| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. காரண்ட³வஸுத்தவண்ணனா
10. Kāraṇḍavasuttavaṇṇanā
10. த³ஸமே அஞ்ஞேனாஞ்ஞங் படிசரதீதி அஞ்ஞேன காரணேன வசனேன வா அஞ்ஞங் காரணங் வசனங் வா படிச்சா²தே³தி. ப³ஹித்³தா⁴ கத²ங் அபனாமேதீதி பா³ஹிரதோ அஞ்ஞங் ஆக³ந்துககத²ங் ஓதாரேதி. அபனெய்யேஸோதி அபனெய்யோ நீஹரிதப்³போ³ ஏஸ. ஸமணதூ³ஸீதி ஸமணதூ³ஸகோ. ஸமணபலாபோதி வீஹீஸு வீஹிபலாபோ விய நிஸ்ஸாரதாய ஸமணேஸு ஸமணபலாபோ. ஸமணகாரண்ட³வோதி ஸமணகசவரோ. ப³ஹித்³தா⁴ நாஸெந்தீதி ப³ஹி நீஹரந்தி. யவகரணேதி யவகெ²த்தே. பு²ணமானஸ்ஸாதி உச்சே டா²னே ட²த்வா மஹாவாதே ஓபுனியமானஸ்ஸ. அபஸம்மஜ்ஜந்தீதி ஸாரத⁴ஞ்ஞானங் ஏகதோ து³ப்³ப³லத⁴ஞ்ஞானங் ஏகதோ கரணத்த²ங் புனப்புனங் அபஸம்மஜ்ஜந்தி, அபஸம்மஜ்ஜனிஸங்கா²தேன வாதக்³கா³ஹினா ஸுப்பேன வா வத்தே²ன வா நீஹரந்தி. த³த்³த³ரந்தி த³த்³த³ரஸத்³த³ங்.
10. Dasame aññenāññaṃ paṭicaratīti aññena kāraṇena vacanena vā aññaṃ kāraṇaṃ vacanaṃ vā paṭicchādeti. Bahiddhā kathaṃ apanāmetīti bāhirato aññaṃ āgantukakathaṃ otāreti. Apaneyyesoti apaneyyo nīharitabbo esa. Samaṇadūsīti samaṇadūsako. Samaṇapalāpoti vīhīsu vīhipalāpo viya nissāratāya samaṇesu samaṇapalāpo. Samaṇakāraṇḍavoti samaṇakacavaro. Bahiddhā nāsentīti bahi nīharanti. Yavakaraṇeti yavakhette. Phuṇamānassāti ucce ṭhāne ṭhatvā mahāvāte opuniyamānassa. Apasammajjantīti sāradhaññānaṃ ekato dubbaladhaññānaṃ ekato karaṇatthaṃ punappunaṃ apasammajjanti, apasammajjanisaṅkhātena vātaggāhinā suppena vā vatthena vā nīharanti. Daddaranti daddarasaddaṃ.
ஸங்வாஸாயந்தி ஸங்வாஸேன அயங். விஜானாதா²தி ஜானெய்யாத². ஸந்தவாசோதி ஸண்ஹவாசோ. ஜனவதீதி ஜனமஜ்ஜே². ரஹோ கரோதி கரணந்தி கரணங் வுச்சதி பாபகம்மங், தங் ரஹோ படிச்ச²ன்னோ ஹுத்வா கரோதி. ஸங்ஸப்பீ ச முஸாவாதீ³தி ஸங்ஸப்பித்வா முஸாவாதீ³, முஸா ப⁴ணந்தோ ஸங்ஸப்பதி ப²ந்த³தீதி அத்தோ². இமஸ்மிங் ஸுத்தே வட்டமேவ கதெ²த்வா கா³தா²ஸு வட்டவிவட்டங் கதி²தந்தி.
Saṃvāsāyanti saṃvāsena ayaṃ. Vijānāthāti jāneyyātha. Santavācoti saṇhavāco. Janavatīti janamajjhe. Raho karoti karaṇanti karaṇaṃ vuccati pāpakammaṃ, taṃ raho paṭicchanno hutvā karoti. Saṃsappī ca musāvādīti saṃsappitvā musāvādī, musā bhaṇanto saṃsappati phandatīti attho. Imasmiṃ sutte vaṭṭameva kathetvā gāthāsu vaṭṭavivaṭṭaṃ kathitanti.
மெத்தாவக்³கோ³ பட²மோ.
Mettāvaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. காரண்ட³வஸுத்தங் • 10. Kāraṇḍavasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. காரண்ட³வஸுத்தவண்ணனா • 10. Kāraṇḍavasuttavaṇṇanā
