| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
கஸ்ஸபோ பு³த்³தோ⁴
Kassapo buddho
தஸ்ஸ அபரபா⁴கே³ கஸ்ஸபோ நாம ஸத்தா² உத³பாதி³. தஸ்ஸாபி ஏகோவ ஸாவகஸன்னிபாதோ, தத்த² வீஸதி பி⁴க்கு²ஸஹஸ்ஸானி அஹேஸுங். ததா³ போ³தி⁴ஸத்தோ ஜோதிபாலோ நாம மாணவோ ஹுத்வா திண்ணங் வேதா³னங் பாரகூ³ பூ⁴மியஞ்சேவ அந்தலிக்கே² ச பாகடோ க⁴டிகாரஸ்ஸ கும்ப⁴காரஸ்ஸ மித்தோ அஹோஸி. ஸோ தேன ஸத்³தி⁴ங் ஸத்தா²ரங் உபஸங்கமித்வா த⁴ம்மகத²ங் ஸுத்வா பப்³ப³ஜித்வா ஆரத்³த⁴வீரியோ தீணி பிடகானி உக்³க³ஹெத்வா வத்தாவத்தஸம்பத்தியா பு³த்³த⁴ஸாஸனங் ஸோபே⁴ஸி. ஸோபி நங் ஸத்தா² ‘‘பு³த்³தோ⁴ ப⁴விஸ்ஸதீ’’தி ப்³யாகாஸி. தஸ்ஸ ப⁴க³வதோ ஜாதனக³ரங் பா³ராணஸீ நாம அஹோஸி, ப்³ரஹ்மத³த்தோ நாம ப்³ராஹ்மணோ பிதா, த⁴னவதீ நாம ப்³ராஹ்மணீ மாதா, திஸ்ஸோ ச பா⁴ரத்³வாஜோ ச த்³வே அக்³க³ஸாவகா, ஸப்³ப³மித்தோ நாமுபட்டா²கோ, அனுளா ச உருவேளா ச த்³வே அக்³க³ஸாவிகா, நிக்³ரோத⁴ருக்கோ² போ³தி⁴, ஸரீரங் வீஸதிஹத்து²ப்³பே³த⁴ங் அஹோஸி, வீஸதி வஸ்ஸஸஹஸ்ஸானி ஆயூதி.
Tassa aparabhāge kassapo nāma satthā udapādi. Tassāpi ekova sāvakasannipāto, tattha vīsati bhikkhusahassāni ahesuṃ. Tadā bodhisatto jotipālo nāma māṇavo hutvā tiṇṇaṃ vedānaṃ pāragū bhūmiyañceva antalikkhe ca pākaṭo ghaṭikārassa kumbhakārassa mitto ahosi. So tena saddhiṃ satthāraṃ upasaṅkamitvā dhammakathaṃ sutvā pabbajitvā āraddhavīriyo tīṇi piṭakāni uggahetvā vattāvattasampattiyā buddhasāsanaṃ sobhesi. Sopi naṃ satthā ‘‘buddho bhavissatī’’ti byākāsi. Tassa bhagavato jātanagaraṃ bārāṇasī nāma ahosi, brahmadatto nāma brāhmaṇo pitā, dhanavatī nāma brāhmaṇī mātā, tisso ca bhāradvājo ca dve aggasāvakā, sabbamitto nāmupaṭṭhāko, anuḷā ca uruveḷā ca dve aggasāvikā, nigrodharukkho bodhi, sarīraṃ vīsatihatthubbedhaṃ ahosi, vīsati vassasahassāni āyūti.
‘‘கோணாக³மனஸ்ஸ அபரேன, ஸம்பு³த்³தோ⁴ த்³விபது³த்தமோ;
‘‘Koṇāgamanassa aparena, sambuddho dvipaduttamo;
கஸ்ஸபோ நாம கொ³த்தேன, த⁴ம்மராஜா பப⁴ங்கரோ’’தி. (பு³॰ வங்॰ 26.1);
Kassapo nāma gottena, dhammarājā pabhaṅkaro’’ti. (bu. vaṃ. 26.1);
யஸ்மிங் பன கப்பே தீ³பங்கரத³ஸப³லோ உத³பாதி³, தஸ்மிங் அஞ்ஞேபி தயோ பு³த்³தா⁴ அஹேஸுங். தேஸங் ஸந்திகே போ³தி⁴ஸத்தஸ்ஸ ப்³யாகரணங் நத்தி², தஸ்மா தே இத⁴ ந த³ஸ்ஸிதா. அட்ட²கதா²யங் பன தண்ஹங்கரதோ பட்டா²ய ஸப்³பே³பி பு³த்³தே⁴ த³ஸ்ஸேதுங் இத³ங் வுத்தங் –
Yasmiṃ pana kappe dīpaṅkaradasabalo udapādi, tasmiṃ aññepi tayo buddhā ahesuṃ. Tesaṃ santike bodhisattassa byākaraṇaṃ natthi, tasmā te idha na dassitā. Aṭṭhakathāyaṃ pana taṇhaṅkarato paṭṭhāya sabbepi buddhe dassetuṃ idaṃ vuttaṃ –
‘‘தண்ஹங்கரோ மேத⁴ங்கரோ, அதோ²பி ஸரணங்கரோ;
‘‘Taṇhaṅkaro medhaṅkaro, athopi saraṇaṅkaro;
தீ³பங்கரோ ச ஸம்பு³த்³தோ⁴, கொண்ட³ஞ்ஞோ த்³விபது³த்தமோ.
Dīpaṅkaro ca sambuddho, koṇḍañño dvipaduttamo.
‘‘மங்க³லோ ச ஸுமனோ ச, ரேவதோ ஸோபி⁴தோ முனி;
‘‘Maṅgalo ca sumano ca, revato sobhito muni;
அனோமத³ஸ்ஸீ பது³மோ, நாரதோ³ பது³முத்தரோ.
Anomadassī padumo, nārado padumuttaro.
‘‘ஸுமேதோ⁴ ச ஸுஜாதோ ச, பியத³ஸ்ஸீ மஹாயஸோ;
‘‘Sumedho ca sujāto ca, piyadassī mahāyaso;
அத்த²த³ஸ்ஸீ த⁴ம்மத³ஸ்ஸீ, ஸித்³த⁴த்தோ² லோகனாயகோ.
Atthadassī dhammadassī, siddhattho lokanāyako.
‘‘திஸ்ஸோ பு²ஸ்ஸோ ச ஸம்பு³த்³தோ⁴, விபஸ்ஸீ ஸிகீ² வெஸ்ஸபூ⁴;
‘‘Tisso phusso ca sambuddho, vipassī sikhī vessabhū;
ககுஸந்தோ⁴ கோணாக³மனோ, கஸ்ஸபோ சாபி நாயகோ.
Kakusandho koṇāgamano, kassapo cāpi nāyako.
‘‘ஏதே அஹேஸுங் ஸம்பு³த்³தா⁴, வீதராகா³ ஸமாஹிதா;
‘‘Ete ahesuṃ sambuddhā, vītarāgā samāhitā;
ஸதரங்ஸீவ உப்பன்னா, மஹாதமவினோத³னா;
Sataraṃsīva uppannā, mahātamavinodanā;
ஜலித்வா அக்³கி³க²ந்தா⁴வ, நிப்³பு³தா தே ஸஸாவகா’’தி.
Jalitvā aggikhandhāva, nibbutā te sasāvakā’’ti.
