| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[125] 5. гадаахагаж̇аад̇агаван̣н̣анаа
[125] 5. Kaṭāhakajātakavaṇṇanā
б̣ахумби со вигад̇т̇зяяаад̇и ид̣̇ам̣ сад̇т̇аа ж̇зд̇аванз вихаранд̇о згам̣ вигад̇т̇агабхигкум̣ аараб̣бха гат̇зси. д̇асса вад̇т̇у хздтаа гат̇ид̇асад̣̇исамзва.
Bahumpiso vikattheyyāti idaṃ satthā jetavane viharanto ekaṃ vikatthakabhikkhuṃ ārabbha kathesi. Tassa vatthu heṭṭhā kathitasadisameva.
ад̇ийд̇з бана б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о махаавибхаво сздти ахоси. д̇асса бхарияаа буд̇д̇ам̣ виж̇ааяи, д̣̇аасийбисса д̇ам̣ д̣̇ивасан̃н̃зва буд̇д̇ам̣ виж̇ааяи. д̇з згад̇ова вад̣дхим̣су. сздтибуд̇д̇з лзкам̣ сигканд̇з д̣̇аасобисса палагам̣ вахамаано г̇анд̇ваа д̇знзва сад̣̇д̇хим̣ лзкам̣ сигки, г̇ан̣анам̣ сигки, д̣̇вз д̇аяо вохаарз агааси. со ануггамзна важанагусало вохаарагусало яуваа абхируубо ахоси, наамзна гадаахзго наама. со сздтигхарз бхан̣д̣ааг̇ааригагаммам̣ гаронд̇о жинд̇зси ‘‘на мам̣ имз саб̣б̣агаалам̣ бхан̣д̣ааг̇ааригагаммам̣ гаарзссанд̇и, гин̃жид̣̇зва д̣̇осам̣ д̣̇исваа д̇аал̣зд̇ваа б̣анд̇хид̇ваа лагкан̣зна ан̇гзд̇ваа д̣̇аасабарибхог̇знаби барибхун̃ж̇иссанд̇и. бажжанд̇з ко бана сздтисса сахааяаго сздти ад̇т̇и, яам̣нуунаахам̣ сздтисса важанзна лзкам̣ аад̣̇ааяа д̇ад̇т̇а г̇анд̇ваа ‘ахам̣ сздтибуд̇д̇о’д̇и вад̇ваа д̇ам̣ сздтим̣ ван̃жзд̇ваа д̇асса д̇хийд̇арам̣ г̇ахзд̇ваа сукам̣ васзяяа’’нд̇и. со саяамзва бан̣н̣ам̣ г̇ахзд̇ваа ‘‘ахам̣ асугам̣ наама мама буд̇д̇ам̣ д̇ава санд̇игам̣ бахин̣им̣, ааваахавиваахасамб̣анд̇хо наама маяхан̃жа д̇аяаа, д̇уяхан̃жа маяаа сад̣̇д̇хим̣ бад̇ируубо, д̇асмаа д̇вам̣ имасса д̣̇аарагасса ад̇д̇ано д̇хийд̇арам̣ д̣̇ад̇ваа зд̇ам̣ д̇ад̇т̇зва васаабзхи, ахамби огаасам̣ лабхид̇ваа ааг̇амиссаамий’’д̇и ликид̇ваа сздтиссзва муд̣̇д̣̇игааяа лан̃ж̇зд̇ваа яат̇ааружид̇ам̣ бариб̣б̣аяан̃жзва г̇анд̇хавад̇т̇аад̣̇ийни жа г̇ахзд̇ваа бажжанд̇ам̣ г̇анд̇ваа сздтим̣ д̣̇исваа ванд̣̇ид̇ваа адтааси.
Atīte pana bārāṇasiyaṃ brahmadatte rajjaṃ kārente bodhisatto mahāvibhavo seṭṭhi ahosi. Tassa bhariyā puttaṃ vijāyi, dāsīpissa taṃ divasaññeva puttaṃ vijāyi. Te ekatova vaḍḍhiṃsu. Seṭṭhiputte lekhaṃ sikkhante dāsopissa phalakaṃ vahamāno gantvā teneva saddhiṃ lekhaṃ sikkhi, gaṇanaṃ sikkhi, dve tayo vohāre akāsi. So anukkamena vacanakusalo vohārakusalo yuvā abhirūpo ahosi, nāmena kaṭāheko nāma. So seṭṭhighare bhaṇḍāgārikakammaṃ karonto cintesi ‘‘na maṃ ime sabbakālaṃ bhaṇḍāgārikakammaṃ kāressanti, kiñcideva dosaṃ disvā tāḷetvā bandhitvā lakkhaṇena aṅketvā dāsaparibhogenapi paribhuñjissanti. Paccante kho pana seṭṭhissa sahāyako seṭṭhi atthi, yaṃnūnāhaṃ seṭṭhissa vacanena lekhaṃ ādāya tattha gantvā ‘ahaṃ seṭṭhiputto’ti vatvā taṃ seṭṭhiṃ vañcetvā tassa dhītaraṃ gahetvā sukhaṃ vaseyya’’nti. So sayameva paṇṇaṃ gahetvā ‘‘ahaṃ asukaṃ nāma mama puttaṃ tava santikaṃ pahiṇiṃ, āvāhavivāhasambandho nāma mayhañca tayā, tuyhañca mayā saddhiṃ patirūpo, tasmā tvaṃ imassa dārakassa attano dhītaraṃ datvā etaṃ tattheva vasāpehi, ahampi okāsaṃ labhitvā āgamissāmī’’ti likhitvā seṭṭhisseva muddikāya lañjetvā yathārucitaṃ paribbayañceva gandhavatthādīni ca gahetvā paccantaṃ gantvā seṭṭhiṃ disvā vanditvā aṭṭhāsi.
ат̇а нам̣ сздти ‘‘гуд̇о ааг̇ад̇оси, д̇аад̇аа’’д̇и бужчи. ‘‘б̣аараан̣асид̇о’’д̇и. ‘‘гасса буд̇д̇осий’’д̇и? ‘‘б̣аараан̣асисздтиссаа’’д̇и. ‘‘гзнад̇т̇знааг̇ад̇осий’’д̇и? д̇асмим̣ кан̣з гадаахаго ‘‘ид̣̇ам̣ д̣̇исваа ж̇ааниссат̇аа’’д̇и бан̣н̣ам̣ ад̣̇ааси. сздти бан̣н̣ам̣ ваажзд̇ваа ‘‘ид̣̇аанаахам̣ ж̇ийваами наамаа’’д̇и д̇удтажид̇д̇о д̇хийд̇арам̣ д̣̇ад̇ваа бад̇идтаабзси. д̇асса баривааро маханд̇о ахоси. со яааг̇укаж̇ж̇агаад̣̇ийсу ваа вад̇т̇аг̇анд̇хаад̣̇ийсу ваа убанийд̇зсу ‘‘звамби наама яааг̇ум̣ бажанд̇и, звам̣ каж̇ж̇агам̣, звам̣ бхад̇д̇ам̣, ахо бажжанд̇аваасигаа наамаа’’д̇и яааг̇уаад̣̇ийни г̇арахад̇и. ‘‘имз бажжанд̇аваасибхаавзнзва ахад̇асаадагз вал̣ан̃ж̇ид̇ум̣ на ж̇аананд̇и, г̇анд̇хз бисид̇ум̣, бубпаани г̇ант̇ид̇ум̣ на ж̇аананд̇ий’’д̇и вад̇т̇агамманд̇игаад̣̇аяо г̇арахад̇и.
Atha naṃ seṭṭhi ‘‘kuto āgatosi, tātā’’ti pucchi. ‘‘Bārāṇasito’’ti. ‘‘Kassa puttosī’’ti? ‘‘Bārāṇasiseṭṭhissā’’ti. ‘‘Kenatthenāgatosī’’ti? Tasmiṃ khaṇe kaṭāhako ‘‘idaṃ disvā jānissathā’’ti paṇṇaṃ adāsi. Seṭṭhi paṇṇaṃ vācetvā ‘‘idānāhaṃ jīvāmi nāmā’’ti tuṭṭhacitto dhītaraṃ datvā patiṭṭhāpesi. Tassa parivāro mahanto ahosi. So yāgukhajjakādīsu vā vatthagandhādīsu vā upanītesu ‘‘evampi nāma yāguṃ pacanti, evaṃ khajjakaṃ, evaṃ bhattaṃ, aho paccantavāsikā nāmā’’ti yāguādīni garahati. ‘‘Ime paccantavāsibhāveneva ahatasāṭake vaḷañjituṃ na jānanti, gandhe pisituṃ, pupphāni ganthituṃ na jānantī’’ti vatthakammantikādayo garahati.
б̣од̇хисад̇д̇оби д̣̇аасам̣ абассанд̇о ‘‘гадаахаго на д̣̇иссад̇и, гахам̣ г̇ад̇о, бариязсат̇а на’’нд̇и саманд̇аа мануссз баяож̇зси. д̇зсу зго д̇ад̇т̇а г̇анд̇ваа д̇ам̣ д̣̇исваа сан̃ж̇аанид̇ваа ад̇д̇аанам̣ аж̇аанаабзд̇ваа ааг̇анд̇ваа б̣од̇хисад̇д̇асса аарожзси. б̣од̇хисад̇д̇о д̇ам̣ бавад̇д̇им̣ суд̇ваа ‘‘аяуд̇д̇ам̣ д̇зна гад̇ам̣, г̇анд̇ваа нам̣ г̇ахзд̇ваа ааг̇ажчиссаамий’’д̇и рааж̇аанам̣ аабужчид̇ваа маханд̇зна бариваарзна нигками. ‘‘сздти гира бажжанд̇ам̣ г̇ажчад̇ий’’д̇и саб̣б̣ад̇т̇а баагадо ж̇аад̇о. гадаахаго ‘‘сздти гира ааг̇ажчад̇ий’’д̇и суд̇ваа жинд̇зси ‘‘на со ан̃н̃зна гааран̣зна ааг̇ажчиссад̇и, мам̣ ниссааязвасса ааг̇аманзна бхавид̇аб̣б̣ам̣. сажз банаахам̣ балааяиссаами, буна ааг̇анд̇ум̣ на саггаа бхависсад̇и. ад̇т̇и банзса убааяо. мама саамигасса бадибат̇ам̣ г̇анд̇ваа д̣̇аасагаммам̣ гад̇ваа д̇амзва аараад̇хзссаамий’’д̇и. со д̇ад̇о бадтааяа барисамаж̇жхз звам̣ бхаасад̇и ‘‘ан̃н̃з б̣ааламануссаа ад̇д̇ано б̣аалабхаавзна маад̇аабид̇уунам̣ г̇ун̣ам̣ аж̇аананд̇аа д̇зсам̣ бхож̇анавзлааяа абажид̇игаммам̣ агад̇ваа д̇зхи сад̣̇д̇хим̣язва бхун̃ж̇анд̇и, маяам̣ бана маад̇аабид̇уунам̣ бхож̇анагаалз бадиг̇г̇ахам̣ убанзма, кзл̣амаллагам̣ убанзма, бхааж̇анаани убанзма, баанийяамби б̣ийж̇анимби г̇ахзд̇ваа убад̇идтаамаа’’д̇и яаава сарийравал̣ан̃ж̇анагаалз уд̣̇агагаласам̣ аад̣̇ааяа бадижчаннадтаанаг̇аманаа саб̣б̣ам̣ д̣̇аасзхи саамигаанам̣ гад̇д̇аб̣б̣агижжам̣ багаасзси.
Bodhisattopi dāsaṃ apassanto ‘‘kaṭāhako na dissati, kahaṃ gato, pariyesatha na’’nti samantā manusse payojesi. Tesu eko tattha gantvā taṃ disvā sañjānitvā attānaṃ ajānāpetvā āgantvā bodhisattassa ārocesi. Bodhisatto taṃ pavattiṃ sutvā ‘‘ayuttaṃ tena kataṃ, gantvā naṃ gahetvā āgacchissāmī’’ti rājānaṃ āpucchitvā mahantena parivārena nikkhami. ‘‘Seṭṭhi kira paccantaṃ gacchatī’’ti sabbattha pākaṭo jāto. Kaṭāhako ‘‘seṭṭhi kira āgacchatī’’ti sutvā cintesi ‘‘na so aññena kāraṇena āgacchissati, maṃ nissāyevassa āgamanena bhavitabbaṃ. Sace panāhaṃ palāyissāmi, puna āgantuṃ na sakkā bhavissati. Atthi panesa upāyo. Mama sāmikassa paṭipathaṃ gantvā dāsakammaṃ katvā tameva ārādhessāmī’’ti. So tato paṭṭhāya parisamajjhe evaṃ bhāsati ‘‘aññe bālamanussā attano bālabhāvena mātāpitūnaṃ guṇaṃ ajānantā tesaṃ bhojanavelāya apacitikammaṃ akatvā tehi saddhiṃyeva bhuñjanti, mayaṃ pana mātāpitūnaṃ bhojanakāle paṭiggahaṃ upanema, kheḷamallakaṃ upanema, bhājanāni upanema, pānīyampi bījanimpi gahetvā upatiṭṭhāmā’’ti yāva sarīravaḷañjanakāle udakakalasaṃ ādāya paṭicchannaṭṭhānagamanā sabbaṃ dāsehi sāmikānaṃ kattabbakiccaṃ pakāsesi.
со звам̣ барисам̣ уг̇г̇ан̣хаабзд̇ваа б̣од̇хисад̇д̇асса бажжанд̇асамийбам̣ ааг̇ад̇агаалз сасурам̣ авожа ‘‘д̇аад̇а, мама гира бид̇аа д̇умхаагам̣ д̣̇ассанад̇т̇ааяа ааг̇ажчад̇и, д̇умхз каад̣̇анийяабхож̇анийяам̣ бадияаад̣̇аабзт̇а, ахам̣ бан̣н̣аагаарам̣ г̇ахзд̇ваа бадибат̇ам̣ г̇амиссаамий’’д̇и. со ‘‘саад̇ху, д̇аад̇аа’’д̇и самбадижчи. гадаахаго б̣ахум̣ бан̣н̣аагаарамаад̣̇ааяа маханд̇зна бариваарзна г̇анд̇ваа б̣од̇хисад̇д̇ам̣ ванд̣̇ид̇ваа бан̣н̣аагаарам̣ ад̣̇ааси. б̣од̇хисад̇д̇оби бан̣н̣аагаарам̣ г̇ахзд̇ваа д̇зна сад̣̇д̇хим̣ бадисант̇аарам̣ гад̇ваа баад̇араасагаалз канд̇хааваарам̣ ниваасзд̇ваа сарийравал̣ан̃ж̇анад̇т̇ааяа бадижчаннадтаанам̣ баависи. гадаахаго ад̇д̇ано бариваарам̣ нивад̇д̇зд̇ваа галасам̣ аад̣̇ааяа б̣од̇хисад̇д̇асса санд̇игам̣ г̇анд̇ваа уд̣̇агагижжабарияосаанз баад̣̇зсу бад̇ид̇ваа ‘‘саами, ахам̣ д̇умхаагам̣ яад̇д̇агам̣ ижчат̇а, д̇ад̇д̇агам̣ д̇ханам̣ д̣̇ассаами, маа мз яасам̣ анд̇арад̇хаабаяид̇т̇аа’’д̇и ааха. б̣од̇хисад̇д̇о д̇асса вад̇д̇асамбад̣̇ааяа басийд̣̇ид̇ваа ‘‘маа бхааяи, над̇т̇и д̇з мама санд̇игаа анд̇арааяо’’д̇и самассаасзд̇ваа бажжанд̇анаг̇арам̣ баависи. маханд̇о саггааро ахоси, гадаахагобисса ниранд̇арам̣ д̣̇аасзна гад̇д̇аб̣б̣агижжам̣ гарод̇и. ат̇а нам̣ згааяа взлааяа суканисиннам̣ бажжанд̇асздти ааха ‘‘махаасздти, маяаа д̇умхаагам̣ бан̣н̣ам̣ д̣̇исваава д̇умхаагам̣ буд̇д̇асса д̣̇ааригаа д̣̇иннаа’’д̇и б̣од̇хисад̇д̇о гадаахагам̣ буд̇д̇амзва гад̇ваа д̇ад̣̇анужчавигам̣ бияаважанам̣ вад̇ваа сздтим̣ д̇осзси. д̇ад̇о бадтааяа гадаахагасса мукам̣ уллогзд̇ум̣ самад̇т̇о наама наахоси.
So evaṃ parisaṃ uggaṇhāpetvā bodhisattassa paccantasamīpaṃ āgatakāle sasuraṃ avoca ‘‘tāta, mama kira pitā tumhākaṃ dassanatthāya āgacchati, tumhe khādanīyabhojanīyaṃ paṭiyādāpetha, ahaṃ paṇṇākāraṃ gahetvā paṭipathaṃ gamissāmī’’ti. So ‘‘sādhu, tātā’’ti sampaṭicchi. Kaṭāhako bahuṃ paṇṇākāramādāya mahantena parivārena gantvā bodhisattaṃ vanditvā paṇṇākāraṃ adāsi. Bodhisattopi paṇṇākāraṃ gahetvā tena saddhiṃ paṭisanthāraṃ katvā pātarāsakāle khandhāvāraṃ nivāsetvā sarīravaḷañjanatthāya paṭicchannaṭṭhānaṃ pāvisi. Kaṭāhako attano parivāraṃ nivattetvā kalasaṃ ādāya bodhisattassa santikaṃ gantvā udakakiccapariyosāne pādesu patitvā ‘‘sāmi, ahaṃ tumhākaṃ yattakaṃ icchatha, tattakaṃ dhanaṃ dassāmi, mā me yasaṃ antaradhāpayitthā’’ti āha. Bodhisatto tassa vattasampadāya pasīditvā ‘‘mā bhāyi, natthi te mama santikā antarāyo’’ti samassāsetvā paccantanagaraṃ pāvisi. Mahanto sakkāro ahosi, kaṭāhakopissa nirantaraṃ dāsena kattabbakiccaṃ karoti. Atha naṃ ekāya velāya sukhanisinnaṃ paccantaseṭṭhi āha ‘‘mahāseṭṭhi, mayā tumhākaṃ paṇṇaṃ disvāva tumhākaṃ puttassa dārikā dinnā’’ti bodhisatto kaṭāhakaṃ puttameva katvā tadanucchavikaṃ piyavacanaṃ vatvā seṭṭhiṃ tosesi. Tato paṭṭhāya kaṭāhakassa mukhaṃ ulloketuṃ samattho nāma nāhosi.
ат̇згад̣̇ивасам̣ махаасад̇д̇о сздтид̇хийд̇арам̣ баггосид̇ваа ‘‘зхи, амма, сийсз мз уугаа вижинаахий’’д̇и вад̇ваа д̇ам̣ ааг̇анд̇ваа уугаа г̇ахзд̇ваа тид̇ам̣ бияаважанам̣ вад̇ваа ‘‘гат̇зхи, амма, гажжи д̇з мама буд̇д̇о сукад̣̇угкзсу аббамад̇д̇о , убхо ж̇анаа саммод̣̇амаанаа самаг̇г̇аваасам̣ васат̇аа’’д̇и бужчи. ‘‘д̇аад̇а, махаасздти д̇умхаагам̣ буд̇д̇асса ан̃н̃о д̣̇осо над̇т̇и, гзвалам̣ аахаарам̣ г̇арахад̇ий’’д̇и. ‘‘амма, нижжагааламзса д̣̇угкасийлова, абижа д̇з ахам̣ д̇асса мукаб̣анд̇ханаманд̇ам̣ д̣̇ассаами, д̇ам̣ д̇вам̣ саад̇хугам̣ уг̇г̇ан̣хид̇ваа мама буд̇д̇асса бхож̇анагаалз г̇араханд̇асса уг̇г̇ахид̇анияаамзнзва бурад̇о тад̇ваа вад̣̇зяяаасий’’д̇и г̇аат̇ам̣ уг̇г̇ан̣хаабзд̇ваа гад̇ибаахам̣ васид̇ваа б̣аараан̣асимзва аг̇амааси. гадаахагоби б̣ахум̣ каад̣̇анийяабхож̇анийяам̣ аад̣̇ааяа анумаг̇г̇ам̣ г̇анд̇ваа б̣ахуд̇ханам̣ д̣̇ад̇ваа ванд̣̇ид̇ваа нивад̇д̇и. со б̣од̇хисад̇д̇асса г̇ад̇агаалад̇о бадтааяа ад̇ирзгамааний ахоси. со згад̣̇ивасам̣ сздтид̇хийд̇ааяа наанаг̇г̇арасабхож̇анам̣ убанзд̇ваа гадажчум̣ аад̣̇ааяа баривисанд̇ияаа бхад̇д̇ам̣ г̇арахид̇ум̣ аарабхи. сздтид̇хийд̇аа б̣од̇хисад̇д̇асса санд̇игз уг̇г̇ахид̇анияаамзнзва имам̣ г̇аат̇амааха –
Athekadivasaṃ mahāsatto seṭṭhidhītaraṃ pakkositvā ‘‘ehi, amma, sīse me ūkā vicināhī’’ti vatvā taṃ āgantvā ūkā gahetvā ṭhitaṃ piyavacanaṃ vatvā ‘‘kathehi, amma, kacci te mama putto sukhadukkhesu appamatto , ubho janā sammodamānā samaggavāsaṃ vasathā’’ti pucchi. ‘‘Tāta, mahāseṭṭhi tumhākaṃ puttassa añño doso natthi, kevalaṃ āhāraṃ garahatī’’ti. ‘‘Amma, niccakālamesa dukkhasīlova, apica te ahaṃ tassa mukhabandhanamantaṃ dassāmi, taṃ tvaṃ sādhukaṃ uggaṇhitvā mama puttassa bhojanakāle garahantassa uggahitaniyāmeneva purato ṭhatvā vadeyyāsī’’ti gāthaṃ uggaṇhāpetvā katipāhaṃ vasitvā bārāṇasimeva agamāsi. Kaṭāhakopi bahuṃ khādanīyabhojanīyaṃ ādāya anumaggaṃ gantvā bahudhanaṃ datvā vanditvā nivatti. So bodhisattassa gatakālato paṭṭhāya atirekamānī ahosi. So ekadivasaṃ seṭṭhidhītāya nānaggarasabhojanaṃ upanetvā kaṭacchuṃ ādāya parivisantiyā bhattaṃ garahituṃ ārabhi. Seṭṭhidhītā bodhisattassa santike uggahitaniyāmeneva imaṃ gāthamāha –
125.
125.
‘‘б̣ахумби со вигад̇т̇зяяа, ан̃н̃ам̣ ж̇анабад̣̇ам̣ г̇ад̇о;
‘‘Bahumpi so vikattheyya, aññaṃ janapadaṃ gato;
анвааг̇анд̇ваана д̣̇уусзяяа, бхун̃ж̇а бхог̇з гадаахагаа’’д̇и.
Anvāgantvāna dūseyya, bhuñja bhoge kaṭāhakā’’ti.
д̇ад̇т̇а б̣ахумби со вигад̇т̇зяяа, ан̃н̃ам̣ ж̇анабад̣̇ам̣ г̇ад̇од̇и яо ад̇д̇ано ж̇аад̇ибхуумид̇о ан̃н̃ам̣ ж̇анабад̣̇ам̣ г̇ад̇о ход̇и, яад̇т̇асса ж̇аад̇им̣ на ж̇аананд̇и, со б̣ахумби вигад̇т̇зяяа, вамбханаважанам̣ ван̃жанаважанам̣ вад̣̇зяяа. анвааг̇анд̇ваана д̣̇уусзяяаад̇и имам̣ д̇аава ваарам̣ саамигасса бадибат̇ам̣ г̇анд̇ваа д̣̇аасагижжасса гад̇ад̇д̇аа гасаахи бахарид̇ваа бидтижаммуббааданад̇о жа лагкан̣аахананад̇о жа муд̇д̇оси. сажз анаажаарам̣ гароси, буна ан̃н̃асмим̣ ааг̇аманаваарз д̇ава саамиго анвааг̇анд̇ваана д̣̇уусзяяа, имам̣ г̇зхам̣ ануааг̇анд̇ваа гасаабхигхаад̇зхи жзва лагкан̣аахананзна жа ж̇аад̇иббагаасанзна жа д̇ам̣ д̣̇уусзяяа убаханзяяа. д̇асмаа имам̣ анаажаарам̣ бахааяа бхун̃ж̇а бхог̇з гадаахага, маа бажчаа ад̇д̇ано д̣̇аасабхаавам̣ баагадам̣ гаарзд̇ваа виббадисаарий ахосийд̇и аяамзд̇т̇а сздтино ад̇хиббааяо.
Tattha bahumpi so vikattheyya, aññaṃ janapadaṃ gatoti yo attano jātibhūmito aññaṃ janapadaṃ gato hoti, yatthassa jātiṃ na jānanti, so bahumpi vikattheyya, vambhanavacanaṃ vañcanavacanaṃ vadeyya. Anvāgantvāna dūseyyāti imaṃ tāva vāraṃ sāmikassa paṭipathaṃ gantvā dāsakiccassa katattā kasāhi paharitvā piṭṭhicammuppāṭanato ca lakkhaṇāhananato ca muttosi. Sace anācāraṃ karosi, puna aññasmiṃ āgamanavāre tava sāmiko anvāgantvāna dūseyya, imaṃ gehaṃ anuāgantvā kasābhighātehi ceva lakkhaṇāhananena ca jātippakāsanena ca taṃ dūseyya upahaneyya. Tasmā imaṃ anācāraṃ pahāya bhuñja bhoge kaṭāhaka, mā pacchā attano dāsabhāvaṃ pākaṭaṃ kāretvā vippaṭisārī ahosīti ayamettha seṭṭhino adhippāyo.
сздтид̇хийд̇аа бана зд̇амад̇т̇ам̣ аж̇аананд̇ий уг̇г̇ахид̇анияаамзна б̣яан̃ж̇анамзва баяируд̣̇аахааси. гадаахаго ‘‘ад̣̇д̇хаа сздтинаа мама гулам̣ аажигкид̇ваа зд̇иссаа саб̣б̣ам̣ гат̇ид̇ам̣ бхависсад̇ий’’д̇и д̇ад̇о бадтааяа буна бхад̇д̇ам̣ г̇арахид̇ум̣ на висахи, нихад̇амаано яат̇аалад̣̇д̇хам̣ бхун̃ж̇ид̇ваа яат̇аагаммам̣ г̇ад̇о.
Seṭṭhidhītā pana etamatthaṃ ajānantī uggahitaniyāmena byañjanameva payirudāhāsi. Kaṭāhako ‘‘addhā seṭṭhinā mama kulaṃ ācikkhitvā etissā sabbaṃ kathitaṃ bhavissatī’’ti tato paṭṭhāya puna bhattaṃ garahituṃ na visahi, nihatamāno yathāladdhaṃ bhuñjitvā yathākammaṃ gato.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси ‘‘д̇ад̣̇аа гадаахаго вигад̇т̇агабхигку ахоси, б̣аараан̣асисздти бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi ‘‘tadā kaṭāhako vikatthakabhikkhu ahosi, bārāṇasiseṭṭhi pana ahameva ahosi’’nti.
гадаахагаж̇аад̇агаван̣н̣анаа бан̃жамаа.
Kaṭāhakajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 125. гадаахагаж̇аад̇агам̣ • 125. Kaṭāhakajātakaṃ
