| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਕਸ੍ਸਪਗੋਤ੍ਤਸੁਤ੍ਤવਣ੍ਣਨਾ
3. Kassapagottasuttavaṇṇanā
੨੨੩. ਤਤਿਯੇ ਛੇਤਨ੍ਤਿ ਏਕਂ ਮਿਗਲੁਦ੍ਦਕਂ। ਓવਦਤੀਤਿ ਸੋ ਕਿਰ ਮਿਗਲੁਦ੍ਦਕੋ ਪਾਤੋવ ਭੁਞ੍ਜਿਤ੍વਾ ‘‘ਮਿਗੇ વਧਿਸ੍ਸਾਮੀ’’ਤਿ ਅਰਞ੍ਞਂ ਪવਿਟ੍ਠੋ ਏਕਂ ਰੋਹਿਤਮਿਗਂ ਦਿਸ੍વਾ ‘‘ਸਤ੍ਤਿਯਾ ਨਂ ਪਹਰਿਸ੍ਸਾਮੀ’’ਤਿ ਅਨੁਬਨ੍ਧਮਾਨੋ ਥੇਰਸ੍ਸ ਪਠਮਸੁਤ੍ਤੇ વੁਤ੍ਤਨਯੇਨੇવ ਦਿવਾવਿਹਾਰਂ ਨਿਸਿਨ੍ਨਸ੍ਸ ਅવਿਦੂਰੇਨ ਪਕ੍ਕਮਤਿ। ਅਥ ਨਂ ਥੇਰੋ – ‘‘ਉਪਾਸਕ, ਪਾਣਾਤਿਪਾਤੋ ਨਾਮੇਸ ਅਪਾਯਸਂવਤ੍ਤਨਿਕੋ ਅਪ੍ਪਾਯੁਕਸਂવਤ੍ਤਨਿਕੋ, ਸਕ੍ਕਾ ਅਞ੍ਞੇਨਪਿ ਕਸਿવਣਿਜ੍ਜਾਦਿਕਮ੍ਮੇਨ ਦਾਰਭਰਣਂ ਕਾਤੁਂ, ਮਾ ਏવਰੂਪਂ ਕਕ੍ਖਲ਼ਕਮ੍ਮਂ ਕਰੋਹੀ’’ਤਿ ਆਹ। ਸੋਪਿ ‘‘ਮਹਾਪਂਸੁਕੂਲਿਕਤ੍ਥੇਰੋ ਕਥੇਤੀ’’ਤਿ ਗਾਰવੇਨ ਠਤ੍વਾ ਸੋਤੁਂ ਆਰਦ੍ਧੋ। ਅਥਸ੍ਸ ਸੋਤੁਕਾਮਤਂ ਜਨੇਸ੍ਸਾਮੀਤਿ ਥੇਰੋ ਅਙ੍ਗੁਟ੍ਠਕਂ ਜਾਲਾਪੇਸਿ। ਸੋ ਅਕ੍ਖੀਹਿਪਿ ਪਸ੍ਸਤਿ, ਕਣ੍ਣੇਹਿਪਿ ਸੁਣਾਤਿ, ਚਿਤ੍ਤਂ ਪਨਸ੍ਸ ‘‘ਅਸੁਕਟ੍ਠਾਨਂ ਮਿਗੋ ਗਤੋ ਭવਿਸ੍ਸਤਿ, ਅਸੁਕਤਿਤ੍ਥਂ ਓਤਿਣ੍ਣੋ, ਤਤ੍ਥ ਨਂ ਗਨ੍ਤ੍વਾ ਘਾਤੇਤ੍વਾ ਯਾવਦਿਚ੍ਛਕਂ ਮਂਸਂ ਖਾਦਿਤ੍વਾ ਸੇਸਂ ਕਾਜੇਨਾਦਾਯ ਗਨ੍ਤ੍વਾ ਪੁਤ੍ਤਕੇ ਤੋਸੇਸ੍ਸਾਮੀ’’ਤਿ ਏવਂ ਮਿਗਸ੍ਸੇવ ਅਨੁਪਦਂ ਧਾવਤਿ। ਏવਂ વਿਕ੍ਖਿਤ੍ਤਚਿਤ੍ਤਸ੍ਸ ਧਮ੍ਮਂ ਦੇਸੇਨ੍ਤਂ ਥੇਰਂ ਸਨ੍ਧਾਯ વੁਤ੍ਤਂ ‘‘ਓવਦਤੀ’’ਤਿ। ਅਜ੍ਝਭਾਸੀਤਿ ‘‘ਅਯਂ ਥੇਰੋ ਅਦਾਰੁਂ ਤਚ੍ਛਨ੍ਤੋ વਿਯ ਅਖੇਤ੍ਤੇ વਪ੍ਪਨ੍ਤੋ વਿਯ ਅਤ੍ਤਨੋਪਿ ਕਮ੍ਮਂ ਨਾਸੇਤਿ, ਏਤਸ੍ਸਾਪਿ ਚੋਦੇਸ੍ਸਾਮਿ ਨ’’ਨ੍ਤਿ ਅਭਾਸਿ।
223. Tatiye chetanti ekaṃ migaluddakaṃ. Ovadatīti so kira migaluddako pātova bhuñjitvā ‘‘mige vadhissāmī’’ti araññaṃ paviṭṭho ekaṃ rohitamigaṃ disvā ‘‘sattiyā naṃ paharissāmī’’ti anubandhamāno therassa paṭhamasutte vuttanayeneva divāvihāraṃ nisinnassa avidūrena pakkamati. Atha naṃ thero – ‘‘upāsaka, pāṇātipāto nāmesa apāyasaṃvattaniko appāyukasaṃvattaniko, sakkā aññenapi kasivaṇijjādikammena dārabharaṇaṃ kātuṃ, mā evarūpaṃ kakkhaḷakammaṃ karohī’’ti āha. Sopi ‘‘mahāpaṃsukūlikatthero kathetī’’ti gāravena ṭhatvā sotuṃ āraddho. Athassa sotukāmataṃ janessāmīti thero aṅguṭṭhakaṃ jālāpesi. So akkhīhipi passati, kaṇṇehipi suṇāti, cittaṃ panassa ‘‘asukaṭṭhānaṃ migo gato bhavissati, asukatitthaṃ otiṇṇo, tattha naṃ gantvā ghātetvā yāvadicchakaṃ maṃsaṃ khāditvā sesaṃ kājenādāya gantvā puttake tosessāmī’’ti evaṃ migasseva anupadaṃ dhāvati. Evaṃ vikkhittacittassa dhammaṃ desentaṃ theraṃ sandhāya vuttaṃ ‘‘ovadatī’’ti. Ajjhabhāsīti ‘‘ayaṃ thero adāruṃ tacchanto viya akhette vappanto viya attanopi kammaṃ nāseti, etassāpi codessāmi na’’nti abhāsi.
ਅਪ੍ਪਪਞ੍ਞਨ੍ਤਿ ਨਿਪ੍ਪਞ੍ਞਂ। ਅਚੇਤਸਨ੍ਤਿ ਕਾਰਣਜਾਨਨਸਮਤ੍ਥੇਨ ਚਿਤ੍ਤੇਨ ਰਹਿਤਂ। ਮਨ੍ਦੋવਾਤਿ ਅਨ੍ਧਬਾਲੋ વਿਯ। ਸੁਣਾਤੀਤਿ ਤવ ਧਮ੍ਮਕਥਂ ਸੁਣਾਤਿ। ਨ વਿਜਾਨਾਤੀਤਿ ਅਤ੍ਥਮਸ੍ਸ ਨ ਜਾਨਾਤਿ। ਆਲੋਕੇਤੀਤਿ ਤવ ਪੁਥੁਜ੍ਜਨਿਕਇਦ੍ਧਿਯਾ ਜਲਨ੍ਤਂ ਅਙ੍ਗੁਟ੍ਠਕਂ ਆਲੋਕੇਤਿ। ਨ ਪਸ੍ਸਤੀਤਿ ਏਤ੍ਥ ‘‘ਨੇવ ਤੇਲਂ ਨ વਟ੍ਟਿ ਨ ਦੀਪਕਪਲ੍ਲਿਕਾ, ਥੇਰਸ੍ਸ ਪਨ ਆਨੁਭਾવੇਨਾਯਂ ਜਲਤੀ’’ਤਿ ਇਮਂ ਕਾਰਣਂ ਨ ਪਸ੍ਸਤਿ। ਦਸ ਪਜ੍ਜੋਤੇਤਿ ਦਸਸੁ ਅਙ੍ਗੁਲੀਸੁ ਦਸ ਪਦੀਪੇ। ਰੂਪਾਨੀਤਿ ਕਾਰਣਰੂਪਾਨਿ। ਚਕ੍ਖੂਤਿ ਪਞ੍ਞਾਚਕ੍ਖੁ। ਸਂવੇਗਮਾਪਾਦੀਤਿ ਕਿਂ ਮੇ ਇਮਿਨਾਤਿ? વੀਰਿਯਂ ਪਗ੍ਗਯ੍ਹ ਪਰਮવਿવੇਕਂ ਅਰਹਤ੍ਤਮਗ੍ਗਂ ਪਟਿਪਜ੍ਜਿ। ਤਤਿਯਂ।
Appapaññanti nippaññaṃ. Acetasanti kāraṇajānanasamatthena cittena rahitaṃ. Mandovāti andhabālo viya. Suṇātīti tava dhammakathaṃ suṇāti. Na vijānātīti atthamassa na jānāti. Āloketīti tava puthujjanikaiddhiyā jalantaṃ aṅguṭṭhakaṃ āloketi. Na passatīti ettha ‘‘neva telaṃ na vaṭṭi na dīpakapallikā, therassa pana ānubhāvenāyaṃ jalatī’’ti imaṃ kāraṇaṃ na passati. Dasa pajjoteti dasasu aṅgulīsu dasa padīpe. Rūpānīti kāraṇarūpāni. Cakkhūti paññācakkhu. Saṃvegamāpādīti kiṃ me imināti? Vīriyaṃ paggayha paramavivekaṃ arahattamaggaṃ paṭipajji. Tatiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਕਸ੍ਸਪਗੋਤ੍ਤਸੁਤ੍ਤਂ • 3. Kassapagottasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੩. ਕਸ੍ਸਪਗੋਤ੍ਤਸੁਤ੍ਤવਣ੍ਣਨਾ • 3. Kassapagottasuttavaṇṇanā
