| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. कटच्छुभिक्खादायिकाथेरीअपदानं
7. Kaṭacchubhikkhādāyikātherīapadānaṃ
६०.
60.
‘‘पिण्डचारं चरन्तस्स, तिस्सनामस्स सत्थुनो।
‘‘Piṇḍacāraṃ carantassa, tissanāmassa satthuno;
कटच्छुभिक्खं पग्गय्ह, बुद्धसेट्ठस्स दासहं॥
Kaṭacchubhikkhaṃ paggayha, buddhaseṭṭhassa dāsahaṃ.
६१.
61.
‘‘पटिग्गहेत्वा सम्बुद्धो, तिस्सो लोकग्गनायको।
‘‘Paṭiggahetvā sambuddho, tisso lokagganāyako;
वीथिया सण्ठितो सत्था, अका मे अनुमोदनं॥
Vīthiyā saṇṭhito satthā, akā me anumodanaṃ.
६२.
62.
‘‘‘कटच्छुभिक्खं दत्वान, तावतिंसं गमिस्ससि।
‘‘‘Kaṭacchubhikkhaṃ datvāna, tāvatiṃsaṃ gamissasi;
छत्तिंसदेवराजूनं, महेसित्तं करिस्ससि॥
Chattiṃsadevarājūnaṃ, mahesittaṃ karissasi.
६३.
63.
‘‘‘पञ्ञासं चक्कवत्तीनं, महेसित्तं करिस्ससि।
‘‘‘Paññāsaṃ cakkavattīnaṃ, mahesittaṃ karissasi;
मनसा पत्थितं सब्बं, पटिलच्छसि सब्बदा॥
Manasā patthitaṃ sabbaṃ, paṭilacchasi sabbadā.
६४.
64.
‘‘‘सम्पत्तिं अनुभोत्वान, पब्बजिस्ससिकिञ्चना।
‘‘‘Sampattiṃ anubhotvāna, pabbajissasikiñcanā;
सब्बासवे परिञ्ञाय, निब्बायिस्ससिनासवा’॥
Sabbāsave pariññāya, nibbāyissasināsavā’.
६५.
65.
‘‘इदं वत्वान सम्बुद्धो, तिस्सो लोकग्गनायको।
‘‘Idaṃ vatvāna sambuddho, tisso lokagganāyako;
नभं अब्भुग्गमी वीरो, हंसराजाव अम्बरे॥
Nabhaṃ abbhuggamī vīro, haṃsarājāva ambare.
६६.
66.
कटच्छुभिक्खं दत्वान, पत्ताहं अचलं पदं॥
Kaṭacchubhikkhaṃ datvāna, pattāhaṃ acalaṃ padaṃ.
६७.
67.
‘‘द्वेनवुते इतो कप्पे, यं दानमददिं तदा।
‘‘Dvenavute ito kappe, yaṃ dānamadadiṃ tadā;
दुग्गतिं नाभिजानामि, भिक्खादानस्सिदं फलं॥
Duggatiṃ nābhijānāmi, bhikkhādānassidaṃ phalaṃ.
६८.
68.
‘‘किलेसा झापिता मय्हं…पे॰… विहरामि अनासवा॥
‘‘Kilesā jhāpitā mayhaṃ…pe… viharāmi anāsavā.
६९.
69.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
७०.
70.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं कटच्छुभिक्खादायिका भिक्खुनी इमा गाथायो अभासित्थाति।
Itthaṃ sudaṃ kaṭacchubhikkhādāyikā bhikkhunī imā gāthāyo abhāsitthāti.
कटच्छुभिक्खादायिकाथेरियापदानं सत्तमं।
Kaṭacchubhikkhādāyikātheriyāpadānaṃ sattamaṃ.
Footnotes:
