| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
9. කරජකායසුත්‌තවණ්‌ණනා
9. Karajakāyasuttavaṇṇanā
219. නවමෙ දුක්‌ඛස්‌සාති විපාකදුක්‌ඛස්‌ස, වට්‌ටදුක්‌ඛස්‌සෙව වා. ඉමස්‌මිං සුත්‌තෙ මණිඔපම්‌මං නත්‌ථි. එවං විගතාභිජ්‌ඣොති එවන්‌ති නිපාතමත්‌තං. යථා වා මෙත්‌තං භාවෙන්‌තා විගතාභිජ්‌ඣා භවන්‌ති, එවං විගතාභිජ්‌ඣො. එවමස්‌ස විගතාභිජ්‌ඣතාදීහි නීවරණවික්‌ඛම්‌භනං දස්‌සෙත්‌වා ඉදානි අකුසලනිස්‌සරණානි කථෙන්‌තො මෙත්‌තාසහගතෙනාතිආදිමාහ. අප්‌පමාණන්‌ති අප්‌පමාණසත්‌තාරම්‌මණතාය චිණ්‌ණවසිතාය වා අප්‌පමාණං. පමාණකතං කම්‌මං නාම කාමාවචරකම්‌මං. න තං තත්‍රාවතිට්‌ඨතීති තං මහොඝො පරිත්‌තං උදකං විය අත්‌තනො ඔකාසං ගහෙත්‌වා ඨාතුං න සක්‌කොති, අථ ඛො නං ඔඝෙ පරිත්‌තං උදකං විය ඉදමෙව අප්‌පමාණං කම්‌මං අජ්‌ඣොත්‌ථරිත්‌වා අත්‌තනො විපාකං නිබ්‌බත්‌තෙති. දහරතග්‌ගෙති දහරකාලතො පට්‌ඨාය.
219. Navame dukkhassāti vipākadukkhassa, vaṭṭadukkhasseva vā. Imasmiṃ sutte maṇiopammaṃ natthi. Evaṃ vigatābhijjhoti evanti nipātamattaṃ. Yathā vā mettaṃ bhāventā vigatābhijjhā bhavanti, evaṃ vigatābhijjho. Evamassa vigatābhijjhatādīhi nīvaraṇavikkhambhanaṃ dassetvā idāni akusalanissaraṇāni kathento mettāsahagatenātiādimāha. Appamāṇanti appamāṇasattārammaṇatāya ciṇṇavasitāya vā appamāṇaṃ. Pamāṇakataṃ kammaṃ nāma kāmāvacarakammaṃ. Na taṃ tatrāvatiṭṭhatīti taṃ mahogho parittaṃ udakaṃ viya attano okāsaṃ gahetvā ṭhātuṃ na sakkoti, atha kho naṃ oghe parittaṃ udakaṃ viya idameva appamāṇaṃ kammaṃ ajjhottharitvā attano vipākaṃ nibbatteti. Daharataggeti daharakālato paṭṭhāya.
නායං කායො ආදායගමනියොති ඉමං කායං ගහෙත්‌වා පරලොකං ගන්‌තුං නාම න සක්‌කාති අත්‌ථො . චිත්‌තන්‌තරොති චිත්‌තකාරණො, අථ වා චිත්‌තෙනෙව අන්‌තරිකො. එකස්‌සෙව හි චුතිචිත්‌තස්‌ස අනන්‌තරා දුතියෙ පටිසන්‌ධිචිත්‌තෙ දෙවො නාම හොති, නෙරයිකො නාම හොති, තිරච්‌ඡානගතො නාම හොති. පුරිමනයෙපි චිත්‌තෙන කාරණභූතෙන දෙවො නෙරයිකො වා හොතීති අත්‌ථො. සබ්‌බං තං ඉධ වෙදනීයන්‌ති දිට්‌ඨධම්‌මවෙදනීයකොට්‌ඨාසවනෙතං වුත්‌තං. න තං අනුගං භවිස්‌සතීති මෙත්‌තාය උපපජ්‌ජවෙදනීයභාවස්‌ස උපච්‌ඡින්‌නත්‌තා උපපජ්‌ජවෙදනීයවසෙන න අනුගතං භවිස්‌සති. ඉදං සොතාපන්‌නසකදාගාමිඅරියපුග්‌ගලානං පච්‌චවෙක්‌ඛණං වෙදිතබ්‌බං. අනාගාමිතායාති ඣානානාගාමිතාය. ඉධපඤ්‌ඤස්‌සාති ඉමස්‌මිං සාසනෙ පඤ්‌ඤා ඉධපඤ්‌ඤා නාම, සාසනචරිතාය අරියපඤ්‌ඤාය ඨිතස්‌ස අරියසාවකස්‌සාති අත්‌ථො. උත්‌තරිවිමුත්‌තින්‌ති අරහත්‌තං. දසමං උත්‌තානත්‌ථමෙවාති.
Nāyaṃ kāyo ādāyagamaniyoti imaṃ kāyaṃ gahetvā paralokaṃ gantuṃ nāma na sakkāti attho . Cittantaroti cittakāraṇo, atha vā citteneva antariko. Ekasseva hi cuticittassa anantarā dutiye paṭisandhicitte devo nāma hoti, nerayiko nāma hoti, tiracchānagato nāma hoti. Purimanayepi cittena kāraṇabhūtena devo nerayiko vā hotīti attho. Sabbaṃ taṃ idha vedanīyanti diṭṭhadhammavedanīyakoṭṭhāsavanetaṃ vuttaṃ. Na taṃ anugaṃ bhavissatīti mettāya upapajjavedanīyabhāvassa upacchinnattā upapajjavedanīyavasena na anugataṃ bhavissati. Idaṃ sotāpannasakadāgāmiariyapuggalānaṃ paccavekkhaṇaṃ veditabbaṃ. Anāgāmitāyāti jhānānāgāmitāya. Idhapaññassāti imasmiṃ sāsane paññā idhapaññā nāma, sāsanacaritāya ariyapaññāya ṭhitassa ariyasāvakassāti attho. Uttarivimuttinti arahattaṃ. Dasamaṃ uttānatthamevāti.
කරජකායවග්‌ගො පඨමො.
Karajakāyavaggo paṭhamo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 9. කරජකායසුත්‌තං • 9. Karajakāyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-536. පඨමනිරයසග්‌ගසුත්‌තාදිවණ්‌ණනා • 1-536. Paṭhamanirayasaggasuttādivaṇṇanā
