| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. কস্সপগোত্তসুত্তং
3. Kassapagottasuttaṃ
২২৩. একং সমযং আযস্মা কস্সপগোত্তো কোসলেসু ৰিহরতি অঞ্ঞতরস্মিং ৰনসণ্ডে। তেন খো পন সমযেন আযস্মা কস্সপগোত্তো দিৰাৰিহারগতো অঞ্ঞতরং ছেতং ওৰদতি। অথ খো যা তস্মিং ৰনসণ্ডে অধিৰত্থা দেৰতা আযস্মন্তং কস্সপগোত্তং সংৰেজেতুকামা যেনাযস্মা কস্সপগোত্তো তেনুপসঙ্কমি; উপসঙ্কমিত্ৰা আযস্মন্তং কস্সপগোত্তং গাথাহি অজ্ঝভাসি –
223. Ekaṃ samayaṃ āyasmā kassapagotto kosalesu viharati aññatarasmiṃ vanasaṇḍe. Tena kho pana samayena āyasmā kassapagotto divāvihāragato aññataraṃ chetaṃ ovadati. Atha kho yā tasmiṃ vanasaṇḍe adhivatthā devatā āyasmantaṃ kassapagottaṃ saṃvejetukāmā yenāyasmā kassapagotto tenupasaṅkami; upasaṅkamitvā āyasmantaṃ kassapagottaṃ gāthāhi ajjhabhāsi –
‘‘গিরিদুগ্গচরং ছেতং, অপ্পপঞ্ঞং অচেতসং।
‘‘Giriduggacaraṃ chetaṃ, appapaññaṃ acetasaṃ;
অকালে ওৰদং ভিক্খু, মন্দোৰ পটিভাতি মং॥
Akāle ovadaṃ bhikkhu, mandova paṭibhāti maṃ.
‘‘সুণাতি ন ৰিজানাতি, আলোকেতি ন পস্সতি।
‘‘Suṇāti na vijānāti, āloketi na passati;
ধম্মস্মিং ভঞ্ঞমানস্মিং, অত্থং বালো ন বুজ্ঝতি॥
Dhammasmiṃ bhaññamānasmiṃ, atthaṃ bālo na bujjhati.
‘‘সচেপি দস পজ্জোতে, ধারযিস্সসি কস্সপ।
‘‘Sacepi dasa pajjote, dhārayissasi kassapa;
নেৰ দক্খতি রূপানি, চক্খু হিস্স ন ৰিজ্জতী’’তি॥
Neva dakkhati rūpāni, cakkhu hissa na vijjatī’’ti.
অথ খো আযস্মা কস্সপগোত্তো তায দেৰতায সংৰেজিতো সংৰেগমাপাদীতি।
Atha kho āyasmā kassapagotto tāya devatāya saṃvejito saṃvegamāpādīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. কস্সপগোত্তসুত্তৰণ্ণনা • 3. Kassapagottasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. কস্সপগোত্তসুত্তৰণ্ণনা • 3. Kassapagottasuttavaṇṇanā
