| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. කස්‌සපගොත්‌තසුත්‌තං
3. Kassapagottasuttaṃ
223. එකං සමයං ආයස්‌මා කස්‌සපගොත්‌තො කොසලෙසු විහරති අඤ්‌ඤතරස්‌මිං වනසණ්‌ඩෙ. තෙන ඛො පන සමයෙන ආයස්‌මා කස්‌සපගොත්‌තො දිවාවිහාරගතො අඤ්‌ඤතරං ඡෙතං ඔවදති. අථ ඛො යා තස්‌මිං වනසණ්‌ඩෙ අධිවත්‌ථා දෙවතා ආයස්‌මන්‌තං කස්‌සපගොත්‌තං සංවෙජෙතුකාමා යෙනායස්‌මා කස්‌සපගොත්‌තො තෙනුපසඞ්‌කමි; උපසඞ්‌කමිත්‌වා ආයස්‌මන්‌තං කස්‌සපගොත්‌තං ගාථාහි අජ්‌ඣභාසි –
223. Ekaṃ samayaṃ āyasmā kassapagotto kosalesu viharati aññatarasmiṃ vanasaṇḍe. Tena kho pana samayena āyasmā kassapagotto divāvihāragato aññataraṃ chetaṃ ovadati. Atha kho yā tasmiṃ vanasaṇḍe adhivatthā devatā āyasmantaṃ kassapagottaṃ saṃvejetukāmā yenāyasmā kassapagotto tenupasaṅkami; upasaṅkamitvā āyasmantaṃ kassapagottaṃ gāthāhi ajjhabhāsi –
‘‘ගිරිදුග්‌ගචරං ඡෙතං, අප්‌පපඤ්‌ඤං අචෙතසං;
‘‘Giriduggacaraṃ chetaṃ, appapaññaṃ acetasaṃ;
අකාලෙ ඔවදං භික්‌ඛු, මන්‌දොව පටිභාති මං.
Akāle ovadaṃ bhikkhu, mandova paṭibhāti maṃ.
‘‘සුණාති න විජානාති, ආලොකෙති න පස්‌සති;
‘‘Suṇāti na vijānāti, āloketi na passati;
ධම්‌මස්‌මිං භඤ්‌ඤමානස්‌මිං, අත්‌ථං බාලො න බුජ්‌ඣති.
Dhammasmiṃ bhaññamānasmiṃ, atthaṃ bālo na bujjhati.
‘‘සචෙපි දස පජ්‌ජොතෙ, ධාරයිස්‌සසි කස්‌සප;
‘‘Sacepi dasa pajjote, dhārayissasi kassapa;
නෙව දක්‌ඛති රූපානි, චක්‌ඛු හිස්‌ස න විජ්‌ජතී’’ති.
Neva dakkhati rūpāni, cakkhu hissa na vijjatī’’ti.
අථ ඛො ආයස්‌මා කස්‌සපගොත්‌තො තාය දෙවතාය සංවෙජිතො සංවෙගමාපාදීති.
Atha kho āyasmā kassapagotto tāya devatāya saṃvejito saṃvegamāpādīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. කස්‌සපගොත්‌තසුත්‌තවණ්‌ණනා • 3. Kassapagottasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. කස්‌සපගොත්‌තසුත්‌තවණ්‌ණනා • 3. Kassapagottasuttavaṇṇanā
