| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
6. කරොතොසුත්‌තවණ්‌ණනා
6. Karotosuttavaṇṇanā
211. කරොතොති සහත්‌ථා කරොන්‌තස්‌ස. කාරයතොති ආණත්‌තියා කාරෙන්‌තස්‌ස. ඡින්‌දතොති පරෙසං හත්‌ථාදීනි ඡින්‌දන්‌තස්‌ස. ඡෙදාපයතොති පරෙහි ඡෙදාපෙන්‌තස්‌ස. පචතොති දණ්‌ඩෙන පීළෙන්‌තස්‌ස. පචාපයතොති පරෙහි දණ්‌ඩාදිනා පීළාපෙන්‌තස්‌ස. සොචතො සොචාපයතොති පරස්‌ස භණ්‌ඩහරණාදීහි සොකං සයං කරොන්‌තස්‌සාපි පරෙහි කාරෙන්‌තස්‌සාපි. කිලමතො කිලමාපයතොති ආහාරුපච්‌ඡෙදබන්‌ධනාගාරපවෙසනාදීහි සයං කිලමෙන්‌තස්‌සපි පරෙහි කිලමාපෙන්‌තස්‌සපි. ඵන්‌දතො ඵන්‌දාපයතොති පරං ඵන්‌දන්‌තං ඵන්‌දනකාලෙ සයම්‌පි ඵන්‌දතො පරෙම්‌පි ඵන්‌දාපයතො. පාණමතිපාතයතොති පාණං හනන්‌තස්‌සපි හනාපෙන්‌තස්‌සපි. එවං සබ්‌බත්‌ථ කරණකාරාපනවසෙනෙව අත්‌ථො වෙදිතබ්‌බො.
211.Karototi sahatthā karontassa. Kārayatoti āṇattiyā kārentassa. Chindatoti paresaṃ hatthādīni chindantassa. Chedāpayatoti parehi chedāpentassa. Pacatoti daṇḍena pīḷentassa. Pacāpayatoti parehi daṇḍādinā pīḷāpentassa. Socato socāpayatoti parassa bhaṇḍaharaṇādīhi sokaṃ sayaṃ karontassāpi parehi kārentassāpi. Kilamato kilamāpayatoti āhārupacchedabandhanāgārapavesanādīhi sayaṃ kilamentassapi parehi kilamāpentassapi. Phandato phandāpayatoti paraṃ phandantaṃ phandanakāle sayampi phandato parempi phandāpayato. Pāṇamatipātayatoti pāṇaṃ hanantassapi hanāpentassapi. Evaṃ sabbattha karaṇakārāpanavaseneva attho veditabbo.
සන්‌ධින්‌ති ඝරසන්‌ධිං. නිල්‌ලොපන්‌ති මහාවිලොපං. එකාගාරිකන්‌ති එකමෙව ඝරං පරිවාරෙත්‌වා විලුම්‌පනං. පරිපන්‌ථෙ තිට්‌ඨතොති ආගතාගතානං අච්‌ඡින්‌දනත්‌ථං මග්‌ගෙ තිට්‌ඨතො. කරොතො න කරීයති පාපන්‌ති යංකිඤ්‌චි පාපං කරොමීති සඤ්‌ඤාය කරොතොපි පාපං න කරීයති, නත්‌ථි පාපං. සත්‌තා පන කරොමාති එවංසඤ්‌ඤිනො හොන්‌තීති දීපෙන්‌ති. ඛුරපරියන්‌තෙනාති ඛුරනෙමිනා, ඛුරධාරසදිසපරියන්‌තෙන වා. එකමංසඛලන්‌ති එකමංසරාසිං. පුඤ්‌ජන්‌ති තස්‌සෙව වෙවචනං. තතොනිදානන්‌ති එකමංසඛලකරණනිදානං.
Sandhinti gharasandhiṃ. Nillopanti mahāvilopaṃ. Ekāgārikanti ekameva gharaṃ parivāretvā vilumpanaṃ. Paripanthe tiṭṭhatoti āgatāgatānaṃ acchindanatthaṃ magge tiṭṭhato. Karoto na karīyati pāpanti yaṃkiñci pāpaṃ karomīti saññāya karotopi pāpaṃ na karīyati, natthi pāpaṃ. Sattā pana karomāti evaṃsaññino hontīti dīpenti. Khurapariyantenāti khuraneminā, khuradhārasadisapariyantena vā. Ekamaṃsakhalanti ekamaṃsarāsiṃ. Puñjanti tasseva vevacanaṃ. Tatonidānanti ekamaṃsakhalakaraṇanidānaṃ.
දක්‌ඛිණන්‌ති දක්‌ඛිණතීරෙ මනුස්‌සා කක්‌ඛළා දාරුණා, තෙ සන්‌ධාය හනන්‌තොතිආදි වුත්‌තං. උත්‌තරන්‌ති උත්‌තරතීරෙ සද්‌ධා හොන්‌ති පසන්‌නා බුද්‌ධමාමකා ධම්‌මමාමකා සඞ්‌ඝමාමකා, තෙ සන්‌ධාය දදන්‌තොතිආදි වුත්‌තං. තත්‌ථ යජන්‌තොති මහායාගං කරොන්‌තො. දමෙනාති ඉන්‌ද්‍රියදමෙන උපොසථකම්‌මෙන. සංයමෙනාති සීලසංයමෙන. සච්‌චවජ්‌ජෙනාති සච්‌චවචනෙන. ආගමොති ආගමනං, පවත්‌තීති අත්‌ථො. සබ්‌බථාපි පාපපුඤ්‌ඤානං කිරියමෙව පටික්‌ඛිපන්‌ති.
Dakkhiṇanti dakkhiṇatīre manussā kakkhaḷā dāruṇā, te sandhāya hanantotiādi vuttaṃ. Uttaranti uttaratīre saddhā honti pasannā buddhamāmakā dhammamāmakā saṅghamāmakā, te sandhāya dadantotiādi vuttaṃ. Tattha yajantoti mahāyāgaṃ karonto. Damenāti indriyadamena uposathakammena. Saṃyamenāti sīlasaṃyamena. Saccavajjenāti saccavacanena. Āgamoti āgamanaṃ, pavattīti attho. Sabbathāpi pāpapuññānaṃ kiriyameva paṭikkhipanti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. කරොතොසුත්‌තං • 6. Karotosuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. කරොතොසුත්‌තවණ්‌ණනා • 6. Karotosuttavaṇṇanā
