| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
9. சம்பெய்யக்க²ந்த⁴கோ
9. Campeyyakkhandhako
234. கஸ்ஸபகொ³த்தபி⁴க்கு²வத்து²
234. Kassapagottabhikkhuvatthu
380. தேன ஸமயேன பு³த்³தோ⁴ ப⁴க³வா சம்பாயங் விஹரதி க³க்³க³ராய பொக்க²ரணியா தீரே. தேன கோ² பன ஸமயேன காஸீஸு ஜனபதே³ வாஸப⁴கா³மோ நாம ஹோதி. தத்த² கஸ்ஸபகொ³த்தோ நாம பி⁴க்கு² ஆவாஸிகோ ஹோதி தந்திப³த்³தோ⁴ உஸ்ஸுக்கங் ஆபன்னோ – கிந்தி அனாக³தா ச பேஸலா பி⁴க்கூ² ஆக³ச்செ²ய்யுங், ஆக³தா ச பேஸலா பி⁴க்கூ² பா²ஸு விஹரெய்யுங், அயஞ்ச ஆவாஸோ வுத்³தி⁴ங் விருள்ஹிங் வேபுல்லங் ஆபஜ்ஜெய்யாதி. தேன கோ² பன ஸமயேன ஸம்ப³ஹுலா பி⁴க்கூ² காஸீஸு சாரிகங் சரமானா யேன வாஸப⁴கா³மோ தத³வஸருங். அத்³த³ஸா கோ² கஸ்ஸபகொ³த்தோ பி⁴க்கு² தே பி⁴க்கூ² தூ³ரதோவ ஆக³ச்ச²ந்தே, தி³ஸ்வான ஆஸனங் பஞ்ஞபேஸி, பாதோ³த³கங் பாத³பீட²ங் பாத³கத²லிகங் உபனிக்கி²பி, பச்சுக்³க³ந்த்வா பத்தசீவரங் படிக்³க³ஹேஸி, பானீயேன ஆபுச்சி², நஹானே உஸ்ஸுக்கங் அகாஸி, உஸ்ஸுக்கம்பி அகாஸி யாகு³யா கா²த³னீயே ப⁴த்தஸ்மிங். அத² கோ² தேஸங் ஆக³ந்துகானங் பி⁴க்கூ²னங் ஏதத³ஹோஸி – ‘‘ப⁴த்³த³கோ கோ² அயங், ஆவுஸோ, ஆவாஸிகோ பி⁴க்கு² நஹானே உஸ்ஸுக்கங் கரோதி, உஸ்ஸுக்கம்பி கரோதி யாகு³யா கா²த³னீயே ப⁴த்தஸ்மிங். ஹந்த³, மயங், ஆவுஸோ, இதே⁴வ வாஸப⁴கா³மே நிவாஸங் கப்பேமா’’தி. அத² கோ² தே ஆக³ந்துகா பி⁴க்கூ² தத்தே²வ வாஸப⁴கா³மே நிவாஸங் கப்பேஸுங்.
380. Tena samayena buddho bhagavā campāyaṃ viharati gaggarāya pokkharaṇiyā tīre. Tena kho pana samayena kāsīsu janapade vāsabhagāmo nāma hoti. Tattha kassapagotto nāma bhikkhu āvāsiko hoti tantibaddho ussukkaṃ āpanno – kinti anāgatā ca pesalā bhikkhū āgaccheyyuṃ, āgatā ca pesalā bhikkhū phāsu vihareyyuṃ, ayañca āvāso vuddhiṃ viruḷhiṃ vepullaṃ āpajjeyyāti. Tena kho pana samayena sambahulā bhikkhū kāsīsu cārikaṃ caramānā yena vāsabhagāmo tadavasaruṃ. Addasā kho kassapagotto bhikkhu te bhikkhū dūratova āgacchante, disvāna āsanaṃ paññapesi, pādodakaṃ pādapīṭhaṃ pādakathalikaṃ upanikkhipi, paccuggantvā pattacīvaraṃ paṭiggahesi, pānīyena āpucchi, nahāne ussukkaṃ akāsi, ussukkampi akāsi yāguyā khādanīye bhattasmiṃ. Atha kho tesaṃ āgantukānaṃ bhikkhūnaṃ etadahosi – ‘‘bhaddako kho ayaṃ, āvuso, āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Handa, mayaṃ, āvuso, idheva vāsabhagāme nivāsaṃ kappemā’’ti. Atha kho te āgantukā bhikkhū tattheva vāsabhagāme nivāsaṃ kappesuṃ.
அத² கோ² கஸ்ஸபகொ³த்தஸ்ஸ பி⁴க்கு²னோ ஏதத³ஹோஸி – ‘‘யோ கோ² இமேஸங் ஆக³ந்துகானங் பி⁴க்கூ²னங் ஆக³ந்துககிலமதோ² ஸோ படிப்பஸ்ஸத்³தோ⁴. யேபிமே கோ³சரே அப்பகதஞ்ஞுனோ தேதா³னிமே கோ³சரே பகதஞ்ஞுனோ. து³க்கரங் கோ² பன பரகுலேஸு யாவஜீவங் உஸ்ஸுக்கங் காதுங், விஞ்ஞத்தி ச மனுஸ்ஸானங் அமனாபா. யங்னூனாஹங் ந உஸ்ஸுக்கங் கரெய்யங் யாகு³யா கா²த³னீயே ப⁴த்தஸ்மி’’ந்தி. ஸோ ந உஸ்ஸுக்கங் அகாஸி யாகு³யா கா²த³னீயே ப⁴த்தஸ்மிங். அத² கோ² தேஸங் ஆக³ந்துகானங் பி⁴க்கூ²னங் ஏதத³ஹோஸி – ‘‘புப்³பே³ க்²வாயங், ஆவுஸோ, ஆவாஸிகோ பி⁴க்கு² நஹானே உஸ்ஸுக்கங் அகாஸி, உஸ்ஸுக்கம்பி அகாஸி யாகு³யா கா²த³னீயே ப⁴த்தஸ்மிங். ஸோதா³னாயங் ந உஸ்ஸுக்கங் கரோதி யாகு³யா கா²த³னீயே ப⁴த்தஸ்மிங். து³ட்டோ²தா³னாயங், ஆவுஸோ, ஆவாஸிகோ பி⁴க்கு². ஹந்த³, மயங், ஆவுஸோ, ஆவாஸிகங் 1 பி⁴க்கு²ங் உக்கி²பாமா’’தி. அத² கோ² தே ஆக³ந்துகா பி⁴க்கூ² ஸன்னிபதித்வா கஸ்ஸபகொ³த்தங் பி⁴க்கு²ங் ஏதத³வோசுங் – ‘‘புப்³பே³ கோ² த்வங், ஆவுஸோ, நஹானே உஸ்ஸுக்கங் கரோஸி, உஸ்ஸுக்கம்பி கரோஸி யாகு³யா கா²த³னீயே ப⁴த்தஸ்மிங். ஸோதா³னி த்வங் ந உஸ்ஸுக்கங் கரோஸி யாகு³யா கா²த³னீயே ப⁴த்தஸ்மிங். ஆபத்திங் த்வங், ஆவுஸோ, ஆபன்னோ. பஸ்ஸஸேதங் ஆபத்தி’’ந்தி? ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்ய’’ந்தி. அத² கோ² தே ஆக³ந்துகா பி⁴க்கூ² கஸ்ஸபகொ³த்தங் பி⁴க்கு²ங் ஆபத்தியா அத³ஸ்ஸனே உக்கி²பிங்ஸு.
Atha kho kassapagottassa bhikkhuno etadahosi – ‘‘yo kho imesaṃ āgantukānaṃ bhikkhūnaṃ āgantukakilamatho so paṭippassaddho. Yepime gocare appakataññuno tedānime gocare pakataññuno. Dukkaraṃ kho pana parakulesu yāvajīvaṃ ussukkaṃ kātuṃ, viññatti ca manussānaṃ amanāpā. Yaṃnūnāhaṃ na ussukkaṃ kareyyaṃ yāguyā khādanīye bhattasmi’’nti. So na ussukkaṃ akāsi yāguyā khādanīye bhattasmiṃ. Atha kho tesaṃ āgantukānaṃ bhikkhūnaṃ etadahosi – ‘‘pubbe khvāyaṃ, āvuso, āvāsiko bhikkhu nahāne ussukkaṃ akāsi, ussukkampi akāsi yāguyā khādanīye bhattasmiṃ. Sodānāyaṃ na ussukkaṃ karoti yāguyā khādanīye bhattasmiṃ. Duṭṭhodānāyaṃ, āvuso, āvāsiko bhikkhu. Handa, mayaṃ, āvuso, āvāsikaṃ 2 bhikkhuṃ ukkhipāmā’’ti. Atha kho te āgantukā bhikkhū sannipatitvā kassapagottaṃ bhikkhuṃ etadavocuṃ – ‘‘pubbe kho tvaṃ, āvuso, nahāne ussukkaṃ karosi, ussukkampi karosi yāguyā khādanīye bhattasmiṃ. Sodāni tvaṃ na ussukkaṃ karosi yāguyā khādanīye bhattasmiṃ. Āpattiṃ tvaṃ, āvuso, āpanno. Passasetaṃ āpatti’’nti? ‘‘Natthi me, āvuso, āpatti, yamahaṃ passeyya’’nti. Atha kho te āgantukā bhikkhū kassapagottaṃ bhikkhuṃ āpattiyā adassane ukkhipiṃsu.
அத² கோ² கஸ்ஸபகொ³த்தஸ்ஸ பி⁴க்கு²னோ ஏதத³ஹோஸி – ‘‘அஹங் கோ² ஏதங் ந ஜானாமி ‘ஆபத்தி வா ஏஸா அனாபத்தி வா, ஆபன்னோ சம்ஹி 3 அனாபன்னோ வா, உக்கி²த்தோ சம்ஹி அனுக்கி²த்தோ வா, த⁴ம்மிகேன வா அத⁴ம்மிகேன வா, குப்பேன வா அகுப்பேன வா, டா²னாரஹேன வா அட்டா²னாரஹேன வா’. யங்னூனாஹங் சம்பங் க³ந்த்வா ப⁴க³வந்தங் ஏதமத்த²ங் புச்செ²ய்ய’’ந்தி. அத² கோ² கஸ்ஸபகொ³த்தோ பி⁴க்கு² ஸேனாஸனங் ஸங்ஸாமெத்வா பத்தசீவரமாதா³ய யேன சம்பா தேன பக்காமி. அனுபுப்³பே³ன யேன சம்பா யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி பி⁴க்கூ²ஹி ஸத்³தி⁴ங் படிஸம்மோதி³துங். அத² கோ² ப⁴க³வா கஸ்ஸபகொ³த்தங் பி⁴க்கு²ங் ஏதத³வோச – ‘‘கச்சி, பி⁴க்கு², க²மனீயங், கச்சி யாபனீயங், கச்சி அப்பகிலமதே²ன அத்³தா⁴னங் ஆக³தோ, குதோ ச த்வங், பி⁴க்கு², ஆக³ச்ச²ஸீ’’தி? ‘‘க²மனீயங், ப⁴க³வா; யாபனீயங், ப⁴க³வா; அப்பகிலமதே²ன சாஹங், ப⁴ந்தே, அத்³தா⁴னங் ஆக³தோ. அத்தி², ப⁴ந்தே, காஸீஸு ஜனபதே³ வாஸப⁴கா³மோ நாம. தத்தா²ஹங், ப⁴க³வா, ஆவாஸிகோ தந்திப³த்³தோ⁴ உஸ்ஸுக்கங் ஆபன்னோ – ‘கிந்தி அனாக³தா ச பேஸலா பி⁴க்கூ² ஆக³ச்செ²ய்யுங், ஆக³தா ச பேஸலா பி⁴க்கூ² பா²ஸு விஹரெய்யுங், அயஞ்ச ஆவாஸோ வுத்³தி⁴ங் விருள்ஹிங் வேபுல்லங் ஆபஜ்ஜெய்யா’தி. அத² கோ², ப⁴ந்தே, ஸம்ப³ஹுலா பி⁴க்கூ² காஸீஸு சாரிகங் சரமானா யேன வாஸப⁴கா³மோ தத³வஸருங். அத்³த³ஸங் கோ² அஹங், ப⁴ந்தே, தே பி⁴க்கூ² தூ³ரதோவ ஆக³ச்ச²ந்தே, தி³ஸ்வான ஆஸனங் பஞ்ஞபேஸிங், பாதோ³த³கங் பாத³பீட²ங் பாத³கத²லிகங் உபனிக்கி²பிங், பச்சுக்³க³ந்த்வா பத்தசீவரங் படிக்³க³ஹேஸிங், பானீயேன அபுச்சி²ங், நஹானே உஸ்ஸுக்கங் அகாஸிங், உஸ்ஸுக்கம்பி அகாஸிங் யாகு³யா கா²த³னீயே ப⁴த்தஸ்மிங் . அத² கோ² தேஸங், ப⁴ந்தே, ஆக³ந்துகானங் பி⁴க்கூ²னங் ஏதத³ஹோஸி – ‘ப⁴த்³த³கோ கோ² அயங் ஆவுஸோ ஆவாஸிகோ பி⁴க்கு² நஹானே உஸ்ஸுக்கங் கரோதி, உஸ்ஸுக்கம்பி கரோதி யாகு³யா கா²த³னீயே ப⁴த்தஸ்மிங். ஹந்த³, மயங், ஆவுஸோ, இதே⁴வ வாஸப⁴கா³மே நிவாஸங் கப்பேமா’தி. அத² கோ² தே, ப⁴ந்தே, ஆக³ந்துகா பி⁴க்கூ² தத்தே²வ வாஸப⁴கா³மே நிவாஸங் கப்பேஸுங். தஸ்ஸ மய்ஹங், ப⁴ந்தே, ஏதத³ஹோஸி – ‘யோ கோ² இமேஸங் ஆக³ந்துகானங் பி⁴க்கூ²னங் ஆக³ந்துககிலமதோ² ஸோ படிப்பஸ்ஸத்³தோ⁴. யேபிமே கோ³சரே அப்பகதஞ்ஞுனோ தேதா³னிமே கோ³சரே பகதஞ்ஞுனோ. து³க்கரங் கோ² பன பரகுலேஸு யாவஜீவங் உஸ்ஸுக்கங் காதுங், விஞ்ஞத்தி ச மனுஸ்ஸானங் அமனாபா. யங்னூனாஹங் ந உஸ்ஸுக்கங் கரெய்யங் யாகு³யா கா²த³னீயே ப⁴த்தஸ்மி’ந்தி. ஸோ கோ² அஹங், ப⁴ந்தே, ந உஸ்ஸுக்கங் அகாஸிங் யாகு³யா கா²த³னீயே ப⁴த்தஸ்மிங். அத² கோ² தேஸங், ப⁴ந்தே, ஆக³ந்துகானங் பி⁴க்கூ²னங் ஏதத³ஹோஸி – ‘புப்³பே³ க்²வாயங், ஆவுஸோ, ஆவாஸிகோ பி⁴க்கு² நஹானே உஸ்ஸுக்கங் கரோதி, உஸ்ஸுக்கம்பி கரோதி யாகு³யா கா²த³னீயே ப⁴த்தஸ்மிங். ஸோதா³னாயங் ந உஸ்ஸுக்கங் கரோதி யாகு³யா கா²த³னீயே ப⁴த்தஸ்மிங். து³ட்டோ²தா³னாயங், ஆவுஸோ, ஆவாஸிகோ பி⁴க்கு². ஹந்த³, மயங், ஆவுஸோ, ஆவாஸிகங் பி⁴க்கு²ங் உக்கி²பாமா’தி. அத² கோ² தே, ப⁴ந்தே, ஆக³ந்துகா பி⁴க்கூ² ஸன்னிபதித்வா மங் ஏதத³வோசுங் – ‘புப்³பே³ கோ² த்வங், ஆவுஸோ, நஹானே உஸ்ஸுக்கங் கரோஸி, உஸ்ஸுக்கம்பி கரோஸி யாகு³யா கா²த³னீயே ப⁴த்தஸ்மிங். ஸோதா³னி த்வங் ந உஸ்ஸுக்கங் கரோஸி யாகு³யா கா²த³னீயே ப⁴த்தஸ்மிங். ஆபத்திங் த்வங், ஆவுஸோ, ஆபன்னோ. பஸ்ஸஸேதங் ஆபத்தி’ந்தி ? ‘நத்தி² மே, ஆவுஸோ, ஆபத்தி யமஹங் பஸ்ஸெய்ய’ந்தி. அத² கோ² தே, ப⁴ந்தே, ஆக³ந்துகா பி⁴க்கூ² மங் ஆபத்தியா அத³ஸ்ஸனே உக்கி²பிங்ஸு. தஸ்ஸ மய்ஹங், ப⁴ந்தே, ஏதத³ஹோஸி – ‘அஹங் கோ² ஏதங் ந ஜானாமி ‘ஆபத்தி வா ஏஸா அனாபத்தி வா, ஆபன்னோ சம்ஹி அனாபன்னோ வா, உக்கி²த்தோ சம்ஹி அனுக்கி²த்தோ வா, த⁴ம்மிகேன வா அத⁴ம்மிகேன வா, குப்பேன வா அகுப்பேன வா, டா²னாரஹேன வா அட்டா²னாரஹேன வா’. யங்னூனாஹங் சம்பங் க³ந்த்வா ப⁴க³வந்தங் ஏதமத்த²ங் புச்செ²ய்ய’ந்தி. ததோ அஹங், ப⁴க³வா, ஆக³ச்சா²மீ’’தி. ‘‘அனாபத்தி ஏஸா, பி⁴க்கு², நேஸா ஆபத்தி. அனாபன்னோஸி, நஸி ஆபன்னோ. அனுக்கி²த்தோஸி, நஸி உக்கி²த்தோ. அத⁴ம்மிகேனாஸி கம்மேன உக்கி²த்தோ குப்பேன அட்டா²னாரஹேன. க³ச்ச² த்வங், பி⁴க்கு², தத்தே²வ வாஸப⁴கா³மே நிவாஸங் கப்பேஹீ’’தி. ‘‘ஏவங், ப⁴ந்தே’’தி கோ² கஸ்ஸபகொ³த்தோ பி⁴க்கு² ப⁴க³வதோ படிஸ்ஸுணித்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா யேன வாஸப⁴கா³மோ தேன பக்காமி.
Atha kho kassapagottassa bhikkhuno etadahosi – ‘‘ahaṃ kho etaṃ na jānāmi ‘āpatti vā esā anāpatti vā, āpanno camhi 4 anāpanno vā, ukkhitto camhi anukkhitto vā, dhammikena vā adhammikena vā, kuppena vā akuppena vā, ṭhānārahena vā aṭṭhānārahena vā’. Yaṃnūnāhaṃ campaṃ gantvā bhagavantaṃ etamatthaṃ puccheyya’’nti. Atha kho kassapagotto bhikkhu senāsanaṃ saṃsāmetvā pattacīvaramādāya yena campā tena pakkāmi. Anupubbena yena campā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā kassapagottaṃ bhikkhuṃ etadavoca – ‘‘kacci, bhikkhu, khamanīyaṃ, kacci yāpanīyaṃ, kacci appakilamathena addhānaṃ āgato, kuto ca tvaṃ, bhikkhu, āgacchasī’’ti? ‘‘Khamanīyaṃ, bhagavā; yāpanīyaṃ, bhagavā; appakilamathena cāhaṃ, bhante, addhānaṃ āgato. Atthi, bhante, kāsīsu janapade vāsabhagāmo nāma. Tatthāhaṃ, bhagavā, āvāsiko tantibaddho ussukkaṃ āpanno – ‘kinti anāgatā ca pesalā bhikkhū āgaccheyyuṃ, āgatā ca pesalā bhikkhū phāsu vihareyyuṃ, ayañca āvāso vuddhiṃ viruḷhiṃ vepullaṃ āpajjeyyā’ti. Atha kho, bhante, sambahulā bhikkhū kāsīsu cārikaṃ caramānā yena vāsabhagāmo tadavasaruṃ. Addasaṃ kho ahaṃ, bhante, te bhikkhū dūratova āgacchante, disvāna āsanaṃ paññapesiṃ, pādodakaṃ pādapīṭhaṃ pādakathalikaṃ upanikkhipiṃ, paccuggantvā pattacīvaraṃ paṭiggahesiṃ, pānīyena apucchiṃ, nahāne ussukkaṃ akāsiṃ, ussukkampi akāsiṃ yāguyā khādanīye bhattasmiṃ . Atha kho tesaṃ, bhante, āgantukānaṃ bhikkhūnaṃ etadahosi – ‘bhaddako kho ayaṃ āvuso āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Handa, mayaṃ, āvuso, idheva vāsabhagāme nivāsaṃ kappemā’ti. Atha kho te, bhante, āgantukā bhikkhū tattheva vāsabhagāme nivāsaṃ kappesuṃ. Tassa mayhaṃ, bhante, etadahosi – ‘yo kho imesaṃ āgantukānaṃ bhikkhūnaṃ āgantukakilamatho so paṭippassaddho. Yepime gocare appakataññuno tedānime gocare pakataññuno. Dukkaraṃ kho pana parakulesu yāvajīvaṃ ussukkaṃ kātuṃ, viññatti ca manussānaṃ amanāpā. Yaṃnūnāhaṃ na ussukkaṃ kareyyaṃ yāguyā khādanīye bhattasmi’nti. So kho ahaṃ, bhante, na ussukkaṃ akāsiṃ yāguyā khādanīye bhattasmiṃ. Atha kho tesaṃ, bhante, āgantukānaṃ bhikkhūnaṃ etadahosi – ‘pubbe khvāyaṃ, āvuso, āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Sodānāyaṃ na ussukkaṃ karoti yāguyā khādanīye bhattasmiṃ. Duṭṭhodānāyaṃ, āvuso, āvāsiko bhikkhu. Handa, mayaṃ, āvuso, āvāsikaṃ bhikkhuṃ ukkhipāmā’ti. Atha kho te, bhante, āgantukā bhikkhū sannipatitvā maṃ etadavocuṃ – ‘pubbe kho tvaṃ, āvuso, nahāne ussukkaṃ karosi, ussukkampi karosi yāguyā khādanīye bhattasmiṃ. Sodāni tvaṃ na ussukkaṃ karosi yāguyā khādanīye bhattasmiṃ. Āpattiṃ tvaṃ, āvuso, āpanno. Passasetaṃ āpatti’nti ? ‘Natthi me, āvuso, āpatti yamahaṃ passeyya’nti. Atha kho te, bhante, āgantukā bhikkhū maṃ āpattiyā adassane ukkhipiṃsu. Tassa mayhaṃ, bhante, etadahosi – ‘ahaṃ kho etaṃ na jānāmi ‘āpatti vā esā anāpatti vā, āpanno camhi anāpanno vā, ukkhitto camhi anukkhitto vā, dhammikena vā adhammikena vā, kuppena vā akuppena vā, ṭhānārahena vā aṭṭhānārahena vā’. Yaṃnūnāhaṃ campaṃ gantvā bhagavantaṃ etamatthaṃ puccheyya’nti. Tato ahaṃ, bhagavā, āgacchāmī’’ti. ‘‘Anāpatti esā, bhikkhu, nesā āpatti. Anāpannosi, nasi āpanno. Anukkhittosi, nasi ukkhitto. Adhammikenāsi kammena ukkhitto kuppena aṭṭhānārahena. Gaccha tvaṃ, bhikkhu, tattheva vāsabhagāme nivāsaṃ kappehī’’ti. ‘‘Evaṃ, bhante’’ti kho kassapagotto bhikkhu bhagavato paṭissuṇitvā uṭṭhāyāsanā bhagavantaṃ abhivādetvā padakkhiṇaṃ katvā yena vāsabhagāmo tena pakkāmi.
381. அத² கோ² தேஸங் ஆக³ந்துகானங் பி⁴க்கூ²னங் அஹுதே³வ குக்குச்சங், அஹு விப்படிஸாரோ – ‘‘அலாபா⁴ வத நோ, ந வத நோ லாபா⁴, து³ல்லத்³த⁴ங் வத நோ, ந வத நோ ஸுலத்³த⁴ங், யே மயங் ஸுத்³த⁴ங் பி⁴க்கு²ங் அனாபத்திகங் அவத்து²ஸ்மிங் அகாரணே உக்கி²பிம்ஹா. ஹந்த³, மயங், ஆவுஸோ, சம்பங் க³ந்த்வா ப⁴க³வதோ ஸந்திகே அச்சயங் அச்சயதோ தே³ஸேமா’’தி. அத² கோ² தே ஆக³ந்துகா பி⁴க்கூ² ஸேனாஸனங் ஸங்ஸாமெத்வா பத்தசீவரமாதா³ய யேன சம்பா தேன பக்கமிங்ஸு. அனுபுப்³பே³ன யேன சம்பா யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி பி⁴க்கூ²ஹி ஸத்³தி⁴ங் படிஸம்மோதி³துங். அத² கோ² ப⁴க³வா தே பி⁴க்கூ² ஏதத³வோச – ‘‘கச்சி, பி⁴க்க²வே, க²மனீயங், கச்சி யாபனீயங், கச்சித்த² அப்பகிலமதே²ன அத்³தா⁴னங் ஆக³தா, குதோ ச தும்ஹே, பி⁴க்க²வே, ஆக³ச்ச²தா²’’தி ? ‘‘க²மனீயங், ப⁴க³வா; யாபனீயங், ப⁴க³வா; அப்பகிலமதே²ன ச மயங், ப⁴ந்தே, அத்³தா⁴னங் ஆக³தா. அத்தி², ப⁴ந்தே, காஸீஸு ஜனபதே³ வாஸப⁴கா³மோ நாம. ததோ மயங், ப⁴க³வா, ஆக³ச்சா²மா’’தி. ‘‘தும்ஹே, பி⁴க்க²வே, ஆவாஸிகங் பி⁴க்கு²ங் உக்கி²பித்தா²’’தி? ‘‘ஏவங், ப⁴ந்தே’’தி. ‘‘கிஸ்மிங், பி⁴க்க²வே, வத்து²ஸ்மிங் காரணே’’தி? ‘‘அவத்து²ஸ்மிங், ப⁴க³வா, அகாரணே’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், மோக⁴புரிஸா, அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம தும்ஹே, மோக⁴புரிஸா, ஸுத்³த⁴ங் பி⁴க்கு²ங் அனாபத்திகங் அவத்து²ஸ்மிங் அகாரணே உக்கி²பிஸ்ஸத². நேதங், மோக⁴புரிஸா, அப்பஸன்னானங் வா பஸாதா³ய…பே॰…’’ விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஸுத்³தோ⁴ பி⁴க்கு² அனாபத்திகோ அவத்து²ஸ்மிங் அகாரணே உக்கி²பிதப்³போ³. யோ உக்கி²பெய்ய, ஆபத்தி து³க்கடஸ்ஸா’’தி.
381. Atha kho tesaṃ āgantukānaṃ bhikkhūnaṃ ahudeva kukkuccaṃ, ahu vippaṭisāro – ‘‘alābhā vata no, na vata no lābhā, dulladdhaṃ vata no, na vata no suladdhaṃ, ye mayaṃ suddhaṃ bhikkhuṃ anāpattikaṃ avatthusmiṃ akāraṇe ukkhipimhā. Handa, mayaṃ, āvuso, campaṃ gantvā bhagavato santike accayaṃ accayato desemā’’ti. Atha kho te āgantukā bhikkhū senāsanaṃ saṃsāmetvā pattacīvaramādāya yena campā tena pakkamiṃsu. Anupubbena yena campā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā te bhikkhū etadavoca – ‘‘kacci, bhikkhave, khamanīyaṃ, kacci yāpanīyaṃ, kaccittha appakilamathena addhānaṃ āgatā, kuto ca tumhe, bhikkhave, āgacchathā’’ti ? ‘‘Khamanīyaṃ, bhagavā; yāpanīyaṃ, bhagavā; appakilamathena ca mayaṃ, bhante, addhānaṃ āgatā. Atthi, bhante, kāsīsu janapade vāsabhagāmo nāma. Tato mayaṃ, bhagavā, āgacchāmā’’ti. ‘‘Tumhe, bhikkhave, āvāsikaṃ bhikkhuṃ ukkhipitthā’’ti? ‘‘Evaṃ, bhante’’ti. ‘‘Kismiṃ, bhikkhave, vatthusmiṃ kāraṇe’’ti? ‘‘Avatthusmiṃ, bhagavā, akāraṇe’’ti. Vigarahi buddho bhagavā – ‘‘ananucchavikaṃ, moghapurisā, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tumhe, moghapurisā, suddhaṃ bhikkhuṃ anāpattikaṃ avatthusmiṃ akāraṇe ukkhipissatha. Netaṃ, moghapurisā, appasannānaṃ vā pasādāya…pe…’’ vigarahitvā dhammiṃ kathaṃ katvā bhikkhū āmantesi – ‘‘na, bhikkhave, suddho bhikkhu anāpattiko avatthusmiṃ akāraṇe ukkhipitabbo. Yo ukkhipeyya, āpatti dukkaṭassā’’ti.
அத² கோ² தே பி⁴க்கூ² உட்டா²யாஸனா ஏகங்ஸங் உத்தராஸங்க³ங் கரித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தங் ஏதத³வோசுங் – ‘‘அச்சயோ நோ, ப⁴ந்தே, அச்சக³மா யதா²பா³லே யதா²மூள்ஹே யதா²அகுஸலே, யே மயங் ஸுத்³த⁴ங் பி⁴க்கு²ங் அனாபத்திகங் அவத்து²ஸ்மிங் அகாரணே உக்கி²பிம்ஹா. தேஸங் நோ, ப⁴ந்தே, ப⁴க³வா அச்சயங் அச்சயதோ படிக்³க³ண்ஹாது ஆயதிங் ஸங்வராயா’’தி. ‘‘தக்³க⁴, தும்ஹே, பி⁴க்க²வே, அச்சயோ அச்சக³மா யதா²பா³லே யதா²மூள்ஹே யதா²அகுஸலே, யே தும்ஹே ஸுத்³த⁴ங் பி⁴க்கு²ங் அனாபத்திகங் அவத்து²ஸ்மிங் அகாரணே உக்கி²பித்த². யதோ ச கோ² தும்ஹே, பி⁴க்க²வே, அச்சயங் அச்சயதோ தி³ஸ்வா யதா²த⁴ம்மங் படிகரோத², தங் வோ மயங் படிக்³க³ண்ஹாம. வுத்³தி⁴ஹேஸா , பி⁴க்க²வே, அரியஸ்ஸ வினயே யோ அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் 5 ஸங்வரங் ஆபஜ்ஜதீ’’தி.
Atha kho te bhikkhū uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavantaṃ etadavocuṃ – ‘‘accayo no, bhante, accagamā yathābāle yathāmūḷhe yathāakusale, ye mayaṃ suddhaṃ bhikkhuṃ anāpattikaṃ avatthusmiṃ akāraṇe ukkhipimhā. Tesaṃ no, bhante, bhagavā accayaṃ accayato paṭiggaṇhātu āyatiṃ saṃvarāyā’’ti. ‘‘Taggha, tumhe, bhikkhave, accayo accagamā yathābāle yathāmūḷhe yathāakusale, ye tumhe suddhaṃ bhikkhuṃ anāpattikaṃ avatthusmiṃ akāraṇe ukkhipittha. Yato ca kho tumhe, bhikkhave, accayaṃ accayato disvā yathādhammaṃ paṭikarotha, taṃ vo mayaṃ paṭiggaṇhāma. Vuddhihesā , bhikkhave, ariyassa vinaye yo accayaṃ accayato disvā yathādhammaṃ paṭikaroti, āyatiṃ 6 saṃvaraṃ āpajjatī’’ti.
கஸ்ஸபகொ³த்தபி⁴க்கு²வத்து² நிட்டி²தங்.
Kassapagottabhikkhuvatthu niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கஸ்ஸபகொ³த்தபி⁴க்கு²வத்து²கதா² • Kassapagottabhikkhuvatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கஸ்ஸபகொ³த்தபி⁴க்கு²வத்து²கதா²வண்ணனா • Kassapagottabhikkhuvatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கஸ்ஸபகொ³த்தபி⁴க்கு²வத்து²கதா²தி³வண்ணனா • Kassapagottabhikkhuvatthukathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 234. கஸ்ஸபகொ³த்தபி⁴க்கு²வத்து²கதா² • 234. Kassapagottabhikkhuvatthukathā
