| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೩. ಕಸ್ಸಪಗೋತ್ತಸುತ್ತವಣ್ಣನಾ
3. Kassapagottasuttavaṇṇanā
೨೨೩. ತತಿಯೇ ಛೇತನ್ತಿ ಏಕಂ ಮಿಗಲುದ್ದಕಂ। ಓವದತೀತಿ ಸೋ ಕಿರ ಮಿಗಲುದ್ದಕೋ ಪಾತೋವ ಭುಞ್ಜಿತ್ವಾ ‘‘ಮಿಗೇ ವಧಿಸ್ಸಾಮೀ’’ತಿ ಅರಞ್ಞಂ ಪವಿಟ್ಠೋ ಏಕಂ ರೋಹಿತಮಿಗಂ ದಿಸ್ವಾ ‘‘ಸತ್ತಿಯಾ ನಂ ಪಹರಿಸ್ಸಾಮೀ’’ತಿ ಅನುಬನ್ಧಮಾನೋ ಥೇರಸ್ಸ ಪಠಮಸುತ್ತೇ ವುತ್ತನಯೇನೇವ ದಿವಾವಿಹಾರಂ ನಿಸಿನ್ನಸ್ಸ ಅವಿದೂರೇನ ಪಕ್ಕಮತಿ। ಅಥ ನಂ ಥೇರೋ – ‘‘ಉಪಾಸಕ, ಪಾಣಾತಿಪಾತೋ ನಾಮೇಸ ಅಪಾಯಸಂವತ್ತನಿಕೋ ಅಪ್ಪಾಯುಕಸಂವತ್ತನಿಕೋ, ಸಕ್ಕಾ ಅಞ್ಞೇನಪಿ ಕಸಿವಣಿಜ್ಜಾದಿಕಮ್ಮೇನ ದಾರಭರಣಂ ಕಾತುಂ, ಮಾ ಏವರೂಪಂ ಕಕ್ಖಳಕಮ್ಮಂ ಕರೋಹೀ’’ತಿ ಆಹ। ಸೋಪಿ ‘‘ಮಹಾಪಂಸುಕೂಲಿಕತ್ಥೇರೋ ಕಥೇತೀ’’ತಿ ಗಾರವೇನ ಠತ್ವಾ ಸೋತುಂ ಆರದ್ಧೋ। ಅಥಸ್ಸ ಸೋತುಕಾಮತಂ ಜನೇಸ್ಸಾಮೀತಿ ಥೇರೋ ಅಙ್ಗುಟ್ಠಕಂ ಜಾಲಾಪೇಸಿ। ಸೋ ಅಕ್ಖೀಹಿಪಿ ಪಸ್ಸತಿ, ಕಣ್ಣೇಹಿಪಿ ಸುಣಾತಿ, ಚಿತ್ತಂ ಪನಸ್ಸ ‘‘ಅಸುಕಟ್ಠಾನಂ ಮಿಗೋ ಗತೋ ಭವಿಸ್ಸತಿ, ಅಸುಕತಿತ್ಥಂ ಓತಿಣ್ಣೋ, ತತ್ಥ ನಂ ಗನ್ತ್ವಾ ಘಾತೇತ್ವಾ ಯಾವದಿಚ್ಛಕಂ ಮಂಸಂ ಖಾದಿತ್ವಾ ಸೇಸಂ ಕಾಜೇನಾದಾಯ ಗನ್ತ್ವಾ ಪುತ್ತಕೇ ತೋಸೇಸ್ಸಾಮೀ’’ತಿ ಏವಂ ಮಿಗಸ್ಸೇವ ಅನುಪದಂ ಧಾವತಿ। ಏವಂ ವಿಕ್ಖಿತ್ತಚಿತ್ತಸ್ಸ ಧಮ್ಮಂ ದೇಸೇನ್ತಂ ಥೇರಂ ಸನ್ಧಾಯ ವುತ್ತಂ ‘‘ಓವದತೀ’’ತಿ। ಅಜ್ಝಭಾಸೀತಿ ‘‘ಅಯಂ ಥೇರೋ ಅದಾರುಂ ತಚ್ಛನ್ತೋ ವಿಯ ಅಖೇತ್ತೇ ವಪ್ಪನ್ತೋ ವಿಯ ಅತ್ತನೋಪಿ ಕಮ್ಮಂ ನಾಸೇತಿ, ಏತಸ್ಸಾಪಿ ಚೋದೇಸ್ಸಾಮಿ ನ’’ನ್ತಿ ಅಭಾಸಿ।
223. Tatiye chetanti ekaṃ migaluddakaṃ. Ovadatīti so kira migaluddako pātova bhuñjitvā ‘‘mige vadhissāmī’’ti araññaṃ paviṭṭho ekaṃ rohitamigaṃ disvā ‘‘sattiyā naṃ paharissāmī’’ti anubandhamāno therassa paṭhamasutte vuttanayeneva divāvihāraṃ nisinnassa avidūrena pakkamati. Atha naṃ thero – ‘‘upāsaka, pāṇātipāto nāmesa apāyasaṃvattaniko appāyukasaṃvattaniko, sakkā aññenapi kasivaṇijjādikammena dārabharaṇaṃ kātuṃ, mā evarūpaṃ kakkhaḷakammaṃ karohī’’ti āha. Sopi ‘‘mahāpaṃsukūlikatthero kathetī’’ti gāravena ṭhatvā sotuṃ āraddho. Athassa sotukāmataṃ janessāmīti thero aṅguṭṭhakaṃ jālāpesi. So akkhīhipi passati, kaṇṇehipi suṇāti, cittaṃ panassa ‘‘asukaṭṭhānaṃ migo gato bhavissati, asukatitthaṃ otiṇṇo, tattha naṃ gantvā ghātetvā yāvadicchakaṃ maṃsaṃ khāditvā sesaṃ kājenādāya gantvā puttake tosessāmī’’ti evaṃ migasseva anupadaṃ dhāvati. Evaṃ vikkhittacittassa dhammaṃ desentaṃ theraṃ sandhāya vuttaṃ ‘‘ovadatī’’ti. Ajjhabhāsīti ‘‘ayaṃ thero adāruṃ tacchanto viya akhette vappanto viya attanopi kammaṃ nāseti, etassāpi codessāmi na’’nti abhāsi.
ಅಪ್ಪಪಞ್ಞನ್ತಿ ನಿಪ್ಪಞ್ಞಂ। ಅಚೇತಸನ್ತಿ ಕಾರಣಜಾನನಸಮತ್ಥೇನ ಚಿತ್ತೇನ ರಹಿತಂ। ಮನ್ದೋವಾತಿ ಅನ್ಧಬಾಲೋ ವಿಯ। ಸುಣಾತೀತಿ ತವ ಧಮ್ಮಕಥಂ ಸುಣಾತಿ। ನ ವಿಜಾನಾತೀತಿ ಅತ್ಥಮಸ್ಸ ನ ಜಾನಾತಿ। ಆಲೋಕೇತೀತಿ ತವ ಪುಥುಜ್ಜನಿಕಇದ್ಧಿಯಾ ಜಲನ್ತಂ ಅಙ್ಗುಟ್ಠಕಂ ಆಲೋಕೇತಿ। ನ ಪಸ್ಸತೀತಿ ಏತ್ಥ ‘‘ನೇವ ತೇಲಂ ನ ವಟ್ಟಿ ನ ದೀಪಕಪಲ್ಲಿಕಾ, ಥೇರಸ್ಸ ಪನ ಆನುಭಾವೇನಾಯಂ ಜಲತೀ’’ತಿ ಇಮಂ ಕಾರಣಂ ನ ಪಸ್ಸತಿ। ದಸ ಪಜ್ಜೋತೇತಿ ದಸಸು ಅಙ್ಗುಲೀಸು ದಸ ಪದೀಪೇ। ರೂಪಾನೀತಿ ಕಾರಣರೂಪಾನಿ। ಚಕ್ಖೂತಿ ಪಞ್ಞಾಚಕ್ಖು। ಸಂವೇಗಮಾಪಾದೀತಿ ಕಿಂ ಮೇ ಇಮಿನಾತಿ? ವೀರಿಯಂ ಪಗ್ಗಯ್ಹ ಪರಮವಿವೇಕಂ ಅರಹತ್ತಮಗ್ಗಂ ಪಟಿಪಜ್ಜಿ। ತತಿಯಂ।
Appapaññanti nippaññaṃ. Acetasanti kāraṇajānanasamatthena cittena rahitaṃ. Mandovāti andhabālo viya. Suṇātīti tava dhammakathaṃ suṇāti. Na vijānātīti atthamassa na jānāti. Āloketīti tava puthujjanikaiddhiyā jalantaṃ aṅguṭṭhakaṃ āloketi. Na passatīti ettha ‘‘neva telaṃ na vaṭṭi na dīpakapallikā, therassa pana ānubhāvenāyaṃ jalatī’’ti imaṃ kāraṇaṃ na passati. Dasa pajjoteti dasasu aṅgulīsu dasa padīpe. Rūpānīti kāraṇarūpāni. Cakkhūti paññācakkhu. Saṃvegamāpādīti kiṃ me imināti? Vīriyaṃ paggayha paramavivekaṃ arahattamaggaṃ paṭipajji. Tatiyaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ಕಸ್ಸಪಗೋತ್ತಸುತ್ತಂ • 3. Kassapagottasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೩. ಕಸ್ಸಪಗೋತ್ತಸುತ್ತವಣ್ಣನಾ • 3. Kassapagottasuttavaṇṇanā
