| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. கஸ்ஸபகொ³த்தஸுத்தவண்ணனா
3. Kassapagottasuttavaṇṇanā
223. ததியே சே²தந்தி ஏகங் மிக³லுத்³த³கங். ஓவத³தீதி ஸோ கிர மிக³லுத்³த³கோ பாதோவ பு⁴ஞ்ஜித்வா ‘‘மிகே³ வதி⁴ஸ்ஸாமீ’’தி அரஞ்ஞங் பவிட்டோ² ஏகங் ரோஹிதமிக³ங் தி³ஸ்வா ‘‘ஸத்தியா நங் பஹரிஸ்ஸாமீ’’தி அனுப³ந்த⁴மானோ தே²ரஸ்ஸ பட²மஸுத்தே வுத்தனயேனேவ தி³வாவிஹாரங் நிஸின்னஸ்ஸ அவிதூ³ரேன பக்கமதி. அத² நங் தே²ரோ – ‘‘உபாஸக, பாணாதிபாதோ நாமேஸ அபாயஸங்வத்தனிகோ அப்பாயுகஸங்வத்தனிகோ, ஸக்கா அஞ்ஞேனபி கஸிவணிஜ்ஜாதி³கம்மேன தா³ரப⁴ரணங் காதுங், மா ஏவரூபங் கக்க²ளகம்மங் கரோஹீ’’தி ஆஹ. ஸோபி ‘‘மஹாபங்ஸுகூலிகத்தே²ரோ கதே²தீ’’தி கா³ரவேன ட²த்வா ஸோதுங் ஆரத்³தோ⁴. அத²ஸ்ஸ ஸோதுகாமதங் ஜனெஸ்ஸாமீதி தே²ரோ அங்கு³ட்ட²கங் ஜாலாபேஸி. ஸோ அக்கீ²ஹிபி பஸ்ஸதி, கண்ணேஹிபி ஸுணாதி, சித்தங் பனஸ்ஸ ‘‘அஸுகட்டா²னங் மிகோ³ க³தோ ப⁴விஸ்ஸதி, அஸுகதித்த²ங் ஓதிண்ணோ, தத்த² நங் க³ந்த்வா கா⁴தெத்வா யாவதி³ச்ச²கங் மங்ஸங் கா²தி³த்வா ஸேஸங் காஜேனாதா³ய க³ந்த்வா புத்தகே தோஸெஸ்ஸாமீ’’தி ஏவங் மிக³ஸ்ஸேவ அனுபத³ங் தா⁴வதி. ஏவங் விக்கி²த்தசித்தஸ்ஸ த⁴ம்மங் தே³ஸெந்தங் தே²ரங் ஸந்தா⁴ய வுத்தங் ‘‘ஓவத³தீ’’தி. அஜ்ஜ²பா⁴ஸீதி ‘‘அயங் தே²ரோ அதா³ருங் தச்ச²ந்தோ விய அகெ²த்தே வப்பந்தோ விய அத்தனோபி கம்மங் நாஸேதி, ஏதஸ்ஸாபி சோதெ³ஸ்ஸாமி ந’’ந்தி அபா⁴ஸி.
223. Tatiye chetanti ekaṃ migaluddakaṃ. Ovadatīti so kira migaluddako pātova bhuñjitvā ‘‘mige vadhissāmī’’ti araññaṃ paviṭṭho ekaṃ rohitamigaṃ disvā ‘‘sattiyā naṃ paharissāmī’’ti anubandhamāno therassa paṭhamasutte vuttanayeneva divāvihāraṃ nisinnassa avidūrena pakkamati. Atha naṃ thero – ‘‘upāsaka, pāṇātipāto nāmesa apāyasaṃvattaniko appāyukasaṃvattaniko, sakkā aññenapi kasivaṇijjādikammena dārabharaṇaṃ kātuṃ, mā evarūpaṃ kakkhaḷakammaṃ karohī’’ti āha. Sopi ‘‘mahāpaṃsukūlikatthero kathetī’’ti gāravena ṭhatvā sotuṃ āraddho. Athassa sotukāmataṃ janessāmīti thero aṅguṭṭhakaṃ jālāpesi. So akkhīhipi passati, kaṇṇehipi suṇāti, cittaṃ panassa ‘‘asukaṭṭhānaṃ migo gato bhavissati, asukatitthaṃ otiṇṇo, tattha naṃ gantvā ghātetvā yāvadicchakaṃ maṃsaṃ khāditvā sesaṃ kājenādāya gantvā puttake tosessāmī’’ti evaṃ migasseva anupadaṃ dhāvati. Evaṃ vikkhittacittassa dhammaṃ desentaṃ theraṃ sandhāya vuttaṃ ‘‘ovadatī’’ti. Ajjhabhāsīti ‘‘ayaṃ thero adāruṃ tacchanto viya akhette vappanto viya attanopi kammaṃ nāseti, etassāpi codessāmi na’’nti abhāsi.
அப்பபஞ்ஞந்தி நிப்பஞ்ஞங். அசேதஸந்தி காரணஜானநஸமத்தே²ன சித்தேன ரஹிதங். மந்தோ³வாதி அந்த⁴பா³லோ விய. ஸுணாதீதி தவ த⁴ம்மகத²ங் ஸுணாதி. ந விஜானாதீதி அத்த²மஸ்ஸ ந ஜானாதி. ஆலோகேதீதி தவ புது²ஜ்ஜனிகஇத்³தி⁴யா ஜலந்தங் அங்கு³ட்ட²கங் ஆலோகேதி. ந பஸ்ஸதீதி எத்த² ‘‘நேவ தேலங் ந வட்டி ந தீ³பகபல்லிகா, தே²ரஸ்ஸ பன ஆனுபா⁴வேனாயங் ஜலதீ’’தி இமங் காரணங் ந பஸ்ஸதி. த³ஸ பஜ்ஜோதேதி த³ஸஸு அங்கு³லீஸு த³ஸ பதீ³பே. ரூபானீதி காரணரூபானி. சக்கூ²தி பஞ்ஞாசக்கு². ஸங்வேக³மாபாதீ³தி கிங் மே இமினாதி? வீரியங் பக்³க³ய்ஹ பரமவிவேகங் அரஹத்தமக்³க³ங் படிபஜ்ஜி. ததியங்.
Appapaññanti nippaññaṃ. Acetasanti kāraṇajānanasamatthena cittena rahitaṃ. Mandovāti andhabālo viya. Suṇātīti tava dhammakathaṃ suṇāti. Na vijānātīti atthamassa na jānāti. Āloketīti tava puthujjanikaiddhiyā jalantaṃ aṅguṭṭhakaṃ āloketi. Na passatīti ettha ‘‘neva telaṃ na vaṭṭi na dīpakapallikā, therassa pana ānubhāvenāyaṃ jalatī’’ti imaṃ kāraṇaṃ na passati. Dasa pajjoteti dasasu aṅgulīsu dasa padīpe. Rūpānīti kāraṇarūpāni. Cakkhūti paññācakkhu. Saṃvegamāpādīti kiṃ me imināti? Vīriyaṃ paggayha paramavivekaṃ arahattamaggaṃ paṭipajji. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கஸ்ஸபகொ³த்தஸுத்தங் • 3. Kassapagottasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. கஸ்ஸபகொ³த்தஸுத்தவண்ணனா • 3. Kassapagottasuttavaṇṇanā
