| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
೯. ಚಮ್ಪೇಯ್ಯಕ್ಖನ್ಧಕಂ
9. Campeyyakkhandhakaṃ
ಕಸ್ಸಪಗೋತ್ತಭಿಕ್ಖುವತ್ಥುಕಥಾ
Kassapagottabhikkhuvatthukathā
೩೮೦. ಚಮ್ಪೇಯ್ಯಕ್ಖನ್ಧಕೇ – ಗಗ್ಗರಾಯ ಪೋಕ್ಖರಣಿಯಾ ತೀರೇತಿ ಗಗ್ಗರಾನಾಮಿಕಾಯ ಇತ್ಥಿಯಾ ಕಾರಿತಪೋಕ್ಖರಣಿಯಾ ತೀರೇ। ತನ್ತಿಬದ್ಧೋತಿ ತಸ್ಮಿಂ ಆವಾಸೇ ಕತ್ತಬ್ಬತಾತನ್ತಿಪಟಿಬದ್ಧೋ। ಉಸ್ಸುಕ್ಕಮ್ಪಿ ಅಕಾಸಿ ಯಾಗುಯಾತಿಆದೀಸು ಮನುಸ್ಸೇಹಿ ಆಗನ್ತುಕೇಸು ಆಗತೇಸು ಆಚಿಕ್ಖೇಯ್ಯಾಥಾತಿ ವುತ್ತಟ್ಠಾನೇಯೇವ ಉಸ್ಸುಕ್ಕಂ ಕಾತುಂ ವಟ್ಟತಿ; ನ ಅವುತ್ತಟ್ಠಾನೇ। ಗಚ್ಛ ತ್ವಂ ಭಿಕ್ಖೂತಿ ಸತ್ಥಾ ತಸ್ಸ ಭಿಕ್ಖುನೋ ತತ್ಥೇವ ಸೇನಾಸನಂ ಸಪ್ಪಾಯನ್ತಿ ಅದ್ದಸ, ತೇನೇವಮಾಹ।
380. Campeyyakkhandhake – gaggarāya pokkharaṇiyā tīreti gaggarānāmikāya itthiyā kāritapokkharaṇiyā tīre. Tantibaddhoti tasmiṃ āvāse kattabbatātantipaṭibaddho. Ussukkampi akāsi yāguyātiādīsu manussehi āgantukesu āgatesu ācikkheyyāthāti vuttaṭṭhāneyeva ussukkaṃ kātuṃ vaṭṭati; na avuttaṭṭhāne. Gaccha tvaṃ bhikkhūti satthā tassa bhikkhuno tattheva senāsanaṃ sappāyanti addasa, tenevamāha.
೩೮೨. ಅಧಮ್ಮೇನ ವಗ್ಗಕಮ್ಮಂ ಕರೋನ್ತೀತಿಆದೀನಂ ಪರತೋ ಪಾಳಿಯಂಯೇವ ನಾನಾಕರಣಂ ಆಗಮಿಸ್ಸತಿ।
382.Adhammena vaggakammaṃ karontītiādīnaṃ parato pāḷiyaṃyeva nānākaraṇaṃ āgamissati.
೩೮೫. ಅಞ್ಞತ್ರಾಪಿ ಧಮ್ಮಾ ಕಮ್ಮಂ ಕರೋನ್ತೀತಿ ಅಞ್ಞತ್ರಾಪಿ ಧಮ್ಮಂ ಕಮ್ಮಂ ಕರೋನ್ತಿ, ಅಯಮೇವ ವಾ ಪಾಠೋ। ಭೂತೇನ ವತ್ಥುನಾ ಕತಂ ಧಮ್ಮೇನ ಕತಂ ನಾಮ ಹೋತಿ, ತಥಾ ನ ಕರೋನ್ತೀತಿ ಅತ್ಥೋ। ಅಞ್ಞತ್ರಾಪಿ ವಿನಯಾ ಕಮ್ಮಂ, ಅಞ್ಞತ್ರಾಪಿ ಸತ್ಥುಸಾಸನಾ ಕಮ್ಮನ್ತಿ ಏತೇಸುಪಿ ಏಸೇವ ನಯೋ। ಏತ್ಥ ಪನ ವಿನಯೋತಿ ಚೋದನಾ ಚ ಸಾರಣಾ ಚ। ಸತ್ಥುಸಾಸನನ್ತಿ ಞತ್ತಿಸಮ್ಪದಾ ಅನುಸ್ಸಾವನಸಮ್ಪದಾ ಚ; ತಾಹಿ ವಿನಾ ಕಮ್ಮಂ ಕರೋನ್ತೀತಿ ಅತ್ಥೋ। ಪಟಿಕುಟ್ಠಕತನ್ತಿ ಪಟಿಕುಟ್ಠಞ್ಚೇವ ಕತಞ್ಚ; ಯಂ ಅಞ್ಞೇಸು ಪಟಿಕ್ಕೋಸನ್ತೇಸು ಕತಂ ತಂ ಪಟಿಕುಟ್ಠಞ್ಚೇವ ಹೋತಿ ಕತಞ್ಚ; ತಾದಿಸಮ್ಪಿ ಕಮ್ಮಂ ಕರೋನ್ತೀತಿ ಅತ್ಥೋ।
385.Aññatrāpi dhammā kammaṃ karontīti aññatrāpi dhammaṃ kammaṃ karonti, ayameva vā pāṭho. Bhūtena vatthunā kataṃ dhammena kataṃ nāma hoti, tathā na karontīti attho. Aññatrāpi vinayā kammaṃ, aññatrāpi satthusāsanā kammanti etesupi eseva nayo. Ettha pana vinayoti codanā ca sāraṇā ca. Satthusāsananti ñattisampadā anussāvanasampadā ca; tāhi vinā kammaṃ karontīti attho. Paṭikuṭṭhakatanti paṭikuṭṭhañceva katañca; yaṃ aññesu paṭikkosantesu kataṃ taṃ paṭikuṭṭhañceva hoti katañca; tādisampi kammaṃ karontīti attho.
೩೮೭. ಛಯಿಮಾನಿ ಭಿಕ್ಖವೇ ಕಮ್ಮಾನಿ ಅಧಮ್ಮಕಮ್ಮನ್ತಿಆದೀಸು ಪನ ‘‘ಧಮ್ಮೋ’’ತಿ ಪಾಳಿಯಾ ಅಧಿವಚನಂ। ತಸ್ಮಾ ಯಂ ಯಥಾವುತ್ತಾಯ ಪಾಳಿಯಾ ನ ಕರಿಯತಿ, ತಂ ಅಧಮ್ಮಕಮ್ಮನ್ತಿ ವೇದಿತಬ್ಬಂ। ಅಯಮೇತ್ಥ ಸಙ್ಖೇಪೋ, ವಿತ್ಥಾರೋ ಪನ ಪಾಳಿಯಂಯೇವ ಆಗತೋ। ಸೋ ಚ ಖೋ ಞತ್ತಿದುತಿಯಞತ್ತಿಚತುತ್ಥಕಮ್ಮಾನಂಯೇವ ವಸೇನ। ಯಸ್ಮಾ ಪನ ಞತ್ತಿಕಮ್ಮೇ ಞತ್ತಿದುತಿಯಞತ್ತಿಚತುತ್ಥೇಸು ವಿಯ ಹಾಪನಂ ವಾ ಅಞ್ಞಥಾ ಕರಣಂ ವಾ ನತ್ಥಿ, ಅಪಲೋಕನಕಮ್ಮಞ್ಚ ಸಾವೇತ್ವಾವ ಕರಿಯತಿ, ತಸ್ಮಾ ತಾನಿ ಪಾಳಿಯಂ ನ ದಸ್ಸಿತಾನಿ, ತೇಸಂ ಸಬ್ಬೇಸಮ್ಪಿ ಕಮ್ಮಾನಂ ವಿನಿಚ್ಛಯಂ ಪರತೋ ವಣ್ಣಯಿಸ್ಸಾಮ।
387.Chayimāni bhikkhave kammāni adhammakammantiādīsu pana ‘‘dhammo’’ti pāḷiyā adhivacanaṃ. Tasmā yaṃ yathāvuttāya pāḷiyā na kariyati, taṃ adhammakammanti veditabbaṃ. Ayamettha saṅkhepo, vitthāro pana pāḷiyaṃyeva āgato. So ca kho ñattidutiyañatticatutthakammānaṃyeva vasena. Yasmā pana ñattikamme ñattidutiyañatticatutthesu viya hāpanaṃ vā aññathā karaṇaṃ vā natthi, apalokanakammañca sāvetvāva kariyati, tasmā tāni pāḷiyaṃ na dassitāni, tesaṃ sabbesampi kammānaṃ vinicchayaṃ parato vaṇṇayissāma.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೨೩೪. ಕಸ್ಸಪಗೋತ್ತಭಿಕ್ಖುವತ್ಥು • 234. Kassapagottabhikkhuvatthu
೨೩೫. ಅಧಮ್ಮೇನ ವಗ್ಗಾದಿಕಮ್ಮಕಥಾ • 235. Adhammena vaggādikammakathā
೨೩೬. ಞತ್ತಿವಿಪನ್ನಕಮ್ಮಾದಿಕಥಾ • 236. Ñattivipannakammādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā
ಕಸ್ಸಪಗೋತ್ತಭಿಕ್ಖುವತ್ಥುಕಥಾವಣ್ಣನಾ • Kassapagottabhikkhuvatthukathāvaṇṇanā
ಞತ್ತಿವಿಪನ್ನಕಮ್ಮಾದಿಕಥಾವಣ್ಣನಾ • Ñattivipannakammādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಕಸ್ಸಪಗೋತ್ತಭಿಕ್ಖುವತ್ಥುಕಥಾದಿವಣ್ಣನಾ • Kassapagottabhikkhuvatthukathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi
೨೩೪. ಕಸ್ಸಪಗೋತ್ತಭಿಕ್ಖುವತ್ಥುಕಥಾ • 234. Kassapagottabhikkhuvatthukathā
೨೩೬. ಞತ್ತಿವಿಪನ್ನಕಮ್ಮಾದಿಕಥಾ • 236. Ñattivipannakammādikathā
