பாசித்யாதி³யோஜனா

Pācityādiyojanā

பரிவாரவக்³க³யோஜனா

Parivāravaggayojanā

சூளவக்³க³க²ந்த⁴கஸ்ஸேவங் , கத்வான யோஜனானயங்;

Cūḷavaggakhandhakassevaṃ , katvāna yojanānayaṃ;

அது⁴னா பரிவாரஸ்ஸ, கரிஸ்ஸங் யோஜனானயங்.

Adhunā parivārassa, karissaṃ yojanānayaṃ.

ஸோளஸமஹாவாரோ

Soḷasamahāvāro

பஞ்ஞத்திவாரயோஜனா

Paññattivārayojanā

ஏவங் த்³வாவீஸதிக²ந்த⁴கானங் ஸங்வண்ணனங் கத்வா இதா³னி ‘‘பரிவாரோ’’தி ஸங்க³ஹமாரூள்ஹஸ்ஸ வினயஸ்ஸ ஸங்வண்ணனங் கரொந்தோ அயமாசரியோ பட²மங் தாவ அனுஸந்தி⁴த³ஸ்ஸனமுகே²ன படிஞ்ஞங் காதுகாமோ ஆஹ ‘‘விஸுத்³த⁴பரிவாரஸ்ஸா’’திஆதி³. தத்த² விஸுத்³த⁴பரிவாரஸ்ஸாதி விஸுத்³தா⁴ய சதுபரிஸாய பரிவாரிதஸ்ஸ, அத²வா விஸுத்³தே⁴ன சதுபரிஸஸங்கா²தேன பரிவாரேன ஸமன்னாக³தஸ்ஸ ப⁴க³வதோதி ஸம்ப³ந்தோ⁴. பரிவாரே ஹி விஸுத்³தே⁴ தேன பரிவாரிதோ, தங்பரிவாரிதோ வா ப⁴க³வாபி விஸுத்³தோ⁴யேவ நாம ஹோதி. இமினா ஸங்வண்ணியமானஸ்ஸ ‘‘பரிவாரோ’’தி ஸங்க³ஹமாரூள்ஹஸ்ஸ தே³ஸேதப்³ப³த⁴ம்மஸ்ஸ அனுரூபேன தே³ஸகபூ⁴தஸ்ஸ ப⁴க³வதோ தோ²மனங் கதங் ஹோதி. த⁴ம்மக்க²ந்த⁴ஸரீரஸ்ஸாதி ஸீலாதி³த⁴ம்மக்க²ந்த⁴ஸங்கா²தேன ஸரீரேன ஸமன்னாக³தஸ்ஸ, இமினா ஸங்வண்ணிதானங் க²ந்த⁴கானமனுரூபேன ப⁴க³வதோ தோ²மனங் கதங் ஹோதி. பகதி ஹேஸாசரியானங் யதி³த³ங் தே³ஸேதப்³ப³த⁴ம்மானுரூபேன தே³ஸகஸ்ஸ தோ²மனா (ஸாரத்த²॰ டீ॰ 1.க³ந்தா²ரம்ப⁴கதா²; விஸுத்³தி⁴॰ மஹாடீ॰ 1.1). அனந்தராதி அனந்தரே காலே.

Evaṃ dvāvīsatikhandhakānaṃ saṃvaṇṇanaṃ katvā idāni ‘‘parivāro’’ti saṅgahamārūḷhassa vinayassa saṃvaṇṇanaṃ karonto ayamācariyo paṭhamaṃ tāva anusandhidassanamukhena paṭiññaṃ kātukāmo āha ‘‘visuddhaparivārassā’’tiādi. Tattha visuddhaparivārassāti visuddhāya catuparisāya parivāritassa, athavā visuddhena catuparisasaṅkhātena parivārena samannāgatassa bhagavatoti sambandho. Parivāre hi visuddhe tena parivārito, taṃparivārito vā bhagavāpi visuddhoyeva nāma hoti. Iminā saṃvaṇṇiyamānassa ‘‘parivāro’’ti saṅgahamārūḷhassa desetabbadhammassa anurūpena desakabhūtassa bhagavato thomanaṃ kataṃ hoti. Dhammakkhandhasarīrassāti sīlādidhammakkhandhasaṅkhātena sarīrena samannāgatassa, iminā saṃvaṇṇitānaṃ khandhakānamanurūpena bhagavato thomanaṃ kataṃ hoti. Pakati hesācariyānaṃ yadidaṃ desetabbadhammānurūpena desakassa thomanā (sārattha. ṭī. 1.ganthārambhakathā; visuddhi. mahāṭī. 1.1). Anantarāti anantare kāle.

யோதி வினயோ. புப்³பா³க³தந்தி புப்³பே³ வுத்தேஸு விப⁴ங்க³க²ந்த⁴கேஸு ஆக³தங். நயந்தி ஸத்³த³அத்த²வினிச்ச²யனயஸங்கா²தங் ஸப்³ப³ங் நயங். ஹித்வாதி சஜித்வா. அனுத்தானத்த²வண்ணனந்தி அனுத்தானானங் பதா³னமத்த²வண்ணனங். அயங் பனெத்த² யோஜனா – விஸுத்³த⁴பரிவாரஸ்ஸ த⁴ம்மக்க²ந்த⁴ஸரீரஸ்ஸ ப⁴க³வதோ ஸாஸனே க²ந்த⁴கானமனந்தரா ‘‘பரிவாரோ’’தி யோ வினயோ ஸங்க³ஹங் ஸமாரூள்ஹோ, தஸ்ஸ வினயஸ்ஸ புப்³பா³க³தங் நயங் ஹித்வா இதா³னி அனுத்தானத்த²வண்ணனங் கரிஸ்ஸாமீதி.

Yoti vinayo. Pubbāgatanti pubbe vuttesu vibhaṅgakhandhakesu āgataṃ. Nayanti saddaatthavinicchayanayasaṅkhātaṃ sabbaṃ nayaṃ. Hitvāti cajitvā. Anuttānatthavaṇṇananti anuttānānaṃ padānamatthavaṇṇanaṃ. Ayaṃ panettha yojanā – visuddhaparivārassa dhammakkhandhasarīrassa bhagavato sāsane khandhakānamanantarā ‘‘parivāro’’ti yo vinayo saṅgahaṃ samārūḷho, tassa vinayassa pubbāgataṃ nayaṃ hitvā idāni anuttānatthavaṇṇanaṃ karissāmīti.

1. தத்த² தத்தா²தி ‘‘தஸ்ஸ அனுத்தானத்த²வண்ணனங் கரிஸ்ஸாமீ’’தி யோ பரிவாரஸங்கா²தோ வினயோ ஸங்வண்ணேதப்³ப³பா⁴வேன வுத்தோ, தத்த². ஸங்கே²பத்தோ²தி ஸமாஸத்தோ². யங் தேனாதி எத்த² தஸத்³த³ஸ்ஸ அனியமனித்³தே³ஸபா⁴வங் த³ஸ்ஸெந்தோ ஆஹ ‘‘யோ ஸோ’’தி. தத்த² யோதி அனியம நித்³தே³ஸோ, தஸ்ஸ ‘‘தேனா’’தி நியமனங் த³ட்ட²ப்³ப³ங். ஸோதி பதா³லங்காரோ. த்³வீஸு ஹி ஸப்³ப³னாமேஸு யேபு⁴ய்யேன புப்³ப³மேவ பதா⁴னங், பச்சி²மங் பன வசனாலங்காரங். யோ ஸோ ப⁴க³வா பஞ்ஞபேஸீதி ஸம்ப³ந்தோ⁴. சிரட்டி²திகத்த²ந்தி சிரங் பஞ்சவஸ்ஸஸஹஸ்ஸகாலங் டி²திகத்தா²ய, ‘‘யாசிதோ’’தி ச ‘‘பஞ்ஞபேஸீ’’தி ச ஸம்ப³ந்தோ⁴. த⁴ம்மஸேனாபதினா யாசிதோதி ஸம்ப³ந்தோ⁴. யாசிதோ ஹுத்வா பஞ்ஞபேஸீதி யோஜனா. தேன ப⁴க³வதா பஞ்ஞத்தந்தி ஸம்ப³ந்தோ⁴. ‘‘ஜானதா பஸ்ஸதா’’தி த்³வின்னங் பதா³னங் கம்மமேவ த³ஸ்ஸெந்தோ ஆஹ ‘‘தஸ்ஸ தஸ்ஸா’’திஆதி³. தத்த² ‘‘பஞ்ஞத்திகால’’ந்தி இமினா ‘‘ஜானதா’’தி பத³ஸ்ஸ கம்மங் த³ஸ்ஸேதி, ‘‘த³ஸ அத்த²வஸே’’தி இமினா ‘‘பஸ்ஸதா’’தி பத³ஸ்ஸ கம்மங்.

1. Tattha tatthāti ‘‘tassa anuttānatthavaṇṇanaṃ karissāmī’’ti yo parivārasaṅkhāto vinayo saṃvaṇṇetabbabhāvena vutto, tattha. Saṅkhepatthoti samāsattho. Yaṃ tenāti ettha tasaddassa aniyamaniddesabhāvaṃ dassento āha ‘‘yo so’’ti. Tattha yoti aniyama niddeso, tassa ‘‘tenā’’ti niyamanaṃ daṭṭhabbaṃ. Soti padālaṅkāro. Dvīsu hi sabbanāmesu yebhuyyena pubbameva padhānaṃ, pacchimaṃ pana vacanālaṅkāraṃ. Yo so bhagavā paññapesīti sambandho. Ciraṭṭhitikatthanti ciraṃ pañcavassasahassakālaṃ ṭhitikatthāya, ‘‘yācito’’ti ca ‘‘paññapesī’’ti ca sambandho. Dhammasenāpatinā yācitoti sambandho. Yācito hutvā paññapesīti yojanā. Tena bhagavatā paññattanti sambandho. ‘‘Jānatā passatā’’ti dvinnaṃ padānaṃ kammameva dassento āha ‘‘tassa tassā’’tiādi. Tattha ‘‘paññattikāla’’nti iminā ‘‘jānatā’’ti padassa kammaṃ dasseti, ‘‘dasa atthavase’’ti iminā ‘‘passatā’’ti padassa kammaṃ.

ஏவங் கம்மத³ஸ்ஸனேன யோஜனானயங் த³ஸ்ஸெத்வா இதா³னி கரணத³ஸ்ஸனேன அபரம்பி யோஜனானயங் த³ஸ்ஸெந்தோ ஆஹ ‘‘அபிசா’’திஆதி³. ‘‘புப்³பே³னிவாஸாதீ³ஹீ’’திஆதி³ஸத்³தே³ன தி³ப்³ப³சக்கு²ஸ்ஸ விஸுங் க³ஹேதப்³ப³த்தா இத்³தி⁴வித⁴தி³ப்³ப³ஸோதபரசித்தவிஜானநானி க³ஹேதப்³பா³னி. இமேஹி பதே³ஹி ‘‘ஜானதா, பஸ்ஸதா’’தி த்³வின்னங் பதா³னங் பஞ்சன்னங் லோகியஅபி⁴ஞ்ஞானமேவ கரணபா⁴வங் த³ஸ்ஸேதி. தீஹி விஜ்ஜாஹீதி புப்³பே³னிவாஸதி³ப்³ப³சக்கு²ஆஸவக்க²யஞாணஸங்கா²தாஹி தீஹி விஜ்ஜாஹி. ச²ஹி வா பன அபி⁴ஞ்ஞாஹீதி ஸஹ ஆஸவக்க²யஞாணேன பஞ்சலோகியாபி⁴ஞ்ஞாஸங்கா²தாஹி ச²ஹி அபி⁴ஞ்ஞாஹி. ஸப்³ப³த்தா²தி ஸப்³பே³ஸு தீஸு காலேஸு, பஞ்சஸுபி ஞெய்யத⁴ம்மேஸு. ஸமந்தசக்கு²னாதி அனாவரணஸப்³ப³ஞ்ஞுதஞ்ஞாணஸங்கா²தேன ஸமந்தசக்கு²னா. பஞ்ஞாயாதி ஸப்³ப³ஞ்ஞுதபஞ்ஞாய. திரோகுட்டாதீ³தி ஆதி³ஸத்³தே³ன திரோபப்³ப³தாத³யோ ஸங்க³ண்ஹாதி. மங்ஸசக்கு²னாதி பஸாத³சக்கு²னா. படிவேத⁴பஞ்ஞாயாதி மக்³க³பஞ்ஞாய. தே³ஸனாபஞ்ஞாயாதி ஸப்³ப³ஞ்ஞுதபஞ்ஞாய. ஸப்³ப³ஞ்ஞுதபஞ்ஞாயேவ ஹி அத்த²தோ தே³ஸனாபஞ்ஞா நாம. தேன வுத்தங் ‘‘தஸ்ஸா பஞ்ஞாய தேஜஸா. அபி⁴த⁴ம்மகதா²மக்³க³ங், தே³வானங் ஸம்பவத்தயீதி (த⁴॰ ஸ॰ அட்ட²॰ க³ந்தா²ரம்ப⁴கதா² 5). இமேஹி பதே³ஹி அவத்தா²வஸேன விஸுங் விஸுங் த்³வின்னங் பதா³னங் கரணஸம்ப⁴வங் த³ஸ்ஸேதி. அரஹதாதி அரீனங் அரானஞ்ச ஹதத்தா, பச்சயாதீ³னஞ்ச அரஹத்தா அரஹதா. ஸம்மாஸம்பு³த்³தே⁴னாதி ஸம்மா ஸாமஞ்ச ஸப்³ப³த⁴ம்மானங் பு³த்³த⁴த்தா ஸம்மாஸம்பு³த்³தே⁴ன, தேன ப⁴க³வதாதி ஸம்ப³ந்தோ⁴. கேனாப⁴தந்தி தங் பட²மங் பாராஜிகங் கேன ஆப⁴தங், இதி ஸங்கே²பத்தோ²தி யோஜனா.

Evaṃ kammadassanena yojanānayaṃ dassetvā idāni karaṇadassanena aparampi yojanānayaṃ dassento āha ‘‘apicā’’tiādi. ‘‘Pubbenivāsādīhī’’tiādisaddena dibbacakkhussa visuṃ gahetabbattā iddhividhadibbasotaparacittavijānanāni gahetabbāni. Imehi padehi ‘‘jānatā, passatā’’ti dvinnaṃ padānaṃ pañcannaṃ lokiyaabhiññānameva karaṇabhāvaṃ dasseti. Tīhi vijjāhīti pubbenivāsadibbacakkhuāsavakkhayañāṇasaṅkhātāhi tīhi vijjāhi. Chahi vā pana abhiññāhīti saha āsavakkhayañāṇena pañcalokiyābhiññāsaṅkhātāhi chahi abhiññāhi. Sabbatthāti sabbesu tīsu kālesu, pañcasupi ñeyyadhammesu. Samantacakkhunāti anāvaraṇasabbaññutaññāṇasaṅkhātena samantacakkhunā. Paññāyāti sabbaññutapaññāya. Tirokuṭṭādīti ādisaddena tiropabbatādayo saṅgaṇhāti. Maṃsacakkhunāti pasādacakkhunā. Paṭivedhapaññāyāti maggapaññāya. Desanāpaññāyāti sabbaññutapaññāya. Sabbaññutapaññāyeva hi atthato desanāpaññā nāma. Tena vuttaṃ ‘‘tassā paññāya tejasā. Abhidhammakathāmaggaṃ, devānaṃ sampavattayīti (dha. sa. aṭṭha. ganthārambhakathā 5). Imehi padehi avatthāvasena visuṃ visuṃ dvinnaṃ padānaṃ karaṇasambhavaṃ dasseti. Arahatāti arīnaṃ arānañca hatattā, paccayādīnañca arahattā arahatā. Sammāsambuddhenāti sammā sāmañca sabbadhammānaṃ buddhattā sammāsambuddhena, tena bhagavatāti sambandho. Kenābhatanti taṃ paṭhamaṃ pārājikaṃ kena ābhataṃ, iti saṅkhepatthoti yojanā.

2. புச்சா²விஸஜ்ஜனே பன ஏவமத்தோ² வேதி³தப்³போ³தி யோஜனா. யங் தேன…பே॰… பாராஜிகந்தி இத³ங் பத³ங் பச்சுத்³த⁴ரணமத்தமேவாதி ஸம்ப³ந்தோ⁴. பதிஉத்³த⁴ரணமத்தமேவ, ந அத்த²த³ஸ்ஸனந்தி அத்தோ². எத்தா²தி ஏதேஸு பதே³ஸு. ஏகா பஞ்ஞத்தீதி ஏகா பட²மபஞ்ஞத்தி. அனுபஞ்ஞத்தியோதி பச்சா² ட²பிதா பஞ்ஞத்தியோ.

2. Pucchāvisajjane pana evamattho veditabboti yojanā. Yaṃ tena…pe… pārājikanti idaṃ padaṃ paccuddharaṇamattamevāti sambandho. Patiuddharaṇamattameva, na atthadassananti attho. Etthāti etesu padesu. Ekā paññattīti ekā paṭhamapaññatti. Anupaññattiyoti pacchā ṭhapitā paññattiyo.

எத்தாவதாதி எத்தகேன ‘‘ஏகா பஞ்ஞத்தி, த்³வே அனுபஞ்ஞத்தியோ’’தி வசனமத்தேன விஸ்ஸஜ்ஜிதா ஹொந்தீதி ஸம்ப³ந்தோ⁴. ததியங் புச்ச²ந்தி ஸம்ப³ந்தோ⁴. கஸ்மா அனுப்பன்னபஞ்ஞத்தி தஸ்மிங் நத்தீ²தி ஆஹ ‘‘அயங் ஹீ’’திஆதி³. தத்த² ஹி யஸ்மா அஞ்ஞத்ர நத்தி², தஸ்மா நத்தீ²தி யோஜனா. ‘‘அனுப்பன்னே தோ³ஸே பஞ்ஞத்தா’’தி இமினா அனுப்பன்னே தோ³ஸே பஞ்ஞபேதப்³பா³தி அனுப்பன்னபஞ்ஞத்தீதி வசனத்த²ங் த³ஸ்ஸேதி. ஸாதி அனுப்பன்னபஞ்ஞத்தி. தஸ்மாதி யஸ்மா அஞ்ஞத்ர நத்தி², தஸ்மா. ஸப்³ப³த்த²பஞ்ஞத்தீதி எத்த² ஸப்³ப³ஸ்மிங் பதே³ஸே பஞ்ஞத்தி ஸப்³ப³த்த²பஞ்ஞத்தீதி அலுத்தஸமாஸங் த³ஸ்ஸெந்தோ ஆஹ ‘‘மஜ்ஜி²மதே³ஸே சேவா’’திஆதி³. ‘‘மஜ்ஜி²மதே³ஸே சேவ பச்சந்திமஜனபதே³ஸு சா’’தி இமினா ‘‘ஸப்³ப³த்தா²’’தி பத³ஸ்ஸ ஸரூபங் த³ஸ்ஸேதி. பதே³ஸபஞ்ஞத்திங் அபனெத்வா ஸப்³ப³த்த²பஞ்ஞத்திங் பாரிஸேஸனயேன த³ஸ்ஸெந்தோ ஆஹ ‘‘வினயத⁴ரபஞ்சமேனா’’திஆதி³ . தத்த² வினயத⁴ரபஞ்சமேனாதி அனுஸ்ஸாவனாசரியபஞ்சமேன. எத்தே²வாதி மஜ்ஜி²மதே³ஸேயேவ. ஏதேஹீதி சதூஹி ஸிக்கா²பதே³ஹி. ஸேஸானீதி சதூஹி ஸிக்கா²பதே³ஹி ஸேஸானி.

Ettāvatāti ettakena ‘‘ekā paññatti, dve anupaññattiyo’’ti vacanamattena vissajjitā hontīti sambandho. Tatiyaṃ pucchanti sambandho. Kasmā anuppannapaññatti tasmiṃ natthīti āha ‘‘ayaṃ hī’’tiādi. Tattha hi yasmā aññatra natthi, tasmā natthīti yojanā. ‘‘Anuppanne dose paññattā’’ti iminā anuppanne dose paññapetabbāti anuppannapaññattīti vacanatthaṃ dasseti. Sāti anuppannapaññatti. Tasmāti yasmā aññatra natthi, tasmā. Sabbatthapaññattīti ettha sabbasmiṃ padese paññatti sabbatthapaññattīti aluttasamāsaṃ dassento āha ‘‘majjhimadese cevā’’tiādi. ‘‘Majjhimadese ceva paccantimajanapadesu cā’’ti iminā ‘‘sabbatthā’’ti padassa sarūpaṃ dasseti. Padesapaññattiṃ apanetvā sabbatthapaññattiṃ pārisesanayena dassento āha ‘‘vinayadharapañcamenā’’tiādi . Tattha vinayadharapañcamenāti anussāvanācariyapañcamena. Etthevāti majjhimadeseyeva. Etehīti catūhi sikkhāpadehi. Sesānīti catūhi sikkhāpadehi sesāni.

ஸாதா⁴ரணபஞ்ஞத்தீதி எத்த² ஸாதா⁴ரணா நாம பி⁴க்கு²பி⁴க்கு²னீனமேவாதி ஆஹ ‘‘பி⁴க்கூ²னஞ்சேவ பி⁴க்கு²னீனஞ்சா’’தி. இத³ங் பனாதி பட²மபாராஜிகங் பன, பஞ்ஞத்தந்தி ஸம்ப³ந்தோ⁴. வினீதகதா²மத்தமேவாதி வினீதவத்து²பகாஸகங் கதா²மத்தமேவ. தாஸந்தி பி⁴க்கு²னீனங். ப்³யஞ்ஜனமத்தமேவாதி ‘‘ஸாதா⁴ரணா’’தி ச ‘‘உப⁴தோ’’தி ச ப்³யஞ்ஜனமத்தமேவ. எத்தா²தி ஸாதா⁴ரணபஞ்ஞத்திஉப⁴தோபஞ்ஞத்திபதே³.

Sādhāraṇapaññattīti ettha sādhāraṇā nāma bhikkhubhikkhunīnamevāti āha ‘‘bhikkhūnañceva bhikkhunīnañcā’’ti. Idaṃ panāti paṭhamapārājikaṃ pana, paññattanti sambandho. Vinītakathāmattamevāti vinītavatthupakāsakaṃ kathāmattameva. Tāsanti bhikkhunīnaṃ. Byañjanamattamevāti ‘‘sādhāraṇā’’ti ca ‘‘ubhato’’ti ca byañjanamattameva. Etthāti sādhāraṇapaññattiubhatopaññattipade.

‘‘நிதா³னே அனுபவிட்ட²’’ந்தி இமினா ‘‘நிதா³னோக³த⁴’’ந்தி பத³ஸ்ஸ ஸத்தமீஸமாஸஞ்ச ஓக³த⁴ஸத்³த³ஸ்ஸ அனுபவிட்ட²த்த²ஞ்ச த³ஸ்ஸேதி. ஓகா³ள்ஹோ ஹுத்வா த⁴ரதி திட்ட²தீதி ஓக³த⁴ங். நனு நிதா³னோக³தே⁴ ஸதி ‘‘பட²மேன உத்³தே³ஸேனா’’தி வத்தப்³ப³ங், கஸ்மா ‘‘து³தியேன உத்³தே³ஸேனா’’தி வுத்தந்தி ஆஹ ‘‘நிதா³னோக³த⁴’’ந்தி. நிதா³னபரியாபன்னம்பி ஸமானந்தி நிதா³னபரியாபன்னங் ஸமானம்பீதி யோஜனா. பிஸத்³தோ³ க³ரஹத்தோ², பகே³வ து³தியே உத்³தே³ஸே பரியாபன்னேதி த³ஸ்ஸேதி. ‘‘ஸீலவிபத்திஆதீ³ன’’ந்தி வசனங் வித்தா²ரெந்தோ ஆஹ ‘‘பட²மா ஹீ’’திஆதி³.

‘‘Nidāne anupaviṭṭha’’nti iminā ‘‘nidānogadha’’nti padassa sattamīsamāsañca ogadhasaddassa anupaviṭṭhatthañca dasseti. Ogāḷho hutvā dharati tiṭṭhatīti ogadhaṃ. Nanu nidānogadhe sati ‘‘paṭhamena uddesenā’’ti vattabbaṃ, kasmā ‘‘dutiyena uddesenā’’ti vuttanti āha ‘‘nidānogadha’’nti. Nidānapariyāpannampi samānanti nidānapariyāpannaṃ samānampīti yojanā. Pisaddo garahattho, pageva dutiye uddese pariyāpanneti dasseti. ‘‘Sīlavipattiādīna’’nti vacanaṃ vitthārento āha ‘‘paṭhamā hī’’tiādi.

த்³வங்கி³கேனாதி காயசித்தஸங்கா²தேன த்³வங்கி³கேன. நனு ‘‘ஏகேன ஸமுட்டா²னேனா’’தி வுத்தத்தா ‘‘காயதோயேவா’’தி வத்தப்³ப³ங், அத² கஸ்மா ‘‘காயதோ ச சித்ததோ ச ஸமுட்டா²தீ’’தி வுத்தந்தி ஆஹ ‘‘எத்த² ஹீ’’திஆதி³. எத்தா²தி ‘‘ஏகேன ஸமுட்டா²னேனா’’தி வசனே. சித்தந்தி ஸேவனசித்தங். ஆபன்னோஸீதி த்வங் ஆபன்னோ அஸீதி யோஜனா. ஆம ஆபன்னொம்ஹீதி ஆம அஹங் ஆபன்னோ அம்ஹீதி யோஜனா. தாவதே³வாதி தஸ்மிங் படிஜானக்க²ணேயேவ. தங் புக்³க³லந்தி பாராஜிகமாபன்னங் தங் புக்³க³லங். தப்பச்சயாதி தஸ்ஸ பாராஜிகமாபன்னஸ்ஸ காரணா. ‘‘ந கதமேன ஸமதே²ன ஸம்மதீ’’தி யங் பன வசனங் வுத்தந்தி யோஜனா. தந்தி வசனங், வுத்தந்தி ஸம்ப³ந்தோ⁴.

Dvaṅgikenāti kāyacittasaṅkhātena dvaṅgikena. Nanu ‘‘ekena samuṭṭhānenā’’ti vuttattā ‘‘kāyatoyevā’’ti vattabbaṃ, atha kasmā ‘‘kāyato ca cittato ca samuṭṭhātī’’ti vuttanti āha ‘‘ettha hī’’tiādi. Etthāti ‘‘ekena samuṭṭhānenā’’ti vacane. Cittanti sevanacittaṃ. Āpannosīti tvaṃ āpanno asīti yojanā. Āma āpannomhīti āma ahaṃ āpanno amhīti yojanā. Tāvadevāti tasmiṃ paṭijānakkhaṇeyeva. Taṃ puggalanti pārājikamāpannaṃ taṃ puggalaṃ. Tappaccayāti tassa pārājikamāpannassa kāraṇā. ‘‘Na katamena samathena sammatī’’ti yaṃ pana vacanaṃ vuttanti yojanā. Tanti vacanaṃ, vuttanti sambandho.

வுத்தமாதிகா பஞ்ஞத்தீதி வுத்தமாதிகாஸங்கா²தா பஞ்ஞத்தி வினயோ நாமாதி யோஜனா. மாதிகா ஹி யஸ்மா பஞ்ஞபீயதி ஸங்கே²பேன ட²பீயதி, பகாரங் ஜானாபேதி வா, தஸ்மா பஞ்ஞத்தீதி வுச்சதி. ‘‘பத³பா⁴ஜனங் வுச்சதீ’’தி இமினா வித்தா²ரேன பா⁴ஜியதி ஏதாயாதி விப⁴த்தீதி த³ஸ்ஸேதி. வீதிக்கமோதி காயவாசாவீதிக்கமோ. ஸோ ஹி ந ஸங்வரதி காயவாசங் ந பித³ஹதீதி அஸங்வரோதி வுச்சதி. யேஸங் வத்ததீதி எத்த² வத்ததிகிரியாய கத்தாரங் த³ஸ்ஸெந்தோ ஆஹ ‘‘வினயபிடகஞ்ச அட்ட²கதா² சா’’தி. பகு³ணாதி வாசுக்³க³தா. தேதி தே புக்³க³லா, தா⁴ரெந்தீதி ஸம்ப³ந்தோ⁴. ஹீதி ஸச்சங், யஸ்மா வா. ஏதஸ்ஸாதி பட²மபாராஜிகஸ்ஸ. கேனாப⁴தந்தி எத்த² ப⁴ரதா⁴துயா தா⁴ரணபோஸனத்தே²ஸு (பாணினீ 108 தா⁴துபாடே²) தா⁴ரணத்த²ங் த³ஸ்ஸெந்தோ ஆஹ ‘‘கேன ஆனீத’’ந்தி . ‘‘பரம்பராய ஆனீத’’ந்தி இமினா பரம்பராப⁴தந்தி பத³ஸ்ஸ ததியாஸமாஸங் த³ஸ்ஸேதி. அத²வா ‘‘கேனாப⁴த’’ந்தி புச்சா²ய அனுரூபங் யகாரலோபவஸேன வாக்யந்தி த³ஸ்ஸேதி.

Vuttamātikā paññattīti vuttamātikāsaṅkhātā paññatti vinayo nāmāti yojanā. Mātikā hi yasmā paññapīyati saṅkhepena ṭhapīyati, pakāraṃ jānāpeti vā, tasmā paññattīti vuccati. ‘‘Padabhājanaṃ vuccatī’’ti iminā vitthārena bhājiyati etāyāti vibhattīti dasseti. Vītikkamoti kāyavācāvītikkamo. So hi na saṃvarati kāyavācaṃ na pidahatīti asaṃvaroti vuccati. Yesaṃ vattatīti ettha vattatikiriyāya kattāraṃ dassento āha ‘‘vinayapiṭakañca aṭṭhakathā cā’’ti. Paguṇāti vācuggatā. Teti te puggalā, dhārentīti sambandho. Hīti saccaṃ, yasmā vā. Etassāti paṭhamapārājikassa. Kenābhatanti ettha bharadhātuyā dhāraṇaposanatthesu (pāṇinī 108 dhātupāṭhe) dhāraṇatthaṃ dassento āha ‘‘kena ānīta’’nti . ‘‘Paramparāya ānīta’’nti iminā paramparābhatanti padassa tatiyāsamāsaṃ dasseti. Athavā ‘‘kenābhata’’nti pucchāya anurūpaṃ yakāralopavasena vākyanti dasseti.

3. உபாலி தா³ஸகோ சேவாதிஆதி³கா கா³தா²யோ கிமத்த²ங் கேஹி ட²பிதாதி ஆஹ ‘‘இதா³னீ’’திஆதி³. தந்தி பரங் பரங். தத்தா²தி தாஸு கா³தா²ஸு. யந்தி வசனங். இமினா நயேனாதி பட²மபாராஜிகஸ்ஸ புச்சா²விஸஜ்ஜனே வுத்தேன இமினா நயேன.

3.Upāli dāsako cevātiādikā gāthāyo kimatthaṃ kehi ṭhapitāti āha ‘‘idānī’’tiādi. Tanti paraṃ paraṃ. Tatthāti tāsu gāthāsu. Yanti vacanaṃ. Iminā nayenāti paṭhamapārājikassa pucchāvisajjane vuttena iminā nayena.

இதி மஹாவிப⁴ங்கே³ பஞ்ஞத்திவாரவண்ணனாய யோஜனா ஸமத்தா.

Iti mahāvibhaṅge paññattivāravaṇṇanāya yojanā samattā.

கதாபத்திவாராதி³வண்ணனா

Katāpattivārādivaṇṇanā

157. இதோதி பஞ்ஞத்திவாரதோ, பரங் வுத்தா ஸத்த வாரா உத்தானத்தா² ஏவாதி யோஜனா. கதாபத்திவாரோதி ‘‘கதாபத்தீ’’தி பதே³ன லக்கி²தோ வாரோ. ஏஸேவ நயோ ஸேஸேஸுபி. தத³னந்தரோதி தேஸங் ஸத்தன்னங் வாரானங் அனந்தரே வுத்தோ. ஸமுச்சயவாரோதி ஸங் ஏகதோ ஆபத்திவிபத்திஆத³யோ உசியந்தி ஸம்பிண்டி³யந்தி எத்தா²தி ஸமுச்சயோ, ஸோயேவ வாரோ ஸமுச்சயவாரோ.

157.Itoti paññattivārato, paraṃ vuttā satta vārā uttānatthā evāti yojanā. Katāpattivāroti ‘‘katāpattī’’ti padena lakkhito vāro. Eseva nayo sesesupi. Tadanantaroti tesaṃ sattannaṃ vārānaṃ anantare vutto. Samuccayavāroti saṃ ekato āpattivipattiādayo uciyanti sampiṇḍiyanti etthāti samuccayo, soyeva vāro samuccayavāro.

188. ததோதி தேஹி அட்ட²ஹி வாரேஹி, பரங் வுத்தாதி ஸம்ப³ந்தோ⁴. பச்சயவஸேன வுத்தோ ஏகோ பஞ்ஞத்திவாரோதி யோஜனா. பச்சயவஸேனாதி பச்சயஸத்³த³ஸ்ஸ வஸேன. தஸ்ஸாதி பச்சயஸ்ஸ. தேபீதி அட்ட² வாராபி. இதீதிஆதி³ நிக³மனங். ததோதி மஹாவிப⁴ங்க³தோ, பரங் ஆக³தாதி ஸம்ப³ந்தோ⁴. ஏவங் இமே த்³வத்திங்ஸ வாராதி யோஜனா. ஹீதி ஸச்சங், யஸ்மா வா. எத்தா²தி த்³வத்திங்ஸவாரேஸு.

188.Tatoti tehi aṭṭhahi vārehi, paraṃ vuttāti sambandho. Paccayavasena vutto eko paññattivāroti yojanā. Paccayavasenāti paccayasaddassa vasena. Tassāti paccayassa. Tepīti aṭṭha vārāpi. Itītiādi nigamanaṃ. Tatoti mahāvibhaṅgato, paraṃ āgatāti sambandho. Evaṃ ime dvattiṃsa vārāti yojanā. Hīti saccaṃ, yasmā vā. Etthāti dvattiṃsavāresu.

Next: ஸமுட்டா²னஸீஸவண்ணனா • Samuṭṭhānasīsavaṇṇanā

Related texts:

திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
1. பாராஜிககண்ட³ங் • 1. Pārājikakaṇḍaṃ
1. பாராஜிககண்ட³ங் • 1. Pārājikakaṇḍaṃ
1. பாராஜிககண்ட³ங் • 1. Pārājikakaṇḍaṃ

அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā
பஞ்ஞத்திவாரவண்ணனா • Paññattivāravaṇṇanā
கதாபத்திவாராதி³வண்ணனா • Katāpattivārādivaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்ஞத்திவாரவண்ணனா • Paññattivāravaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்ஞத்திவாரவண்ணனா • Paññattivāravaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்ஞத்திவாரவண்ணனா • Paññattivāravaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact