| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. காரணபாலீஸுத்தவண்ணனா
4. Kāraṇapālīsuttavaṇṇanā
194. சதுத்தே² பண்டி³தோ மஞ்ஞேதி எத்த² மஞ்ஞேதி இத³ங் ‘‘மஞ்ஞதீ’’தி இமினா ஸமானத்த²ங் நிபாதபத³ங். தஸ்ஸ இதி-ஸத்³த³ங் ஆனெத்வா அத்த²ங் த³ஸ்ஸெந்தோ ‘‘பண்டி³தோதி மஞ்ஞதீ’’தி ஆஹ. அனுமதிபுச்சா²வஸேன சேதங் வுத்தங். தேனேவாஹ ‘‘உதா³ஹு நோ’’தி. ‘‘தங் கிங் மஞ்ஞதி ப⁴வங் பிங்கி³யானீ ஸமணஸ்ஸ கோ³தமஸ்ஸ பஞ்ஞாவெய்யத்திய’’ந்தி வுத்தமேவத்த²ங் புன க³ண்ஹந்தோ ‘‘பண்டி³தோ மஞ்ஞே’’தி ஆஹ, தஸ்மா வுத்தங் ‘‘ப⁴வங் பிங்கி³யானீ ஸமணங் கோ³தமங் பண்டி³தோதி மஞ்ஞதி உதா³ஹு நோ’’தி, யதா² தே க²மெய்ய, ததா² நங் கதே²ஹீதி அதி⁴ப்பாயோ. அஹங் கோ நாம, மம அவிஸயோ ஏஸோதி த³ஸ்ஸேதி. கோ சாதி ஹேதுனிஸ்ஸக்கே பச்சத்தவசனந்தி ஆஹ ‘‘குதோ சா’’தி. ததா² சாஹ ‘‘கேன காரணேன ஜானிஸ்ஸாமீ’’தி, யேன காரணேன ஸமணஸ்ஸ கோ³தமஸ்ஸ பஞ்ஞாவெய்யத்தியங் ஜானெய்யங் , தங் காரணங் மயி நத்தீ²தி அதி⁴ப்பாயோ. பு³த்³தோ⁴யேவ ப⁴வெய்ய அபு³த்³த⁴ஸ்ஸ ஸப்³ப³தா² பு³த்³த⁴ஞாணானுபா⁴வங் ஜானிதுங் அஸக்குணெய்யத்தாதி. வுத்தஞ்ஹேதங் – ‘‘அப்பமத்தகங் பனேதங், பி⁴க்க²வே, ஓரமத்தகங் ஸீலமத்தகங், யேன புது²ஜ்ஜனோ ததா²க³தஸ்ஸ வண்ணங் வத³மானோ வதெ³ய்ய (தீ³॰ நி॰ 1.7). அத்தி², பி⁴க்க²வே, அஞ்ஞேவ த⁴ம்மா க³ம்பீ⁴ரா து³த்³த³ஸா து³ரனுபோ³தா⁴…பே॰… யேஹி ததா²க³தஸ்ஸ யதா²பூ⁴தங் வண்ணங் ஸம்மா வத³மானோ வதெ³ய்யா’’தி (தீ³॰ நி॰ 1.28) ச. எத்தா²தி ‘‘ஸோபி நூனஸ்ஸ தாதி³ஸோ’’தி ஏதஸ்மிங் பதே³.
194. Catutthe paṇḍito maññeti ettha maññeti idaṃ ‘‘maññatī’’ti iminā samānatthaṃ nipātapadaṃ. Tassa iti-saddaṃ ānetvā atthaṃ dassento ‘‘paṇḍitoti maññatī’’ti āha. Anumatipucchāvasena cetaṃ vuttaṃ. Tenevāha ‘‘udāhu no’’ti. ‘‘Taṃ kiṃ maññati bhavaṃ piṅgiyānī samaṇassa gotamassa paññāveyyattiya’’nti vuttamevatthaṃ puna gaṇhanto ‘‘paṇḍito maññe’’ti āha, tasmā vuttaṃ ‘‘bhavaṃ piṅgiyānī samaṇaṃ gotamaṃ paṇḍitoti maññati udāhu no’’ti, yathā te khameyya, tathā naṃ kathehīti adhippāyo. Ahaṃ ko nāma, mama avisayo esoti dasseti. Ko cāti hetunissakke paccattavacananti āha ‘‘kuto cā’’ti. Tathā cāha ‘‘kena kāraṇena jānissāmī’’ti, yena kāraṇena samaṇassa gotamassa paññāveyyattiyaṃ jāneyyaṃ , taṃ kāraṇaṃ mayi natthīti adhippāyo. Buddhoyeva bhaveyya abuddhassa sabbathā buddhañāṇānubhāvaṃ jānituṃ asakkuṇeyyattāti. Vuttañhetaṃ – ‘‘appamattakaṃ panetaṃ, bhikkhave, oramattakaṃ sīlamattakaṃ, yena puthujjano tathāgatassa vaṇṇaṃ vadamāno vadeyya (dī. ni. 1.7). Atthi, bhikkhave, aññeva dhammā gambhīrā duddasā duranubodhā…pe… yehi tathāgatassa yathābhūtaṃ vaṇṇaṃ sammā vadamāno vadeyyā’’ti (dī. ni. 1.28) ca. Etthāti ‘‘sopi nūnassa tādiso’’ti etasmiṃ pade.
பஸத்த²ப்பஸத்தோ²தி பஸத்தே²ஹி பாஸங்ஸேஹி அத்தனோ கு³ணேஹேவ ஸோ பஸத்தோ², ந தஸ்ஸ கித்தினா, பஸங்ஸாஸபா⁴வேனேவ பாஸங்ஸோதி அத்தோ². தேனாஹ ‘‘ஸப்³ப³கு³ணான’’ந்திஆதி³. மணிரதனந்தி சக்கவத்தினோ மணிரதனங்.
Pasatthappasatthoti pasatthehi pāsaṃsehi attano guṇeheva so pasattho, na tassa kittinā, pasaṃsāsabhāveneva pāsaṃsoti attho. Tenāha ‘‘sabbaguṇāna’’ntiādi. Maṇiratananti cakkavattino maṇiratanaṃ.
ஸதே³வகே பாஸங்ஸானம்பி பாஸங்ஸோதி த³ஸ்ஸேதுங் ‘‘பஸத்தே²ஹி வா’’தி து³தியவிகப்போ க³ஹிதோ. அரணீயதோ அத்தோ², ஸோ ஏவ வஸதீதி வஸோதி அத்த²வஸோ. தஸ்ஸ தஸ்ஸ பயோக³ஸ்ஸ ஆனிஸங்ஸபூ⁴தங் ப²லந்தி ஆஹ ‘‘அத்த²வஸந்தி அத்தா²னிஸங்ஸ’’ந்தி. அத்தோ² வா ப²லங் தத³தீ⁴னவுத்திதாய வஸோ ஏதஸ்ஸாதி அத்த²வஸோ, காரணங்.
Sadevake pāsaṃsānampi pāsaṃsoti dassetuṃ ‘‘pasatthehi vā’’ti dutiyavikappo gahito. Araṇīyato attho, so eva vasatīti vasoti atthavaso. Tassa tassa payogassa ānisaṃsabhūtaṃ phalanti āha ‘‘atthavasanti atthānisaṃsa’’nti. Attho vā phalaṃ tadadhīnavuttitāya vaso etassāti atthavaso, kāraṇaṃ.
கு²த்³த³கமதூ⁴தி கு²த்³த³கமக்கி²காஹி கதத³ண்ட³கமது⁴. அனேளகந்தி நித்³தோ³ஸங் அபக³தமக்கி²கண்ட³கங்.
Khuddakamadhūti khuddakamakkhikāhi katadaṇḍakamadhu. Aneḷakanti niddosaṃ apagatamakkhikaṇḍakaṃ.
உதா³ஹரீயதி உப்³பே³க³பீதிவஸேனாதி உதா³னங், ததா² வா உதா³ஹரணங் உதா³னங். தேனாஹ ‘‘உதா³ஹாரங் உதா³ஹரீ’’தி. யதா² பன தங் வசனங் உதா³னந்தி வுச்சதி, தங் த³ஸ்ஸேதுங் ‘‘யதா² ஹீ’’திஆதி³ வுத்தங். ஸேஸங் ஸுவிஞ்ஞெய்யமேவ.
Udāharīyati ubbegapītivasenāti udānaṃ, tathā vā udāharaṇaṃ udānaṃ. Tenāha ‘‘udāhāraṃ udāharī’’ti. Yathā pana taṃ vacanaṃ udānanti vuccati, taṃ dassetuṃ ‘‘yathā hī’’tiādi vuttaṃ. Sesaṃ suviññeyyameva.
காரணபாலீஸுத்தவண்ணனா நிட்டி²தா.
Kāraṇapālīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. காரணபாலீஸுத்தங் • 4. Kāraṇapālīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. காரணபாலீஸுத்தவண்ணனா • 4. Kāraṇapālīsuttavaṇṇanā
