| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. করজকাযসুত্তং
9. Karajakāyasuttaṃ
২১৯. ‘‘নাহং, ভিক্খৰে, সঞ্চেতনিকানং কম্মানং কতানং উপচিতানং অপ্পটিসংৰেদিত্ৰা ব্যন্তীভাৰং ৰদামি, তঞ্চ খো দিট্ঠেৰ ধম্মে উপপজ্জে ৰা অপরে ৰা পরিযাযে। ন ত্ৰেৰাহং, ভিক্খৰে, সঞ্চেতনিকানং কম্মানং কতানং উপচিতানং অপ্পটিসংৰেদিত্ৰা দুক্খস্সন্তকিরিযং ৰদামি।
219. ‘‘Nāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā byantībhāvaṃ vadāmi, tañca kho diṭṭheva dhamme upapajje vā apare vā pariyāye. Na tvevāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā dukkhassantakiriyaṃ vadāmi.
‘‘স খো সো, ভিক্খৰে, অরিযসাৰকো এৰং ৰিগতাভিজ্ঝো ৰিগতব্যাপাদো অসম্মূল়্হো সম্পজানো পটিস্সতো মেত্তাসহগতেন চেতসা একং দিসং ফরিত্ৰা ৰিহরতি তথা দুতিযং তথা ততিযং তথা চতুত্থং 1। ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি।
‘‘Sa kho so, bhikkhave, ariyasāvako evaṃ vigatābhijjho vigatabyāpādo asammūḷho sampajāno paṭissato mettāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ 2. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati.
‘‘সো এৰং পজানাতি – ‘পুব্বে খো মে ইদং চিত্তং পরিত্তং অহোসি অভাৰিতং, এতরহি পন মে ইদং চিত্তং অপ্পমাণং সুভাৰিতং। যং খো পন কিঞ্চি পমাণকতং কম্মং, ন তং তত্রাৰসিস্সতি ন তং তত্রাৰতিট্ঠতী’তি ।
‘‘So evaṃ pajānāti – ‘pubbe kho me idaṃ cittaṃ parittaṃ ahosi abhāvitaṃ, etarahi pana me idaṃ cittaṃ appamāṇaṃ subhāvitaṃ. Yaṃ kho pana kiñci pamāṇakataṃ kammaṃ, na taṃ tatrāvasissati na taṃ tatrāvatiṭṭhatī’ti .
‘‘অকরোন্তং খো পন পাপকম্মং অপি নু খো দুক্খং ফুসেয্যা’’তি? ‘‘নো হেতং, ভন্তে। অকরোন্তঞ্হি, ভন্তে, পাপকম্মং কুতো দুক্খং ফুসিস্সতী’’তি!
‘‘Akarontaṃ kho pana pāpakammaṃ api nu kho dukkhaṃ phuseyyā’’ti? ‘‘No hetaṃ, bhante. Akarontañhi, bhante, pāpakammaṃ kuto dukkhaṃ phusissatī’’ti!
‘‘ভাৰেতব্বা খো পনাযং, ভিক্খৰে, মেত্তাচেতোৰিমুত্তি ইত্থিযা ৰা পুরিসেন ৰা। ইত্থিযা ৰা, ভিক্খৰে, পুরিসস্স ৰা নাযং কাযো আদায গমনীযো। চিত্তন্তরো অযং, ভিক্খৰে , মচ্চো। সো এৰং পজানাতি – ‘যং খো মে ইদং কিঞ্চি পুব্বে ইমিনা করজকাযেন পাপকম্মং কতং, সব্বং তং ইধ ৰেদনীযং; ন তং অনুগং ভৰিস্সতী’তি। এৰং ভাৰিতা খো, ভিক্খৰে, মেত্তা চেতোৰিমুত্তি অনাগামিতায সংৰত্ততি, ইধ পঞ্ঞস্স ভিক্খুনো উত্তরি 7 ৰিমুত্তিং অপ্পটিৰিজ্ঝতো।
‘‘Bhāvetabbā kho panāyaṃ, bhikkhave, mettācetovimutti itthiyā vā purisena vā. Itthiyā vā, bhikkhave, purisassa vā nāyaṃ kāyo ādāya gamanīyo. Cittantaro ayaṃ, bhikkhave , macco. So evaṃ pajānāti – ‘yaṃ kho me idaṃ kiñci pubbe iminā karajakāyena pāpakammaṃ kataṃ, sabbaṃ taṃ idha vedanīyaṃ; na taṃ anugaṃ bhavissatī’ti. Evaṃ bhāvitā kho, bhikkhave, mettā cetovimutti anāgāmitāya saṃvattati, idha paññassa bhikkhuno uttari 8 vimuttiṃ appaṭivijjhato.
‘‘করুণাসহগতেন চেতসা… মুদিতাসহগতেন চেতসা… উপেক্খাসহগতেন চেতসা একং দিসং ফরিত্ৰা ৰিহরতি তথা দুতিযং তথা ততিযং তথা চতুত্থং। ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি।
‘‘Karuṇāsahagatena cetasā… muditāsahagatena cetasā… upekkhāsahagatena cetasā ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
‘‘সো এৰং পজানাতি – ‘পুব্বে খো মে ইদং চিত্তং পরিত্তং অহোসি অভাৰিতং, এতরহি পন মে ইদং চিত্তং অপ্পমাণং সুভাৰিতং। যং খো পন কিঞ্চি পমাণকতং কম্মং , ন তং তত্রাৰসিস্সতি ন তং তত্রাৰতিট্ঠতী’তি।
‘‘So evaṃ pajānāti – ‘pubbe kho me idaṃ cittaṃ parittaṃ ahosi abhāvitaṃ, etarahi pana me idaṃ cittaṃ appamāṇaṃ subhāvitaṃ. Yaṃ kho pana kiñci pamāṇakataṃ kammaṃ , na taṃ tatrāvasissati na taṃ tatrāvatiṭṭhatī’ti.
‘‘তং কিং মঞ্ঞথ, ভিক্খৰে, দহরতগ্গে চে সো অযং কুমারো উপেক্খং চেতোৰিমুত্তিং ভাৰেয্য, অপি নু খো পাপকম্মং করেয্যা’’তি? ‘‘নো হেতং, ভন্তে’’।
‘‘Taṃ kiṃ maññatha, bhikkhave, daharatagge ce so ayaṃ kumāro upekkhaṃ cetovimuttiṃ bhāveyya, api nu kho pāpakammaṃ kareyyā’’ti? ‘‘No hetaṃ, bhante’’.
‘‘অকরোন্তং খো পন পাপকম্মং অপি নু খো দুক্খং ফুসেয্যা’’তি? ‘‘নো হেতং, ভন্তে। অকরোন্তঞ্হি, ভন্তে, পাপকম্মং কুতো দুক্খং ফুসিস্সতী’’তি!
‘‘Akarontaṃ kho pana pāpakammaṃ api nu kho dukkhaṃ phuseyyā’’ti? ‘‘No hetaṃ, bhante. Akarontañhi, bhante, pāpakammaṃ kuto dukkhaṃ phusissatī’’ti!
‘‘ভাৰেতব্বা খো পনাযং, ভিক্খৰে, উপেক্খা চেতোৰিমুত্তি ইত্থিযা ৰা পুরিসেন ৰা। ইত্থিযা ৰা, ভিক্খৰে, পুরিসস্স ৰা নাযং কাযো আদায গমনীযো। চিত্তন্তরো অযং, ভিক্খৰে, মচ্চো। সো এৰং পজানাতি – ‘যং খো মে ইদং কিঞ্চি পুব্বে ইমিনা করজকাযেন পাপকম্মং কতং, সব্বং তং ইধ ৰেদনীযং; ন তং অনুগং ভৰিস্সতী’তি। এৰং ভাৰিতা খো, ভিক্খৰে, উপেক্খা চেতোৰিমুত্তি অনাগামিতায সংৰত্ততি, ইধ পঞ্ঞস্স ভিক্খুনো উত্তরি ৰিমুত্তিং অপ্পটিৰিজ্ঝতো’’তি। নৰমং।
‘‘Bhāvetabbā kho panāyaṃ, bhikkhave, upekkhā cetovimutti itthiyā vā purisena vā. Itthiyā vā, bhikkhave, purisassa vā nāyaṃ kāyo ādāya gamanīyo. Cittantaro ayaṃ, bhikkhave, macco. So evaṃ pajānāti – ‘yaṃ kho me idaṃ kiñci pubbe iminā karajakāyena pāpakammaṃ kataṃ, sabbaṃ taṃ idha vedanīyaṃ; na taṃ anugaṃ bhavissatī’ti. Evaṃ bhāvitā kho, bhikkhave, upekkhā cetovimutti anāgāmitāya saṃvattati, idha paññassa bhikkhuno uttari vimuttiṃ appaṭivijjhato’’ti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. করজকাযসুত্তৰণ্ণনা • 9. Karajakāyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৫৩৬. পঠমনিরযসগ্গসুত্তাদিৰণ্ণনা • 1-536. Paṭhamanirayasaggasuttādivaṇṇanā
