| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
9. жамбзяяагканд̇хаго
9. Campeyyakkhandhako
234. гассабаг̇од̇д̇абхигкувад̇т̇у
234. Kassapagottabhikkhuvatthu
380. д̇зна самаязна б̣уд̣̇д̇хо бхаг̇аваа жамбааяам̣ вихарад̇и г̇аг̇г̇арааяа богкаран̣ияаа д̇ийрз. д̇зна ко бана самаязна гаасийсу ж̇анабад̣̇з ваасабхаг̇аамо наама ход̇и. д̇ад̇т̇а гассабаг̇од̇д̇о наама бхигку ааваасиго ход̇и д̇анд̇иб̣ад̣̇д̇хо уссуггам̣ аабанно – гинд̇и анааг̇ад̇аа жа бзсалаа бхигкуу ааг̇ажчзяяум̣, ааг̇ад̇аа жа бзсалаа бхигкуу паасу вихарзяяум̣, аяан̃жа ааваасо вуд̣̇д̇хим̣ вирул̣хим̣ взбуллам̣ аабаж̇ж̇зяяаад̇и. д̇зна ко бана самаязна самб̣ахулаа бхигкуу гаасийсу жааригам̣ жарамаанаа язна ваасабхаг̇аамо д̇ад̣̇авасарум̣. ад̣̇д̣̇асаа ко гассабаг̇од̇д̇о бхигку д̇з бхигкуу д̣̇уурад̇ова ааг̇ажчанд̇з, д̣̇исваана аасанам̣ бан̃н̃абзси, баад̣̇од̣̇агам̣ баад̣̇абийтам̣ баад̣̇агат̇алигам̣ убанигкиби, бажжуг̇г̇анд̇ваа бад̇д̇ажийварам̣ бадиг̇г̇ахзси, баанийязна аабужчи, нахаанз уссуггам̣ агааси, уссуггамби агааси яааг̇уяаа каад̣̇анийяз бхад̇д̇асмим̣. ат̇а ко д̇зсам̣ ааг̇анд̇угаанам̣ бхигкуунам̣ зд̇ад̣̇ахоси – ‘‘бхад̣̇д̣̇аго ко аяам̣, аавусо, ааваасиго бхигку нахаанз уссуггам̣ гарод̇и, уссуггамби гарод̇и яааг̇уяаа каад̣̇анийяз бхад̇д̇асмим̣. ханд̣̇а, маяам̣, аавусо, ид̇хзва ваасабхаг̇аамз ниваасам̣ габбзмаа’’д̇и. ат̇а ко д̇з ааг̇анд̇угаа бхигкуу д̇ад̇т̇зва ваасабхаг̇аамз ниваасам̣ габбзсум̣.
380. Tena samayena buddho bhagavā campāyaṃ viharati gaggarāya pokkharaṇiyā tīre. Tena kho pana samayena kāsīsu janapade vāsabhagāmo nāma hoti. Tattha kassapagotto nāma bhikkhu āvāsiko hoti tantibaddho ussukkaṃ āpanno – kinti anāgatā ca pesalā bhikkhū āgaccheyyuṃ, āgatā ca pesalā bhikkhū phāsu vihareyyuṃ, ayañca āvāso vuddhiṃ viruḷhiṃ vepullaṃ āpajjeyyāti. Tena kho pana samayena sambahulā bhikkhū kāsīsu cārikaṃ caramānā yena vāsabhagāmo tadavasaruṃ. Addasā kho kassapagotto bhikkhu te bhikkhū dūratova āgacchante, disvāna āsanaṃ paññapesi, pādodakaṃ pādapīṭhaṃ pādakathalikaṃ upanikkhipi, paccuggantvā pattacīvaraṃ paṭiggahesi, pānīyena āpucchi, nahāne ussukkaṃ akāsi, ussukkampi akāsi yāguyā khādanīye bhattasmiṃ. Atha kho tesaṃ āgantukānaṃ bhikkhūnaṃ etadahosi – ‘‘bhaddako kho ayaṃ, āvuso, āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Handa, mayaṃ, āvuso, idheva vāsabhagāme nivāsaṃ kappemā’’ti. Atha kho te āgantukā bhikkhū tattheva vāsabhagāme nivāsaṃ kappesuṃ.
ат̇а ко гассабаг̇од̇д̇асса бхигкуно зд̇ад̣̇ахоси – ‘‘яо ко имзсам̣ ааг̇анд̇угаанам̣ бхигкуунам̣ ааг̇анд̇угагиламат̇о со бадиббассад̣̇д̇хо. язбимз г̇ожарз аббагад̇ан̃н̃уно д̇зд̣̇аанимз г̇ожарз багад̇ан̃н̃уно. д̣̇уггарам̣ ко бана барагулзсу яааваж̇ийвам̣ уссуггам̣ гаад̇ум̣, вин̃н̃ад̇д̇и жа мануссаанам̣ аманаабаа. яам̣нуунаахам̣ на уссуггам̣ гарзяяам̣ яааг̇уяаа каад̣̇анийяз бхад̇д̇асми’’нд̇и. со на уссуггам̣ агааси яааг̇уяаа каад̣̇анийяз бхад̇д̇асмим̣. ат̇а ко д̇зсам̣ ааг̇анд̇угаанам̣ бхигкуунам̣ зд̇ад̣̇ахоси – ‘‘буб̣б̣з квааяам̣, аавусо, ааваасиго бхигку нахаанз уссуггам̣ агааси, уссуггамби агааси яааг̇уяаа каад̣̇анийяз бхад̇д̇асмим̣. сод̣̇аанааяам̣ на уссуггам̣ гарод̇и яааг̇уяаа каад̣̇анийяз бхад̇д̇асмим̣. д̣̇удтод̣̇аанааяам̣, аавусо, ааваасиго бхигку. ханд̣̇а, маяам̣, аавусо, ааваасигам̣ 1 бхигкум̣ угкибаамаа’’д̇и. ат̇а ко д̇з ааг̇анд̇угаа бхигкуу саннибад̇ид̇ваа гассабаг̇од̇д̇ам̣ бхигкум̣ зд̇ад̣̇авожум̣ – ‘‘буб̣б̣з ко д̇вам̣, аавусо, нахаанз уссуггам̣ гароси, уссуггамби гароси яааг̇уяаа каад̣̇анийяз бхад̇д̇асмим̣. сод̣̇аани д̇вам̣ на уссуггам̣ гароси яааг̇уяаа каад̣̇анийяз бхад̇д̇асмим̣. аабад̇д̇им̣ д̇вам̣, аавусо, аабанно. бассасзд̇ам̣ аабад̇д̇и’’нд̇и? ‘‘над̇т̇и мз, аавусо, аабад̇д̇и, яамахам̣ бассзяяа’’нд̇и. ат̇а ко д̇з ааг̇анд̇угаа бхигкуу гассабаг̇од̇д̇ам̣ бхигкум̣ аабад̇д̇ияаа ад̣̇ассанз угкибим̣су.
Atha kho kassapagottassa bhikkhuno etadahosi – ‘‘yo kho imesaṃ āgantukānaṃ bhikkhūnaṃ āgantukakilamatho so paṭippassaddho. Yepime gocare appakataññuno tedānime gocare pakataññuno. Dukkaraṃ kho pana parakulesu yāvajīvaṃ ussukkaṃ kātuṃ, viññatti ca manussānaṃ amanāpā. Yaṃnūnāhaṃ na ussukkaṃ kareyyaṃ yāguyā khādanīye bhattasmi’’nti. So na ussukkaṃ akāsi yāguyā khādanīye bhattasmiṃ. Atha kho tesaṃ āgantukānaṃ bhikkhūnaṃ etadahosi – ‘‘pubbe khvāyaṃ, āvuso, āvāsiko bhikkhu nahāne ussukkaṃ akāsi, ussukkampi akāsi yāguyā khādanīye bhattasmiṃ. Sodānāyaṃ na ussukkaṃ karoti yāguyā khādanīye bhattasmiṃ. Duṭṭhodānāyaṃ, āvuso, āvāsiko bhikkhu. Handa, mayaṃ, āvuso, āvāsikaṃ 2 bhikkhuṃ ukkhipāmā’’ti. Atha kho te āgantukā bhikkhū sannipatitvā kassapagottaṃ bhikkhuṃ etadavocuṃ – ‘‘pubbe kho tvaṃ, āvuso, nahāne ussukkaṃ karosi, ussukkampi karosi yāguyā khādanīye bhattasmiṃ. Sodāni tvaṃ na ussukkaṃ karosi yāguyā khādanīye bhattasmiṃ. Āpattiṃ tvaṃ, āvuso, āpanno. Passasetaṃ āpatti’’nti? ‘‘Natthi me, āvuso, āpatti, yamahaṃ passeyya’’nti. Atha kho te āgantukā bhikkhū kassapagottaṃ bhikkhuṃ āpattiyā adassane ukkhipiṃsu.
ат̇а ко гассабаг̇од̇д̇асса бхигкуно зд̇ад̣̇ахоси – ‘‘ахам̣ ко зд̇ам̣ на ж̇аанаами ‘аабад̇д̇и ваа зсаа анаабад̇д̇и ваа, аабанно жамхи 3 анаабанно ваа, угкид̇д̇о жамхи анугкид̇д̇о ваа, д̇хаммигзна ваа ад̇хаммигзна ваа, губбзна ваа агуббзна ваа, таанаарахзна ваа адтаанаарахзна ваа’. яам̣нуунаахам̣ жамбам̣ г̇анд̇ваа бхаг̇аванд̇ам̣ зд̇амад̇т̇ам̣ бужчзяяа’’нд̇и. ат̇а ко гассабаг̇од̇д̇о бхигку сзнаасанам̣ сам̣саамзд̇ваа бад̇д̇ажийварамаад̣̇ааяа язна жамбаа д̇зна баггаами. анубуб̣б̣зна язна жамбаа язна бхаг̇аваа д̇знубасан̇гами, убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. аажин̣н̣ам̣ ко банзд̇ам̣ б̣уд̣̇д̇хаанам̣ бхаг̇аванд̇аанам̣ ааг̇анд̇угзхи бхигкуухи сад̣̇д̇хим̣ бадисаммод̣̇ид̇ум̣. ат̇а ко бхаг̇аваа гассабаг̇од̇д̇ам̣ бхигкум̣ зд̇ад̣̇авожа – ‘‘гажжи, бхигку, каманийяам̣, гажжи яаабанийяам̣, гажжи аббагиламат̇зна ад̣̇д̇хаанам̣ ааг̇ад̇о, гуд̇о жа д̇вам̣, бхигку, ааг̇ажчасий’’д̇и? ‘‘каманийяам̣, бхаг̇аваа; яаабанийяам̣, бхаг̇аваа; аббагиламат̇зна жаахам̣, бханд̇з, ад̣̇д̇хаанам̣ ааг̇ад̇о. ад̇т̇и, бханд̇з, гаасийсу ж̇анабад̣̇з ваасабхаг̇аамо наама. д̇ад̇т̇аахам̣, бхаг̇аваа, ааваасиго д̇анд̇иб̣ад̣̇д̇хо уссуггам̣ аабанно – ‘гинд̇и анааг̇ад̇аа жа бзсалаа бхигкуу ааг̇ажчзяяум̣, ааг̇ад̇аа жа бзсалаа бхигкуу паасу вихарзяяум̣, аяан̃жа ааваасо вуд̣̇д̇хим̣ вирул̣хим̣ взбуллам̣ аабаж̇ж̇зяяаа’д̇и. ат̇а ко, бханд̇з, самб̣ахулаа бхигкуу гаасийсу жааригам̣ жарамаанаа язна ваасабхаг̇аамо д̇ад̣̇авасарум̣. ад̣̇д̣̇асам̣ ко ахам̣, бханд̇з, д̇з бхигкуу д̣̇уурад̇ова ааг̇ажчанд̇з, д̣̇исваана аасанам̣ бан̃н̃абзсим̣, баад̣̇од̣̇агам̣ баад̣̇абийтам̣ баад̣̇агат̇алигам̣ убанигкибим̣, бажжуг̇г̇анд̇ваа бад̇д̇ажийварам̣ бадиг̇г̇ахзсим̣, баанийязна абужчим̣, нахаанз уссуггам̣ агаасим̣, уссуггамби агаасим̣ яааг̇уяаа каад̣̇анийяз бхад̇д̇асмим̣ . ат̇а ко д̇зсам̣, бханд̇з, ааг̇анд̇угаанам̣ бхигкуунам̣ зд̇ад̣̇ахоси – ‘бхад̣̇д̣̇аго ко аяам̣ аавусо ааваасиго бхигку нахаанз уссуггам̣ гарод̇и, уссуггамби гарод̇и яааг̇уяаа каад̣̇анийяз бхад̇д̇асмим̣. ханд̣̇а, маяам̣, аавусо, ид̇хзва ваасабхаг̇аамз ниваасам̣ габбзмаа’д̇и. ат̇а ко д̇з, бханд̇з, ааг̇анд̇угаа бхигкуу д̇ад̇т̇зва ваасабхаг̇аамз ниваасам̣ габбзсум̣. д̇асса маяхам̣, бханд̇з, зд̇ад̣̇ахоси – ‘яо ко имзсам̣ ааг̇анд̇угаанам̣ бхигкуунам̣ ааг̇анд̇угагиламат̇о со бадиббассад̣̇д̇хо. язбимз г̇ожарз аббагад̇ан̃н̃уно д̇зд̣̇аанимз г̇ожарз багад̇ан̃н̃уно. д̣̇уггарам̣ ко бана барагулзсу яааваж̇ийвам̣ уссуггам̣ гаад̇ум̣, вин̃н̃ад̇д̇и жа мануссаанам̣ аманаабаа. яам̣нуунаахам̣ на уссуггам̣ гарзяяам̣ яааг̇уяаа каад̣̇анийяз бхад̇д̇асми’нд̇и. со ко ахам̣, бханд̇з, на уссуггам̣ агаасим̣ яааг̇уяаа каад̣̇анийяз бхад̇д̇асмим̣. ат̇а ко д̇зсам̣, бханд̇з, ааг̇анд̇угаанам̣ бхигкуунам̣ зд̇ад̣̇ахоси – ‘буб̣б̣з квааяам̣, аавусо, ааваасиго бхигку нахаанз уссуггам̣ гарод̇и, уссуггамби гарод̇и яааг̇уяаа каад̣̇анийяз бхад̇д̇асмим̣. сод̣̇аанааяам̣ на уссуггам̣ гарод̇и яааг̇уяаа каад̣̇анийяз бхад̇д̇асмим̣. д̣̇удтод̣̇аанааяам̣, аавусо, ааваасиго бхигку. ханд̣̇а, маяам̣, аавусо, ааваасигам̣ бхигкум̣ угкибаамаа’д̇и. ат̇а ко д̇з, бханд̇з, ааг̇анд̇угаа бхигкуу саннибад̇ид̇ваа мам̣ зд̇ад̣̇авожум̣ – ‘буб̣б̣з ко д̇вам̣, аавусо, нахаанз уссуггам̣ гароси, уссуггамби гароси яааг̇уяаа каад̣̇анийяз бхад̇д̇асмим̣. сод̣̇аани д̇вам̣ на уссуггам̣ гароси яааг̇уяаа каад̣̇анийяз бхад̇д̇асмим̣. аабад̇д̇им̣ д̇вам̣, аавусо, аабанно. бассасзд̇ам̣ аабад̇д̇и’нд̇и ? ‘над̇т̇и мз, аавусо, аабад̇д̇и яамахам̣ бассзяяа’нд̇и. ат̇а ко д̇з, бханд̇з, ааг̇анд̇угаа бхигкуу мам̣ аабад̇д̇ияаа ад̣̇ассанз угкибим̣су. д̇асса маяхам̣, бханд̇з, зд̇ад̣̇ахоси – ‘ахам̣ ко зд̇ам̣ на ж̇аанаами ‘аабад̇д̇и ваа зсаа анаабад̇д̇и ваа, аабанно жамхи анаабанно ваа, угкид̇д̇о жамхи анугкид̇д̇о ваа, д̇хаммигзна ваа ад̇хаммигзна ваа, губбзна ваа агуббзна ваа, таанаарахзна ваа адтаанаарахзна ваа’. яам̣нуунаахам̣ жамбам̣ г̇анд̇ваа бхаг̇аванд̇ам̣ зд̇амад̇т̇ам̣ бужчзяяа’нд̇и. д̇ад̇о ахам̣, бхаг̇аваа, ааг̇ажчаамий’’д̇и. ‘‘анаабад̇д̇и зсаа, бхигку, нзсаа аабад̇д̇и. анаабанноси, наси аабанно. анугкид̇д̇оси, наси угкид̇д̇о. ад̇хаммигзнааси гаммзна угкид̇д̇о губбзна адтаанаарахзна. г̇ажча д̇вам̣, бхигку, д̇ад̇т̇зва ваасабхаг̇аамз ниваасам̣ габбзхий’’д̇и. ‘‘звам̣, бханд̇з’’д̇и ко гассабаг̇од̇д̇о бхигку бхаг̇авад̇о бадиссун̣ид̇ваа удтааяаасанаа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа язна ваасабхаг̇аамо д̇зна баггаами.
Atha kho kassapagottassa bhikkhuno etadahosi – ‘‘ahaṃ kho etaṃ na jānāmi ‘āpatti vā esā anāpatti vā, āpanno camhi 4 anāpanno vā, ukkhitto camhi anukkhitto vā, dhammikena vā adhammikena vā, kuppena vā akuppena vā, ṭhānārahena vā aṭṭhānārahena vā’. Yaṃnūnāhaṃ campaṃ gantvā bhagavantaṃ etamatthaṃ puccheyya’’nti. Atha kho kassapagotto bhikkhu senāsanaṃ saṃsāmetvā pattacīvaramādāya yena campā tena pakkāmi. Anupubbena yena campā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā kassapagottaṃ bhikkhuṃ etadavoca – ‘‘kacci, bhikkhu, khamanīyaṃ, kacci yāpanīyaṃ, kacci appakilamathena addhānaṃ āgato, kuto ca tvaṃ, bhikkhu, āgacchasī’’ti? ‘‘Khamanīyaṃ, bhagavā; yāpanīyaṃ, bhagavā; appakilamathena cāhaṃ, bhante, addhānaṃ āgato. Atthi, bhante, kāsīsu janapade vāsabhagāmo nāma. Tatthāhaṃ, bhagavā, āvāsiko tantibaddho ussukkaṃ āpanno – ‘kinti anāgatā ca pesalā bhikkhū āgaccheyyuṃ, āgatā ca pesalā bhikkhū phāsu vihareyyuṃ, ayañca āvāso vuddhiṃ viruḷhiṃ vepullaṃ āpajjeyyā’ti. Atha kho, bhante, sambahulā bhikkhū kāsīsu cārikaṃ caramānā yena vāsabhagāmo tadavasaruṃ. Addasaṃ kho ahaṃ, bhante, te bhikkhū dūratova āgacchante, disvāna āsanaṃ paññapesiṃ, pādodakaṃ pādapīṭhaṃ pādakathalikaṃ upanikkhipiṃ, paccuggantvā pattacīvaraṃ paṭiggahesiṃ, pānīyena apucchiṃ, nahāne ussukkaṃ akāsiṃ, ussukkampi akāsiṃ yāguyā khādanīye bhattasmiṃ . Atha kho tesaṃ, bhante, āgantukānaṃ bhikkhūnaṃ etadahosi – ‘bhaddako kho ayaṃ āvuso āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Handa, mayaṃ, āvuso, idheva vāsabhagāme nivāsaṃ kappemā’ti. Atha kho te, bhante, āgantukā bhikkhū tattheva vāsabhagāme nivāsaṃ kappesuṃ. Tassa mayhaṃ, bhante, etadahosi – ‘yo kho imesaṃ āgantukānaṃ bhikkhūnaṃ āgantukakilamatho so paṭippassaddho. Yepime gocare appakataññuno tedānime gocare pakataññuno. Dukkaraṃ kho pana parakulesu yāvajīvaṃ ussukkaṃ kātuṃ, viññatti ca manussānaṃ amanāpā. Yaṃnūnāhaṃ na ussukkaṃ kareyyaṃ yāguyā khādanīye bhattasmi’nti. So kho ahaṃ, bhante, na ussukkaṃ akāsiṃ yāguyā khādanīye bhattasmiṃ. Atha kho tesaṃ, bhante, āgantukānaṃ bhikkhūnaṃ etadahosi – ‘pubbe khvāyaṃ, āvuso, āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Sodānāyaṃ na ussukkaṃ karoti yāguyā khādanīye bhattasmiṃ. Duṭṭhodānāyaṃ, āvuso, āvāsiko bhikkhu. Handa, mayaṃ, āvuso, āvāsikaṃ bhikkhuṃ ukkhipāmā’ti. Atha kho te, bhante, āgantukā bhikkhū sannipatitvā maṃ etadavocuṃ – ‘pubbe kho tvaṃ, āvuso, nahāne ussukkaṃ karosi, ussukkampi karosi yāguyā khādanīye bhattasmiṃ. Sodāni tvaṃ na ussukkaṃ karosi yāguyā khādanīye bhattasmiṃ. Āpattiṃ tvaṃ, āvuso, āpanno. Passasetaṃ āpatti’nti ? ‘Natthi me, āvuso, āpatti yamahaṃ passeyya’nti. Atha kho te, bhante, āgantukā bhikkhū maṃ āpattiyā adassane ukkhipiṃsu. Tassa mayhaṃ, bhante, etadahosi – ‘ahaṃ kho etaṃ na jānāmi ‘āpatti vā esā anāpatti vā, āpanno camhi anāpanno vā, ukkhitto camhi anukkhitto vā, dhammikena vā adhammikena vā, kuppena vā akuppena vā, ṭhānārahena vā aṭṭhānārahena vā’. Yaṃnūnāhaṃ campaṃ gantvā bhagavantaṃ etamatthaṃ puccheyya’nti. Tato ahaṃ, bhagavā, āgacchāmī’’ti. ‘‘Anāpatti esā, bhikkhu, nesā āpatti. Anāpannosi, nasi āpanno. Anukkhittosi, nasi ukkhitto. Adhammikenāsi kammena ukkhitto kuppena aṭṭhānārahena. Gaccha tvaṃ, bhikkhu, tattheva vāsabhagāme nivāsaṃ kappehī’’ti. ‘‘Evaṃ, bhante’’ti kho kassapagotto bhikkhu bhagavato paṭissuṇitvā uṭṭhāyāsanā bhagavantaṃ abhivādetvā padakkhiṇaṃ katvā yena vāsabhagāmo tena pakkāmi.
381. ат̇а ко д̇зсам̣ ааг̇анд̇угаанам̣ бхигкуунам̣ ахуд̣̇зва гуггужжам̣, аху виббадисааро – ‘‘алаабхаа вад̇а но, на вад̇а но лаабхаа, д̣̇уллад̣̇д̇хам̣ вад̇а но, на вад̇а но сулад̣̇д̇хам̣, яз маяам̣ суд̣̇д̇хам̣ бхигкум̣ анаабад̇д̇игам̣ авад̇т̇усмим̣ агааран̣з угкибимхаа. ханд̣̇а, маяам̣, аавусо, жамбам̣ г̇анд̇ваа бхаг̇авад̇о санд̇игз ажжаяам̣ ажжаяад̇о д̣̇зсзмаа’’д̇и. ат̇а ко д̇з ааг̇анд̇угаа бхигкуу сзнаасанам̣ сам̣саамзд̇ваа бад̇д̇ажийварамаад̣̇ааяа язна жамбаа д̇зна баггамим̣су. анубуб̣б̣зна язна жамбаа язна бхаг̇аваа д̇знубасан̇гамим̣су, убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇им̣су. аажин̣н̣ам̣ ко банзд̇ам̣ б̣уд̣̇д̇хаанам̣ бхаг̇аванд̇аанам̣ ааг̇анд̇угзхи бхигкуухи сад̣̇д̇хим̣ бадисаммод̣̇ид̇ум̣. ат̇а ко бхаг̇аваа д̇з бхигкуу зд̇ад̣̇авожа – ‘‘гажжи, бхигкавз, каманийяам̣, гажжи яаабанийяам̣, гажжид̇т̇а аббагиламат̇зна ад̣̇д̇хаанам̣ ааг̇ад̇аа, гуд̇о жа д̇умхз, бхигкавз, ааг̇ажчат̇аа’’д̇и ? ‘‘каманийяам̣, бхаг̇аваа; яаабанийяам̣, бхаг̇аваа; аббагиламат̇зна жа маяам̣, бханд̇з, ад̣̇д̇хаанам̣ ааг̇ад̇аа. ад̇т̇и, бханд̇з, гаасийсу ж̇анабад̣̇з ваасабхаг̇аамо наама. д̇ад̇о маяам̣, бхаг̇аваа, ааг̇ажчаамаа’’д̇и. ‘‘д̇умхз, бхигкавз, ааваасигам̣ бхигкум̣ угкибид̇т̇аа’’д̇и? ‘‘звам̣, бханд̇з’’д̇и. ‘‘гисмим̣, бхигкавз, вад̇т̇усмим̣ гааран̣з’’д̇и? ‘‘авад̇т̇усмим̣, бхаг̇аваа, агааран̣з’’д̇и. виг̇арахи б̣уд̣̇д̇хо бхаг̇аваа – ‘‘ананужчавигам̣, могхабурисаа, анануломигам̣ аббад̇ируубам̣ ассааман̣агам̣ агаббияам̣ агаран̣ийяам̣. гат̇ан̃хи наама д̇умхз, могхабурисаа, суд̣̇д̇хам̣ бхигкум̣ анаабад̇д̇игам̣ авад̇т̇усмим̣ агааран̣з угкибиссат̇а. нзд̇ам̣, могхабурисаа, аббасаннаанам̣ ваа басаад̣̇ааяа…бз…’’ виг̇арахид̇ваа д̇хаммим̣ гат̇ам̣ гад̇ваа бхигкуу ааманд̇зси – ‘‘на, бхигкавз, суд̣̇д̇хо бхигку анаабад̇д̇иго авад̇т̇усмим̣ агааран̣з угкибид̇аб̣б̣о. яо угкибзяяа, аабад̇д̇и д̣̇уггадассаа’’д̇и.
381. Atha kho tesaṃ āgantukānaṃ bhikkhūnaṃ ahudeva kukkuccaṃ, ahu vippaṭisāro – ‘‘alābhā vata no, na vata no lābhā, dulladdhaṃ vata no, na vata no suladdhaṃ, ye mayaṃ suddhaṃ bhikkhuṃ anāpattikaṃ avatthusmiṃ akāraṇe ukkhipimhā. Handa, mayaṃ, āvuso, campaṃ gantvā bhagavato santike accayaṃ accayato desemā’’ti. Atha kho te āgantukā bhikkhū senāsanaṃ saṃsāmetvā pattacīvaramādāya yena campā tena pakkamiṃsu. Anupubbena yena campā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā te bhikkhū etadavoca – ‘‘kacci, bhikkhave, khamanīyaṃ, kacci yāpanīyaṃ, kaccittha appakilamathena addhānaṃ āgatā, kuto ca tumhe, bhikkhave, āgacchathā’’ti ? ‘‘Khamanīyaṃ, bhagavā; yāpanīyaṃ, bhagavā; appakilamathena ca mayaṃ, bhante, addhānaṃ āgatā. Atthi, bhante, kāsīsu janapade vāsabhagāmo nāma. Tato mayaṃ, bhagavā, āgacchāmā’’ti. ‘‘Tumhe, bhikkhave, āvāsikaṃ bhikkhuṃ ukkhipitthā’’ti? ‘‘Evaṃ, bhante’’ti. ‘‘Kismiṃ, bhikkhave, vatthusmiṃ kāraṇe’’ti? ‘‘Avatthusmiṃ, bhagavā, akāraṇe’’ti. Vigarahi buddho bhagavā – ‘‘ananucchavikaṃ, moghapurisā, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tumhe, moghapurisā, suddhaṃ bhikkhuṃ anāpattikaṃ avatthusmiṃ akāraṇe ukkhipissatha. Netaṃ, moghapurisā, appasannānaṃ vā pasādāya…pe…’’ vigarahitvā dhammiṃ kathaṃ katvā bhikkhū āmantesi – ‘‘na, bhikkhave, suddho bhikkhu anāpattiko avatthusmiṃ akāraṇe ukkhipitabbo. Yo ukkhipeyya, āpatti dukkaṭassā’’ti.
ат̇а ко д̇з бхигкуу удтааяаасанаа згам̣сам̣ уд̇д̇араасан̇г̇ам̣ гарид̇ваа бхаг̇авад̇о баад̣̇зсу сирасаа нибад̇ид̇ваа бхаг̇аванд̇ам̣ зд̇ад̣̇авожум̣ – ‘‘ажжаяо но, бханд̇з, ажжаг̇амаа яат̇ааб̣аалз яат̇аамуул̣хз яат̇ааагусалз, яз маяам̣ суд̣̇д̇хам̣ бхигкум̣ анаабад̇д̇игам̣ авад̇т̇усмим̣ агааран̣з угкибимхаа. д̇зсам̣ но, бханд̇з, бхаг̇аваа ажжаяам̣ ажжаяад̇о бадиг̇г̇ан̣хаад̇у ааяад̇им̣ сам̣варааяаа’’д̇и. ‘‘д̇аг̇гха, д̇умхз, бхигкавз, ажжаяо ажжаг̇амаа яат̇ааб̣аалз яат̇аамуул̣хз яат̇ааагусалз, яз д̇умхз суд̣̇д̇хам̣ бхигкум̣ анаабад̇д̇игам̣ авад̇т̇усмим̣ агааран̣з угкибид̇т̇а. яад̇о жа ко д̇умхз, бхигкавз, ажжаяам̣ ажжаяад̇о д̣̇исваа яат̇аад̇хаммам̣ бадигарот̇а, д̇ам̣ во маяам̣ бадиг̇г̇ан̣хаама. вуд̣̇д̇хихзсаа , бхигкавз, арияасса винаяз яо ажжаяам̣ ажжаяад̇о д̣̇исваа яат̇аад̇хаммам̣ бадигарод̇и, ааяад̇им̣ 5 сам̣варам̣ аабаж̇ж̇ад̇ий’’д̇и.
Atha kho te bhikkhū uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavantaṃ etadavocuṃ – ‘‘accayo no, bhante, accagamā yathābāle yathāmūḷhe yathāakusale, ye mayaṃ suddhaṃ bhikkhuṃ anāpattikaṃ avatthusmiṃ akāraṇe ukkhipimhā. Tesaṃ no, bhante, bhagavā accayaṃ accayato paṭiggaṇhātu āyatiṃ saṃvarāyā’’ti. ‘‘Taggha, tumhe, bhikkhave, accayo accagamā yathābāle yathāmūḷhe yathāakusale, ye tumhe suddhaṃ bhikkhuṃ anāpattikaṃ avatthusmiṃ akāraṇe ukkhipittha. Yato ca kho tumhe, bhikkhave, accayaṃ accayato disvā yathādhammaṃ paṭikarotha, taṃ vo mayaṃ paṭiggaṇhāma. Vuddhihesā , bhikkhave, ariyassa vinaye yo accayaṃ accayato disvā yathādhammaṃ paṭikaroti, āyatiṃ 6 saṃvaraṃ āpajjatī’’ti.
гассабаг̇од̇д̇абхигкувад̇т̇у нидтид̇ам̣.
Kassapagottabhikkhuvatthu niṭṭhitaṃ.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / гассабаг̇од̇д̇абхигкувад̇т̇угат̇аа • Kassapagottabhikkhuvatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / гассабаг̇од̇д̇абхигкувад̇т̇угат̇ааван̣н̣анаа • Kassapagottabhikkhuvatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / гассабаг̇од̇д̇абхигкувад̇т̇угат̇аад̣̇иван̣н̣анаа • Kassapagottabhikkhuvatthukathādivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 234. гассабаг̇од̇д̇абхигкувад̇т̇угат̇аа • 234. Kassapagottabhikkhuvatthukathā
