| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৯. করজকাযসুত্তৰণ্ণনা
9. Karajakāyasuttavaṇṇanā
২১৯. নৰমে দুক্খস্সাতি ৰিপাকদুক্খস্স, ৰট্টদুক্খস্সেৰ ৰা। ইমস্মিং সুত্তে মণিওপম্মং নত্থি। এৰং ৰিগতাভিজ্ঝোতি এৰন্তি নিপাতমত্তং। যথা ৰা মেত্তং ভাৰেন্তা ৰিগতাভিজ্ঝা ভৰন্তি, এৰং ৰিগতাভিজ্ঝো। এৰমস্স ৰিগতাভিজ্ঝতাদীহি নীৰরণৰিক্খম্ভনং দস্সেত্ৰা ইদানি অকুসলনিস্সরণানি কথেন্তো মেত্তাসহগতেনাতিআদিমাহ। অপ্পমাণন্তি অপ্পমাণসত্তারম্মণতায চিণ্ণৰসিতায ৰা অপ্পমাণং। পমাণকতং কম্মং নাম কামাৰচরকম্মং। ন তং তত্রাৰতিট্ঠতীতি তং মহোঘো পরিত্তং উদকং ৰিয অত্তনো ওকাসং গহেত্ৰা ঠাতুং ন সক্কোতি, অথ খো নং ওঘে পরিত্তং উদকং ৰিয ইদমেৰ অপ্পমাণং কম্মং অজ্ঝোত্থরিত্ৰা অত্তনো ৰিপাকং নিব্বত্তেতি। দহরতগ্গেতি দহরকালতো পট্ঠায।
219. Navame dukkhassāti vipākadukkhassa, vaṭṭadukkhasseva vā. Imasmiṃ sutte maṇiopammaṃ natthi. Evaṃ vigatābhijjhoti evanti nipātamattaṃ. Yathā vā mettaṃ bhāventā vigatābhijjhā bhavanti, evaṃ vigatābhijjho. Evamassa vigatābhijjhatādīhi nīvaraṇavikkhambhanaṃ dassetvā idāni akusalanissaraṇāni kathento mettāsahagatenātiādimāha. Appamāṇanti appamāṇasattārammaṇatāya ciṇṇavasitāya vā appamāṇaṃ. Pamāṇakataṃ kammaṃ nāma kāmāvacarakammaṃ. Na taṃ tatrāvatiṭṭhatīti taṃ mahogho parittaṃ udakaṃ viya attano okāsaṃ gahetvā ṭhātuṃ na sakkoti, atha kho naṃ oghe parittaṃ udakaṃ viya idameva appamāṇaṃ kammaṃ ajjhottharitvā attano vipākaṃ nibbatteti. Daharataggeti daharakālato paṭṭhāya.
নাযং কাযো আদাযগমনিযোতি ইমং কাযং গহেত্ৰা পরলোকং গন্তুং নাম ন সক্কাতি অত্থো । চিত্তন্তরোতি চিত্তকারণো, অথ ৰা চিত্তেনেৰ অন্তরিকো। একস্সেৰ হি চুতিচিত্তস্স অনন্তরা দুতিযে পটিসন্ধিচিত্তে দেৰো নাম হোতি, নেরযিকো নাম হোতি, তিরচ্ছানগতো নাম হোতি। পুরিমনযেপি চিত্তেন কারণভূতেন দেৰো নেরযিকো ৰা হোতীতি অত্থো। সব্বং তং ইধ ৰেদনীযন্তি দিট্ঠধম্মৰেদনীযকোট্ঠাসৰনেতং ৰুত্তং। ন তং অনুগং ভৰিস্সতীতি মেত্তায উপপজ্জৰেদনীযভাৰস্স উপচ্ছিন্নত্তা উপপজ্জৰেদনীযৰসেন ন অনুগতং ভৰিস্সতি। ইদং সোতাপন্নসকদাগামিঅরিযপুগ্গলানং পচ্চৰেক্খণং ৰেদিতব্বং। অনাগামিতাযাতি ঝানানাগামিতায। ইধপঞ্ঞস্সাতি ইমস্মিং সাসনে পঞ্ঞা ইধপঞ্ঞা নাম, সাসনচরিতায অরিযপঞ্ঞায ঠিতস্স অরিযসাৰকস্সাতি অত্থো। উত্তরিৰিমুত্তিন্তি অরহত্তং। দসমং উত্তানত্থমেৰাতি।
Nāyaṃ kāyo ādāyagamaniyoti imaṃ kāyaṃ gahetvā paralokaṃ gantuṃ nāma na sakkāti attho . Cittantaroti cittakāraṇo, atha vā citteneva antariko. Ekasseva hi cuticittassa anantarā dutiye paṭisandhicitte devo nāma hoti, nerayiko nāma hoti, tiracchānagato nāma hoti. Purimanayepi cittena kāraṇabhūtena devo nerayiko vā hotīti attho. Sabbaṃ taṃ idha vedanīyanti diṭṭhadhammavedanīyakoṭṭhāsavanetaṃ vuttaṃ. Na taṃ anugaṃ bhavissatīti mettāya upapajjavedanīyabhāvassa upacchinnattā upapajjavedanīyavasena na anugataṃ bhavissati. Idaṃ sotāpannasakadāgāmiariyapuggalānaṃ paccavekkhaṇaṃ veditabbaṃ. Anāgāmitāyāti jhānānāgāmitāya. Idhapaññassāti imasmiṃ sāsane paññā idhapaññā nāma, sāsanacaritāya ariyapaññāya ṭhitassa ariyasāvakassāti attho. Uttarivimuttinti arahattaṃ. Dasamaṃ uttānatthamevāti.
করজকাযৰগ্গো পঠমো।
Karajakāyavaggo paṭhamo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. করজকাযসুত্তং • 9. Karajakāyasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৫৩৬. পঠমনিরযসগ্গসুত্তাদিৰণ্ণনা • 1-536. Paṭhamanirayasaggasuttādivaṇṇanā
