| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. கஸிணஸுத்தவண்ணனா
5. Kasiṇasuttavaṇṇanā
25. பஞ்சமே ஸகலட்டே²னாதி நிஸ்ஸேஸட்டே²ன. அனவஸேஸப²ரணவஸேன செத்த² ஸகலட்டோ² வேதி³தப்³போ³, அஸுப⁴னிமித்தாதீ³ஸு விய ஏகதே³ஸே அட்ட²த்வா அனவஸேஸதோ க³ஹேதப்³ப³ட்டே²னாதி அத்தோ². ததா³ரம்மணானங் த⁴ம்மானந்தி தங் கஸிணங் ஆரப்³ப⁴ பவத்தனகத⁴ம்மானங். கெ²த்தட்டே²னாதி உப்பத்திட்டா²னட்டே²ன. அதி⁴ட்டா²னட்டே²னாதி பவத்திட்டா²னபா⁴வேன. யதா² கெ²த்தங் ஸஸ்ஸானங் உப்பத்திட்டா²னங் வட்³ட⁴னட்டா²னஞ்ச, ஏவமேவ தங் த ஜா²னங் ஸம்பயுத்தத⁴ம்மானந்தி. யோகி³னோ வா ஸுக²விஸேஸானங் காரணபா⁴வேன. பரிச்சி²ந்தி³த்வாதி இத³ங் ‘‘உத்³த⁴ங் அதோ⁴ திரிய’’ந்தி எத்தா²பி யோஜேதப்³ப³ங். பரிச்சி²ந்தி³த்வா ஏவ ஹி ஸப்³ப³த்த² கஸிணங் வட்³டே⁴தப்³ப³ங். தேன தேன வா காரணேனாதி தேன தேன உபரிஆதீ³ஸு கஸிணவட்³ட⁴னகாரணேன. யதா² கிந்தி ஆஹ ‘‘ஆலோகமிவ ரூபத³ஸ்ஸனகாமோ’’தி. யதா² தி³ப்³ப³சக்கு²னா உத்³த⁴ங் சே ரூபங் த³ட்டு²காமோ, உத்³த⁴ங் ஆலோகங் பஸாரேதி. அதோ⁴ சே, அதோ⁴. ஸமந்ததோ சே ரூபங் த³ட்டு²காமோ, ஸமந்ததோ ஆலோகங் பஸாரேதி, ஏவங் ஸப்³ப³கஸிணந்தி அத்தோ². ஏகஸ்ஸாதி பத²வீகஸிணாதீ³ஸு ஏகேகஸ்ஸ. அஞ்ஞபா⁴வானுபக³மனத்த²ந்தி அஞ்ஞகஸிணபா⁴வானுபக³மனதீ³பனத்த²ங், அஞ்ஞஸ்ஸ வா கஸிணபா⁴வானுபக³மனதீ³பனத்த²ங். ந ஹி அஞ்ஞேன பஸாரிதகஸிணங் ததோ அஞ்ஞேன பஸாரிதகஸிணபா⁴வங் உபக³ச்ச²தி, ஏவம்பி நேஸங் அஞ்ஞகஸிணஸம்பே⁴தா³பா⁴வோ வேதி³தப்³போ³. ந அஞ்ஞங் பத²வீஆதி³. ந ஹி உத³கேன டி²தட்டா²னே ஸஸம்பா⁴ரபத²வீ அத்தி². அஞ்ஞகஸிணஸம்பே⁴தோ³தி ஆபோகஸிணாதி³னா ஸங்கரோ. ஸப்³ப³த்தா²தி ஸப்³பே³ஸு ஸேஸகஸிணேஸு.
25. Pañcame sakalaṭṭhenāti nissesaṭṭhena. Anavasesapharaṇavasena cettha sakalaṭṭho veditabbo, asubhanimittādīsu viya ekadese aṭṭhatvā anavasesato gahetabbaṭṭhenāti attho. Tadārammaṇānaṃ dhammānanti taṃ kasiṇaṃ ārabbha pavattanakadhammānaṃ. Khettaṭṭhenāti uppattiṭṭhānaṭṭhena. Adhiṭṭhānaṭṭhenāti pavattiṭṭhānabhāvena. Yathā khettaṃ sassānaṃ uppattiṭṭhānaṃ vaḍḍhanaṭṭhānañca, evameva taṃ ta jhānaṃ sampayuttadhammānanti. Yogino vā sukhavisesānaṃ kāraṇabhāvena. Paricchinditvāti idaṃ ‘‘uddhaṃ adho tiriya’’nti etthāpi yojetabbaṃ. Paricchinditvā eva hi sabbattha kasiṇaṃ vaḍḍhetabbaṃ. Tena tena vā kāraṇenāti tena tena upariādīsu kasiṇavaḍḍhanakāraṇena. Yathā kinti āha ‘‘ālokamiva rūpadassanakāmo’’ti. Yathā dibbacakkhunā uddhaṃ ce rūpaṃ daṭṭhukāmo, uddhaṃ ālokaṃ pasāreti. Adho ce, adho. Samantato ce rūpaṃ daṭṭhukāmo, samantato ālokaṃ pasāreti, evaṃ sabbakasiṇanti attho. Ekassāti pathavīkasiṇādīsu ekekassa. Aññabhāvānupagamanatthanti aññakasiṇabhāvānupagamanadīpanatthaṃ, aññassa vā kasiṇabhāvānupagamanadīpanatthaṃ. Na hi aññena pasāritakasiṇaṃ tato aññena pasāritakasiṇabhāvaṃ upagacchati, evampi nesaṃ aññakasiṇasambhedābhāvo veditabbo. Na aññaṃ pathavīādi. Na hi udakena ṭhitaṭṭhāne sasambhārapathavī atthi. Aññakasiṇasambhedoti āpokasiṇādinā saṅkaro. Sabbatthāti sabbesu sesakasiṇesu.
ஏகதே³ஸே அட்ட²த்வா அனவஸேஸப²ரணங் பமாணஸ்ஸ அக்³க³ஹணதோ அப்பமாணங். தேனேவ ஹி நேஸங் கஸிணஸமஞ்ஞா. ததா² சாஹ ‘‘தஞ்ஹீ’’திஆதி³. தத்த² சேதஸா ப²ரந்தோதி பா⁴வனாசித்தேன ஆரம்மணங் கரொந்தோ. பா⁴வனாசித்தஞ்ஹி கஸிணங் பரித்தங் வா விபுலங் வா ஸகலமேவ மனஸி கரோதி, ந ஏகதே³ஸங். கஸிணுக்³கா⁴டிமாகாஸே பவத்தவிஞ்ஞாணங் ப²ரணஅப்பமாணவஸேன விஞ்ஞாணகஸிணந்தி வுத்தங். ததா² ஹி தங் விஞ்ஞாணந்தி வுச்சதி. கஸிணவஸேனாதி உக்³கா⁴டிதகஸிணவஸேன கஸிணுக்³கா⁴டிமாகாஸே உத்³த⁴ங்அதோ⁴திரியதா வேதி³தப்³பா³. யத்தகஞ்ஹி டா²னங் கஸிணங் பஸாரிதங், தத்தகங் ஆகாஸபா⁴வனாவஸேன ஆகாஸங் ஹோதீதி. ஏவங் யத்தகங் டா²னங் ஆகாஸங் ஹுத்வா உபட்டி²தங், தத்தகங் ஸகலமேவ ப²ரித்வா விஞ்ஞாணஸ்ஸ பவத்தனதோ ஆக³மனவஸேன விஞ்ஞாணகஸிணேபி உத்³த⁴ங்அதோ⁴திரியதா வுத்தாதி ஆஹ ‘‘கஸிணுக்³கா⁴டிமாகாஸவஸேன தத்த² பவத்தவிஞ்ஞாணே உத்³த⁴ங்அதோ⁴திரியதா வேதி³தப்³பா³’’தி.
Ekadese aṭṭhatvā anavasesapharaṇaṃ pamāṇassa aggahaṇato appamāṇaṃ. Teneva hi nesaṃ kasiṇasamaññā. Tathā cāha ‘‘tañhī’’tiādi. Tattha cetasā pharantoti bhāvanācittena ārammaṇaṃ karonto. Bhāvanācittañhi kasiṇaṃ parittaṃ vā vipulaṃ vā sakalameva manasi karoti, na ekadesaṃ. Kasiṇugghāṭimākāse pavattaviññāṇaṃ pharaṇaappamāṇavasena viññāṇakasiṇanti vuttaṃ. Tathā hi taṃ viññāṇanti vuccati. Kasiṇavasenāti ugghāṭitakasiṇavasena kasiṇugghāṭimākāse uddhaṃadhotiriyatā veditabbā. Yattakañhi ṭhānaṃ kasiṇaṃ pasāritaṃ, tattakaṃ ākāsabhāvanāvasena ākāsaṃ hotīti. Evaṃ yattakaṃ ṭhānaṃ ākāsaṃ hutvā upaṭṭhitaṃ, tattakaṃ sakalameva pharitvā viññāṇassa pavattanato āgamanavasena viññāṇakasiṇepi uddhaṃadhotiriyatā vuttāti āha ‘‘kasiṇugghāṭimākāsavasena tattha pavattaviññāṇe uddhaṃadhotiriyatā veditabbā’’ti.
கஸிணஸுத்தவண்ணனா நிட்டி²தா.
Kasiṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. கஸிணஸுத்தங் • 5. Kasiṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. கஸிணஸுத்தவண்ணனா • 5. Kasiṇasuttavaṇṇanā
