| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. கரஜகாயஸுத்தவண்ணனா
9. Karajakāyasuttavaṇṇanā
219. நவமே து³க்க²ஸ்ஸாதி விபாகது³க்க²ஸ்ஸ, வட்டது³க்க²ஸ்ஸேவ வா. இமஸ்மிங் ஸுத்தே மணிஓபம்மங் நத்தி². ஏவங் விக³தாபி⁴ஜ்ஜோ²தி ஏவந்தி நிபாதமத்தங். யதா² வா மெத்தங் பா⁴வெந்தா விக³தாபி⁴ஜ்ஜா² ப⁴வந்தி, ஏவங் விக³தாபி⁴ஜ்ஜோ². ஏவமஸ்ஸ விக³தாபி⁴ஜ்ஜ²தாதீ³ஹி நீவரணவிக்க²ம்ப⁴னங் த³ஸ்ஸெத்வா இதா³னி அகுஸலனிஸ்ஸரணானி கதெ²ந்தோ மெத்தாஸஹக³தேனாதிஆதி³மாஹ. அப்பமாணந்தி அப்பமாணஸத்தாரம்மணதாய சிண்ணவஸிதாய வா அப்பமாணங். பமாணகதங் கம்மங் நாம காமாவசரகம்மங். ந தங் தத்ராவதிட்ட²தீதி தங் மஹோகோ⁴ பரித்தங் உத³கங் விய அத்தனோ ஓகாஸங் க³ஹெத்வா டா²துங் ந ஸக்கோதி, அத² கோ² நங் ஓகே⁴ பரித்தங் உத³கங் விய இத³மேவ அப்பமாணங் கம்மங் அஜ்ஜொ²த்த²ரித்வா அத்தனோ விபாகங் நிப்³ப³த்தேதி. த³ஹரதக்³கே³தி த³ஹரகாலதோ பட்டா²ய.
219. Navame dukkhassāti vipākadukkhassa, vaṭṭadukkhasseva vā. Imasmiṃ sutte maṇiopammaṃ natthi. Evaṃ vigatābhijjhoti evanti nipātamattaṃ. Yathā vā mettaṃ bhāventā vigatābhijjhā bhavanti, evaṃ vigatābhijjho. Evamassa vigatābhijjhatādīhi nīvaraṇavikkhambhanaṃ dassetvā idāni akusalanissaraṇāni kathento mettāsahagatenātiādimāha. Appamāṇanti appamāṇasattārammaṇatāya ciṇṇavasitāya vā appamāṇaṃ. Pamāṇakataṃ kammaṃ nāma kāmāvacarakammaṃ. Na taṃ tatrāvatiṭṭhatīti taṃ mahogho parittaṃ udakaṃ viya attano okāsaṃ gahetvā ṭhātuṃ na sakkoti, atha kho naṃ oghe parittaṃ udakaṃ viya idameva appamāṇaṃ kammaṃ ajjhottharitvā attano vipākaṃ nibbatteti. Daharataggeti daharakālato paṭṭhāya.
நாயங் காயோ ஆதா³யக³மனியோதி இமங் காயங் க³ஹெத்வா பரலோகங் க³ந்துங் நாம ந ஸக்காதி அத்தோ² . சித்தந்தரோதி சித்தகாரணோ, அத² வா சித்தேனேவ அந்தரிகோ. ஏகஸ்ஸேவ ஹி சுதிசித்தஸ்ஸ அனந்தரா து³தியே படிஸந்தி⁴சித்தே தே³வோ நாம ஹோதி, நேரயிகோ நாம ஹோதி, திரச்சா²னக³தோ நாம ஹோதி. புரிமனயேபி சித்தேன காரணபூ⁴தேன தே³வோ நேரயிகோ வா ஹோதீதி அத்தோ². ஸப்³ப³ங் தங் இத⁴ வேத³னீயந்தி தி³ட்ட²த⁴ம்மவேத³னீயகொட்டா²ஸவனேதங் வுத்தங். ந தங் அனுக³ங் ப⁴விஸ்ஸதீதி மெத்தாய உபபஜ்ஜவேத³னீயபா⁴வஸ்ஸ உபச்சி²ன்னத்தா உபபஜ்ஜவேத³னீயவஸேன ந அனுக³தங் ப⁴விஸ்ஸதி. இத³ங் ஸோதாபன்னஸகதா³கா³மிஅரியபுக்³க³லானங் பச்சவெக்க²ணங் வேதி³தப்³ப³ங். அனாகா³மிதாயாதி ஜா²னானாகா³மிதாய. இத⁴பஞ்ஞஸ்ஸாதி இமஸ்மிங் ஸாஸனே பஞ்ஞா இத⁴பஞ்ஞா நாம, ஸாஸனசரிதாய அரியபஞ்ஞாய டி²தஸ்ஸ அரியஸாவகஸ்ஸாதி அத்தோ². உத்தரிவிமுத்திந்தி அரஹத்தங். த³ஸமங் உத்தானத்த²மேவாதி.
Nāyaṃ kāyo ādāyagamaniyoti imaṃ kāyaṃ gahetvā paralokaṃ gantuṃ nāma na sakkāti attho . Cittantaroti cittakāraṇo, atha vā citteneva antariko. Ekasseva hi cuticittassa anantarā dutiye paṭisandhicitte devo nāma hoti, nerayiko nāma hoti, tiracchānagato nāma hoti. Purimanayepi cittena kāraṇabhūtena devo nerayiko vā hotīti attho. Sabbaṃ taṃ idha vedanīyanti diṭṭhadhammavedanīyakoṭṭhāsavanetaṃ vuttaṃ. Na taṃ anugaṃ bhavissatīti mettāya upapajjavedanīyabhāvassa upacchinnattā upapajjavedanīyavasena na anugataṃ bhavissati. Idaṃ sotāpannasakadāgāmiariyapuggalānaṃ paccavekkhaṇaṃ veditabbaṃ. Anāgāmitāyāti jhānānāgāmitāya. Idhapaññassāti imasmiṃ sāsane paññā idhapaññā nāma, sāsanacaritāya ariyapaññāya ṭhitassa ariyasāvakassāti attho. Uttarivimuttinti arahattaṃ. Dasamaṃ uttānatthamevāti.
கரஜகாயவக்³கோ³ பட²மோ.
Karajakāyavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. கரஜகாயஸுத்தங் • 9. Karajakāyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-536. பட²மனிரயஸக்³க³ஸுத்தாதி³வண்ணனா • 1-536. Paṭhamanirayasaggasuttādivaṇṇanā
