| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
9. කස්‌සකසුත්‌තවණ්‌ණනා
9. Kassakasuttavaṇṇanā
155. නවමෙ නිබ්‌බානපටිසංයුත්‌තායාති නිබ්‌බානං අපදිසිත්‌වා පවත්‌තාය. හටහටකෙසොති පුරිමකෙසෙ පච්‌ඡතො, පච්‌ඡිමකෙසෙ පුරතො වාමපස්‌සකෙසෙ දක්‌ඛිණතො, දක්‌ඛිණපස්‌සකෙසෙ වාමතො ඵරිත්‌වා ඵරිත්‌වා විප්‌පකිණ්‌ණකෙසො. මම චක්‌ඛුසම්‌ඵස්‌සවිඤ්‌ඤාණායතනන්‌ති චක්‌ඛුවිඤ්‌ඤාණෙන සම්‌පයුත්‌තො චක්‌ඛුසම්‌ඵස්‌සොපි විඤ්‌ඤාණායතනම්‌පි මමෙවාති. එත්‌ථ ච චක්‌ඛුසම්‌ඵස්‌සෙන විඤ්‌ඤාණසම්‌පයුත්‌තකා ධම්‌මා ගහිතා, විඤ්‌ඤාණායතනෙන සබ්‌බානිපි චක්‌ඛුද්‌වාරෙ උප්‌පන්‌නානි ආවජ්‌ජනාදිවිඤ්‌ඤාණානි. සොතද්‌වාරාදීසුපි එසෙව නයො. මනොද්‌වාරෙ පන මනොති සාවජ්‌ජනකං භවඞ්‌ගචිත්‌තං. ධම්‌මාති ආරම්‌මණධම්‌මා. මනොසම්‌ඵස්‌සොති සාවජ්‌ජනෙන භවඞ්‌ගෙන සම්‌පයුත්‌තඵස්‌සො. විඤ්‌ඤාණායතනන්‌ති ජවනචිත්‌තං තදාරම්‌මණම්‌පි වට්‌ටති.
155. Navame nibbānapaṭisaṃyuttāyāti nibbānaṃ apadisitvā pavattāya. Haṭahaṭakesoti purimakese pacchato, pacchimakese purato vāmapassakese dakkhiṇato, dakkhiṇapassakese vāmato pharitvā pharitvā vippakiṇṇakeso. Mama cakkhusamphassaviññāṇāyatananti cakkhuviññāṇena sampayutto cakkhusamphassopi viññāṇāyatanampi mamevāti. Ettha ca cakkhusamphassena viññāṇasampayuttakā dhammā gahitā, viññāṇāyatanena sabbānipi cakkhudvāre uppannāni āvajjanādiviññāṇāni. Sotadvārādīsupi eseva nayo. Manodvāre pana manoti sāvajjanakaṃ bhavaṅgacittaṃ. Dhammāti ārammaṇadhammā. Manosamphassoti sāvajjanena bhavaṅgena sampayuttaphasso. Viññāṇāyatananti javanacittaṃ tadārammaṇampi vaṭṭati.
තවෙව පාපිම, චක්‌ඛූති යං ලොකෙ තිමිරකාචාදීහි උපද්‌දුතං අනෙකරොගායතනං උපක්‌කවිපක්‌කං අන්‌තමසො කාණචක්‌ඛුපි, සබ්‌බං තං තවෙව භවතු. රූපාදීසුපි එසෙව නයො.
Taveva pāpima, cakkhūti yaṃ loke timirakācādīhi upaddutaṃ anekarogāyatanaṃ upakkavipakkaṃ antamaso kāṇacakkhupi, sabbaṃ taṃ taveva bhavatu. Rūpādīsupi eseva nayo.
යං වදන්‌තීති යං භණ්‌ඩකං ‘‘මම ඉද’’න්‌ති වදන්‌ති. යෙ වදන්‌ති මමන්‌ති චාති යෙ ච පුග්‌ගලා ‘‘මම’’න්‌ති වදන්‌ති. එත්‌ථ චෙ තෙ මනො අත්‌ථීති එතෙසු ච ඨානෙසු යදි චිත්‌තං අත්‌ථි. න මෙ සමණ මොක්‌ඛසීති සමණ මය්‌හං විසයතො න මුච්‌චිස්‌සසි. යං වදන්‌තීති යං භණ්‌ඩකං වදන්‌ති, න තං මය්‌හං. යෙ වදන්‌තීති යෙපි පුග්‌ගලා එවං වදන්‌ති, න තෙ අහං. න මෙ මග්‌ගම්‌පි දක්‌ඛසීති භවයොනිගතිආදීසු මය්‌හං ගතමග්‌ගම්‌පි න පස්‌සසි. නවමං.
Yaṃ vadantīti yaṃ bhaṇḍakaṃ ‘‘mama ida’’nti vadanti. Ye vadanti mamanti cāti ye ca puggalā ‘‘mama’’nti vadanti. Ettha ce te mano atthīti etesu ca ṭhānesu yadi cittaṃ atthi. Na me samaṇa mokkhasīti samaṇa mayhaṃ visayato na muccissasi. Yaṃ vadantīti yaṃ bhaṇḍakaṃ vadanti, na taṃ mayhaṃ. Ye vadantīti yepi puggalā evaṃ vadanti, na te ahaṃ. Na me maggampi dakkhasīti bhavayonigatiādīsu mayhaṃ gatamaggampi na passasi. Navamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. කස්‌සකසුත්‌තං • 9. Kassakasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. කස්‌සකසුත්‌තවණ්‌ණනා • 9. Kassakasuttavaṇṇanā
