| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๗. กฎจฺฉุภิกฺขาทายิกาเถรีอปทานํ
7. Kaṭacchubhikkhādāyikātherīapadānaṃ
๖๐.
60.
‘‘ปิณฺฑจารํ จรนฺตสฺส, ติสฺสนามสฺส สตฺถุโน;
‘‘Piṇḍacāraṃ carantassa, tissanāmassa satthuno;
กฎจฺฉุภิกฺขํ ปคฺคยฺห, พุทฺธเสฎฺฐสฺส ทาสหํฯ
Kaṭacchubhikkhaṃ paggayha, buddhaseṭṭhassa dāsahaṃ.
๖๑.
61.
‘‘ปฎิคฺคเหตฺวา สมฺพุโทฺธ, ติโสฺส โลกคฺคนายโก;
‘‘Paṭiggahetvā sambuddho, tisso lokagganāyako;
วีถิยา สณฺฐิโต สตฺถา, อกา เม อนุโมทนํฯ
Vīthiyā saṇṭhito satthā, akā me anumodanaṃ.
๖๒.
62.
‘‘‘กฎจฺฉุภิกฺขํ ทตฺวาน, ตาวติํสํ คมิสฺสสิ;
‘‘‘Kaṭacchubhikkhaṃ datvāna, tāvatiṃsaṃ gamissasi;
ฉตฺติํสเทวราชูนํ, มเหสิตฺตํ กริสฺสสิฯ
Chattiṃsadevarājūnaṃ, mahesittaṃ karissasi.
๖๓.
63.
‘‘‘ปญฺญาสํ จกฺกวตฺตีนํ, มเหสิตฺตํ กริสฺสสิ;
‘‘‘Paññāsaṃ cakkavattīnaṃ, mahesittaṃ karissasi;
มนสา ปตฺถิตํ สพฺพํ, ปฎิลจฺฉสิ สพฺพทาฯ
Manasā patthitaṃ sabbaṃ, paṭilacchasi sabbadā.
๖๔.
64.
‘‘‘สมฺปตฺติํ อนุโภตฺวาน, ปพฺพชิสฺสสิกิญฺจนา;
‘‘‘Sampattiṃ anubhotvāna, pabbajissasikiñcanā;
สพฺพาสเว ปริญฺญาย, นิพฺพายิสฺสสินาสวา’ฯ
Sabbāsave pariññāya, nibbāyissasināsavā’.
๖๕.
65.
‘‘อิทํ วตฺวาน สมฺพุโทฺธ, ติโสฺส โลกคฺคนายโก;
‘‘Idaṃ vatvāna sambuddho, tisso lokagganāyako;
นภํ อพฺภุคฺคมี วีโร, หํสราชาว อมฺพเรฯ
Nabhaṃ abbhuggamī vīro, haṃsarājāva ambare.
๖๖.
66.
กฎจฺฉุภิกฺขํ ทตฺวาน, ปตฺตาหํ อจลํ ปทํฯ
Kaṭacchubhikkhaṃ datvāna, pattāhaṃ acalaṃ padaṃ.
๖๗.
67.
‘‘เทฺวนวุเต อิโต กเปฺป, ยํ ทานมททิํ ตทา;
‘‘Dvenavute ito kappe, yaṃ dānamadadiṃ tadā;
ทุคฺคติํ นาภิชานามิ, ภิกฺขาทานสฺสิทํ ผลํฯ
Duggatiṃ nābhijānāmi, bhikkhādānassidaṃ phalaṃ.
๖๘.
68.
‘‘กิเลสา ฌาปิตา มยฺหํ…เป.… วิหรามิ อนาสวาฯ
‘‘Kilesā jhāpitā mayhaṃ…pe… viharāmi anāsavā.
๖๙.
69.
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
‘‘Svāgataṃ vata me āsi…pe… kataṃ buddhassa sāsanaṃ.
๗๐.
70.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ กฎจฺฉุภิกฺขาทายิกา ภิกฺขุนี อิมา คาถาโย อภาสิตฺถาติฯ
Itthaṃ sudaṃ kaṭacchubhikkhādāyikā bhikkhunī imā gāthāyo abhāsitthāti.
กฎจฺฉุภิกฺขาทายิกาเถริยาปทานํ สตฺตมํฯ
Kaṭacchubhikkhādāyikātheriyāpadānaṃ sattamaṃ.
Footnotes:
