| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
4. гааран̣абаалийсуд̇д̇аван̣н̣анаа
4. Kāraṇapālīsuttavaṇṇanā
194. жад̇уд̇т̇з гааран̣абаалийд̇и баалод̇и д̇асса наамам̣, рааж̇агулаанам̣ бана гамманд̇з гаарзд̇ийд̇и гааран̣абаалий наама ж̇аад̇о. гамманд̇ам̣ гаарзд̇ийд̇и баад̇ова удтааяа д̣̇ваараддаалагабаагаарз агад̇з гаарзд̇и, ж̇ин̣н̣з бадиж̇аг̇г̇аабзд̇и. бин̇г̇ияааним̣ б̣раахман̣анд̇и звам̣наамагам̣ анааг̇аамипалз бад̇идтид̇ам̣ арияасаавагам̣ б̣раахман̣ам̣. со гира баад̇ова удтааяа г̇анд̇хамаалаад̣̇ийни г̇аахаабзд̇ваа сад̇т̇у санд̇игам̣ г̇анд̇ваа ванд̣̇ид̇ваа г̇анд̇хамаалаад̣̇ийхи бууж̇зд̇ваа наг̇арам̣ ааг̇ажчад̇и, ид̣̇ам̣ б̣раахман̣асса д̣̇звасигам̣ вад̇д̇анд̇и. д̇ам̣ со звам̣ вад̇д̇ам̣ гад̇ваа ааг̇ажчанд̇ам̣ ад̣̇д̣̇аса. зд̇ад̣̇авожаад̇и ‘‘аяам̣ б̣раахман̣о бан̃н̃аваа н̃аан̣уд̇д̇аро, гахам̣ ну ко баад̇ова г̇анд̇ваа ааг̇ажчад̇ий’’д̇и жинд̇зд̇ваа ануггамзна санд̇игам̣ ааг̇ад̇ам̣ сан̃ж̇аанид̇ваа ‘‘ханд̣̇а гуд̇о нуу’’д̇иаад̣̇иважанам̣ авожа.
194. Catutthe kāraṇapālīti pāloti tassa nāmaṃ, rājakulānaṃ pana kammante kāretīti kāraṇapālī nāma jāto. Kammantaṃkāretīti pātova uṭṭhāya dvāraṭṭālakapākāre akate kāreti, jiṇṇe paṭijaggāpeti. Piṅgiyāniṃ brāhmaṇanti evaṃnāmakaṃ anāgāmiphale patiṭṭhitaṃ ariyasāvakaṃ brāhmaṇaṃ. So kira pātova uṭṭhāya gandhamālādīni gāhāpetvā satthu santikaṃ gantvā vanditvā gandhamālādīhi pūjetvā nagaraṃ āgacchati, idaṃ brāhmaṇassa devasikaṃ vattanti. Taṃ so evaṃ vattaṃ katvā āgacchantaṃ addasa. Etadavocāti ‘‘ayaṃ brāhmaṇo paññavā ñāṇuttaro, kahaṃ nu kho pātova gantvā āgacchatī’’ti cintetvā anukkamena santikaṃ āgataṃ sañjānitvā ‘‘handa kuto nū’’tiādivacanaṃ avoca.
д̇ад̇т̇а д̣̇иваа д̣̇ивассаад̇и д̣̇ивасассааби д̣̇иваа, маж̇жханхигагаалзд̇и ад̇т̇о. бан̣д̣ид̇о ман̃н̃зд̇и бхавам̣ бин̇г̇ияааний саман̣ам̣ г̇од̇амам̣ бан̣д̣ид̇од̇и ман̃н̃ад̇и, уд̣̇ааху нод̇и аяамзд̇т̇а ад̇т̇о. го жаахам̣, бход̇и, бхо, саман̣асса г̇од̇амасса бан̃н̃аавзяяад̇д̇ияаж̇аананз ахам̣ го наама? го жа саман̣асса г̇од̇амасса бан̃н̃аавзяяад̇д̇ияам̣ ж̇ааниссаамийд̇и гуд̇о жаахам̣ саман̣асса г̇од̇амасса бан̃н̃аавзяяад̇д̇ияам̣ ж̇ааниссаами, гзна наама гааран̣зна ж̇ааниссаамийд̇и звам̣ саб̣б̣ат̇ааби ад̇д̇ано аж̇аананабхаавам̣ д̣̇ийбзд̇и. соби нуунасса д̇аад̣̇исоваад̇и яо саман̣асса г̇од̇амасса бан̃н̃аавзяяад̇д̇ияам̣ ж̇аанзяяа, соби нууна д̣̇аса баарамияо буурзд̇ваа саб̣б̣ан̃н̃уд̇ам̣ бад̇д̇о д̇аад̣̇исо б̣уд̣̇д̇хоязва бхавзяяа. синзрум̣ ваа хи бат̇авим̣ ваа аагаасам̣ ваа бамзд̇угаамзна д̇аббамаан̣о д̣̇ан̣д̣о ваа раж̇ж̇у ваа лад̣̇д̇хум̣ ваддад̇и, саман̣асса г̇од̇амасса бан̃н̃ам̣ ж̇аананд̇знаби д̇асса н̃аан̣асад̣̇исамзва саб̣б̣ан̃н̃уд̇ан̃н̃аан̣ам̣ лад̣̇д̇хум̣ ваддад̇ийд̇и д̣̇ийбзд̇и. аад̣̇аравасзна банзд̇т̇а аамзд̣ид̇ам̣ гад̇ам̣. ул̣аарааяаад̇и уд̇д̇амааяа сздтааяа. го жаахам̣, бход̇и, бхо, ахам̣ саман̣асса г̇од̇амасса басам̣санз го наама. го жа саман̣ам̣ г̇од̇амам̣ басам̣сиссаамийд̇и гзна гааран̣зна басам̣сиссаами.
Tattha divā divassāti divasassāpi divā, majjhanhikakāleti attho. Paṇḍito maññeti bhavaṃ piṅgiyānī samaṇaṃ gotamaṃ paṇḍitoti maññati, udāhu noti ayamettha attho. Ko cāhaṃ, bhoti, bho, samaṇassa gotamassa paññāveyyattiyajānane ahaṃ ko nāma? Ko ca samaṇassa gotamassa paññāveyyattiyaṃ jānissāmīti kuto cāhaṃ samaṇassa gotamassa paññāveyyattiyaṃ jānissāmi, kena nāma kāraṇena jānissāmīti evaṃ sabbathāpi attano ajānanabhāvaṃ dīpeti. Sopi nūnassa tādisovāti yo samaṇassa gotamassa paññāveyyattiyaṃ jāneyya, sopi nūna dasa pāramiyo pūretvā sabbaññutaṃ patto tādiso buddhoyeva bhaveyya. Sineruṃ vā hi pathaviṃ vā ākāsaṃ vā pametukāmena tappamāṇo daṇḍo vā rajju vā laddhuṃ vaṭṭati, samaṇassa gotamassa paññaṃ jānantenapi tassa ñāṇasadisameva sabbaññutaññāṇaṃ laddhuṃ vaṭṭatīti dīpeti. Ādaravasena panettha āmeḍitaṃ kataṃ. Uḷārāyāti uttamāya seṭṭhāya. Ko cāhaṃ, bhoti, bho, ahaṃ samaṇassa gotamassa pasaṃsane ko nāma. Ko ca samaṇaṃ gotamaṃ pasaṃsissāmīti kena kāraṇena pasaṃsissāmi.
басад̇т̇аббасад̇т̇од̇и саб̣б̣аг̇ун̣аанам̣ убари жарзхи саб̣б̣алогабасад̇т̇зхи ад̇д̇ано г̇ун̣зхзва басад̇т̇о, на д̇асса ан̃н̃зхи басам̣санагижжам̣ ад̇т̇и. яат̇аа хи жамбагабубпам̣ ваа нийлуббалам̣ ваа бад̣̇умам̣ ваа лохид̇ажанд̣̇анам̣ ваа ад̇д̇ано ван̣н̣аг̇анд̇хасирияаава баасаад̣̇иган̃жзва суг̇анд̇хан̃жа, на д̇асса ааг̇анд̇угзхи ван̣н̣аг̇анд̇хзхи т̇оманагижжам̣ ад̇т̇и. яат̇аа жа ман̣ирад̇анам̣ ваа жанд̣̇аман̣д̣алам̣ ваа ад̇д̇ано аалогзнзва обхаасад̇и, на д̇асса ан̃н̃зна обхаасанагижжам̣ ад̇т̇и, звам̣ саман̣о г̇од̇амо саб̣б̣алогабасад̇т̇зхи ад̇д̇ано г̇ун̣зхзва басад̇т̇о т̇омид̇о, саб̣б̣алогасса сздтад̇ам̣ баабид̇о. на д̇асса ан̃н̃зна басам̣санагижжам̣ ад̇т̇и.
Pasatthappasatthoti sabbaguṇānaṃ upari carehi sabbalokapasatthehi attano guṇeheva pasattho, na tassa aññehi pasaṃsanakiccaṃ atthi. Yathā hi campakapupphaṃ vā nīluppalaṃ vā padumaṃ vā lohitacandanaṃ vā attano vaṇṇagandhasiriyāva pāsādikañceva sugandhañca, na tassa āgantukehi vaṇṇagandhehi thomanakiccaṃ atthi. Yathā ca maṇiratanaṃ vā candamaṇḍalaṃ vā attano ālokeneva obhāsati, na tassa aññena obhāsanakiccaṃ atthi, evaṃ samaṇo gotamo sabbalokapasatthehi attano guṇeheva pasattho thomito, sabbalokassa seṭṭhataṃ pāpito. Na tassa aññena pasaṃsanakiccaṃ atthi.
басад̇т̇зхи ваа басад̇т̇од̇иби басад̇т̇аббасад̇т̇о. гз бана басад̇т̇аа наама? рааж̇аа басзнад̣̇и госало гаасигосалаваасигзхи басад̇т̇о, б̣имб̣исааро ан̇г̇амаг̇ад̇хаваасийхи, взсаалигаа лижчавий важ̇ж̇ид̇адтаваасийхи басад̇т̇аа, баавзяяагаа маллаа госинаарагаа маллаа ан̃н̃зби д̇з д̇з кад̇д̇ияаа д̇зхи д̇зхи ж̇аанабад̣̇зхи басад̇т̇аа, жан̇гиаад̣̇аяо б̣раахман̣аа б̣раахман̣аг̇ан̣зхи, анаат̇абин̣д̣игаад̣̇аяо убаасагаа убаасагаг̇ан̣зхи, висаакаааад̣̇игаа убаасигаа анзгасад̇аахи убаасигаахи, сагулуд̣̇ааяиаад̣̇аяо бариб̣б̣ааж̇агаа анзгзхи бариб̣б̣ааж̇агасад̇зхи, уббалаван̣н̣ад̇т̇зриаад̣̇игаа махаасаавигаа анзгзхи бхигкунисад̇зхи, саарибуд̇д̇ад̇т̇зраад̣̇аяо махаат̇зраа анзгасад̇зхи бхигкуухи, саггаад̣̇аяо д̣̇зваа анзгасахассзхи д̣̇звзхи, махааб̣рахмаад̣̇аяо б̣рахмаано анзгасахассзхи б̣рахмзхи басад̇т̇аа. д̇з саб̣б̣зби д̣̇асаб̣алам̣ т̇омзнд̇и ван̣н̣знд̇и басам̣санд̇ийд̇и бхаг̇аваа ‘‘басад̇т̇аббасад̇т̇о’’д̇и вужжад̇и. ад̇т̇авасанд̇и ад̇т̇аанисам̣сам̣.
Pasatthehi vā pasatthotipi pasatthappasattho. Ke pana pasatthā nāma? Rājā pasenadi kosalo kāsikosalavāsikehi pasattho, bimbisāro aṅgamagadhavāsīhi, vesālikā licchavī vajjitaṭṭhavāsīhi pasatthā, pāveyyakā mallā kosinārakā mallā aññepi te te khattiyā tehi tehi jānapadehi pasatthā, caṅkiādayo brāhmaṇā brāhmaṇagaṇehi, anāthapiṇḍikādayo upāsakā upāsakagaṇehi, visākhāādikā upāsikā anekasatāhi upāsikāhi, sakuludāyiādayo paribbājakā anekehi paribbājakasatehi, uppalavaṇṇattheriādikā mahāsāvikā anekehi bhikkhunisatehi, sāriputtattherādayo mahātherā anekasatehi bhikkhūhi, sakkādayo devā anekasahassehi devehi, mahābrahmādayo brahmāno anekasahassehi brahmehi pasatthā. Te sabbepi dasabalaṃ thomenti vaṇṇenti pasaṃsantīti bhagavā ‘‘pasatthappasattho’’ti vuccati. Atthavasanti atthānisaṃsaṃ.
ат̇асса со ад̇д̇ано басаад̣̇агааран̣ам̣ аажигканд̇о сзяяат̇ааби, бхо, бурисод̇иаад̣̇имааха. д̇ад̇т̇а аг̇г̇арасабарид̇ид̇д̇од̇и бхож̇анарасзсу бааяаасо снзхарасзсу г̇осабби, гасааварасзсу куд̣̇д̣̇агамад̇ху анзл̣агам̣, мад̇хурарасзсу саггараад̇и звамаад̣̇аяо аг̇г̇арасаа наама. д̇зсу язна гзнажи барид̇ид̇д̇о ааган̣таббамаан̣ам̣ бхун̃ж̇ид̇ваа тид̇о. ан̃н̃зсам̣ хийнаананд̇и аг̇г̇арасзхи ан̃н̃зсам̣ хийнарасаанам̣. суд̇д̇асод̇и суд̇д̇ад̇о, суд̇д̇абхаавзнаад̇и ад̇т̇о. сзсуби зсзва наяо. д̇ад̇о д̇ад̇од̇и суд̇д̇аад̣̇ийсу д̇ад̇о д̇ад̇о. ан̃н̃зсам̣ бут̇усаман̣аб̣раахман̣ааббаваад̣̇аананд̇и яз ан̃н̃зсам̣ бут̇уунам̣ саман̣аб̣раахман̣аанам̣ лад̣̇д̇хисан̇каад̇аббаваад̣̇аа, д̇зсам̣. на бихзд̇ийд̇и на бад̇т̇зд̇и, д̇з гат̇ияамаанз сод̇умби на ижчад̇и. ж̇игхажчаад̣̇уб̣б̣аляабарзд̇од̇и ж̇игхажчааяа жзва д̣̇уб̣б̣алабхаавзна жа ануг̇ад̇о. мад̇хубин̣д̣иганд̇и саалибидтам̣ бхаж̇ж̇ид̇ваа жад̇умад̇хурзна яож̇зд̇ваа гад̇ам̣ б̣ад̣̇д̇хасад̇д̇убин̣д̣игам̣, мад̇хурабуувамзва ваа. ад̇хиг̇ажчзяяаад̇и лабхзяяа. асзжанаганд̇и мад̇хурабхаавагаран̣ад̇т̇ааяа ан̃н̃зна расзна анаасид̇д̇агам̣ ож̇аванд̇ам̣ бан̣ийд̇арасам̣.
Athassa so attano pasādakāraṇaṃ ācikkhanto seyyathāpi, bho, purisotiādimāha. Tattha aggarasaparitittoti bhojanarasesu pāyāso sneharasesu gosappi, kasāvarasesu khuddakamadhu aneḷakaṃ, madhurarasesu sakkarāti evamādayo aggarasā nāma. Tesu yena kenaci parititto ākaṇṭhappamāṇaṃ bhuñjitvā ṭhito. Aññesaṃ hīnānanti aggarasehi aññesaṃ hīnarasānaṃ. Suttasoti suttato, suttabhāvenāti attho. Sesupi eseva nayo. Tato tatoti suttādīsu tato tato. Aññesaṃ puthusamaṇabrāhmaṇāppavādānanti ye aññesaṃ puthūnaṃ samaṇabrāhmaṇānaṃ laddhisaṅkhātappavādā, tesaṃ. Na pihetīti na pattheti, te kathiyamāne sotumpi na icchati. Jighacchādubbalyaparetoti jighacchāya ceva dubbalabhāvena ca anugato. Madhupiṇḍikanti sālipiṭṭhaṃ bhajjitvā catumadhurena yojetvā kataṃ baddhasattupiṇḍikaṃ, madhurapūvameva vā. Adhigaccheyyāti labheyya. Asecanakanti madhurabhāvakaraṇatthāya aññena rasena anāsittakaṃ ojavantaṃ paṇītarasaṃ.
харижанд̣̇анассаад̇и суван̣н̣аван̣н̣ажанд̣̇анасса. лохид̇ажанд̣̇анассаад̇и рад̇д̇аван̣н̣ажанд̣̇анасса. сурабхиг̇анд̇ханд̇и суг̇анд̇хам̣. д̣̇арат̇аад̣̇аяо ваддад̣̇арат̇аа, ваддагиламат̇аа, ваддабарил̣аахаа зва. уд̣̇аанам̣ уд̣̇аанзсийд̇и уд̣̇аахаарам̣ уд̣̇аахари. яат̇аа хи яам̣ д̇злам̣ маанам̣ г̇ахзд̇ум̣ на саггод̇и, виссанд̣̇ид̇ваа г̇ажчад̇и, д̇ам̣ авасзгод̇и вужжад̇и. яан̃жа ж̇алам̣ д̇ал̣аагам̣ г̇ахзд̇ум̣ на саггод̇и, аж̇жход̇т̇арид̇ваа г̇ажчад̇и, д̇ам̣ огход̇и вужжад̇и. звамзвам̣ яам̣ бийд̇иважанам̣ хад̣̇аяам̣ г̇ахзд̇ум̣ на саггод̇и, ад̇хигам̣ худ̇ваа анд̇о асан̣тахид̇ваа б̣ахи нигкамад̇и, д̇ам̣ уд̣̇аананд̇и вужжад̇и. зваруубам̣ бийд̇имаяаважанам̣ нижчаарзсийд̇и ад̇т̇о.
Haricandanassāti suvaṇṇavaṇṇacandanassa. Lohitacandanassāti rattavaṇṇacandanassa. Surabhigandhanti sugandhaṃ. Darathādayo vaṭṭadarathā, vaṭṭakilamathā, vaṭṭapariḷāhā eva. Udānaṃ udānesīti udāhāraṃ udāhari. Yathā hi yaṃ telaṃ mānaṃ gahetuṃ na sakkoti, vissanditvā gacchati, taṃ avasekoti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati. Evamevaṃ yaṃ pītivacanaṃ hadayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati. Evarūpaṃ pītimayavacanaṃ nicchāresīti attho.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 4. гааран̣абаалийсуд̇д̇ам̣ • 4. Kāraṇapālīsuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 4. гааран̣абаалийсуд̇д̇аван̣н̣анаа • 4. Kāraṇapālīsuttavaṇṇanā
