| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. கஸ்ஸகஸுத்தவண்ணனா
9. Kassakasuttavaṇṇanā
155. நவமே நிப்³பா³னபடிஸங்யுத்தாயாதி நிப்³பா³னங் அபதி³ஸித்வா பவத்தாய. ஹடஹடகேஸோதி புரிமகேஸே பச்ச²தோ, பச்சி²மகேஸே புரதோ வாமபஸ்ஸகேஸே த³க்கி²ணதோ, த³க்கி²ணபஸ்ஸகேஸே வாமதோ ப²ரித்வா ப²ரித்வா விப்பகிண்ணகேஸோ. மம சக்கு²ஸம்ப²ஸ்ஸவிஞ்ஞாணாயதனந்தி சக்கு²விஞ்ஞாணேன ஸம்பயுத்தோ சக்கு²ஸம்ப²ஸ்ஸோபி விஞ்ஞாணாயதனம்பி மமேவாதி. எத்த² ச சக்கு²ஸம்ப²ஸ்ஸேன விஞ்ஞாணஸம்பயுத்தகா த⁴ம்மா க³ஹிதா, விஞ்ஞாணாயதனேன ஸப்³பா³னிபி சக்கு²த்³வாரே உப்பன்னானி ஆவஜ்ஜனாதி³விஞ்ஞாணானி. ஸோதத்³வாராதீ³ஸுபி ஏஸேவ நயோ. மனொத்³வாரே பன மனோதி ஸாவஜ்ஜனகங் ப⁴வங்க³சித்தங். த⁴ம்மாதி ஆரம்மணத⁴ம்மா. மனோஸம்ப²ஸ்ஸோதி ஸாவஜ்ஜனேன ப⁴வங்கே³ன ஸம்பயுத்தப²ஸ்ஸோ. விஞ்ஞாணாயதனந்தி ஜவனசித்தங் ததா³ரம்மணம்பி வட்டதி.
155. Navame nibbānapaṭisaṃyuttāyāti nibbānaṃ apadisitvā pavattāya. Haṭahaṭakesoti purimakese pacchato, pacchimakese purato vāmapassakese dakkhiṇato, dakkhiṇapassakese vāmato pharitvā pharitvā vippakiṇṇakeso. Mama cakkhusamphassaviññāṇāyatananti cakkhuviññāṇena sampayutto cakkhusamphassopi viññāṇāyatanampi mamevāti. Ettha ca cakkhusamphassena viññāṇasampayuttakā dhammā gahitā, viññāṇāyatanena sabbānipi cakkhudvāre uppannāni āvajjanādiviññāṇāni. Sotadvārādīsupi eseva nayo. Manodvāre pana manoti sāvajjanakaṃ bhavaṅgacittaṃ. Dhammāti ārammaṇadhammā. Manosamphassoti sāvajjanena bhavaṅgena sampayuttaphasso. Viññāṇāyatananti javanacittaṃ tadārammaṇampi vaṭṭati.
தவேவ பாபிம, சக்கூ²தி யங் லோகே திமிரகாசாதீ³ஹி உபத்³து³தங் அனேகரோகா³யதனங் உபக்கவிபக்கங் அந்தமஸோ காணசக்கு²பி, ஸப்³ப³ங் தங் தவேவ ப⁴வது. ரூபாதீ³ஸுபி ஏஸேவ நயோ.
Taveva pāpima, cakkhūti yaṃ loke timirakācādīhi upaddutaṃ anekarogāyatanaṃ upakkavipakkaṃ antamaso kāṇacakkhupi, sabbaṃ taṃ taveva bhavatu. Rūpādīsupi eseva nayo.
யங் வத³ந்தீதி யங் ப⁴ண்ட³கங் ‘‘மம இத³’’ந்தி வத³ந்தி. யே வத³ந்தி மமந்தி சாதி யே ச புக்³க³லா ‘‘மம’’ந்தி வத³ந்தி. எத்த² சே தே மனோ அத்தீ²தி ஏதேஸு ச டா²னேஸு யதி³ சித்தங் அத்தி². ந மே ஸமண மொக்க²ஸீதி ஸமண மய்ஹங் விஸயதோ ந முச்சிஸ்ஸஸி. யங் வத³ந்தீதி யங் ப⁴ண்ட³கங் வத³ந்தி, ந தங் மய்ஹங். யே வத³ந்தீதி யேபி புக்³க³லா ஏவங் வத³ந்தி, ந தே அஹங். ந மே மக்³க³ம்பி த³க்க²ஸீதி ப⁴வயோனிக³திஆதீ³ஸு மய்ஹங் க³தமக்³க³ம்பி ந பஸ்ஸஸி. நவமங்.
Yaṃ vadantīti yaṃ bhaṇḍakaṃ ‘‘mama ida’’nti vadanti. Ye vadanti mamanti cāti ye ca puggalā ‘‘mama’’nti vadanti. Ettha ce te mano atthīti etesu ca ṭhānesu yadi cittaṃ atthi. Na me samaṇa mokkhasīti samaṇa mayhaṃ visayato na muccissasi. Yaṃ vadantīti yaṃ bhaṇḍakaṃ vadanti, na taṃ mayhaṃ. Ye vadantīti yepi puggalā evaṃ vadanti, na te ahaṃ. Na me maggampi dakkhasīti bhavayonigatiādīsu mayhaṃ gatamaggampi na passasi. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. கஸ்ஸகஸுத்தங் • 9. Kassakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. கஸ்ஸகஸுத்தவண்ணனா • 9. Kassakasuttavaṇṇanā
