| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
9. சம்பெய்யக்க²ந்த⁴கங்
9. Campeyyakkhandhakaṃ
கஸ்ஸபகொ³த்தபி⁴க்கு²வத்து²கதா²
Kassapagottabhikkhuvatthukathā
380. சம்பெய்யக்க²ந்த⁴கே – க³க்³க³ராய பொக்க²ரணியா தீரேதி க³க்³க³ரானாமிகாய இத்தி²யா காரிதபொக்க²ரணியா தீரே. தந்திப³த்³தோ⁴தி தஸ்மிங் ஆவாஸே கத்தப்³ப³தாதந்திபடிப³த்³தோ⁴. உஸ்ஸுக்கம்பி அகாஸி யாகு³யாதிஆதீ³ஸு மனுஸ்ஸேஹி ஆக³ந்துகேஸு ஆக³தேஸு ஆசிக்கெ²ய்யாதா²தி வுத்தட்டா²னேயேவ உஸ்ஸுக்கங் காதுங் வட்டதி; ந அவுத்தட்டா²னே. க³ச்ச² த்வங் பி⁴க்கூ²தி ஸத்தா² தஸ்ஸ பி⁴க்கு²னோ தத்தே²வ ஸேனாஸனங் ஸப்பாயந்தி அத்³த³ஸ, தேனேவமாஹ.
380. Campeyyakkhandhake – gaggarāya pokkharaṇiyā tīreti gaggarānāmikāya itthiyā kāritapokkharaṇiyā tīre. Tantibaddhoti tasmiṃ āvāse kattabbatātantipaṭibaddho. Ussukkampi akāsi yāguyātiādīsu manussehi āgantukesu āgatesu ācikkheyyāthāti vuttaṭṭhāneyeva ussukkaṃ kātuṃ vaṭṭati; na avuttaṭṭhāne. Gaccha tvaṃ bhikkhūti satthā tassa bhikkhuno tattheva senāsanaṃ sappāyanti addasa, tenevamāha.
382. அத⁴ம்மேன வக்³க³கம்மங் கரொந்தீதிஆதீ³னங் பரதோ பாளியங்யேவ நானாகரணங் ஆக³மிஸ்ஸதி.
382.Adhammena vaggakammaṃ karontītiādīnaṃ parato pāḷiyaṃyeva nānākaraṇaṃ āgamissati.
385. அஞ்ஞத்ராபி த⁴ம்மா கம்மங் கரொந்தீதி அஞ்ஞத்ராபி த⁴ம்மங் கம்மங் கரொந்தி, அயமேவ வா பாடோ². பூ⁴தேன வத்து²னா கதங் த⁴ம்மேன கதங் நாம ஹோதி, ததா² ந கரொந்தீதி அத்தோ². அஞ்ஞத்ராபி வினயா கம்மங், அஞ்ஞத்ராபி ஸத்து²ஸாஸனா கம்மந்தி ஏதேஸுபி ஏஸேவ நயோ. எத்த² பன வினயோதி சோத³னா ச ஸாரணா ச. ஸத்து²ஸாஸனந்தி ஞத்திஸம்பதா³ அனுஸ்ஸாவனஸம்பதா³ ச; தாஹி வினா கம்மங் கரொந்தீதி அத்தோ². படிகுட்ட²கதந்தி படிகுட்ட²ஞ்சேவ கதஞ்ச; யங் அஞ்ஞேஸு படிக்கோஸந்தேஸு கதங் தங் படிகுட்ட²ஞ்சேவ ஹோதி கதஞ்ச; தாதி³ஸம்பி கம்மங் கரொந்தீதி அத்தோ².
385.Aññatrāpi dhammā kammaṃ karontīti aññatrāpi dhammaṃ kammaṃ karonti, ayameva vā pāṭho. Bhūtena vatthunā kataṃ dhammena kataṃ nāma hoti, tathā na karontīti attho. Aññatrāpi vinayā kammaṃ, aññatrāpi satthusāsanā kammanti etesupi eseva nayo. Ettha pana vinayoti codanā ca sāraṇā ca. Satthusāsananti ñattisampadā anussāvanasampadā ca; tāhi vinā kammaṃ karontīti attho. Paṭikuṭṭhakatanti paṭikuṭṭhañceva katañca; yaṃ aññesu paṭikkosantesu kataṃ taṃ paṭikuṭṭhañceva hoti katañca; tādisampi kammaṃ karontīti attho.
387. ச²யிமானி பி⁴க்க²வே கம்மானி அத⁴ம்மகம்மந்திஆதீ³ஸு பன ‘‘த⁴ம்மோ’’தி பாளியா அதி⁴வசனங். தஸ்மா யங் யதா²வுத்தாய பாளியா ந கரியதி, தங் அத⁴ம்மகம்மந்தி வேதி³தப்³ப³ங். அயமெத்த² ஸங்கே²போ, வித்தா²ரோ பன பாளியங்யேவ ஆக³தோ. ஸோ ச கோ² ஞத்திது³தியஞத்திசதுத்த²கம்மானங்யேவ வஸேன. யஸ்மா பன ஞத்திகம்மே ஞத்திது³தியஞத்திசதுத்தே²ஸு விய ஹாபனங் வா அஞ்ஞதா² கரணங் வா நத்தி², அபலோகனகம்மஞ்ச ஸாவெத்வாவ கரியதி, தஸ்மா தானி பாளியங் ந த³ஸ்ஸிதானி, தேஸங் ஸப்³பே³ஸம்பி கம்மானங் வினிச்ச²யங் பரதோ வண்ணயிஸ்ஸாம.
387.Chayimāni bhikkhave kammāni adhammakammantiādīsu pana ‘‘dhammo’’ti pāḷiyā adhivacanaṃ. Tasmā yaṃ yathāvuttāya pāḷiyā na kariyati, taṃ adhammakammanti veditabbaṃ. Ayamettha saṅkhepo, vitthāro pana pāḷiyaṃyeva āgato. So ca kho ñattidutiyañatticatutthakammānaṃyeva vasena. Yasmā pana ñattikamme ñattidutiyañatticatutthesu viya hāpanaṃ vā aññathā karaṇaṃ vā natthi, apalokanakammañca sāvetvāva kariyati, tasmā tāni pāḷiyaṃ na dassitāni, tesaṃ sabbesampi kammānaṃ vinicchayaṃ parato vaṇṇayissāma.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
234. கஸ்ஸபகொ³த்தபி⁴க்கு²வத்து² • 234. Kassapagottabhikkhuvatthu
235. அத⁴ம்மேன வக்³கா³தி³கம்மகதா² • 235. Adhammena vaggādikammakathā
236. ஞத்திவிபன்னகம்மாதி³கதா² • 236. Ñattivipannakammādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
கஸ்ஸபகொ³த்தபி⁴க்கு²வத்து²கதா²வண்ணனா • Kassapagottabhikkhuvatthukathāvaṇṇanā
ஞத்திவிபன்னகம்மாதி³கதா²வண்ணனா • Ñattivipannakammādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கஸ்ஸபகொ³த்தபி⁴க்கு²வத்து²கதா²தி³வண்ணனா • Kassapagottabhikkhuvatthukathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
234. கஸ்ஸபகொ³த்தபி⁴க்கு²வத்து²கதா² • 234. Kassapagottabhikkhuvatthukathā
236. ஞத்திவிபன்னகம்மாதி³கதா² • 236. Ñattivipannakammādikathā
