| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. கஸிணஸுத்தவண்ணனா
5. Kasiṇasuttavaṇṇanā
25. பஞ்சமே ஸகலட்டே²ன கஸிணானி, ததா³ரம்மணானங் த⁴ம்மானங் கெ²த்தட்டே²ன அதி⁴ட்டா²னட்டே²ன வா ஆயதனானீதி கஸிணாயதனானி. உத்³த⁴ந்தி உபரி க³க³ணதலாபி⁴முக²ங். அதோ⁴தி ஹெட்டா² பூ⁴மிதலாபி⁴முக²ங். திரியந்தி கெ²த்தமண்ட³லங் விய ஸமந்தா பரிச்சி²ந்தி³த்வா. ஏகச்சோ ஹி உத்³த⁴மேவ கஸிணங் வட்³டே⁴தி, ஏகச்சோ அதோ⁴, ஏகச்சோ ஸமந்ததோ. தேன தேன வா காரணேன ஏவங் பஸாரேதி ஆலோகமிவ ரூபத³ஸ்ஸனகாமோ. தேன வுத்தங் – ‘‘பத²வீகஸிணமேகோ ஸஞ்ஜானாதி உத்³த⁴ங் அதோ⁴ திரிய’’ந்தி. அத்³வயந்தி இத³ங் பன ஏகஸ்ஸ அஞ்ஞபா⁴வானுபக³மனத்த²ங் வுத்தங். யதா² ஹி உத³கங் பவிட்ட²ஸ்ஸ ஸப்³ப³தி³ஸாஸு உத³கமேவ ஹோதி ந அஞ்ஞங், ஏவமேவ பத²வீகஸிணங் பத²வீகஸிணமேவ ஹோதி. நத்தி² தஸ்ஸ அஞ்ஞகஸிணஸம்பே⁴தோ³தி. ஏஸேவ நயோ ஸப்³ப³த்த². அப்பமாணந்தி இத³ங் தஸ்ஸ தஸ்ஸ ப²ரணஅப்பமாணவஸேன வுத்தங். தஞ்ஹி சேதஸா ப²ரந்தோ ஸகலமேவ ப²ரதி, ‘‘அயமஸ்ஸ ஆதி³, இத³ங் மஜ்ஜ²’’ந்தி பமாணங் ந க³ண்ஹாதி. விஞ்ஞாணகஸிணந்தி செத்த² கஸிணுக்³கா⁴டிமாகாஸே பவத்தவிஞ்ஞாணங். தத்த² கஸிணவஸேன கஸிணுக்³கா⁴டிமாகாஸே, கஸிணுக்³கா⁴டிமாகாஸவஸேன தத்த² பவத்தவிஞ்ஞாணே உத்³த⁴ங்அதோ⁴திரியதா வேதி³தப்³பா³. அயமெத்த² ஸங்கே²போ, கம்மட்டா²னபா⁴வனானயேன பனேதானி பத²வீகஸிணாதீ³னி வித்தா²ரதோ விஸுத்³தி⁴மக்³கே³ (விஸுத்³தி⁴॰ 1.51 ஆத³யோ) வுத்தானேவ.
25. Pañcame sakalaṭṭhena kasiṇāni, tadārammaṇānaṃ dhammānaṃ khettaṭṭhena adhiṭṭhānaṭṭhena vā āyatanānīti kasiṇāyatanāni. Uddhanti upari gagaṇatalābhimukhaṃ. Adhoti heṭṭhā bhūmitalābhimukhaṃ. Tiriyanti khettamaṇḍalaṃ viya samantā paricchinditvā. Ekacco hi uddhameva kasiṇaṃ vaḍḍheti, ekacco adho, ekacco samantato. Tena tena vā kāraṇena evaṃ pasāreti ālokamiva rūpadassanakāmo. Tena vuttaṃ – ‘‘pathavīkasiṇameko sañjānāti uddhaṃ adho tiriya’’nti. Advayanti idaṃ pana ekassa aññabhāvānupagamanatthaṃ vuttaṃ. Yathā hi udakaṃ paviṭṭhassa sabbadisāsu udakameva hoti na aññaṃ, evameva pathavīkasiṇaṃ pathavīkasiṇameva hoti. Natthi tassa aññakasiṇasambhedoti. Eseva nayo sabbattha. Appamāṇanti idaṃ tassa tassa pharaṇaappamāṇavasena vuttaṃ. Tañhi cetasā pharanto sakalameva pharati, ‘‘ayamassa ādi, idaṃ majjha’’nti pamāṇaṃ na gaṇhāti. Viññāṇakasiṇanti cettha kasiṇugghāṭimākāse pavattaviññāṇaṃ. Tattha kasiṇavasena kasiṇugghāṭimākāse, kasiṇugghāṭimākāsavasena tattha pavattaviññāṇe uddhaṃadhotiriyatā veditabbā. Ayamettha saṅkhepo, kammaṭṭhānabhāvanānayena panetāni pathavīkasiṇādīni vitthārato visuddhimagge (visuddhi. 1.51 ādayo) vuttāneva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. கஸிணஸுத்தங் • 5. Kasiṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. கஸிணஸுத்தவண்ணனா • 5. Kasiṇasuttavaṇṇanā
