hoti.
ஆராமோதி உபசாரஸீமாபரிச்சி²ன்னோ ஸகலோ விஹாரோ. ஸேனாஸனானீதி விஹாரஸ்ஸ அந்தோ திணகுடிஆதி³கானி ஸங்க⁴ஸ்ஸ நிவாஸகே³ஹானி. விஹாரகோ³னிஸாதி³கா நாமாதி ஸேனாஸனகோ³னிஸாதி³கா நாம. ஸேனாஸனானி ஹி ஸயங் பரிக்கி²த்தானிபி ஆராமபரிக்கே²பாபா⁴வேன ‘‘கோ³னிஸாதி³கா’’தி வுத்தா. ‘‘உபட்³ட⁴பரிக்கி²த்தோபீ’’தி இமினா ததோ ஊனபரிக்கி²த்தோ யேபு⁴ய்யேன அபரிக்கி²த்தோ நாம, தஸ்மா அபரிக்கி²த்தஸங்க²மேவ க³ச்ச²தீதி த³ஸ்ஸேதி. எத்தா²தி உபட்³டா⁴தி³பரிக்கி²த்தே. கப்பியகுடி லத்³து⁴ங் வட்டதீதி கோ³னிஸாதி³காய அபா⁴வேன ஸேஸகப்பியகுடீஸு தீஸு யா காசி கப்பியகுடி காதப்³பா³தி அத்தோ².
Ārāmoti upacārasīmāparicchinno sakalo vihāro. Senāsanānīti vihārassa anto tiṇakuṭiādikāni saṅghassa nivāsagehāni. Vihāragonisādikā nāmāti senāsanagonisādikā nāma. Senāsanāni hi sayaṃ parikkhittānipi ārāmaparikkhepābhāvena ‘‘gonisādikā’’ti vuttā. ‘‘Upaḍḍhaparikkhittopī’’ti iminā tato ūnaparikkhitto yebhuyyena aparikkhitto nāma, tasmā aparikkhittasaṅkhameva gacchatīti dasseti. Etthāti upaḍḍhādiparikkhitte. Kappiyakuṭi laddhuṃ vaṭṭatīti gonisādikāya abhāvena sesakappiyakuṭīsu tīsu yā kāci kappiyakuṭi kātabbāti attho.
தேஸங் கே³ஹானீதி எத்த² பி⁴க்கூ²னங் வாஸத்தா²ய கதம்பி யாவ ந தெ³ந்தி, தாவ தேஸங் ஸந்தகங்யேவ ப⁴விஸ்ஸதீதி த³ட்ட²ப்³ப³ங். விஹாரங் ட²பெத்வாதி உபஸம்பன்னானங் வாஸத்தா²ய கதங் கே³ஹங் ட²பெத்வாதி அத்தோ². கே³ஹந்தி நிவாஸகே³ஹங். தத³ஞ்ஞங் பன உபோஸதா²கா³ராதி³ ஸப்³ப³ங் அனிவாஸகே³ஹங் சதுகப்பியபூ⁴மிவிமுத்தா பஞ்சமீ கப்பியபூ⁴மி. ஸங்க⁴ஸந்தகேபி ஹி ஏதாதி³ஸே கே³ஹே ஸுட்டு² பரிக்கி²த்தாராமட்டே²பி அப்³போ⁴காஸே விய அந்தோவுத்தா²தி³தோ³ஸோ நத்தி². யேன கேனசி ச²ன்னே பரிச்ச²ன்னே ச ஸஹஸெய்யப்பஹோனகே பி⁴க்கு²ஸ்ஸ, ஸங்க⁴ஸ்ஸ வா நிவாஸகே³ஹே அந்தோவுத்தா²தி³தோ³ஸோ, ந அஞ்ஞத்த². தேனாஹ ‘‘யங் பனா’’திஆதி³. தத்த² ‘‘ஸங்கி⁴கங் வா புக்³க³லிகங் வா’’தி இத³ங் கிஞ்சாபி பி⁴க்கு²பி⁴க்கு²னீனங் ஸாமஞ்ஞதோ வுத்தங் பி⁴க்கூ²னங் பன ஸங்கி⁴கங் புக்³க³லிகஞ்ச பி⁴க்கு²னீனங், தாஸங் ஸங்கி⁴கங் புக்³க³லிகஞ்ச பி⁴க்கூ²னங் கி³ஹிஸந்தகட்டா²னே திட்ட²தீதி வேதி³தப்³ப³ங்.
Tesaṃ gehānīti ettha bhikkhūnaṃ vāsatthāya katampi yāva na denti, tāva tesaṃ santakaṃyeva bhavissatīti daṭṭhabbaṃ. Vihāraṃṭhapetvāti upasampannānaṃ vāsatthāya kataṃ gehaṃ ṭhapetvāti attho. Gehanti nivāsagehaṃ. Tadaññaṃ pana uposathāgārādi sabbaṃ anivāsagehaṃ catukappiyabhūmivimuttā pañcamī kappiyabhūmi. Saṅghasantakepi hi etādise gehe suṭṭhu parikkhittārāmaṭṭhepi abbhokāse viya antovutthādidoso natthi. Yena kenaci channe paricchanne ca sahaseyyappahonake bhikkhussa, saṅghassa vā nivāsagehe antovutthādidoso, na aññattha. Tenāha ‘‘yaṃ panā’’tiādi. Tattha ‘‘saṅghikaṃ vā puggalikaṃ vā’’ti idaṃ kiñcāpi bhikkhubhikkhunīnaṃ sāmaññato vuttaṃ bhikkhūnaṃ pana saṅghikaṃ puggalikañca bhikkhunīnaṃ, tāsaṃ saṅghikaṃ puggalikañca bhikkhūnaṃ gihisantakaṭṭhāne tiṭṭhatīti veditabbaṃ.
முக²ஸன்னிதீ⁴தி அந்தோஸன்னிஹிததோ³ஸோ ஹி முக²ப்பவேஸனநிமித்தங் ஆபத்திங் கரோதி, நாஞ்ஞதா², தஸ்மா ‘‘முக²ஸன்னிதீ⁴’’தி (வி॰ வி॰ டீ॰ மஹாவக்³க³ 2.295) வுத்தோதி.
Mukhasannidhīti antosannihitadoso hi mukhappavesananimittaṃ āpattiṃ karoti, nāññathā, tasmā ‘‘mukhasannidhī’’ti (vi. vi. ṭī. mahāvagga 2.295) vuttoti.
தத்த² தத்த² க²ண்டா³ ஹொந்தீதி உபட்³ட⁴தோ அதி⁴கங் க²ண்டா³ ஹொந்தி. ஸப்³ப³ஸ்மிங் ச²த³னே வினட்டே²தி திணபண்ணாதி³வஸ்ஸபரித்தாயகே ச²த³னே வினட்டே². கோ³பானஸீனங் பன உபரி வல்லீஹி ப³த்³த⁴த³ண்டே³ஸு டி²தேஸுபி ஜஹிதவத்து²கா ஹொந்தி ஏவ. பக்க²பாஸகமண்ட³லந்தி ஏகஸ்மிங் பஸ்ஸே திண்ணங் கோ³பானஸீனங் உபரி டி²ததிணபண்ணாதி³ச²த³னங் வுச்சதி.
Tattha tattha khaṇḍā hontīti upaḍḍhato adhikaṃ khaṇḍā honti. Sabbasmiṃ chadane vinaṭṭheti tiṇapaṇṇādivassaparittāyake chadane vinaṭṭhe. Gopānasīnaṃ pana upari vallīhi baddhadaṇḍesu ṭhitesupi jahitavatthukā honti eva. Pakkhapāsakamaṇḍalanti ekasmiṃ passe tiṇṇaṃ gopānasīnaṃ upari ṭhitatiṇapaṇṇādichadanaṃ vuccati.
103. ‘‘அனுபஸம்பன்னஸ்ஸ த³த்வா தஸ்ஸா’’திஆதி³னா அகப்பியகுடியங் வுத்த²ம்பி அனுபஸம்பன்னஸ்ஸ தி³ன்னே கப்பியங் ஹோதி, ஸாபெக்க²தா³னஞ்செத்த² வட்டதி, படிக்³க³ஹணங் விய ந ஹோதீதி த³ஸ்ஸேதி. அந்தோபக்கஸாமங்பக்கேஸு பன ‘‘ந, பி⁴க்க²வே, அந்தோவுத்த²ங் அந்தோபக்கங் ஸாமங்பக்கங் பரிபு⁴ஞ்ஜிதப்³ப³ங், யோ பரிபு⁴ஞ்ஜெய்ய, ஆபத்தி து³க்கடஸ்ஸ. அந்தோ சே, பி⁴க்க²வே, வுத்த²ங் அந்தோபக்கங் ஸாமங்பக்கங், தஞ்சே பரிபு⁴ஞ்ஜெய்ய, ஆபத்தி திண்ணங் து³க்கடானங். அந்தோ சே, பி⁴க்க²வே, வுத்த²ங் அந்தோபக்கங் அஞ்ஞேஹி பக்கங், தஞ்சே பரிபு⁴ஞ்ஜெய்ய, ஆபத்தி த்³வின்னங் து³க்கடானங். அந்தோ சே, பி⁴க்க²வே, வுத்த²ங் ப³ஹிபக்கங் ஸாமங்பக்கங், தஞ்சே பரிபு⁴ஞ்ஜெய்ய, ஆபத்தி த்³வின்னங் து³க்கடானங். ப³ஹி சே, பி⁴க்க²வே, வுத்த²ங் அந்தோபக்கங் ஸாமங்பக்கங், தஞ்சே பரிபு⁴ஞ்ஜெய்ய, ஆபத்தி த்³வின்னங் து³க்கடானங். அந்தோ சே, பி⁴க்க²வே, வுத்த²ங் ப³ஹிபக்கங் அஞ்ஞேஹி பக்கங், தஞ்சே பரிபு⁴ஞ்ஜெய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுத்த²ங் அந்தோபக்கங் அஞ்ஞேஹி பக்கங், தஞ்சே பரிபு⁴ஞ்ஜெய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுத்த²ங் ப³ஹிபக்கங் ஸாமங்பக்கங், தஞ்சே பரிபு⁴ஞ்ஜெய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுத்த²ங் ப³ஹிபக்கங் அஞ்ஞேஹி பக்கங், தஞ்சே பரிபு⁴ஞ்ஜெய்ய, அனாபத்தீ’’தி (மஹாவ॰ 274) வசனதோ ஏகங் திராபத்திகங், தீணி து³ராபத்திகானி, தீணி ஏகாபத்திகானி, ஏகங் அனாபத்திகந்தி அட்ட² ஹொந்தி. தத்த² அந்தோவுத்த²ந்தி அகப்பியகுடியங் வுத்த²ங். அந்தோபக்கேபி ஏஸேவ நயோ. ஸாமங்பக்கந்தி யங் கிஞ்சி ஆமிஸங் பி⁴க்கு²ஸ்ஸ பசிதுங் ந வட்டதி. தத்த² யங் வத்தப்³ப³ங், தங் அட்ட²கதா²யங் வுத்தமேவ.
103.‘‘Anupasampannassa datvā tassā’’tiādinā akappiyakuṭiyaṃ vutthampi anupasampannassa dinne kappiyaṃ hoti, sāpekkhadānañcettha vaṭṭati, paṭiggahaṇaṃ viya na hotīti dasseti. Antopakkasāmaṃpakkesu pana ‘‘na, bhikkhave, antovutthaṃ antopakkaṃ sāmaṃpakkaṃ paribhuñjitabbaṃ, yo paribhuñjeyya, āpatti dukkaṭassa. Anto ce, bhikkhave, vutthaṃ antopakkaṃ sāmaṃpakkaṃ, tañce paribhuñjeyya, āpatti tiṇṇaṃ dukkaṭānaṃ. Anto ce, bhikkhave, vutthaṃ antopakkaṃ aññehi pakkaṃ, tañce paribhuñjeyya, āpatti dvinnaṃ dukkaṭānaṃ. Anto ce, bhikkhave, vutthaṃ bahipakkaṃ sāmaṃpakkaṃ, tañce paribhuñjeyya, āpatti dvinnaṃ dukkaṭānaṃ. Bahi ce, bhikkhave, vutthaṃ antopakkaṃ sāmaṃpakkaṃ, tañce paribhuñjeyya, āpatti dvinnaṃ dukkaṭānaṃ. Anto ce, bhikkhave, vutthaṃ bahipakkaṃ aññehi pakkaṃ, tañce paribhuñjeyya, āpatti dukkaṭassa. Bahi ce, bhikkhave, vutthaṃ antopakkaṃ aññehi pakkaṃ, tañce paribhuñjeyya, āpatti dukkaṭassa. Bahi ce, bhikkhave, vutthaṃ bahipakkaṃ sāmaṃpakkaṃ, tañce paribhuñjeyya, āpatti dukkaṭassa. Bahi ce, bhikkhave, vutthaṃ bahipakkaṃ aññehi pakkaṃ, tañce paribhuñjeyya, anāpattī’’ti (mahāva. 274) vacanato ekaṃ tirāpattikaṃ, tīṇi durāpattikāni, tīṇi ekāpattikāni, ekaṃ anāpattikanti aṭṭha honti. Tattha antovutthanti akappiyakuṭiyaṃ vutthaṃ. Antopakkepi eseva nayo. Sāmaṃpakkanti yaṃ kiñci āmisaṃ bhikkhussa pacituṃ na vaṭṭati. Tattha yaṃ vattabbaṃ, taṃ aṭṭhakathāyaṃ vuttameva.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
கப்பியபூ⁴மிவினிச்ச²யகதா²லங்காரோ நாம
Kappiyabhūmivinicchayakathālaṅkāro nāma
ஏகூனவீஸதிமோ பரிச்சே²தோ³.
Ekūnavīsatimo paricchedo.
