| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๓. กสฺสปโคตฺตสุตฺตํ
3. Kassapagottasuttaṃ
๒๒๓. เอกํ สมยํ อายสฺมา กสฺสปโคโตฺต โกสเลสุ วิหรติ อญฺญตรสฺมิํ วนสเณฺฑฯ เตน โข ปน สมเยน อายสฺมา กสฺสปโคโตฺต ทิวาวิหารคโต อญฺญตรํ เฉตํ โอวทติฯ อถ โข ยา ตสฺมิํ วนสเณฺฑ อธิวตฺถา เทวตา อายสฺมนฺตํ กสฺสปโคตฺตํ สํเวเชตุกามา เยนายสฺมา กสฺสปโคโตฺต เตนุปสงฺกมิ; อุปสงฺกมิตฺวา อายสฺมนฺตํ กสฺสปโคตฺตํ คาถาหิ อชฺฌภาสิ –
223. Ekaṃ samayaṃ āyasmā kassapagotto kosalesu viharati aññatarasmiṃ vanasaṇḍe. Tena kho pana samayena āyasmā kassapagotto divāvihāragato aññataraṃ chetaṃ ovadati. Atha kho yā tasmiṃ vanasaṇḍe adhivatthā devatā āyasmantaṃ kassapagottaṃ saṃvejetukāmā yenāyasmā kassapagotto tenupasaṅkami; upasaṅkamitvā āyasmantaṃ kassapagottaṃ gāthāhi ajjhabhāsi –
‘‘คิริทุคฺคจรํ เฉตํ, อปฺปปญฺญํ อเจตสํ;
‘‘Giriduggacaraṃ chetaṃ, appapaññaṃ acetasaṃ;
อกาเล โอวทํ ภิกฺขุ, มโนฺทว ปฎิภาติ มํฯ
Akāle ovadaṃ bhikkhu, mandova paṭibhāti maṃ.
‘‘สุณาติ น วิชานาติ, อาโลเกติ น ปสฺสติ;
‘‘Suṇāti na vijānāti, āloketi na passati;
ธมฺมสฺมิํ ภญฺญมานสฺมิํ, อตฺถํ พาโล น พุชฺฌติฯ
Dhammasmiṃ bhaññamānasmiṃ, atthaṃ bālo na bujjhati.
‘‘สเจปิ ทส ปโชฺชเต, ธารยิสฺสสิ กสฺสป;
‘‘Sacepi dasa pajjote, dhārayissasi kassapa;
เนว ทกฺขติ รูปานิ, จกฺขุ หิสฺส น วิชฺชตี’’ติฯ
Neva dakkhati rūpāni, cakkhu hissa na vijjatī’’ti.
อถ โข อายสฺมา กสฺสปโคโตฺต ตาย เทวตาย สํเวชิโต สํเวคมาปาทีติฯ
Atha kho āyasmā kassapagotto tāya devatāya saṃvejito saṃvegamāpādīti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๓. กสฺสปโคตฺตสุตฺตวณฺณนา • 3. Kassapagottasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๓. กสฺสปโคตฺตสุตฺตวณฺณนา • 3. Kassapagottasuttavaṇṇanā
