| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
৯. চম্পেয্যক্খন্ধকং
9. Campeyyakkhandhakaṃ
কস্সপগোত্তভিক্খুৰত্থুকথা
Kassapagottabhikkhuvatthukathā
৩৮০. চম্পেয্যক্খন্ধকে – গগ্গরায পোক্খরণিযা তীরেতি গগ্গরানামিকায ইত্থিযা কারিতপোক্খরণিযা তীরে। তন্তিবদ্ধোতি তস্মিং আৰাসে কত্তব্বতাতন্তিপটিবদ্ধো। উস্সুক্কম্পি অকাসি যাগুযাতিআদীসু মনুস্সেহি আগন্তুকেসু আগতেসু আচিক্খেয্যাথাতি ৰুত্তট্ঠানেযেৰ উস্সুক্কং কাতুং ৰট্টতি; ন অৰুত্তট্ঠানে। গচ্ছ ত্ৰং ভিক্খূতি সত্থা তস্স ভিক্খুনো তত্থেৰ সেনাসনং সপ্পাযন্তি অদ্দস, তেনেৰমাহ।
380. Campeyyakkhandhake – gaggarāya pokkharaṇiyā tīreti gaggarānāmikāya itthiyā kāritapokkharaṇiyā tīre. Tantibaddhoti tasmiṃ āvāse kattabbatātantipaṭibaddho. Ussukkampi akāsi yāguyātiādīsu manussehi āgantukesu āgatesu ācikkheyyāthāti vuttaṭṭhāneyeva ussukkaṃ kātuṃ vaṭṭati; na avuttaṭṭhāne. Gaccha tvaṃ bhikkhūti satthā tassa bhikkhuno tattheva senāsanaṃ sappāyanti addasa, tenevamāha.
৩৮২. অধম্মেন ৰগ্গকম্মং করোন্তীতিআদীনং পরতো পাল়িযংযেৰ নানাকরণং আগমিস্সতি।
382.Adhammena vaggakammaṃ karontītiādīnaṃ parato pāḷiyaṃyeva nānākaraṇaṃ āgamissati.
৩৮৫. অঞ্ঞত্রাপি ধম্মা কম্মং করোন্তীতি অঞ্ঞত্রাপি ধম্মং কম্মং করোন্তি, অযমেৰ ৰা পাঠো। ভূতেন ৰত্থুনা কতং ধম্মেন কতং নাম হোতি, তথা ন করোন্তীতি অত্থো। অঞ্ঞত্রাপি ৰিনযা কম্মং, অঞ্ঞত্রাপি সত্থুসাসনা কম্মন্তি এতেসুপি এসেৰ নযো। এত্থ পন ৰিনযোতি চোদনা চ সারণা চ। সত্থুসাসনন্তি ঞত্তিসম্পদা অনুস্সাৰনসম্পদা চ; তাহি ৰিনা কম্মং করোন্তীতি অত্থো। পটিকুট্ঠকতন্তি পটিকুট্ঠঞ্চেৰ কতঞ্চ; যং অঞ্ঞেসু পটিক্কোসন্তেসু কতং তং পটিকুট্ঠঞ্চেৰ হোতি কতঞ্চ; তাদিসম্পি কম্মং করোন্তীতি অত্থো।
385.Aññatrāpi dhammā kammaṃ karontīti aññatrāpi dhammaṃ kammaṃ karonti, ayameva vā pāṭho. Bhūtena vatthunā kataṃ dhammena kataṃ nāma hoti, tathā na karontīti attho. Aññatrāpi vinayā kammaṃ, aññatrāpi satthusāsanā kammanti etesupi eseva nayo. Ettha pana vinayoti codanā ca sāraṇā ca. Satthusāsananti ñattisampadā anussāvanasampadā ca; tāhi vinā kammaṃ karontīti attho. Paṭikuṭṭhakatanti paṭikuṭṭhañceva katañca; yaṃ aññesu paṭikkosantesu kataṃ taṃ paṭikuṭṭhañceva hoti katañca; tādisampi kammaṃ karontīti attho.
৩৮৭. ছযিমানি ভিক্খৰে কম্মানি অধম্মকম্মন্তিআদীসু পন ‘‘ধম্মো’’তি পাল়িযা অধিৰচনং। তস্মা যং যথাৰুত্তায পাল়িযা ন করিযতি, তং অধম্মকম্মন্তি ৰেদিতব্বং। অযমেত্থ সঙ্খেপো, ৰিত্থারো পন পাল়িযংযেৰ আগতো। সো চ খো ঞত্তিদুতিযঞত্তিচতুত্থকম্মানংযেৰ ৰসেন। যস্মা পন ঞত্তিকম্মে ঞত্তিদুতিযঞত্তিচতুত্থেসু ৰিয হাপনং ৰা অঞ্ঞথা করণং ৰা নত্থি, অপলোকনকম্মঞ্চ সাৰেত্ৰাৰ করিযতি, তস্মা তানি পাল়িযং ন দস্সিতানি, তেসং সব্বেসম্পি কম্মানং ৰিনিচ্ছযং পরতো ৰণ্ণযিস্সাম।
387.Chayimāni bhikkhave kammāni adhammakammantiādīsu pana ‘‘dhammo’’ti pāḷiyā adhivacanaṃ. Tasmā yaṃ yathāvuttāya pāḷiyā na kariyati, taṃ adhammakammanti veditabbaṃ. Ayamettha saṅkhepo, vitthāro pana pāḷiyaṃyeva āgato. So ca kho ñattidutiyañatticatutthakammānaṃyeva vasena. Yasmā pana ñattikamme ñattidutiyañatticatutthesu viya hāpanaṃ vā aññathā karaṇaṃ vā natthi, apalokanakammañca sāvetvāva kariyati, tasmā tāni pāḷiyaṃ na dassitāni, tesaṃ sabbesampi kammānaṃ vinicchayaṃ parato vaṇṇayissāma.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
২৩৪. কস্সপগোত্তভিক্খুৰত্থু • 234. Kassapagottabhikkhuvatthu
২৩৫. অধম্মেন ৰগ্গাদিকম্মকথা • 235. Adhammena vaggādikammakathā
২৩৬. ঞত্তিৰিপন্নকম্মাদিকথা • 236. Ñattivipannakammādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
কস্সপগোত্তভিক্খুৰত্থুকথাৰণ্ণনা • Kassapagottabhikkhuvatthukathāvaṇṇanā
ঞত্তিৰিপন্নকম্মাদিকথাৰণ্ণনা • Ñattivipannakammādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কস্সপগোত্তভিক্খুৰত্থুকথাদিৰণ্ণনা • Kassapagottabhikkhuvatthukathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
২৩৪. কস্সপগোত্তভিক্খুৰত্থুকথা • 234. Kassapagottabhikkhuvatthukathā
২৩৬. ঞত্তিৰিপন্নকম্মাদিকথা • 236. Ñattivipannakammādikathā
