| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. கஸ்ஸபகொ³த்தஸுத்தங்
3. Kassapagottasuttaṃ
223. ஏகங் ஸமயங் ஆயஸ்மா கஸ்ஸபகொ³த்தோ கோஸலேஸு விஹரதி அஞ்ஞதரஸ்மிங் வனஸண்டே³. தேன கோ² பன ஸமயேன ஆயஸ்மா கஸ்ஸபகொ³த்தோ தி³வாவிஹாரக³தோ அஞ்ஞதரங் சே²தங் ஓவத³தி. அத² கோ² யா தஸ்மிங் வனஸண்டே³ அதி⁴வத்தா² தே³வதா ஆயஸ்மந்தங் கஸ்ஸபகொ³த்தங் ஸங்வேஜேதுகாமா யேனாயஸ்மா கஸ்ஸபகொ³த்தோ தேனுபஸங்கமி; உபஸங்கமித்வா ஆயஸ்மந்தங் கஸ்ஸபகொ³த்தங் கா³தா²ஹி அஜ்ஜ²பா⁴ஸி –
223. Ekaṃ samayaṃ āyasmā kassapagotto kosalesu viharati aññatarasmiṃ vanasaṇḍe. Tena kho pana samayena āyasmā kassapagotto divāvihāragato aññataraṃ chetaṃ ovadati. Atha kho yā tasmiṃ vanasaṇḍe adhivatthā devatā āyasmantaṃ kassapagottaṃ saṃvejetukāmā yenāyasmā kassapagotto tenupasaṅkami; upasaṅkamitvā āyasmantaṃ kassapagottaṃ gāthāhi ajjhabhāsi –
‘‘கி³ரிது³க்³க³சரங் சே²தங், அப்பபஞ்ஞங் அசேதஸங்;
‘‘Giriduggacaraṃ chetaṃ, appapaññaṃ acetasaṃ;
அகாலே ஓவத³ங் பி⁴க்கு², மந்தோ³வ படிபா⁴தி மங்.
Akāle ovadaṃ bhikkhu, mandova paṭibhāti maṃ.
‘‘ஸுணாதி ந விஜானாதி, ஆலோகேதி ந பஸ்ஸதி;
‘‘Suṇāti na vijānāti, āloketi na passati;
த⁴ம்மஸ்மிங் ப⁴ஞ்ஞமானஸ்மிங், அத்த²ங் பா³லோ ந பு³ஜ்ஜ²தி.
Dhammasmiṃ bhaññamānasmiṃ, atthaṃ bālo na bujjhati.
‘‘ஸசேபி த³ஸ பஜ்ஜோதே, தா⁴ரயிஸ்ஸஸி கஸ்ஸப;
‘‘Sacepi dasa pajjote, dhārayissasi kassapa;
நேவ த³க்க²தி ரூபானி, சக்கு² ஹிஸ்ஸ ந விஜ்ஜதீ’’தி.
Neva dakkhati rūpāni, cakkhu hissa na vijjatī’’ti.
அத² கோ² ஆயஸ்மா கஸ்ஸபகொ³த்தோ தாய தே³வதாய ஸங்வேஜிதோ ஸங்வேக³மாபாதீ³தி.
Atha kho āyasmā kassapagotto tāya devatāya saṃvejito saṃvegamāpādīti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. கஸ்ஸபகொ³த்தஸுத்தவண்ணனா • 3. Kassapagottasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. கஸ்ஸபகொ³த்தஸுத்தவண்ணனா • 3. Kassapagottasuttavaṇṇanā
