| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೯. ಚಮ್ಪೇಯ್ಯಕ್ಖನ್ಧಕೋ
9. Campeyyakkhandhako
೨೩೪. ಕಸ್ಸಪಗೋತ್ತಭಿಕ್ಖುವತ್ಥು
234. Kassapagottabhikkhuvatthu
೩೮೦. ತೇನ ಸಮಯೇನ ಬುದ್ಧೋ ಭಗವಾ ಚಮ್ಪಾಯಂ ವಿಹರತಿ ಗಗ್ಗರಾಯ ಪೋಕ್ಖರಣಿಯಾ ತೀರೇ। ತೇನ ಖೋ ಪನ ಸಮಯೇನ ಕಾಸೀಸು ಜನಪದೇ ವಾಸಭಗಾಮೋ ನಾಮ ಹೋತಿ। ತತ್ಥ ಕಸ್ಸಪಗೋತ್ತೋ ನಾಮ ಭಿಕ್ಖು ಆವಾಸಿಕೋ ಹೋತಿ ತನ್ತಿಬದ್ಧೋ ಉಸ್ಸುಕ್ಕಂ ಆಪನ್ನೋ – ಕಿನ್ತಿ ಅನಾಗತಾ ಚ ಪೇಸಲಾ ಭಿಕ್ಖೂ ಆಗಚ್ಛೇಯ್ಯುಂ, ಆಗತಾ ಚ ಪೇಸಲಾ ಭಿಕ್ಖೂ ಫಾಸು ವಿಹರೇಯ್ಯುಂ, ಅಯಞ್ಚ ಆವಾಸೋ ವುದ್ಧಿಂ ವಿರುಳ್ಹಿಂ ವೇಪುಲ್ಲಂ ಆಪಜ್ಜೇಯ್ಯಾತಿ। ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಕಾಸೀಸು ಚಾರಿಕಂ ಚರಮಾನಾ ಯೇನ ವಾಸಭಗಾಮೋ ತದವಸರುಂ। ಅದ್ದಸಾ ಖೋ ಕಸ್ಸಪಗೋತ್ತೋ ಭಿಕ್ಖು ತೇ ಭಿಕ್ಖೂ ದೂರತೋವ ಆಗಚ್ಛನ್ತೇ, ದಿಸ್ವಾನ ಆಸನಂ ಪಞ್ಞಪೇಸಿ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸಿ, ಪಾನೀಯೇನ ಆಪುಚ್ಛಿ, ನಹಾನೇ ಉಸ್ಸುಕ್ಕಂ ಅಕಾಸಿ, ಉಸ್ಸುಕ್ಕಮ್ಪಿ ಅಕಾಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಅಥ ಖೋ ತೇಸಂ ಆಗನ್ತುಕಾನಂ ಭಿಕ್ಖೂನಂ ಏತದಹೋಸಿ – ‘‘ಭದ್ದಕೋ ಖೋ ಅಯಂ, ಆವುಸೋ, ಆವಾಸಿಕೋ ಭಿಕ್ಖು ನಹಾನೇ ಉಸ್ಸುಕ್ಕಂ ಕರೋತಿ, ಉಸ್ಸುಕ್ಕಮ್ಪಿ ಕರೋತಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಹನ್ದ, ಮಯಂ, ಆವುಸೋ, ಇಧೇವ ವಾಸಭಗಾಮೇ ನಿವಾಸಂ ಕಪ್ಪೇಮಾ’’ತಿ। ಅಥ ಖೋ ತೇ ಆಗನ್ತುಕಾ ಭಿಕ್ಖೂ ತತ್ಥೇವ ವಾಸಭಗಾಮೇ ನಿವಾಸಂ ಕಪ್ಪೇಸುಂ।
380. Tena samayena buddho bhagavā campāyaṃ viharati gaggarāya pokkharaṇiyā tīre. Tena kho pana samayena kāsīsu janapade vāsabhagāmo nāma hoti. Tattha kassapagotto nāma bhikkhu āvāsiko hoti tantibaddho ussukkaṃ āpanno – kinti anāgatā ca pesalā bhikkhū āgaccheyyuṃ, āgatā ca pesalā bhikkhū phāsu vihareyyuṃ, ayañca āvāso vuddhiṃ viruḷhiṃ vepullaṃ āpajjeyyāti. Tena kho pana samayena sambahulā bhikkhū kāsīsu cārikaṃ caramānā yena vāsabhagāmo tadavasaruṃ. Addasā kho kassapagotto bhikkhu te bhikkhū dūratova āgacchante, disvāna āsanaṃ paññapesi, pādodakaṃ pādapīṭhaṃ pādakathalikaṃ upanikkhipi, paccuggantvā pattacīvaraṃ paṭiggahesi, pānīyena āpucchi, nahāne ussukkaṃ akāsi, ussukkampi akāsi yāguyā khādanīye bhattasmiṃ. Atha kho tesaṃ āgantukānaṃ bhikkhūnaṃ etadahosi – ‘‘bhaddako kho ayaṃ, āvuso, āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Handa, mayaṃ, āvuso, idheva vāsabhagāme nivāsaṃ kappemā’’ti. Atha kho te āgantukā bhikkhū tattheva vāsabhagāme nivāsaṃ kappesuṃ.
ಅಥ ಖೋ ಕಸ್ಸಪಗೋತ್ತಸ್ಸ ಭಿಕ್ಖುನೋ ಏತದಹೋಸಿ – ‘‘ಯೋ ಖೋ ಇಮೇಸಂ ಆಗನ್ತುಕಾನಂ ಭಿಕ್ಖೂನಂ ಆಗನ್ತುಕಕಿಲಮಥೋ ಸೋ ಪಟಿಪ್ಪಸ್ಸದ್ಧೋ। ಯೇಪಿಮೇ ಗೋಚರೇ ಅಪ್ಪಕತಞ್ಞುನೋ ತೇದಾನಿಮೇ ಗೋಚರೇ ಪಕತಞ್ಞುನೋ। ದುಕ್ಕರಂ ಖೋ ಪನ ಪರಕುಲೇಸು ಯಾವಜೀವಂ ಉಸ್ಸುಕ್ಕಂ ಕಾತುಂ, ವಿಞ್ಞತ್ತಿ ಚ ಮನುಸ್ಸಾನಂ ಅಮನಾಪಾ। ಯಂನೂನಾಹಂ ನ ಉಸ್ಸುಕ್ಕಂ ಕರೇಯ್ಯಂ ಯಾಗುಯಾ ಖಾದನೀಯೇ ಭತ್ತಸ್ಮಿ’’ನ್ತಿ। ಸೋ ನ ಉಸ್ಸುಕ್ಕಂ ಅಕಾಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಅಥ ಖೋ ತೇಸಂ ಆಗನ್ತುಕಾನಂ ಭಿಕ್ಖೂನಂ ಏತದಹೋಸಿ – ‘‘ಪುಬ್ಬೇ ಖ್ವಾಯಂ, ಆವುಸೋ, ಆವಾಸಿಕೋ ಭಿಕ್ಖು ನಹಾನೇ ಉಸ್ಸುಕ್ಕಂ ಅಕಾಸಿ, ಉಸ್ಸುಕ್ಕಮ್ಪಿ ಅಕಾಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಸೋದಾನಾಯಂ ನ ಉಸ್ಸುಕ್ಕಂ ಕರೋತಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ದುಟ್ಠೋದಾನಾಯಂ, ಆವುಸೋ, ಆವಾಸಿಕೋ ಭಿಕ್ಖು। ಹನ್ದ, ಮಯಂ, ಆವುಸೋ, ಆವಾಸಿಕಂ 1 ಭಿಕ್ಖುಂ ಉಕ್ಖಿಪಾಮಾ’’ತಿ। ಅಥ ಖೋ ತೇ ಆಗನ್ತುಕಾ ಭಿಕ್ಖೂ ಸನ್ನಿಪತಿತ್ವಾ ಕಸ್ಸಪಗೋತ್ತಂ ಭಿಕ್ಖುಂ ಏತದವೋಚುಂ – ‘‘ಪುಬ್ಬೇ ಖೋ ತ್ವಂ, ಆವುಸೋ, ನಹಾನೇ ಉಸ್ಸುಕ್ಕಂ ಕರೋಸಿ, ಉಸ್ಸುಕ್ಕಮ್ಪಿ ಕರೋಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಸೋದಾನಿ ತ್ವಂ ನ ಉಸ್ಸುಕ್ಕಂ ಕರೋಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಆಪತ್ತಿಂ ತ್ವಂ, ಆವುಸೋ, ಆಪನ್ನೋ। ಪಸ್ಸಸೇತಂ ಆಪತ್ತಿ’’ನ್ತಿ? ‘‘ನತ್ಥಿ ಮೇ, ಆವುಸೋ, ಆಪತ್ತಿ, ಯಮಹಂ ಪಸ್ಸೇಯ್ಯ’’ನ್ತಿ। ಅಥ ಖೋ ತೇ ಆಗನ್ತುಕಾ ಭಿಕ್ಖೂ ಕಸ್ಸಪಗೋತ್ತಂ ಭಿಕ್ಖುಂ ಆಪತ್ತಿಯಾ ಅದಸ್ಸನೇ ಉಕ್ಖಿಪಿಂಸು।
Atha kho kassapagottassa bhikkhuno etadahosi – ‘‘yo kho imesaṃ āgantukānaṃ bhikkhūnaṃ āgantukakilamatho so paṭippassaddho. Yepime gocare appakataññuno tedānime gocare pakataññuno. Dukkaraṃ kho pana parakulesu yāvajīvaṃ ussukkaṃ kātuṃ, viññatti ca manussānaṃ amanāpā. Yaṃnūnāhaṃ na ussukkaṃ kareyyaṃ yāguyā khādanīye bhattasmi’’nti. So na ussukkaṃ akāsi yāguyā khādanīye bhattasmiṃ. Atha kho tesaṃ āgantukānaṃ bhikkhūnaṃ etadahosi – ‘‘pubbe khvāyaṃ, āvuso, āvāsiko bhikkhu nahāne ussukkaṃ akāsi, ussukkampi akāsi yāguyā khādanīye bhattasmiṃ. Sodānāyaṃ na ussukkaṃ karoti yāguyā khādanīye bhattasmiṃ. Duṭṭhodānāyaṃ, āvuso, āvāsiko bhikkhu. Handa, mayaṃ, āvuso, āvāsikaṃ 2 bhikkhuṃ ukkhipāmā’’ti. Atha kho te āgantukā bhikkhū sannipatitvā kassapagottaṃ bhikkhuṃ etadavocuṃ – ‘‘pubbe kho tvaṃ, āvuso, nahāne ussukkaṃ karosi, ussukkampi karosi yāguyā khādanīye bhattasmiṃ. Sodāni tvaṃ na ussukkaṃ karosi yāguyā khādanīye bhattasmiṃ. Āpattiṃ tvaṃ, āvuso, āpanno. Passasetaṃ āpatti’’nti? ‘‘Natthi me, āvuso, āpatti, yamahaṃ passeyya’’nti. Atha kho te āgantukā bhikkhū kassapagottaṃ bhikkhuṃ āpattiyā adassane ukkhipiṃsu.
ಅಥ ಖೋ ಕಸ್ಸಪಗೋತ್ತಸ್ಸ ಭಿಕ್ಖುನೋ ಏತದಹೋಸಿ – ‘‘ಅಹಂ ಖೋ ಏತಂ ನ ಜಾನಾಮಿ ‘ಆಪತ್ತಿ ವಾ ಏಸಾ ಅನಾಪತ್ತಿ ವಾ, ಆಪನ್ನೋ ಚಮ್ಹಿ 3 ಅನಾಪನ್ನೋ ವಾ, ಉಕ್ಖಿತ್ತೋ ಚಮ್ಹಿ ಅನುಕ್ಖಿತ್ತೋ ವಾ, ಧಮ್ಮಿಕೇನ ವಾ ಅಧಮ್ಮಿಕೇನ ವಾ, ಕುಪ್ಪೇನ ವಾ ಅಕುಪ್ಪೇನ ವಾ, ಠಾನಾರಹೇನ ವಾ ಅಟ್ಠಾನಾರಹೇನ ವಾ’। ಯಂನೂನಾಹಂ ಚಮ್ಪಂ ಗನ್ತ್ವಾ ಭಗವನ್ತಂ ಏತಮತ್ಥಂ ಪುಚ್ಛೇಯ್ಯ’’ನ್ತಿ। ಅಥ ಖೋ ಕಸ್ಸಪಗೋತ್ತೋ ಭಿಕ್ಖು ಸೇನಾಸನಂ ಸಂಸಾಮೇತ್ವಾ ಪತ್ತಚೀವರಮಾದಾಯ ಯೇನ ಚಮ್ಪಾ ತೇನ ಪಕ್ಕಾಮಿ। ಅನುಪುಬ್ಬೇನ ಯೇನ ಚಮ್ಪಾ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಆಚಿಣ್ಣಂ ಖೋ ಪನೇತಂ ಬುದ್ಧಾನಂ ಭಗವನ್ತಾನಂ ಆಗನ್ತುಕೇಹಿ ಭಿಕ್ಖೂಹಿ ಸದ್ಧಿಂ ಪಟಿಸಮ್ಮೋದಿತುಂ। ಅಥ ಖೋ ಭಗವಾ ಕಸ್ಸಪಗೋತ್ತಂ ಭಿಕ್ಖುಂ ಏತದವೋಚ – ‘‘ಕಚ್ಚಿ, ಭಿಕ್ಖು, ಖಮನೀಯಂ, ಕಚ್ಚಿ ಯಾಪನೀಯಂ, ಕಚ್ಚಿ ಅಪ್ಪಕಿಲಮಥೇನ ಅದ್ಧಾನಂ ಆಗತೋ, ಕುತೋ ಚ ತ್ವಂ, ಭಿಕ್ಖು, ಆಗಚ್ಛಸೀ’’ತಿ? ‘‘ಖಮನೀಯಂ, ಭಗವಾ; ಯಾಪನೀಯಂ, ಭಗವಾ; ಅಪ್ಪಕಿಲಮಥೇನ ಚಾಹಂ, ಭನ್ತೇ, ಅದ್ಧಾನಂ ಆಗತೋ। ಅತ್ಥಿ, ಭನ್ತೇ, ಕಾಸೀಸು ಜನಪದೇ ವಾಸಭಗಾಮೋ ನಾಮ। ತತ್ಥಾಹಂ, ಭಗವಾ, ಆವಾಸಿಕೋ ತನ್ತಿಬದ್ಧೋ ಉಸ್ಸುಕ್ಕಂ ಆಪನ್ನೋ – ‘ಕಿನ್ತಿ ಅನಾಗತಾ ಚ ಪೇಸಲಾ ಭಿಕ್ಖೂ ಆಗಚ್ಛೇಯ್ಯುಂ, ಆಗತಾ ಚ ಪೇಸಲಾ ಭಿಕ್ಖೂ ಫಾಸು ವಿಹರೇಯ್ಯುಂ, ಅಯಞ್ಚ ಆವಾಸೋ ವುದ್ಧಿಂ ವಿರುಳ್ಹಿಂ ವೇಪುಲ್ಲಂ ಆಪಜ್ಜೇಯ್ಯಾ’ತಿ। ಅಥ ಖೋ, ಭನ್ತೇ, ಸಮ್ಬಹುಲಾ ಭಿಕ್ಖೂ ಕಾಸೀಸು ಚಾರಿಕಂ ಚರಮಾನಾ ಯೇನ ವಾಸಭಗಾಮೋ ತದವಸರುಂ। ಅದ್ದಸಂ ಖೋ ಅಹಂ, ಭನ್ತೇ, ತೇ ಭಿಕ್ಖೂ ದೂರತೋವ ಆಗಚ್ಛನ್ತೇ, ದಿಸ್ವಾನ ಆಸನಂ ಪಞ್ಞಪೇಸಿಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸಿಂ, ಪಾನೀಯೇನ ಅಪುಚ್ಛಿಂ, ನಹಾನೇ ಉಸ್ಸುಕ್ಕಂ ಅಕಾಸಿಂ, ಉಸ್ಸುಕ್ಕಮ್ಪಿ ಅಕಾಸಿಂ ಯಾಗುಯಾ ಖಾದನೀಯೇ ಭತ್ತಸ್ಮಿಂ । ಅಥ ಖೋ ತೇಸಂ, ಭನ್ತೇ, ಆಗನ್ತುಕಾನಂ ಭಿಕ್ಖೂನಂ ಏತದಹೋಸಿ – ‘ಭದ್ದಕೋ ಖೋ ಅಯಂ ಆವುಸೋ ಆವಾಸಿಕೋ ಭಿಕ್ಖು ನಹಾನೇ ಉಸ್ಸುಕ್ಕಂ ಕರೋತಿ, ಉಸ್ಸುಕ್ಕಮ್ಪಿ ಕರೋತಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಹನ್ದ, ಮಯಂ, ಆವುಸೋ, ಇಧೇವ ವಾಸಭಗಾಮೇ ನಿವಾಸಂ ಕಪ್ಪೇಮಾ’ತಿ। ಅಥ ಖೋ ತೇ, ಭನ್ತೇ, ಆಗನ್ತುಕಾ ಭಿಕ್ಖೂ ತತ್ಥೇವ ವಾಸಭಗಾಮೇ ನಿವಾಸಂ ಕಪ್ಪೇಸುಂ। ತಸ್ಸ ಮಯ್ಹಂ, ಭನ್ತೇ, ಏತದಹೋಸಿ – ‘ಯೋ ಖೋ ಇಮೇಸಂ ಆಗನ್ತುಕಾನಂ ಭಿಕ್ಖೂನಂ ಆಗನ್ತುಕಕಿಲಮಥೋ ಸೋ ಪಟಿಪ್ಪಸ್ಸದ್ಧೋ। ಯೇಪಿಮೇ ಗೋಚರೇ ಅಪ್ಪಕತಞ್ಞುನೋ ತೇದಾನಿಮೇ ಗೋಚರೇ ಪಕತಞ್ಞುನೋ। ದುಕ್ಕರಂ ಖೋ ಪನ ಪರಕುಲೇಸು ಯಾವಜೀವಂ ಉಸ್ಸುಕ್ಕಂ ಕಾತುಂ, ವಿಞ್ಞತ್ತಿ ಚ ಮನುಸ್ಸಾನಂ ಅಮನಾಪಾ। ಯಂನೂನಾಹಂ ನ ಉಸ್ಸುಕ್ಕಂ ಕರೇಯ್ಯಂ ಯಾಗುಯಾ ಖಾದನೀಯೇ ಭತ್ತಸ್ಮಿ’ನ್ತಿ। ಸೋ ಖೋ ಅಹಂ, ಭನ್ತೇ, ನ ಉಸ್ಸುಕ್ಕಂ ಅಕಾಸಿಂ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಅಥ ಖೋ ತೇಸಂ, ಭನ್ತೇ, ಆಗನ್ತುಕಾನಂ ಭಿಕ್ಖೂನಂ ಏತದಹೋಸಿ – ‘ಪುಬ್ಬೇ ಖ್ವಾಯಂ, ಆವುಸೋ, ಆವಾಸಿಕೋ ಭಿಕ್ಖು ನಹಾನೇ ಉಸ್ಸುಕ್ಕಂ ಕರೋತಿ, ಉಸ್ಸುಕ್ಕಮ್ಪಿ ಕರೋತಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಸೋದಾನಾಯಂ ನ ಉಸ್ಸುಕ್ಕಂ ಕರೋತಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ದುಟ್ಠೋದಾನಾಯಂ, ಆವುಸೋ, ಆವಾಸಿಕೋ ಭಿಕ್ಖು। ಹನ್ದ, ಮಯಂ, ಆವುಸೋ, ಆವಾಸಿಕಂ ಭಿಕ್ಖುಂ ಉಕ್ಖಿಪಾಮಾ’ತಿ। ಅಥ ಖೋ ತೇ, ಭನ್ತೇ, ಆಗನ್ತುಕಾ ಭಿಕ್ಖೂ ಸನ್ನಿಪತಿತ್ವಾ ಮಂ ಏತದವೋಚುಂ – ‘ಪುಬ್ಬೇ ಖೋ ತ್ವಂ, ಆವುಸೋ, ನಹಾನೇ ಉಸ್ಸುಕ್ಕಂ ಕರೋಸಿ, ಉಸ್ಸುಕ್ಕಮ್ಪಿ ಕರೋಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಸೋದಾನಿ ತ್ವಂ ನ ಉಸ್ಸುಕ್ಕಂ ಕರೋಸಿ ಯಾಗುಯಾ ಖಾದನೀಯೇ ಭತ್ತಸ್ಮಿಂ। ಆಪತ್ತಿಂ ತ್ವಂ, ಆವುಸೋ, ಆಪನ್ನೋ। ಪಸ್ಸಸೇತಂ ಆಪತ್ತಿ’ನ್ತಿ ? ‘ನತ್ಥಿ ಮೇ, ಆವುಸೋ, ಆಪತ್ತಿ ಯಮಹಂ ಪಸ್ಸೇಯ್ಯ’ನ್ತಿ। ಅಥ ಖೋ ತೇ, ಭನ್ತೇ, ಆಗನ್ತುಕಾ ಭಿಕ್ಖೂ ಮಂ ಆಪತ್ತಿಯಾ ಅದಸ್ಸನೇ ಉಕ್ಖಿಪಿಂಸು। ತಸ್ಸ ಮಯ್ಹಂ, ಭನ್ತೇ, ಏತದಹೋಸಿ – ‘ಅಹಂ ಖೋ ಏತಂ ನ ಜಾನಾಮಿ ‘ಆಪತ್ತಿ ವಾ ಏಸಾ ಅನಾಪತ್ತಿ ವಾ, ಆಪನ್ನೋ ಚಮ್ಹಿ ಅನಾಪನ್ನೋ ವಾ, ಉಕ್ಖಿತ್ತೋ ಚಮ್ಹಿ ಅನುಕ್ಖಿತ್ತೋ ವಾ, ಧಮ್ಮಿಕೇನ ವಾ ಅಧಮ್ಮಿಕೇನ ವಾ, ಕುಪ್ಪೇನ ವಾ ಅಕುಪ್ಪೇನ ವಾ, ಠಾನಾರಹೇನ ವಾ ಅಟ್ಠಾನಾರಹೇನ ವಾ’। ಯಂನೂನಾಹಂ ಚಮ್ಪಂ ಗನ್ತ್ವಾ ಭಗವನ್ತಂ ಏತಮತ್ಥಂ ಪುಚ್ಛೇಯ್ಯ’ನ್ತಿ। ತತೋ ಅಹಂ, ಭಗವಾ, ಆಗಚ್ಛಾಮೀ’’ತಿ। ‘‘ಅನಾಪತ್ತಿ ಏಸಾ, ಭಿಕ್ಖು, ನೇಸಾ ಆಪತ್ತಿ। ಅನಾಪನ್ನೋಸಿ, ನಸಿ ಆಪನ್ನೋ। ಅನುಕ್ಖಿತ್ತೋಸಿ, ನಸಿ ಉಕ್ಖಿತ್ತೋ। ಅಧಮ್ಮಿಕೇನಾಸಿ ಕಮ್ಮೇನ ಉಕ್ಖಿತ್ತೋ ಕುಪ್ಪೇನ ಅಟ್ಠಾನಾರಹೇನ। ಗಚ್ಛ ತ್ವಂ, ಭಿಕ್ಖು, ತತ್ಥೇವ ವಾಸಭಗಾಮೇ ನಿವಾಸಂ ಕಪ್ಪೇಹೀ’’ತಿ। ‘‘ಏವಂ, ಭನ್ತೇ’’ತಿ ಖೋ ಕಸ್ಸಪಗೋತ್ತೋ ಭಿಕ್ಖು ಭಗವತೋ ಪಟಿಸ್ಸುಣಿತ್ವಾ ಉಟ್ಠಾಯಾಸನಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಯೇನ ವಾಸಭಗಾಮೋ ತೇನ ಪಕ್ಕಾಮಿ।
Atha kho kassapagottassa bhikkhuno etadahosi – ‘‘ahaṃ kho etaṃ na jānāmi ‘āpatti vā esā anāpatti vā, āpanno camhi 4 anāpanno vā, ukkhitto camhi anukkhitto vā, dhammikena vā adhammikena vā, kuppena vā akuppena vā, ṭhānārahena vā aṭṭhānārahena vā’. Yaṃnūnāhaṃ campaṃ gantvā bhagavantaṃ etamatthaṃ puccheyya’’nti. Atha kho kassapagotto bhikkhu senāsanaṃ saṃsāmetvā pattacīvaramādāya yena campā tena pakkāmi. Anupubbena yena campā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā kassapagottaṃ bhikkhuṃ etadavoca – ‘‘kacci, bhikkhu, khamanīyaṃ, kacci yāpanīyaṃ, kacci appakilamathena addhānaṃ āgato, kuto ca tvaṃ, bhikkhu, āgacchasī’’ti? ‘‘Khamanīyaṃ, bhagavā; yāpanīyaṃ, bhagavā; appakilamathena cāhaṃ, bhante, addhānaṃ āgato. Atthi, bhante, kāsīsu janapade vāsabhagāmo nāma. Tatthāhaṃ, bhagavā, āvāsiko tantibaddho ussukkaṃ āpanno – ‘kinti anāgatā ca pesalā bhikkhū āgaccheyyuṃ, āgatā ca pesalā bhikkhū phāsu vihareyyuṃ, ayañca āvāso vuddhiṃ viruḷhiṃ vepullaṃ āpajjeyyā’ti. Atha kho, bhante, sambahulā bhikkhū kāsīsu cārikaṃ caramānā yena vāsabhagāmo tadavasaruṃ. Addasaṃ kho ahaṃ, bhante, te bhikkhū dūratova āgacchante, disvāna āsanaṃ paññapesiṃ, pādodakaṃ pādapīṭhaṃ pādakathalikaṃ upanikkhipiṃ, paccuggantvā pattacīvaraṃ paṭiggahesiṃ, pānīyena apucchiṃ, nahāne ussukkaṃ akāsiṃ, ussukkampi akāsiṃ yāguyā khādanīye bhattasmiṃ . Atha kho tesaṃ, bhante, āgantukānaṃ bhikkhūnaṃ etadahosi – ‘bhaddako kho ayaṃ āvuso āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Handa, mayaṃ, āvuso, idheva vāsabhagāme nivāsaṃ kappemā’ti. Atha kho te, bhante, āgantukā bhikkhū tattheva vāsabhagāme nivāsaṃ kappesuṃ. Tassa mayhaṃ, bhante, etadahosi – ‘yo kho imesaṃ āgantukānaṃ bhikkhūnaṃ āgantukakilamatho so paṭippassaddho. Yepime gocare appakataññuno tedānime gocare pakataññuno. Dukkaraṃ kho pana parakulesu yāvajīvaṃ ussukkaṃ kātuṃ, viññatti ca manussānaṃ amanāpā. Yaṃnūnāhaṃ na ussukkaṃ kareyyaṃ yāguyā khādanīye bhattasmi’nti. So kho ahaṃ, bhante, na ussukkaṃ akāsiṃ yāguyā khādanīye bhattasmiṃ. Atha kho tesaṃ, bhante, āgantukānaṃ bhikkhūnaṃ etadahosi – ‘pubbe khvāyaṃ, āvuso, āvāsiko bhikkhu nahāne ussukkaṃ karoti, ussukkampi karoti yāguyā khādanīye bhattasmiṃ. Sodānāyaṃ na ussukkaṃ karoti yāguyā khādanīye bhattasmiṃ. Duṭṭhodānāyaṃ, āvuso, āvāsiko bhikkhu. Handa, mayaṃ, āvuso, āvāsikaṃ bhikkhuṃ ukkhipāmā’ti. Atha kho te, bhante, āgantukā bhikkhū sannipatitvā maṃ etadavocuṃ – ‘pubbe kho tvaṃ, āvuso, nahāne ussukkaṃ karosi, ussukkampi karosi yāguyā khādanīye bhattasmiṃ. Sodāni tvaṃ na ussukkaṃ karosi yāguyā khādanīye bhattasmiṃ. Āpattiṃ tvaṃ, āvuso, āpanno. Passasetaṃ āpatti’nti ? ‘Natthi me, āvuso, āpatti yamahaṃ passeyya’nti. Atha kho te, bhante, āgantukā bhikkhū maṃ āpattiyā adassane ukkhipiṃsu. Tassa mayhaṃ, bhante, etadahosi – ‘ahaṃ kho etaṃ na jānāmi ‘āpatti vā esā anāpatti vā, āpanno camhi anāpanno vā, ukkhitto camhi anukkhitto vā, dhammikena vā adhammikena vā, kuppena vā akuppena vā, ṭhānārahena vā aṭṭhānārahena vā’. Yaṃnūnāhaṃ campaṃ gantvā bhagavantaṃ etamatthaṃ puccheyya’nti. Tato ahaṃ, bhagavā, āgacchāmī’’ti. ‘‘Anāpatti esā, bhikkhu, nesā āpatti. Anāpannosi, nasi āpanno. Anukkhittosi, nasi ukkhitto. Adhammikenāsi kammena ukkhitto kuppena aṭṭhānārahena. Gaccha tvaṃ, bhikkhu, tattheva vāsabhagāme nivāsaṃ kappehī’’ti. ‘‘Evaṃ, bhante’’ti kho kassapagotto bhikkhu bhagavato paṭissuṇitvā uṭṭhāyāsanā bhagavantaṃ abhivādetvā padakkhiṇaṃ katvā yena vāsabhagāmo tena pakkāmi.
೩೮೧. ಅಥ ಖೋ ತೇಸಂ ಆಗನ್ತುಕಾನಂ ಭಿಕ್ಖೂನಂ ಅಹುದೇವ ಕುಕ್ಕುಚ್ಚಂ, ಅಹು ವಿಪ್ಪಟಿಸಾರೋ – ‘‘ಅಲಾಭಾ ವತ ನೋ, ನ ವತ ನೋ ಲಾಭಾ, ದುಲ್ಲದ್ಧಂ ವತ ನೋ, ನ ವತ ನೋ ಸುಲದ್ಧಂ, ಯೇ ಮಯಂ ಸುದ್ಧಂ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿಮ್ಹಾ। ಹನ್ದ, ಮಯಂ, ಆವುಸೋ, ಚಮ್ಪಂ ಗನ್ತ್ವಾ ಭಗವತೋ ಸನ್ತಿಕೇ ಅಚ್ಚಯಂ ಅಚ್ಚಯತೋ ದೇಸೇಮಾ’’ತಿ। ಅಥ ಖೋ ತೇ ಆಗನ್ತುಕಾ ಭಿಕ್ಖೂ ಸೇನಾಸನಂ ಸಂಸಾಮೇತ್ವಾ ಪತ್ತಚೀವರಮಾದಾಯ ಯೇನ ಚಮ್ಪಾ ತೇನ ಪಕ್ಕಮಿಂಸು। ಅನುಪುಬ್ಬೇನ ಯೇನ ಚಮ್ಪಾ ಯೇನ ಭಗವಾ ತೇನುಪಸಙ್ಕಮಿಂಸು, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು। ಆಚಿಣ್ಣಂ ಖೋ ಪನೇತಂ ಬುದ್ಧಾನಂ ಭಗವನ್ತಾನಂ ಆಗನ್ತುಕೇಹಿ ಭಿಕ್ಖೂಹಿ ಸದ್ಧಿಂ ಪಟಿಸಮ್ಮೋದಿತುಂ। ಅಥ ಖೋ ಭಗವಾ ತೇ ಭಿಕ್ಖೂ ಏತದವೋಚ – ‘‘ಕಚ್ಚಿ, ಭಿಕ್ಖವೇ, ಖಮನೀಯಂ, ಕಚ್ಚಿ ಯಾಪನೀಯಂ, ಕಚ್ಚಿತ್ಥ ಅಪ್ಪಕಿಲಮಥೇನ ಅದ್ಧಾನಂ ಆಗತಾ, ಕುತೋ ಚ ತುಮ್ಹೇ, ಭಿಕ್ಖವೇ, ಆಗಚ್ಛಥಾ’’ತಿ ? ‘‘ಖಮನೀಯಂ, ಭಗವಾ; ಯಾಪನೀಯಂ, ಭಗವಾ; ಅಪ್ಪಕಿಲಮಥೇನ ಚ ಮಯಂ, ಭನ್ತೇ, ಅದ್ಧಾನಂ ಆಗತಾ। ಅತ್ಥಿ, ಭನ್ತೇ, ಕಾಸೀಸು ಜನಪದೇ ವಾಸಭಗಾಮೋ ನಾಮ। ತತೋ ಮಯಂ, ಭಗವಾ, ಆಗಚ್ಛಾಮಾ’’ತಿ। ‘‘ತುಮ್ಹೇ, ಭಿಕ್ಖವೇ, ಆವಾಸಿಕಂ ಭಿಕ್ಖುಂ ಉಕ್ಖಿಪಿತ್ಥಾ’’ತಿ? ‘‘ಏವಂ, ಭನ್ತೇ’’ತಿ। ‘‘ಕಿಸ್ಮಿಂ, ಭಿಕ್ಖವೇ, ವತ್ಥುಸ್ಮಿಂ ಕಾರಣೇ’’ತಿ? ‘‘ಅವತ್ಥುಸ್ಮಿಂ, ಭಗವಾ, ಅಕಾರಣೇ’’ತಿ। ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸಾ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ। ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಸುದ್ಧಂ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿಸ್ಸಥ। ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰…’’ ವಿಗರಹಿತ್ವಾ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಸುದ್ಧೋ ಭಿಕ್ಖು ಅನಾಪತ್ತಿಕೋ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿತಬ್ಬೋ। ಯೋ ಉಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
381. Atha kho tesaṃ āgantukānaṃ bhikkhūnaṃ ahudeva kukkuccaṃ, ahu vippaṭisāro – ‘‘alābhā vata no, na vata no lābhā, dulladdhaṃ vata no, na vata no suladdhaṃ, ye mayaṃ suddhaṃ bhikkhuṃ anāpattikaṃ avatthusmiṃ akāraṇe ukkhipimhā. Handa, mayaṃ, āvuso, campaṃ gantvā bhagavato santike accayaṃ accayato desemā’’ti. Atha kho te āgantukā bhikkhū senāsanaṃ saṃsāmetvā pattacīvaramādāya yena campā tena pakkamiṃsu. Anupubbena yena campā yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā te bhikkhū etadavoca – ‘‘kacci, bhikkhave, khamanīyaṃ, kacci yāpanīyaṃ, kaccittha appakilamathena addhānaṃ āgatā, kuto ca tumhe, bhikkhave, āgacchathā’’ti ? ‘‘Khamanīyaṃ, bhagavā; yāpanīyaṃ, bhagavā; appakilamathena ca mayaṃ, bhante, addhānaṃ āgatā. Atthi, bhante, kāsīsu janapade vāsabhagāmo nāma. Tato mayaṃ, bhagavā, āgacchāmā’’ti. ‘‘Tumhe, bhikkhave, āvāsikaṃ bhikkhuṃ ukkhipitthā’’ti? ‘‘Evaṃ, bhante’’ti. ‘‘Kismiṃ, bhikkhave, vatthusmiṃ kāraṇe’’ti? ‘‘Avatthusmiṃ, bhagavā, akāraṇe’’ti. Vigarahi buddho bhagavā – ‘‘ananucchavikaṃ, moghapurisā, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tumhe, moghapurisā, suddhaṃ bhikkhuṃ anāpattikaṃ avatthusmiṃ akāraṇe ukkhipissatha. Netaṃ, moghapurisā, appasannānaṃ vā pasādāya…pe…’’ vigarahitvā dhammiṃ kathaṃ katvā bhikkhū āmantesi – ‘‘na, bhikkhave, suddho bhikkhu anāpattiko avatthusmiṃ akāraṇe ukkhipitabbo. Yo ukkhipeyya, āpatti dukkaṭassā’’ti.
ಅಥ ಖೋ ತೇ ಭಿಕ್ಖೂ ಉಟ್ಠಾಯಾಸನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಭಗವತೋ ಪಾದೇಸು ಸಿರಸಾ ನಿಪತಿತ್ವಾ ಭಗವನ್ತಂ ಏತದವೋಚುಂ – ‘‘ಅಚ್ಚಯೋ ನೋ, ಭನ್ತೇ, ಅಚ್ಚಗಮಾ ಯಥಾಬಾಲೇ ಯಥಾಮೂಳ್ಹೇ ಯಥಾಅಕುಸಲೇ, ಯೇ ಮಯಂ ಸುದ್ಧಂ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿಮ್ಹಾ। ತೇಸಂ ನೋ, ಭನ್ತೇ, ಭಗವಾ ಅಚ್ಚಯಂ ಅಚ್ಚಯತೋ ಪಟಿಗ್ಗಣ್ಹಾತು ಆಯತಿಂ ಸಂವರಾಯಾ’’ತಿ। ‘‘ತಗ್ಘ, ತುಮ್ಹೇ, ಭಿಕ್ಖವೇ, ಅಚ್ಚಯೋ ಅಚ್ಚಗಮಾ ಯಥಾಬಾಲೇ ಯಥಾಮೂಳ್ಹೇ ಯಥಾಅಕುಸಲೇ, ಯೇ ತುಮ್ಹೇ ಸುದ್ಧಂ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿತ್ಥ। ಯತೋ ಚ ಖೋ ತುಮ್ಹೇ, ಭಿಕ್ಖವೇ, ಅಚ್ಚಯಂ ಅಚ್ಚಯತೋ ದಿಸ್ವಾ ಯಥಾಧಮ್ಮಂ ಪಟಿಕರೋಥ, ತಂ ವೋ ಮಯಂ ಪಟಿಗ್ಗಣ್ಹಾಮ। ವುದ್ಧಿಹೇಸಾ , ಭಿಕ್ಖವೇ, ಅರಿಯಸ್ಸ ವಿನಯೇ ಯೋ ಅಚ್ಚಯಂ ಅಚ್ಚಯತೋ ದಿಸ್ವಾ ಯಥಾಧಮ್ಮಂ ಪಟಿಕರೋತಿ, ಆಯತಿಂ 5 ಸಂವರಂ ಆಪಜ್ಜತೀ’’ತಿ।
Atha kho te bhikkhū uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavantaṃ etadavocuṃ – ‘‘accayo no, bhante, accagamā yathābāle yathāmūḷhe yathāakusale, ye mayaṃ suddhaṃ bhikkhuṃ anāpattikaṃ avatthusmiṃ akāraṇe ukkhipimhā. Tesaṃ no, bhante, bhagavā accayaṃ accayato paṭiggaṇhātu āyatiṃ saṃvarāyā’’ti. ‘‘Taggha, tumhe, bhikkhave, accayo accagamā yathābāle yathāmūḷhe yathāakusale, ye tumhe suddhaṃ bhikkhuṃ anāpattikaṃ avatthusmiṃ akāraṇe ukkhipittha. Yato ca kho tumhe, bhikkhave, accayaṃ accayato disvā yathādhammaṃ paṭikarotha, taṃ vo mayaṃ paṭiggaṇhāma. Vuddhihesā , bhikkhave, ariyassa vinaye yo accayaṃ accayato disvā yathādhammaṃ paṭikaroti, āyatiṃ 6 saṃvaraṃ āpajjatī’’ti.
ಕಸ್ಸಪಗೋತ್ತಭಿಕ್ಖುವತ್ಥು ನಿಟ್ಠಿತಂ।
Kassapagottabhikkhuvatthu niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಕಸ್ಸಪಗೋತ್ತಭಿಕ್ಖುವತ್ಥುಕಥಾ • Kassapagottabhikkhuvatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಕಸ್ಸಪಗೋತ್ತಭಿಕ್ಖುವತ್ಥುಕಥಾವಣ್ಣನಾ • Kassapagottabhikkhuvatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಕಸ್ಸಪಗೋತ್ತಭಿಕ್ಖುವತ್ಥುಕಥಾದಿವಣ್ಣನಾ • Kassapagottabhikkhuvatthukathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨೩೪. ಕಸ್ಸಪಗೋತ್ತಭಿಕ್ಖುವತ್ಥುಕಥಾ • 234. Kassapagottabhikkhuvatthukathā
